2 Sahˬpaˬ 19 - Akha

Iˇsaˬyaˇ jawˇ gaˇ Heˬsaˬgiˇ tsawˇ haˬ pyehˬ gʼeh-euˬ

¹ Gaˇ kawˆ kʼoeˇ sahˬ paˬ Heˬsaˬgiˇ ya gaˬ ngeh, noeˬ shaˬ-eu laꞈ kʼoeˇ aˬ yawꞈ dm luꞈ-eu mehˬ tsoeˬ cehˬ pyaˬ-awˇ, guˬ daˇ pehˇ zeuˇ mehˬ tsoeˬ dm paˇ-awˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma-ahˇ le-euˬ meh.

² Kʼoeˇ naˇ, sahˬ paˬ-euˬ hawˇ nymˇ-ahˇ haw-eu pyaˆ-eu yaw huiˬ yaw mahˇ pyeuꞈ-eu Eˇliˇkmˬ, saˇ naˇ gaˇ paw haw-eu yaw huiˬ yaw mahˇ pyeuꞈ-eu Sheˬbaˬnaˬ hawˇ-eu, piˇ ma deuˬ laꞈ kʼoeˇ aˬ yuiꞈ geuꞈ luꞈ-eu deuˬ-ahˇ, Aˬmoˆ-euˬ aˬ li pyeuꞈ-eu Miˬyehˇ gʼaˇ duˬ ngehˬ dah-eu Iˇsaˬyaˇ jawˇ gaˇ aˬ yawꞈ pyehˬ gʼeh-euˬ meh. Aˬ yawꞈ maꞈ kʼawꞈ, guˬ daˇ pehˇ zeuˇ mehˬ tsoeˬ dm luꞈ-eu meh.

³ Aˬ yawꞈ maꞈ-ahˇ, Iˇsaˬyaˇ jawˇ gaˇ heu loꞈ-ehˇ bi ehˇ gaˬ-iˇ-euˬ meh. “Iˬ nah-aˬ, ya noeˬ shaˬ ya noeˬ zahˬ-euˬ aˇ nah pyeuꞈ-eu meh. Aˬ dui -ahˇ aˬ cawˬ kʼehˬ nehˬ kʼaˆ nehˬ laꞈ-awˇ, shaˬ zahˬ naꞈ dui dui-eu aˇ nah keuˆ laˇ taˬ-euˬ meh. Aˬ nyiˇ ciˬ deˇ-euˬ kʼawꞈ, gʼaˬ maˬ ahˇ-eu miˇ neh maˬ ciˬ doˆ leꞈ nya-eu zaˬ baw aˬ ma tiˬ gʼaˬ-ahˇ aˬ dui duˇ miˇ-a.

⁴ Dehꞈ luꞈ-eu Miˬyehˇ-ahˇ bi naˬ gʼa-eu gʼaˇ duˬ, Aˬshuˇliˆ sahˬ paˬ neh aˬ yawꞈ-euˬ yaw huiˬ yaw mahˇ deuˬ-ahˇ pyehˬ gʼeh leꞈ-euˬ meh. Kʼoeˇ loꞈ-ehˇ naˬ gʼa-eu dawˬ-ahˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ ya gaˬ-awˇ, naˬ gʼa le-euˬ tsawˇ haˬ kʼoeˇ deuˬ-ahˇ kʼehˬ nehˬ kʼaˆ nehˬ luꞈ-uˇ. Kʼoeˇ miˇ neh, maˬ shiˇ dzeuˇ-ehˇ dehꞈ luꞈ-eu tsawˇ haˬ deuˬ gʼaˇ duˬ, Miˬyehˇ-ahˇ guiˬ lahˬ shaˇ-awˬ.”

⁵ Sahˬ paˬ Heˬsaˬgiˇ-euˬ dawˬ-ahˇ Iˇsaˬyaˇ ya gaˬ ngeh,

⁶ heu loꞈ-ehˇ ehˇ kʼoꞈ nehˬ-euˬ meh. “Sahˬpaˬ Miˬyehˇ naw maꞈ-ahˇ maˬ ka kʼoꞈ nehˬ nya-aˇ lehˇ, Aˬshuˇliˆ tsawˇ haˬ deuˬ lmˬ gaˇ naw maꞈ taˬ guˆ lehˇ, Sahˬpaˬ Miˬyehˇ ehˇ-eu meh.

