2 Sahˬpaˬ 20 - Akha

Sahˬ paˬ Heˬsaˬgiˇ jawˇ saˇ maˬ doˆ-eu

¹ Aˇ nah aˇ yamˬ kʼoeˇ yamˬ laꞈ kʼoeˇ, sahˬ paˬ Heˬsaˬgiˇ shiˇ taw tehˬ ni naˇ laˇ-euˬ meh. Aˬmoˆ-euˬ aˬ li pyeuꞈ-eu Miˬyehˇ gʼaˇ duˬ ngehˬ dah-eu Iˇsaˬyaˇ gʼaˬ aˬ yawꞈ jawˇ gaˇ iˇ-awˇ, “Sahˬpaˬ Miˬyehˇ nawˬ-ahˇ heu loꞈ-ehˇ ehˇ-eu meh. Yawˬ jeˬ na luꞈ lehˬ hmˬ dah taˬ jiˇ-awˬ. Aˬ jeˬ miˇ neh ehˇ naˇ, nawˇ naˇ-eu maˬ taˬ leˇ nya-ehˇ ya shiˇ tehꞈ-a lehˇ ehˇ-eu meh” lehˇ ehˇ nehˬ-euˬ meh.

² Kʼoeˇ ngeh, Heˬsaˬgiˇ kaˇ pyawˇ-ahˇ myaˆ pyawˬ ciˬ daˬ-awˇ, heu loꞈ-ehˇ guiˬ lahˬ shaˇ-euˬ meh.

³ “Sahˬpaˬ Miˬyehˇ-oˇ, ngaˇ nawˬ-ahˇ saˇ jaˇ ziꞈ-eu laꞈ kʼoeˇ yaw dehꞈ dehꞈ-awˇ, nawˬ neh ngaˬ-ahˇ bi mˇ mawꞈ-eu jeˬ-ahˇ leh jeh-awˇ mˇ-euˬ gaˇ taˬ ngehˇ nehˬ laꞈ” lehˇ shaˇ-euˬ meh. Kʼoeˇ naˇ, aˬ yawꞈ ngoeˇ dui dui-euˬ meh.

⁴ Heˬsaˬgiˇ jawˇ gaˇ neh gʼoꞈ-iˇ-eu lehˇ, Iˇsaˬyaˇ doˆ-iˇ-euˬ meh. Ehˇ kʼawꞈ, sahˬ paˬ hawˇ nymˇ-euˬ nymˇ ma lawˆ maˬ iˇ doˆ dzeuˇ mi naˆ-ehˇ, Sahˬpaˬ Miˬyehˇ aˬ yawꞈ-ahˇ heu loꞈ-ehˇ ehˇ nehˬ-euˬ meh.

⁵ “Sahˬpaˬ Miˬyehˇ-euˬ tsawˇ haˬ deuˬ-ahˇ uˆ lahˇ-eu gʼaˬ pyeuꞈ-eu Heˬsaˬgiˇ-ahˇ, heu loꞈ-ehˇ ehˇ nehˬ-awˬ. ‘Nawˬ poeˬ Daˬbiˇ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ, nawˬ-euˬ shaˇ dawˬ ya gaˬ-awˇ, nawˇ myaˆ biˇ yoeˇ le gaˇ ya mawˇ-euˬ ma. Nawˬ-ahˇ ngaˇ laˆ taˬ nehˬ-awˇ, smˬ nah laꞈ kʼoeˇ Uˬ duˬ tahˬ nymˇ nymˇ ma-ahˇ nawˇ ya le tehꞈ-a.

⁶ Nawˬ-ahˇ ngaˇ tseˇ ngaˬ kʼoꞈ paˇ bi dehꞈ ma. Nawˬ-ahˇ maˬ ehˇ, Yeˬluˇsaˬlehˬ meuˬ-ahˇ maˬ ehˇ, Aˬshuˇliˆ sahˬ paˬ-euˬ aˬ laꞈ laꞈ kʼoeˇ ngaˇ ka kʼoꞈ nehˬ ma. Ngaˬ-euˬ tsawˇ myahˇ baˬ da neh maˬ ehˇ, ngaˬ-euˬ zaˬ kʼaˆ Daˬbiˇ-ahˇ ngaˬ neh dzaˬ taˬ-euˬ saˇ jaˇ baˬ da neh maˬ ehˇ, meuˬ heu meuˬ-ahˇ ngaˇ haw piˇ nehˬ ma’ lehˇ ehˇ nehˬ-iˇ-awˬ.”

