2 Sahˬpaˬ 13 - Akha

Iˇsaˬleˬlaˆ sahˬ paˬ Yeˬhawˇhaˆ

¹ Aˬhaˬziˇ-euˬ aˬ li Yawˇshaˆ Yuˇdaˆ miˇ kʼahˬ-ahˇ uˆ lahˇ-euˬ nyiˬ tseˇ smˇ kʼoꞈ tiˬ kʼoꞈ-ahˇ, Yeˬhuˇ-euˬ aˬ li Yeˬhawˇhaˆ gʼaˬ Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ tseˇ shiꞈ kʼoꞈ uˆ lahˇ-euˬ meh.

² Aˬ yawꞈ-euˬ mehˬ hu sahˬ paˬ geuꞈ-euˬ sahˬ paˬ Yeˬyawˇbamˬ loꞈ-ehˇ, Sahˬpaˬ Miˬyehˇ mehˬ shi aˬ yawꞈ iˬ baˇ mˇ-awˇ, Iˇsaˬleˬlaˆ tsawˇ haˬ deuˬ iˬ baˇ mˇ ni aˬ yawꞈ sheuˬ gʼeh-euˬ meh. Aˬ yawꞈ yaw haiˬ jeˬ mˇ-eu tiˬ jawˇ-iˬ maˬ byehˇ-a.

³ Kʼoeˇ miˇ neh, Iˇsaˬleˬlaˆ tsawˇ jeuˬ-ahˇ Sahˬpaˬ Miˬyehˇ nui ma pehˇ-awˇ, Suˇliˆ sahˬ paˬ Haˬzeˬlaˇ hawˇ-eu aˬ yawꞈ-euˬ aˬ li Beˬhaˬdaˇ aˬ nyaꞈ da zaˬ neh, Iˇsaˬleˬlaˆ miˇ kʼahˬ-ahˇ tiˬ poˆ saˇ-iˬ tiˬ poˆ bi deuˆ gʼaˬ-euˬ meh.

⁴ Kʼoeˇ ngeh jawˇ, Yeˬhawˇhaˆ-aˬ, Sahˬpaˬ Miˬyehˇ-ahˇ guiˬ lahˬ shaˇ-euˬ meh. Suˇliˆ sahˬ paˬ Iˇsaˬleˬlaˆ tsawˇ haˬ deuˬ-ahˇ yaw kʼaˆ-ehˇ kʼehˬ nehˬ gaˇ Sahˬpaˬ Miˬyehˇ ya mawˇ ngeh, Yeˬhawˇhaˆ-euˬ guiˬ lahˬ shaˇ dawˬ-ahˇ naˇ haˬ nehˬ-euˬ meh.

⁵ Suˇliˆ tsawˇ haˬ deuˬ neh kʼehˬ nehˬ kʼaˆ nehˬ-euˬ jeˬ-ahˇ buˬ-iˇ nya ni, Iˇsaˬleˬlaˆ tsawˇ haˬ deuˬ-ahˇ aˬ yuiꞈ geuꞈ-awˇ sheuˬ gʼeh nehˬ-eu tsawˇ haˬ tiˬ gʼaˬ Sahˬpaˬ Miˬyehˇ pyehˬ leꞈ-awˇ, aˇ hu ba dehꞈ dzeuˇ jawˇ dzeuˇ yaꞈ-euˬ aˇ nah aˇ yamˬ loꞈ-ehˇ, aˬ yawꞈ maꞈ nui saˇ oꞈ-eu laꞈ kʼoeˇ ya dehꞈ ya jawˇ-euˬ meh.

⁶ Ehˇ kʼawꞈ, sahˬ paˬ Yeˬyawˇbamˬ neh Iˇsaˬleˬlaˆ tsawˇ haˬ deuˬ-ahˇ sheuˬ gʼeh-awˇ bi mˇ-euˬ iˬ baˇ kʼoeˇ deuˬ-ahˇ, aˬ yawꞈ maꞈ maˬ byehˇ dzeh ni mˇ-awˇ, Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ kʼoeˇ kawˇ kʼawꞈ, Saˬmaˬliˆ meuˬ-ahˇ jaˆ luꞈ-eu meh.

⁷ Yeˬhawˇhaˆ-euˬ guiˇ maꞈ laꞈ kʼoeˇ, mahˬ dziˬ-eu yehˇ ngaˬ tseˇ gʼaˬ, mahˬ laˆ lawˬ tseˇ laˇ hawˇ-eu, kuiˇ zoˬ cah-eu yehˇ tiˬ muiˇ gʼaˬ tehꞈ-ehˇ dzeˇ-eu meh. Aˬ jeˬ miˇ neh ehˇ naˇ, aˬ yawꞈ-euˬ guiˇ maꞈ kʼaˬ puiˬ kʼaˬ lehˇ loꞈ-ehˇ pyeuꞈ-iˇ gaˇ keuˆ ni Suˇliˆ sahˬ paˬ neh bi laˆ cawˆ nehˬ-euˬ meh.