⁷ Aˬ cawˬ gʼawˬ mya jeˬ ja guˆ nehˬ gaˇ Aˬshuˇliˆ sahˬ paˬ ya gaˬ-awˇ, aˬ yawꞈ-euˬ miˇ kʼahˬ-ahˇ ya gʼoꞈ leˇ ngeh keuˆ ni Sahˬpaˬ Miˬyehˇ jahˇ-eu uˬ taꞈ, aˬ yawꞈ-euˬ miˇ kʼahˬ laꞈ kʼoeˇ mi cehˇ laꞈ-ahˇ aˬ yawꞈ ya shiˇ ni jahˇ nehˬ tehꞈ-a.”

Aˬshuˇliˆ tsawˇ haˬ deuˬ Yeˬluˇsaˬlehˬ meuˬ-ahˇ guiˇ deuˆ-eu lehˇ paˇ gʼeh-eu

⁸ Aˬshuˇliˆ sahˬ paˬ-aˬ, Laˬkiˇshaˆ meuˬ-ahˇ neh doˆ-iˇ-awˇ, Liˇbaˬnahˬ meuˬ-ahˇ guiˇ deuˆ luꞈ-eu gaˇ kawˆ, Aˬshuˇliˆ tsawˇ haˬ yaw huiˬ yaw mahˇ kʼoeˇ gʼaˬ ya gaˬ ngeh, kʼoeˇ gaˇ iˇ-awˇ sahˬ paˬ-ahˇ mehˬ bawˬ mˇ-iˇ-euˬ meh.

⁹ Suˬdaˬ sahˬ paˬ Tiˇlaˬkaˬ gʼaˬ, Iˇjiˇtuˆ guiˇ maꞈ maꞈ ma sheuˬ-awˇ, aˬ yawꞈ maꞈ-ahˇ guiˇ deuˆ-eu gʼaˇ duˬ laˇ luꞈ-eu gaˇ kawˆ, Aˬshuˇliˆ tsawˇ haˬ deuˬ ya gaˬ-euˬ meh. Gaˇ kawˆ kʼoeˇ Aˬshuˇliˆ sahˬ paˬ ya gaˬ ngeh, sahˬ paˬ Heˬsaˬgiˇ-ahˇ heu loꞈ-ehˇ sahˬ boꞈ boꞈ ahˇ nehˬ-euˬ meh.

¹⁰ “Yeˬluˇsaˬlehˬ meuˬ ngaˬ-euˬ laꞈ-ahˇ maˬ ahˇ laˇ-aˇ lehˇ, nawˇ jah luꞈ-eu nawˬ-euˬ Miˬyehˇ mehˇ shuiˇ shuiˇ gaˇ taˬ naˇ haˬ.

¹¹ Yawˬ ha neh laˆ cawˆ nehˬ ma lehˇ noeˬ tsehˆ taˬ-euˬ miˇ kʼahˬ tiˬ kʼahˬ-ahˇ, Aˬshuˇliˆ sahˬ paˬ aˬ joˆ-ehˇ jahˇ nehˬ-euˬ gaˇ kawˆ nawˇ ya gaˬ haw-euˬ meh.

¹² Goˇzaˬ meuˬ, Haˬlaˬ meuˬ, Yeˬzehˇ meuˬ heu deuˬ-ahˇ ngaˬ-euˬ aˬ poeˬ aˬ bawˇ deuˬ neh laˆ luˬ laˆ seˇ nehˬ-awˇ, Teˬlaˬsaˬ meuˬ-ahˇ jawˇ-eu Behˬteˬdeˬ tsawˇ haˬ deuˬ-ahˇ sehꞈ-euˬ kʼawꞈ, meuˬ kʼoeˇ deuˬ-euˬ miˬ yehˇ tiˬ gʼaˬ-iˬ aˬ yawꞈ-euˬ tsawˇ haˬ deuˬ-ahˇ maˬ ka kʼoꞈ nehˬ nya-aˬ.