⁷ Sahˬ paˬ-ahˇ bo saˆ luꞈ-eu deuˬ-ahˇ Iˇsaˬyaˇ ehˇ nehˬ-eu, “Siˬ guˬ aˇ siˬ aˇ yaˆ yuˇ-awˇ, sahˬ paˬ-euˬ maˇ naˇ-ahˇ kaꞈ uꞈ nehˬ naˇ taˬ leˇ tehꞈ-a.”

⁸ Kʼoeˇ ngeh, Iˇsaˬyaˇ-ahˇ Heˬsaˬgiˇ ehˇ-eu, “Sahˬpaˬ Miˬyehˇ ngaˬ-ahˇ bi taˬ leˇ-awˇ, smˬ nah keuˆ laˇ ngeh Uˬ duˬ tahˬ nymˇ nymˇ ma-ahˇ ngaˇ ya le tehꞈ-a lehˇ ehˇ-eu gaˇ kawˆ heu, aˬ diˇ aˬ maˇ pyeuꞈ laˇ meh lehˇ nawˇ ngaˬ-ahˇ saˇ kiˇ aˬ joˆ-ehˇ mehˬ nehˬ laꞈ nmˇ.”

⁹ Iˇsaˬyaˇ ehˇ-eu, “Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ byah laˇ-eu gaˇ kawˆ, aˬ yawꞈ nawˬ-ahˇ saˇ kiˇ mehˬ nehˬ laꞈ tehꞈ-a. Haw sheˇ. Dawˬ dzm dawˬ tehꞈ-ahˇ jaˆ-eu naˇ shmˇ kʼoeˇ, mehˬ hu paw shiꞈ tehꞈ bi iˇ-eu loˇ, maˬ ngeuˇ naˇ, naˇ kʼah paw shiꞈ tehꞈ bi gʼoꞈ kʼoꞈ laˇ-eu loˇ lehˇ, nawˇ ehˇ sheˇ.”

¹⁰ Heˬsaˬgiˇ ehˇ-eu, “Naˇ shmˇ-ahˇ mehˬ hu paw shiꞈ tehꞈ bi iˇ-euˬ-aˬ, yaw awˬ tehꞈ-a. Naˇ kʼah paw shiꞈ tehꞈ bi gʼoꞈ laˇ-awˬ.”

¹¹ Iˇsaˬyaˇ Sahˬpaˬ Miˬyehˇ-ahˇ guiˬ lahˬ shaˇ ngeh, sahˬ paˬ Aˬkaˆ neh tsoˆ taˬ-euˬ dawˬ dzm kʼoeˇ taˆ, naˇ shmˇ kʼoeˇ naˇ kʼah paw shiꞈ tehꞈ jiˆ gʼoꞈ laˇ ni Sahˬpaˬ Miˬyehˇ jahˇ nehˬ-euˬ meh.

Baˬbuˇloˬ sahˬ paˬ tsawˇ haˬ pyehˬ leꞈ-euˬ

¹² Aˇ nah aˇ yamˬ kʼoeˇ yamˬ laꞈ kʼoeˇ, Baˬlaˬdaˬ-euˬ aˬ li Baˬbuˇloˬ sahˬ paˬ Meˬlawˇdaˆbaˬlaˬdaˬ-aˬ, sahˬ paˬ Heˬsaˬgiˇ jawˇ saˇ maˬ doˆ-eu gaˇ kawˆ ya gaˬ-awˇ, sahˬ boꞈ tiˬ taꞈ boꞈ ahˇ leꞈ-awˇ, laꞈ sawˬ bi sha ha le-euˬ meh.

¹³ Baˬbuˇloˬ sahˬ paˬ neh pyehˬ gʼeh leꞈ-euˬ tsawˇ haˬ kʼoeˇ deuˬ-ahˇ Heˬsaˬgiˇ ha geuꞈ-awˇ aˬ yawꞈ-euˬ pyuˇ shuiˇ myawˬ gahˬ deuˬ mehˬ nehˬ-euˬ meh. Aˬ yawꞈ-euˬ pyuˇ hawˇ-eu shuiˇ maˬ ehˇ, aˇ poeˬ kʼaˆ-eu tsiˇ yaw saw deuˬ maˬ ehˇ, aˬ yawꞈ-euˬ guiˇ deuˆ-eu keu ka dawˬ tawˆ luꞈ maˬ ehˇ, aˬ yawꞈ maꞈ-ahˇ mehˬ nehˬ-euˬ meh. Aˬ yawꞈ-euˬ myawˬ gahˬ jeˬ hmˬ duˬ hawˇ-eu aˬ yawꞈ-euˬ miˇ kʼahˬ laꞈ kʼoeˇ kʼaˇ jaˆ-eu jeˬ dawˬ tawˆ luꞈ, aˬ yawꞈ maꞈ-ahˇ maˬ mehˬ nehˬ jiˇ-euˬ tiˬ jeˬ-iˬ maˬ jaˆ-a.