⁸ Yeˬhawˇhaˆ neh mˇ-euˬ huiˬ-eu gaˇ deuˬ hawˇ-eu, aˬ yawꞈ neh kʼaˇ mˇ kʼaˇ shaˇ yaꞈ-euˬ jeˬ dawˬ tawˆ luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

⁹ Aˬ yawꞈ ziˇ jiˇ-awˇ, Saˬmaˬliˆ meuˬ laꞈ kʼoeˇ aˬ yawꞈ-ahˇ baꞈ pahˬ-euˬ meh. Aˬ yawꞈ-euˬ aˬ li Yeˬhawˇshaˆ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

Iˇsaˬleˬlaˆ sahˬ paˬ Yeˬhawˇshaˆ

¹⁰ Sahˬ paˬ Yawˇshaˆ gʼaˬ Yuˇdaˆ miˇ kʼahˬ-ahˇ uˆ lahˇ-euˬ smˬ tseˇ shiꞈ kʼoꞈ tiˬ kʼoꞈ-ahˇ, Yeˬhawˇhaˆ-euˬ aˬ li Yeˬhawˇshaˆ gʼaˬ Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ tseˇ koꞈ kʼoꞈ uˇ lahˆ-euˬ meh.

¹¹ Iˇsaˬleˬlaˆ tsawˇ jeuˬ iˬ baˇ mˇ ni sheuˬ gʼeh nehˬ-euˬ gʼaˬ pyeuꞈ-eu sahˬ paˬ Yeˬhawˇbamˬ-ahˇ aˬ yawꞈ dzaw geuꞈ-awˇ, Sahˬpaˬ Miˬyehˇ mehˬ shi iˬ baˇ mˇ-euˬ meh.

¹² Yuˇdaˆ sahˬ paˬ Aˬmaˬziˇ-ahˇ kʼaˬ duˬ ni ciˬ daˬ-awˇ guiˇ deuˆ-euˬ gaˇ kawˆ ahˇ leˇ-ehˇ, Yeˬhawˇshaˆ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

¹³ Yeˬhawˇshaˆ ziˇ jiˇ-awˇ, Saˬmaˬliˆ meuˬ-ahˇ jaˆ-eu sahˬ paˬ-euˬ lmˬ bymˇ-ahˇ baꞈ pahˬ nehˬ-euˬ meh. Aˬ yawꞈ-euˬ aˬ li Yeˬyawˇbamˬ gʼaˬ aˬ yawꞈ-euˬ dah zaˇ sahˬ paˬ geuꞈ-euˬ meh.

Eˇliˇshehˇ ziˇ jiˇ-euˬ

¹⁴ Eˇliˇshehˇ naˇ dui dui-awˇ, ziˇ jiˇ-eu dawˬ peh peh laˇ ngeh, Iˇsaˬleˬlaˆ sahˬ paˬ Yeˬhawˇshaˆ aˬ yawꞈ jawˇ gaˇ iˇ-awˇ ngoeˇ-eu laꞈ kʼoeˇ, “Ngaˬ da-oˇ, ngaˬ da-oˇ, nawˇ-aˬ, Iˇsaˬleˬlaˆ tsawˇ jeuˬ-ahˇ haw piˇ-euˬ gʼaˬ meh” lehˇ ehˇ-eu meh.

¹⁵ “Kaˆ hawˇ-eu kaˆ myaˬ yuˇ laꞈ sheˇ” lehˇ, Eˇliˇshehˇ aˬ yawꞈ-ahˇ ehˇ ngeh, kaˆ hawˇ-eu kaˆ myaˬ yuˇ gʼeh nehˬ-euˬ meh.

¹⁶ “Beuˆ-eu lehˇ lehˬ hmˬ-awˬ” lehˇ Eˇliˇshehˇ ehˇ ngeh, aˬ yawꞈ kaˆ ngoꞈ daˆ-awˇ lehˬ hmˬ-euˬ meh. Kʼoeˇ ngeh, sahˬ paˬ-euˬ aˬ laꞈ kʼoeˇ taˆ, Eˇliˇshehˇ-euˬ aˬ laꞈ cawˬ daˆ-euˬ meh.

¹⁷ “Suˇliˆ miˇ kʼahˬ paw pyawˇ-ehˇ jaˆ-eu laˇ gʼoˆ gʼoˆ zaˬ pah-awˬ” lehˇ Eˇliˇshehˇ ehˇ ngeh, aˬ yawꞈ pah-awˇ, “Beuˆ-awˬ” lehˇ Eˇliˇshehˇ ehˇ ngeh, aˬ yawꞈ beuˆ-euˬ meh. Sahˬ paˬ kaˆ beuˆ gʼaˬ-euˬ nehˬ-ehˇ Eˇliˇshehˇ heu loꞈ-ehˇ ehˇ-eu meh. “Nawˇ-aˬ, Suˇliˆ miˇ kʼahˬ-ahˇ gʼaˬ leˇ-eu Sahˬpaˬ Miˬyehˇ-euˬ kaˆ myaˬ meh. Suˇliˆ tsawˇ haˬ deuˬ-ahˇ nawˇ guiˇ deuˆ gʼaˬ ngeh keuˆ ni, Aˬpyehˇ meuˬ-ahˇ aˬ yawꞈ maꞈ nehˬ-ehˇ nawˇ ya deuˆ ceh ceh tehꞈ-a.”

¹⁸ Kʼoeˇ naˇ, “Kaˆ myaˬ yuˇ-awˇ miˇ tsaˬ-ahˇ beuˆ-awˬ” lehˇ Eˇliˇshehˇ ehˇ ngeh, Iˇsaˬleˬlaˆ sahˬ paˬ miˇ tsaˬ-ahˇ smˇ laꞈ beuˆ-awˇ naˬ-euˬ meh.

¹⁹ Kʼoeˇ ngeh, Eˇliