2 Sahˬpaˬ 16 - Akha

Yuˇdaˆ sahˬ paˬ Aˬkaˆ

¹ Leˬmaˬliˇ-euˬ aˬ li sahˬ paˬ Peˬkah gʼaˬ Iˇsaˬleˬlaˆ miˇ kʼahˬ-ahˇ uˆ lahˇ-euˬ tseˇ shiꞈ kʼoꞈ tiˬ kʼoꞈ-ahˇ, Yoˇdaˬ-euˬ aˬ li Aˬkaˆ gʼaˬ Yuˇdaˆ sahˬ paˬ pyeuꞈ laˇ-euˬ meh.

² Aˇ kʼoꞈ nyiˬ tseˇ byah ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ tseˇ koꞈ kʼoꞈ uˆ lahˇ-euˬ meh. Aˬ yawꞈ-euˬ aˬ poeˬ sahˬ paˬ Daˬbiˇ-ahˇ aˬ yawꞈ maˬ dzaw geuꞈ ni, Sahˬpaˬ Miˬyehˇ nui ma maˬ tsaˬ-eu jeˬ aˬ yawꞈ mˇ-euˬ meh.

³ Iˇsaˬleˬlaˆ sahˬ paˬ deuˬ-ahˇ aˬ yawꞈ dzaw geuꞈ-eu uˬ taꞈ, Iˇsaˬleˬlaˆ tsawˇ haˬ deuˬ miˇ kʼahˬ kʼoeˇ kʼahˬ-ahˇ jawˇ uˇ leˇ ngeh, Sahˬpaˬ Miˬyehˇ neh teh doˆ nehˬ-euˬ tsawˇ haˬ deuˬ-euˬ zahˇ sahˇ kʼoꞈ-ahˇ aˬ yawꞈ caw teh-awˇ, aˬ yawꞈ-euˬ aˬ li-ahˇ kʼawꞈ, miˬ dzaˬ dzah puiˆ-awˇ lawˇ-euˬ meh.

⁴ Gawˬ duˇ uˬ du hawˇ-eu aˇ bawˇ naˇ shmˇ kʼaˇ muiˬ gaˇ jaˆ-eu lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ-ahˇ, aˬ yawꞈ lawˇ-eu shehˇ-eu jeˬ mˇ-awˇ, yaw saw jeˬ doꞈ damˬ-euˬ meh.

⁵ Suˇliˆ sahˬ paˬ Leˬzeˬ hawˇ-eu Iˇsaˬleˬlaˆ sahˬ paˬ Peˬkah aˬ nyaꞈ Yeˬluˇsaˬlehˬ meuˬ-ahˇ loꞈ jawˬ-awˇ guiˇ deuˆ kʼawꞈ, Aˬkaˆ-ahˇ maˬ deuˆ gʼaˬ nya-a.

⁶ Aˇ yamˬ kʼoeˇ yamˬ laꞈ kʼoeˇ, Eˬdoˬ sahˬ paˬ neh Eˇlaˆ meuˬ paˇ deuˆ kʼoꞈ geuꞈ-awˇ, kʼoeˇ gaˇ jawˇ-eu Yuˇdaˆ tsawˇ haˬ deuˬ-ahˇ teh doˆ-euˬ meh. Eˬdoˬ tsawˇ jeuˬ kʼoeˇ gaˇ paˇ gʼoꞈ jawˇ leˇ-awˇ, iˬ nah keuˆ ni jawˇ luꞈ-eu meh.

⁷ Aˬshuˇliˆ sahˬ paˬ Tiˇgaˬlaˇpaˬleˬsaˬ jawˇ gaˇ Aˬkaˆ tsawˇ haˬ pyehˬ gʼeh-awˇ, “Ngaˇ-aˬ, nawˬ-ahˇ gʼoe-eu nawˬ-euˬ zaˬ kʼaˆ ma. Nawˇ tiˬ poˆ oe-awˇ, ngaˬ-ahˇ guiˇ deuˆ luꞈ-eu Suˇliˆ sahˬ paˬ hawˇ-eu Iˇsaˬleˬlaˆ sahˬ paˬ-euˬ laꞈ-ahˇ, ngaˬ-ahˇ ka kʼoꞈ nehˬ le-awˬ” lehˇ bi tsaꞈ gaˬ leˇ-euˬ meh.

