2 Sahˬpaˬ 15 - Akha

Yuˇdaˆ sahˬ paˬ Awˇziˇ

¹ Sahˬ paˬ Yeˬyawˇbamˬ Iˇsaˬleˬlaˆ miˇ kʼahˬ-ahˇ uˆ lahˇ-euˬ nyiˬ tseˇ shiꞈ kʼoꞈ tiˬ kʼoꞈ-ahˇ, Aˬmaˬziˇ-euˬ aˬ li Awˇziˇ gʼaˬ Yuˇdaˆ sahˬ paˬ pyeuꞈ laˇ-euˬ meh.

² Aˬ yawꞈ tseˇ koꞈ kʼoꞈ kʼawˆ ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ ngaˬ tseˇ nyiꞈ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Yeˬluˇsaˬlehˬ meuˬ-ahˇ jawˇ-eu Yeˬkawˇliˇ meh.

³ Aˬ yawꞈ-euˬ aˬ da Aˬmaˬziˇ loꞈ-ehˇ, Sahˬpaˬ Miˬyehˇ nui ma tsaˬ-eu jeˬ aˬ yawꞈ mˇ-euˬ meh.

⁴ Ehˇ kʼawꞈ, lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ maˬ laˆ cawˆ ni, miˇ kʼahˬ zaˬ deuˬ kʼoeˇ gaˇ lawˇ-eu shehˇ-eu jeˬ mˇ-awˇ, yaw saw jeˬ doꞈ damˬ-euˬ meh.

⁵ Sahˬpaˬ Miˬyehˇ neh Awˇziˇ-ahˇ maˬ shiˇ tiˬ ziˇ nyawˬ bi naˇ-awˇ, nymˇ tiˬ nymˇ laꞈ kʼoeˇ aˬ yawꞈ tiˬ gʼaˬ tehꞈ-ehˇ jawˇ-euˬ meh. Aˬ yawꞈ-euˬ aˬ li Yoˇdaˬ gʼaˬ neh miˇ kʼahˬ-ahˇ bi uˆ lahˇ-euˬ meh.

⁶ Awˇziˇ neh kʼaˇ mˇ kʼaˇ shaˇ-euˬ yawˬ jeˬ na luꞈ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

⁷ Awˇziˇ shiˇ-awˇ, Daˬbiˇ-euˬ meuˬ laꞈ kʼoeˇ jaˆ-eu sahˬ paˬ-euˬ lmˬ bymˇ-ahˇ baꞈ pahˬ nehˬ-euˬ meh. Aˬ yawꞈ-euˬ aˬ li Yoˇdaˬ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

Iˇsaˬleˬlaˆ sahˬ paˬ Zaˬkaˬliˇ

⁸ Sahˬ paˬ Awˇziˇ Yuˇdaˆ miˇ kʼahˬ-ahˇ uˆ lahˇ-euˬ smˬ tseˇ yehꞈ kʼoꞈ tiˬ kʼoꞈ-ahˇ, Yeˬyawˇbamˬ-euˬ aˬ li Zaˬkaˬliˇ gʼaˬ Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ ba la koꞈ siˬ uˆ lahˇ-euˬ meh.

⁹ Aˬ yawꞈ-euˬ mehˬ hu sahˬ paˬ geuꞈ-awˇ uˆ lahˇ dzeuˇ yaꞈ-euˬ deuˬ loꞈ-ehˇ, Sahˬpaˬ Miˬyehˇ mehˬ shi aˬ yawꞈ iˬ baˇ mˇ-euˬ meh. Iˇsaˬleˬlaˆ tsawˇ haˬ deuˬ iˬ baˇ mˇ ni sheuˬ gʼeh-euˬ gʼaˬ pyeuꞈ-eu, Neˬbaˇ-euˬ aˬ li sahˬ paˬ Yeˬyawˇbamˬ-ahˇ aˬ yawꞈ dzaw geuꞈ-awˇ, yaw haiˬ jeˬ mˇ-euˬ meh.

¹⁰ Jaˬbehˆ-euˬ aˬ li Shaˬlmˬ aˬ yawꞈ-ahˇ puiˬ-awˇ, Iˇbaˬleˬ meuˬ laꞈ kʼoeˇ aˬ yawꞈ-ahˇ sehꞈ-awˇ, aˬ yawꞈ-euˬ dah zaˇ sahˬ paˬ geuꞈ-euˬ meh.