¹³ Haˬmaˆ sahˬ paˬ, Aˬpaˆ sahˬ paˬ, Seˬpaˬbeˬ sahˬ paˬ hawˇ-eu, Iˇsaˬleˬlaˆ sahˬ paˬ kʼoeˇ deuˬ aˬ geu paw iˇ byoˆ iˇ laˆ jiˇ taˬ lehˇ shaˇ noeˬ haw sheˇ.”

¹⁴ Sahˬ boꞈ kʼoeˇ taꞈ-ahˇ, sahˬ paˬ Heˬsaˬgiˇ gui haw-euˬ meh. Kʼoeˇ naˇ, Uˬ duˬ tahˬ nymˇ nymˇ ma-ahˇ aˬ yawꞈ le-awˇ, Sahˬpaˬ Miˬyehˇ mehˬ shi sahˬ boꞈ kʼoeˇ taꞈ yuˇ taˬ-euˬ meh.

¹⁵ Kʼoeˇ naˇ, aˬ yawꞈ heu loꞈ-ehˇ guiˬ lahˬ shaˇ-euˬ meh. “Jeˬluˇbeˬ mawˇ kawˇ kʼoeˇ taˆ jaˆ-eu dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˇ tiˬ gʼaˬ tehꞈ-ehˇ Miˬyehˇ pyeuꞈ-awˇ, miˇ kʼahˬ dawˬ tawˆ luꞈ kʼoeˇ taˆ uˆ lahˇ luꞈ-eu meh. Mˬ hawˇ-eu miˇ, nawˬ neh beh-euˬ meh.

¹⁶ Sahˬpaˬ Miˬyehˇ-oˇ, nymˬ-mˇ nga maꞈ kʼoeˇ taˆ keuˆ le taˬ-euˬ jeˬ-ahˇ nawˇ tiˬ poˆ haw sheˇ. Dehꞈ luꞈ-eu Miˬyehˇ pyeuꞈ-eu nawˬ-ahˇ Saˬneˬkaˬliˇ naˬ gʼa gaˇ tiˬ poˆ naˇ haˬ sheˇ.

¹⁷ Sahˬpaˬ Miˬyehˇ-oˇ, Aˬshuˇliˆ sahˬ paˬ deuˬ miˇ kʼahˬ gʼawˬ mya kʼahˬ laˆ cawˆ-awˇ byehˇ dzeh yaꞈ-euˬ nga maꞈ dawˬ tawˆ luꞈ siˬ nya jiˇ ma.

¹⁸ Miˇ kʼahˬ kʼoeˇ deuˬ-euˬ miˬ yehˇ deuˬ-ahˇ kʼawꞈ, miˬ dzaˬ keuˬ dzeh-euˬ meh. Miˬyehˇ kʼoeˇ deuˬ-aˬ, Miˬyehˇ maˬ ngeuˇ-a. Tsawˇ haˬ zaˬ-euˬ aˬ laꞈ neh jahˇ-euˬ daˇ kawˬ hawˇ-eu kʼaˬ lo tahˬ pahˬ aˬ ma mawˇ kawˇ tehꞈ meh.

¹⁹ Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, miˇ tsaˬ kʼoeˇ taˆ kʼaˇ jaˆ-eu miˇ kʼahˬ dawˬ tawˆ luꞈ, Sahˬpaˬ Miˬyehˇ nawˇ tiˬ gʼaˬ tehꞈ-ehˇ aˬ diˇ aˬ maˇ Miˬyehˇ pyeuꞈ-eu gaˇ kawˆ ya siˬ duˬ ni, Aˬshuˇliˆ tsawˇ haˬ deuˬ-euˬ aˬ laꞈ laꞈ kʼoeˇ, nga maꞈ-ahˇ nymˬ-mˇ ka kʼoꞈ nehˬ laꞈ-awˬ.”