⁸ Uˬ duˬ tahˬ nymˇ nymˇ ma laꞈ kʼoeˇ hawˇ-eu sahˬ paˬ-euˬ pyuˇ cehˇ jiˇ laꞈ kʼoeˇ jaˆ-eu pyuˇ hawˇ-eu shuiˇ deuˬ, sahˬ paˬ Tiˇgaˬlaˇpaˬleˬsaˬ-ahˇ laꞈ sawˬ bi biꞈ leˇ-euˬ meh.

⁹ Aˬkaˆ-euˬ shaˇ dawˬ-ahˇ Tiˇgaˬlaˇpaˬleˬsaˬ naˇ haˬ-awˇ, aˬ yawꞈ-euˬ guiˇ maꞈ sheuˬ leꞈ-awˇ, Daˬmaˬsehˇ meuˬ-ahˇ deuˆ gʼaˬ-awˇ sahˬ paˬ Leˬzeˬ-ahˇ sehꞈ-euˬ uˬ taꞈ, Suˇliˆ miˇ kʼahˬ zaˬ deuˬ-ahˇ Kiˇlaˆ meuˬ-ahˇ nyehꞈ daˆ gʼeh-euˬ meh.

¹⁰ Sahˬ paˬ Aˬkaˆ Daˬmaˬsehˇ meuˬ-ahˇ le-awˇ, sahˬ paˬ Tiˇgaˬlaˇpaˬleˬsaˬ-ahˇ tahˬ puˬ leˇ ngeh, kʼoeˇ gaˇ jaˆ-eu tahˬ pahˬ aˬ ma mawˇ kawˇ-ahˇ ya mawˇ-awˇ, tahˬ pahˬ aˬ ma mawˇ kawˇ kʼoeˇ kawˇ-euˬ aˇ baˇ, tiˬ pawꞈ-iˬ maˬ bi lehˬ-iˇ ni yaw muiˬ paˬ-ehˇ boꞈ doˆ-awˇ, piˇ ma Uˇliˇyaˆ jawˇ gaˇ bi sha kʼoꞈ ha-iˇ-euˬ meh.

¹¹ Daˬmaˬsehˇ meuˬ-ahˇ neh sahˬ paˬ Aˬkaˆ neh kʼaˇ boꞈ ahˇ leꞈ-euˬ loꞈ-ehˇ, tahˬ pahˬ aˬ ma mawˇ kawˇ tiˬ kawˇ piˇ ma Uˇliˇyaˆ neh tehˆ-euˬ meh. Sahˬ paˬ Aˬkaˆ Daˬmaˬsehˇ meuˬ-ahˇ neh maˬ gʼoꞈ keuˆ le mi naˆ-ehˇ, tahˬ pahˬ aˬ ma mawˇ kawˇ kʼoeˇ kawˇ tehˆ gʼaˬ taˬ-euˬ meh.

¹² Sahˬ paˬ Aˬkaˆ Daˬmaˬsehˇ meuˬ-ahˇ neh gʼoꞈ keuˆ le ngeh, tahˬ pahˬ aˬ ma mawˇ kawˇ kʼoeˇ kawˇ tehˆ gʼaˬ taˬ-euˬ gaˇ ya mawˇ-euˬ meh.

¹³ Kʼoeˇ naˇ, jeˬ zaˬ dzah puiˆ-awˇ lawˇ-eu jeˬ hawˇ-eu dzaˬ la gʼo cehˇ lawˇ-eu jeˬ, tahˬ pahˬ aˬ ma mawˇ kawˇ kʼoeˇ kawˇ-ahˇ aˬ yawꞈ lawˇ nehˬ-awˇ, aˬ gaꞈ dzaˇ uiˇ shehˆ daˆ-awˇ lawˇ-eu jeˬ hawˇ-eu, jeˬ zaˬ-euˬ shiˬ shehˆ daˆ-awˇ ya lawˇ-eu cawˬ cawˬ taꞈ-eu lawˇ-eu jeˬ lawˇ daˆ nehˬ-euˬ meh.

¹⁴ Sahˬpaˬ Miˬyehˇ-ahˇ a nehˬ taˬ-euˬ guiˬ shuiˇ neh jahˇ-euˬ lawˇ duˬ kʼoeˇ hmˬ-aˬ, lawˇ duˬ yaw shuiꞈ kʼoeˇ hmˬ hawˇ-eu Uˬ duˬ tahˬ nymˇ nymˇ ma yaw kaˬ-ahˇ jaˆ-eu meh.

¹⁵ Kʼoeˇ naˇ, piˇ ma Uˇliˇyaˆ-ahˇ aˬ yawꞈ heu loꞈ-ehˇ dawˬ biꞈ-euˬ meh. “Uˬ shawˬ paw lawˇ-eu miˬ dzaˬ dzah puiˆ-awˇ lawˇ-eu jeˬ maˬ ehˇ, uˬ ciꞈ uˬ taw paw lawˇ-eu dzaˬ la gʼo cehˇ lawˇ-eu jeˬ maˬ ehˇ, sahˬ paˬ hawˇ-eu miˇ kʼahˬ zaˬ deuˬ lawˇ-eu miˬ dzaˬ dzah puiˆ-awˇ lawˇ-eu jeˬ hawˇ-eu dzaˬ la gʼo cehˇ lawˇ-eu jeˬ maˬ ehˇ, huiˬ dzehˬ-eu ngaˬ-euˬ lawˇ duˬ heu tsahˇ kʼoeˇ taˆ lawˇ-awˬ. Lawˇ-eu shehˇ-eu gʼaˇ duˬ kʼaˇ sehꞈ-euˬ jeˬ zaˬ-euˬ shiˬ-ahˇ, lawˇ duˬ heu hmˬ kʼoeˇ taˆ shehˆ daˆ-awˬ. Guiˬ shuiˇ neh jahˇ taˬ-eu lawˇ duˬ kʼoeˇ hmˬ-aˬ, ngaˇ ja maw maw ngeh zmˬ-eu gʼaˇ duˬ bi jaˆ-awˬ.”

¹⁶ Sahˬ paˬ Aˬkaˆ neh dawˬ kʼaˇ biꞈ nehˬ-euˬ loꞈ-ehˇ Uˇliˇyaˆ mˇ-euˬ meh.

¹⁷ Sahˬ paˬ Aˬkaˆ-aˬ, Uˬ duˬ tahˬ nymˇ nymˇ ma laꞈ kʼoeˇ zmˬ luꞈ-eu guiˬ shuiˇ laˆ lawˬ deuˬ pyaˆ dzeh-awˇ, laˆ lawˬ kʼoeˇ deuˬ kʼoeˇ taˆ tsoꞈ taˬ-euˬ sehˇ byehˇ kʼoeˇ deuˬ yuˇ doˆ-euˬ meh. Guiˬ shuiˇ mawˇ neˇ mawˇ kawˇ tseˇ nyiꞈ kawˇ kʼoeˇ taˆ bi jaˆ-euˬ guiˬ shuiˇ lah kʼoeˆ lah kʼawꞈ aˬ yawꞈ lehˆ doˆ-awˇ, kʼaˬ lo kʼawˬ taˬ-euˬ kʼoeˇ taˆ baꞈ taˬ-euˬ meh.

¹⁸ Aˬshuˇliˆ sahˬ paˬ nui kʼahˇ shiˇ ni, Uˬ duˬ tahˬ nymˇ nymˇ ma laꞈ kʼoeˇ dzoeˬ dzaˬ nuiˇ mahˬ ciˬ taˬ-eu gʼaˇ duˬ laˆ goˇ taˬ-euˬ kʼoeˇ kʼawꞈ, Aˬkaˆ neh pyaˆ dzeh-awˇ, Uˬ duˬ tahˬ nymˇ nymˇ ma laꞈ kʼoeˇ sahˬ paˬ uˇ leˇ-eu gʼaˇ duˬ jahˇ taˬ-euˬ laˇ gʼoˆ kʼoeˇ gʼoˆ kʼawꞈ, aˬ yawꞈ laˆ gʼoeˬ-euˬ meh.

¹⁹ Sahˬ paˬ Aˬkaˆ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Yuˇdaˆ sahˬ paˬ-euˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²⁰ Aˬkaˆ ziˇ jiˇ-awˇ, Daˬbiˇ-euˬ meuˬ laꞈ kʼoeˇ jaˆ-eu sahˬ paˬ-euˬ lmˬ bymˇ-ahˇ, aˬ yawꞈ-ahˇ baꞈ pahˬ nehˬ-euˬ meh. Aˬ yawꞈ-euˬ aˬ li Heˬsaˬgiˇ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.