¹¹ Zaˬkaˬliˇ neh kʼaˇ mˇ kʼaˇ shaˇ-euˬ yawˬ jeˬ na luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

¹² “Nawˬ-euˬ zaˬ nawˬ-euˬ uˆ deuˬ oeˬ ziˇ keuˆ ni sahˬ paˬ ya geuꞈ tehꞈ-a” lehˇ, sahˬ paˬ Yeˬhuˇ-ahˇ Sahˬpaˬ Miˬyehˇ neh ehˇ nehˬ-euˬ dawˬ kʼoeˇ dawˬ, kʼoeˇ gaˇ byah laˇ-euˬ meh.

Iˇsaˬleˬlaˆ sahˬ paˬ Shaˬlmˬ

¹³ Sahˬ paˬ Awˇziˇ Yuˇdaˆ miˇ kʼahˬ-ahˇ uˆ lahˇ-euˬ smˬ tseˇ gʼoeˬ kʼoꞈ tiˬ kʼoꞈ-ahˇ, Jaˬbehˆ-euˬ aˬ li Shaˬlmˬ gʼaˬ Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ, ba la tiˬ siˬ ehˇ gʼaˬ ni uˆ lahˇ-euˬ meh.

¹⁴ Gaˬdiˬ-euˬ aˬ li Meˬnaˇheˬ-aˬ, Teuˇzaˬ meuˬ-ahˇ neh Saˬmaˬliˆ meuˬ-ahˇ le-awˇ, Shaˬlmˬ-ahˇ sehꞈ-awˇ, aˬ yawꞈ-euˬ dah zaˇ sahˬ paˬ geuꞈ-euˬ meh.

¹⁵ Sahˬ paˬ Zaˬkaˬliˇ-ahˇ sehꞈ kʼoeˬ-euˬ gaˇ kawˆ ahˇ leˇ-ehˇ, Shaˬlmˬ neh kʼaˇ mˇ kʼaˇ shaˇ-euˬ yawˬ jeˬ na luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

¹⁶ Meˬnaˇheˬ gʼaˬ Teuˇzaˬ meuˬ-ahˇ neh doˆ laˇ ngeh, gaˇ pehˇ-ahˇ jaˆ-eu Taˬpahˇ meuˬ hawˇ-eu kʼoeˇ gaˇ jawˇ-eu tsawˇ haˬ deuˬ-ahˇ maˬ ehˇ, meuˬ kʼoeˇ meuˬ-euˬ jawˬ jawˬ-ehˇ jaˆ-euˬ gahˬ kaˬ deuˬ-ahˇ maˬ ehˇ, nui kʼahˇ tiˬ shiˇ laˆ cawˆ nehˬ-euˬ meh. Aˬ jeˬ miˇ neh ehˇ naˇ, meuˬ kʼoeˇ meuˬ aˬ yawꞈ-euˬ laꞈ oꞈ maˬ awꞈ mawꞈ-a. Aˬ nyiˇ pi luꞈ-eu zaˬ miˬ zaˬ dawˬ tawˆ luꞈ-ahˇ kʼawꞈ, aˬ yawꞈ neh uˬ maˆ yehˬ paˆ nehˬ jiˇ yaꞈ-euˬ meh.

Iˇsaˬleˬlaˆ sahˬ paˬ Meˬnaˇheˬ

¹⁷ Sahˬ paˬ Awˇziˇ Iˇsaˬleˬlaˆ miˇ kʼahˬ-ahˇ uˆ lahˇ-euˬ smˬ tseˇ gʼoeˬ kʼoꞈ tiˬ kʼoꞈ-ahˇ, Gaˬdiˬ-euˬ aˬ li Meˬnaˇheˬ Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ tseˇ kʼoꞈ uˆ lahˇ-euˬ meh.

¹⁸ Shiˇ ngeh keuˆ ni Iˇsaˬleˬlaˆ tsawˇ haˬ deuˬ iˬ baˇ mˇ ni sheuˬ gʼeh-euˬ gʼaˬ pyeuꞈ-eu, Neˬbaˇ-euˬ aˬ li sahˬ paˬ Yeˬyawˇbamˬ neh mˇ yaꞈ-euˬ yaw haiˬ jeˬ-ahˇ aˬ yawꞈ dzaw geuꞈ-awˇ, Sahˬpaˬ Miˬyehˇ mehˬ shi iˬ baˇ mˇ-euˬ meh.

¹⁹ Aˬshuˇliˆ sahˬ paˬ Tiˇgaˬlaˇpaˬleˬsaˬ gʼaˬ Iˇsaˬleˬlaˆ miˇ kʼahˬ-ahˇ guiˇ deuˆ le-awˇ, Meˬnaˇheˬ gʼaˬ Iˇsaˬleˬlaˆ miˇ kʼahˬ-ahˇ sahˬ paˬ geuꞈ-awˇ ya uˆ lahˇ ni, sahˬ paˬ kʼoeˇ gʼaˬ-ahˇ pyuˇ nyiˬ muiˇ oeˬ yaˇ jawꞈ-i biꞈ-euˬ meh.