Iˇsaˬyaˇ neh Heˬsaˬgiˇ-ahˇ ehˇ nehˬ-euˬ dawˬ

²⁰ Kʼoeˇ naˇ, Aˬmoˆ-euˬ aˬ li Iˇsaˬyaˇ neh Heˬsaˬgiˇ-ahˇ heu loꞈ-ehˇ bi ehˇ gaˬ-iˇ-euˬ meh. “Aˬshuˇliˆ sahˬ paˬ Saˬneˬkaˬliˇ-ahˇ taꞈ leˇ-awˇ nawˬ neh guiˬ lahˬ shaˇ-euˬ shaˇ dawˬ-ahˇ, Sahˬpaˬ Miˬyehˇ ya gaˬ gʼaˬ-euˬ meh.

²¹ Sahˬpaˬ Miˬyehˇ heu loꞈ-ehˇ ehˇ-eu meh. ‘Saˬneˬkaˬliˇ-oˇ, Yeˬluˇsaˬlehˬ meuˬ nawˬ ahˇ uiˇ-awˇ naˬ gʼaˬ luꞈ meh.

²² Nawˇ yehˬ bawˬ sehˇ lu-ehˇ ehˇ niˇ gʼa-awˇ naˬ gʼa-eu teu, aˬ suˇ gʼaˬ-ahˇ naˬ gʼa-eu nga lehˇ nawˇ noeˬ-eu nya. Nawˇ-aˬ, Iˇsaˬleˬlaˆ-euˬ muiˬ-eu shawˇ-eu Miˬyehˇ pyeuꞈ-eu ngaˬ-ahˇ yaw zeu maˬ baw-eu jeˬ mˇ luꞈ-eu meh.

²³ Nawˬ-euˬ tsawˇ haˬ-ahˇ nawˇ pyehˬ gʼeh leꞈ-awˇ, nawˬ-euˬ mahˬ laˆ lawˬ deuˬ neh goˇ dui dui-eu Leˬbaˬnoˬ gawˬ jawˬ deuˬ-ahˇ deuˆ gʼaˬ-euˬ gaˇ kawˆ, ngaˬ-euˬ meh shi kʼahˬ sehˇ bi jehˆ le-euˬ meh. Kʼoeˇ gaˇ, goˇ dui dui-eu siˬ daˬ miˬ shuˬ aˇ bawˇ deuˬ hawˇ-eu, muiˬ dui dui-eu shuˬ liˇ aˇ bawˇ deuˬ nawˇ tuˇ dzeh-awˇ, zahˇ tsui ni gʼeh-eu aˇ bawˇ sahˬ kʼaˆ uˬ moˆ keuˆ ni le keuˆ-euˬ gaˇ kawˆ, nawˇ kʼahˬ sehˇ jehˆ luꞈ-eu meh.

²⁴ Boeˇ miˬ siˬ kʼaˬ deuˬ-euˬ miˇ kʼahˬ-ahˇ nawˇ lah duˬ duˬ-awˇ iˇ cuꞈ kʼawꞈ dawˇ-euˬ gaˇ kawˆ hawˇ-eu, nawˬ-euˬ yehˇ deuˬ neh Niˬlaˇ lawˇ baˬ iˇ cuꞈ nawˬ gui-euˬ gaˇ kawˆ, nawˇ kʼahˬ sehˇ jehˆ-eu meh.

²⁵ “Heu loꞈ-ehˇ bi pyeuꞈ laˇ-eu gʼaˇ duˬ, aˇ hu ba neh ngaˇ gaˇ kawˆ kawˆ taˬ-euˬ nawˇ maˬ gaˬ haw-aˬ loˇ. Nymˬ-mˇ ngaˇ kʼoeˇ loꞈ-ehˇ mˇ byah luꞈ-eu ma. Ziꞈ dui dui-eu meuˬ deuˬ meuˬ tsoeˬ tsoeˬ-iˇ gaˇ keuˆ ni laˆ cawˆ nehˬ nya-eu baoˬ, nawˬ-ahˇ ngaˇ biꞈ taˬ-euˬ ma.