¹⁴ Kʼoeˇ naˇ, Miˬyehˇ gʼaˇ duˬ ngehˬ dah-eu Iˇsaˬyaˇ-aˬ, sahˬ paˬ jawˇ gaˇ le-awˇ, “Tsawˇ haˬ heu deuˬ aˬ geu gaˇ neh oe-awˇ, nawˬ-ahˇ aˬ jeˬ ehˇ le taˬ” lehˇ naˇ haˬ ngeh, “Aˬ yawꞈ maꞈ-aˬ, kaˬ dui dui-eu miˇ kʼahˬ tiˬ kʼahˬ pyeuꞈ-eu Baˬbuˇloˬ miˇ kʼahˬ-ahˇ neh oe-euˬ meh” lehˇ, Heˬsaˬgiˇ ehˇ kʼoꞈ nehˬ-euˬ meh.

¹⁵ “Nawˬ-euˬ nymˇ laꞈ kʼoeˇ aˬ yawꞈ maꞈ aˬ jeˬ haw mawˇ taˬ” lehˇ Iˇsaˬyaˇ naˇ haˬ ngeh, “Aˬ yawꞈ maꞈ yawˬ jeˬ na luꞈ haw mawˇ jiˇ-euˬ meh. Ngaˬ-euˬ myawˬ jeˬ hmˬ duˬ-ahˇ kʼaˇ jaˆ-eu jeˬ, aˬ yawꞈ maꞈ-ahˇ maˬ mehˬ nehˬ-euˬ tiˬ jeˬ-iˬ maˬ paˇ jaˆ ma” lehˇ, Heˬsaˬgiˇ ehˇ-eu meh.

¹⁶ Kʼoeˇ naˇ, Heˬsaˬgiˇ-ahˇ Iˇsaˬyaˇ heu loꞈ-ehˇ ehˇ nehˬ-euˬ meh. “Sahˬpaˬ Miˬyehˇ heu loꞈ-ehˇ ehˇ-eu meh.

¹⁷ ‘Nawˬ-euˬ nymˇ laꞈ kʼoeˇ kʼaˇ jaˆ-eu jeˬ hawˇ-eu, nawˬ poeˬ nawˬ bawˇ deuˬ neh kʼaˇ jeˬ hmˬ daˆ laꞈ-euˬ jeˬ dawˬ tawˆ luꞈ, tiˬ jeˬ-iˬ maˬ paˇ dzeˇ yaꞈ ni Baˬbuˇloˬ miˇ kʼahˬ-ahˇ bi yuˇ geuꞈ gʼeh jiˇ-eu aˇ nah keuˆ le tehꞈ-a.

¹⁸ Nawˬ-euˬ aˬ li tiˬ deuˬ na-ahˇ kʼawꞈ nyehꞈ gʼeh-awˇ, shawꞈ-awˇ, Baˬbuˇloˬ sahˬ paˬ-euˬ nymˇ-ahˇ gaˇ mˇ-eu tsawˇ haˬ bi geuꞈ tehꞈ-a’ lehˇ ehˇ-eu meh.”

¹⁹ Sahˬ paˬ Heˬsaˬgiˇ-aˬ, aˬ yawꞈ-euˬ ziˇ laꞈ kʼoeˇ kʼoeˇ loꞈ-ehˇ maˬ pyeuꞈ laˇ-ehˇ, saˇ lehˆ ni ya dehꞈ ya jawˇ tehꞈ-a lehˇ gʼoˆ shaw-awˇ, “Sahˬpaˬ Miˬyehˇ neh nawˬ-ahˇ ngaˇ jawˇ gaˇ bi ehˇ le-euˬ dawˬ teu dawˬ muiˬ miˇ-a” lehˇ, Iˇsaˬyaˇ-ahˇ ehˇ kʼoꞈ nehˬ-euˬ meh.

Heˬsaˬgiˇ ziˇ jiˇ-euˬ

²⁰ Sahˬ paˬ Heˬsaˬgiˇ neh mˇ-euˬ huiˬ-eu gaˇ deuˬ maˬ ehˇ, iˇ cuꞈ lah ciˬ-awˇ, meuˬ-ahˇ iˇ pahˬ pahˬ ahˇ-euˬ gaˇ kawˆ maˬ ehˇ, aˬ yawꞈ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²¹ Heˬsaˬgiˇ ziˇ jiˇ-awˇ, aˬ yawꞈ-euˬ aˬ li Maˬnaˇseˬ gʼaˬ aˬ yawꞈ-euˬ dah zaˇ sahˬ paˬ geuꞈ-euˬ meh.