²⁰ Meˬnaˇheˬ-aˬ, Iˇsaˬleˬlaˆ tsawˇ haˬ smˇ muiˬ smˇ baw deuˬ-ahˇ, tiˬ gʼaˬ-euˬ pyuˇ ngaˬ tseˇ byaˆ taꞈ uiˬ-awˇ, Aˬshuˇliˆ sahˬ paˬ-ahˇ biꞈ-euˬ meh. Kʼoeˇ ngeh, Tiˇgaˬlaˇpaˬleˬsaˬ gʼaˬ aˬ yawꞈ-euˬ miˇ kʼahˬ-ahˇ gʼoꞈ leˇ-euˬ meh.

²¹ Meˬnaˇheˬ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²² Aˬ yawꞈ ziˇ jiˇ-awˇ, aˬ yawꞈ-ahˇ baꞈ pahˬ gʼaˬ ngeh, aˬ yawꞈ-euˬ aˬ li Peˬkaˬhiˇ gʼaˬ aˬ yawꞈ-euˬ dah zaˇ sahˬ paˬ geuꞈ-eu meh.

Iˇsaˬleˬlaˆ sahˬ paˬ Peˬkaˬhiˇ

²³ Sahˬ paˬ Awˇziˇ Yuˇdaˆ miˇ kʼahˬ-ahˇ uˆ lahˇ-euˬ ngaˬ tseˇ kʼoꞈ tiˬ kʼoꞈ-ahˇ, Meˬnaˇheˬ-euˬ aˬ li Peˬkaˬhiˇ gʼaˬ Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ nyiˬ kʼoꞈ uˆ lahˇ-euˬ meh.

²⁴ Iˇsaˬleˬlaˆ tsawˇ jeuˬ iˬ baˇ mˇ ni sheuˬ gʼeh-euˬ gʼaˬ pyeuꞈ-eu, Neˬbaˇ-euˬ aˬ li sahˬ paˬ Yeˬyawˇbamˬ neh mˇ-euˬ yaw haiˬ jeˬ-ahˇ aˬ yawꞈ dzaw geuꞈ-awˇ, Sahˬpaˬ Miˬyehˇ mehˬ shi iˬ baˇ mˇ-euˬ meh.

²⁵ Peˬkaˬhiˇ-euˬ guiˇ maꞈ-ahˇ uˆ lahˇ-eu yaw huiˬ yaw mahˇ tiˬ gʼaˬ pyeuꞈ-eu Peˬkah lehˇ myahˇ-euˬ Leˬmaˬliˇ-euˬ aˬ li-aˬ, Giˇlaˆ miˇ kʼahˬ-ahˇ jawˇ-eu tsawˇ haˬ ngaˬ tseˇ gʼaˬ sheuˬ-awˇ, Saˬmaˬliˆ meuˬ sahˬ paˬ-euˬ hawˇ nymˇ laꞈ kʼoeˇ paw jaˆ-eu bawˇ tsahˬ bawˇ dahˇ lawˆ lehˇ kuˇ-eu lawˆ-ahˇ, Peˬkaˬhiˇ-ahˇ sehꞈ-awˇ, aˬ yawꞈ-euˬ dah zaˇ sahˬ paˬ geuꞈ-euˬ meh.

²⁶ Peˬkaˬhiˇ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

Iˇsaˬleˬlaˆ sahˬ paˬ Peˬkah

²⁷ Sahˬ paˬ Awˇziˇ Yuˇdaˆ miˇ kʼahˬ-ahˇ uˆ lahˇ-eu ngaˬ tseˇ nyiꞈ kʼoꞈ tiˬ kʼoꞈ-ahˇ, Leˬmaˬliˇ-euˬ aˬ li Peˬkah gʼaˬ Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ nyiˬ tseˇ kʼoꞈ uˆ lahˇ-euˬ meh.

²⁸ Iˇsaˬleˬlaˆ tsawˇ jeuˬ iˬ baˇ mˇ ni sheuˬ gʼeh-euˬ gʼaˬ pyeuꞈ-eu Neˬbaˇ-euˬ aˬ li sahˬ paˬ Yeˬyawˇbamˬ neh mˇ-euˬ yaw haiˬ jeˬ-ahˇ aˬ yawꞈ dzaw geuꞈ-awˇ, Sahˬpaˬ Miˬyehˇ mehˬ shi iˬ baˇ mˇ-euˬ meh.