²⁶ Meuˬ kʼoeˇ deuˬ-ahˇ jawˇ-eu tsawˇ haˬ deuˬ gʼaˬ maˬ ahˇ-a. Aˬ yawꞈ maꞈ guˆ dui dui-awˇ zahˬ leˇ taˬ-euˬ meh. Aˬ yawꞈ maꞈ-aˬ, nahˇ ma doˆ kʼehˬ paw neh baw gʼeh laꞈ-euˬ lahˇ dui dui-eu jaˬ lehˇ zaw leˇ-awˇ nyoeˬ-iˇ jiˇ-euˬ, deh ga-ahˇ dehꞈ-eu daˬ yawˬ hawˇ-eu nymˇ mˬ kʼoeˇ taˆ dehꞈ-eu jaˆ gaˆ-ahˇ duˇ-eu meh.

²⁷ Nawˇ kʼaˇ mˇ kʼaˇ shaˇ, kʼaˇ iˇ kʼaˇ laˇ-eu dawˬ tawˆ luꞈ ngaˇ siˬ nya jiˇ ma. Nawˇ ngaˬ-ahˇ muiˇ-eu gaˇ kawˆ kʼawꞈ, ngaˇ siˬ nya ma.

²⁸ Nawˇ ngaˬ-ahˇ muiˇ-awˇ kʼahˬ sehˇ jehˆ luꞈ-eu gaˇ kawˆ, aˬ cawˬ ngaˇ jawˇ gaˇ tsaꞈ keuˆ laˇ-euˬ meh. Nawˬ-euˬ naˇ mehˇ-ahˇ ngaˇ kuˆ seuˬ neh naˇ kʼaoˬ smˇ-awˇ, nawˬ-euˬ kʼaˬ meh ahˇ mehˬ tsahˬ tsahˬ-awˇ, nawˬ neh kʼaˇ oe-euˬ gaˇ ma law caw-ehˇ tsahˇ kʼoꞈ gʼeh ma’ lehˇ, Sahˬpaˬ Miˬyehˇ ehˇ-eu meh”

²⁹ Kʼoeˇ naˇ, sahˬ paˬ Heˬsaˬgiˇ-ahˇ Iˇsaˬyaˇ heu loꞈ-ehˇ ehˇ nehˬ-euˬ meh. “Aˬ joˆ-ehˇ pyeuꞈ laˇ-eu gaˇ kawˆ-ahˇ taꞈ leˇ-awˇ, bi siˬ bi mawˇ-eu jeˬ heu loꞈ-ehˇ jaˆ tehꞈ-a. Tsuiꞈ nui kʼoꞈ hawˇ-eu naꞈ yaꞈ kʼoꞈ laꞈ kʼoeˇ, aˬ yawˆ yawꞈ dehꞈ laˇ-euˬ cehˇ aˇ shehꞈ deuˬ tehꞈ-ehˇ nawˇ ya yehˬ dzaˬ tehꞈ-a. Ehˇ kʼawꞈ, na nui kʼoꞈ keuˆ laˇ ngeh, nawˇ cehˇ ka dzaˬ nya-awˇ aˬ gaꞈ yaˇ kmˇ kʼawꞈ mˇ dzaˬ nya tehꞈ-a.

³⁰ Yuˇdaˆ miˇ kʼahˬ laꞈ kʼoeˇ maˬ cawˆ-iˇ ni kʼaˇ dzeˇ yaꞈ-euˬ tsawˇ haˬ deuˬ-aˬ, miˇ tsaˬ-ahˇ duˬ ciˇ toeˬ naꞈ dui dui-awˇ aˇ siˬ sahˇ le-eu aˇ bawˇ loꞈ-ehˇ dehꞈ doˆ dzaˬ laˇ tehꞈ-a.

³¹ Yeˬluˇsaˬlehˬ meuˬ hawˇ-eu Ziˇoˬ gawˬ jawˬ kʼoeˇ taˆ, maˬ ya cawˆ-iˇ ni dzeuˇ-iˇ-euˬ tsawˇ haˬ jawˇ tehꞈ-a. Aˬ jeˬ miˇ neh ehˇ naˇ, kʼoeˇ loꞈ-ehˇ bi pyeuꞈ laˇ-eu gʼaˇ duˬ, Sahˬpaˬ Miˬyehˇ noeˬ tsehˆ-awˇ lehˬ hmˬ taˬ-euˬ meh.

³² “Aˬshuˇliˆ sahˬ paˬ gaˇ kawˆ Sahˬpaˬ Miˬyehˇ neh ehˇ taˬ-euˬ heu loꞈ-ehˇ jaˆ-eu meh. ‘Aˬ yawꞈ-aˬ, meuˬ heu meuˬ-ahˇ maˬ ya uˇ keuˆ laˇ-eu uˬ taꞈ, kaˆ myaˬ tiˬ myaˬ tehꞈ-ehˇ kʼawꞈ maˬ ya beuˆ ahˇ laꞈ-aˇ. Dehˬ daˬ duˬ tuˆ tehˬ luꞈ-eu yehˇ tiˬ gʼaˬ-iˬ meuˬ dawˬ peh maˬ ya nyiꞈ laˇ-ehˇ, meuˬ-ahˇ guiˇ deuˆ-eu gʼaˇ duˬ meuˬ meuˬ lahˇ jawˬ jawˬ-ehˇ miˇ tsaˬ ciˬ goˇ-eu kʼawꞈ maˬ dah-aˇ.

³³ Meuˬ heu meuˬ-ahˇ maˬ ya uˇ laˇ-eu uˬ taꞈ, aˬ yawꞈ oe-euˬ gaˇ ma kahˇ li ya gʼoꞈ poˆ leˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ taˬ-euˬ ma.

³⁴ Ngaˬ-euˬ tsawˇ myahˇ baˬ da neh maˬ ehˇ, ngaˬ-euˬ zaˬ kʼaˆ Daˬbiˇ-ahˇ ngaˬ neh dzaˬ taˬ-euˬ dawˬ ma saˇ jaˇ baˬ da neh maˬ ehˇ, meuˬ heu meuˬ-ahˇ ngaˇ haw piˇ ma’ lehˇ ehˇ-eu meh.”

³⁵ Kʼoeˇ ngeh miˇ, Sahˬpaˬ Miˬyehˇ-euˬ mˬ taˆ gʼaˬ kʼehˇ tiˬ gʼaˬ, Aˬshuˇliˆ guiˇ maꞈ-euˬ taˆ-ahˇ le-awˇ, yehˇ tiˬ seh yehꞈ muiˇ ngaˬ heˇ gʼaˬ-ahˇ sehꞈ-euˬ meh. Uˬ bya bya laˇ ngeh, tsawˇ haˬ kʼoeˇ deuˬ yaw shiˇ-ehˇ ga-eu meh.

³⁶ Kʼoeˇ naˇ, Aˬshuˇliˆ sahˬ paˬ Saˬneˬkaˬliˇ kʼoeˇ gaˇ neh doˆ-iˇ-awˇ, Niˇnaˬbeˬ meuˬ-ahˇ gʼoꞈ leˇ-euˬ meh.

³⁷ Tiˬ nah-aˬ, aˬ yawꞈ-euˬ miˬ yehˇ pyeuꞈ-eu Niˇsaˬlawˇ miˬ yehˇ-euˬ uˬ duˬ tahˬ nymˇ laꞈ kʼoeˇ aˬ yawꞈ uˬ duˬ tahˬ luꞈ ngeh, aˬ yawꞈ-euˬ aˬ li Aˬdaˬleˬmeˬlehˆ hawˇ-eu, Shaˬleˬzaˬ aˬ nyaꞈ nmˇ aˬ yawꞈ-ahˇ mi cehˇ deuˆ sehꞈ-awˇ Aˬyaˬyaˇ miˇ kʼahˬ paw cehˆ-euˬ meh. Kʼoeˇ naˇ, aˬ yawꞈ-euˬ aˬ li Eˇdaˬhaˬdoˬ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.