²⁹ Peˬkah sahˬ paˬ geuꞈ-awˇ uˆ lahˇ-euˬ aˇ nah aˇ yamˬ laꞈ kʼoeˇ, Iˇyaˬ meuˬ, AˬbeˬlaˇBehˬmaˬkaˬhaˬ meuˬ, Yaˬnoˇaˬ meuˬ, Geˬdeˬshaˆ meuˬ, Haˬzoˬ meuˬ hawˇ-eu, Giˇlaˆ miˇ kʼahˬ, Naˬtaˬliˇ miˇ kʼahˬ heu deuˬ-ahˇ, Aˬshuˇliˆ sahˬ paˬ Tiˇgaˬlaˇpaˬleˬsaˬ neh deuˆ geuꞈ-awˇ, Aˬshuˇliˆ miˇ kʼahˬ-ahˇ tsawˇ haˬ nyehꞈ daˆ gʼeh-euˬ meh.

³⁰ Awˇziˇ-euˬ aˬ li Yoˇdaˬ gʼaˬ Yuˇdaˆ miˇ kʼahˬ-ahˇ sahˬ paˬ geuꞈ-awˇ uˆ lahˇ-euˬ nyiˬ tseˇ kʼoꞈ tiˬ kʼoꞈ-ahˇ, Eˇlahˬ-euˬ aˬ li Awˇsheˬ neh sahˬ paˬ Peˬkah-ahˇ sehꞈ-awˇ, aˬ yawꞈ-euˬ dah zaˇ Iˇsaˬleˬlaˆ sahˬ paˬ geuꞈ-euˬ meh.

³¹ Peˬkah neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

Yuˇdaˆ sahˬ paˬ Yoˇdaˬ

³² Leˬmaˬliˇ-euˬ aˬ li sahˬ paˬ Peˬkah Iˇsaˬleˬlaˆ miˇ kʼahˬ-ahˇ uˆ lahˇ-euˬ nyiˬ kʼoꞈ tiˬ kʼoꞈ-ahˇ Awˇziˇ-euˬ aˬ li Yoˇdaˬ gʼaˬ Yuˇdaˆ sahˬ paˬ pyeuꞈ laˇ-euˬ meh.

³³ Aˬ yawꞈ sahˬ paˬ pyeuꞈ laˇ ngeh, aˬ yawꞈ-euˬ aˇ kʼoꞈ nyiˬ tseˇ ngaˬ kʼoꞈ kʼawˆ-awˇ, Yeˬluˇsaˬlehˬ meuˬ-ahˇ jawˇ-awˇ, tseˇ koꞈ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Yeˬluˇsaˬlehˬ meuˬ-ahˇ jawˇ-eu Zaˬdoˆ-euˬ aˬ buˇ Yeˬluˇshaˆ meh.

³⁴ Yoˇdaˬ-aˬ, aˬ yawꞈ-euˬ aˬ da-ahˇ dzaw geuꞈ-awˇ, Sahˬpaˬ Miˬyehˇ nui ma tsaˬ-eu jeˬ mˇ-euˬ meh.

³⁵ Ehˇ kʼawꞈ, lawˇ ciꞈ zaˬ deuˬ uˬ duˬ tahˬ-euˬ jawˇ duˬ deuˬ-ahˇ maˬ laˆ cawˆ ni, miˇ kʼahˬ zaˬ deuˬ kʼoeˇ gaˇ lawˇ-eu shehˇ-eu jeˬ mˇ-awˇ, yaw saw jeˬ doꞈ damˬ-euˬ meh. Uˬ duˬ tahˬ nymˇ nymˇ ma-euˬ laꞈ taˆ paw pyawˬ lahˇ kʼehˬ jahˇ ahˇ-euˬ gʼaˬ-aˬ, Yoˇdaˬ meh.

³⁶ Yoˇdaˬ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

³⁷ Aˇ nah aˇ yamˬ kʼoeˇ yamˬ laꞈ kʼoeˇ, Suˇliˆ sahˬ paˬ Leˬzeˬ hawˇ-eu Iˇsaˬleˬlaˆ sahˬ paˬ Peˬkah-ahˇ Sahˬpaˬ Miˬyehˇ neh pyehˬ gʼeh-awˇ, Yuˇdaˆ miˇ kʼahˬ-ahˇ guiˇ bi deuˆ-euˬ meh.

³⁸ Yoˇdaˬ ziˇ jiˇ-awˇ, Daˬbiˇ-euˬ meuˬ laꞈ kʼoeˇ jaˆ-euˬ sahˬ paˬ-euˬ lmˬ bymˇ-ahˇ, aˬ yawꞈ-ahˇ baꞈ pahˬ-euˬ meh. Kʼoeˇ naˇ, aˬ yawꞈ-euˬ aˬ li Aˬkaˆ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.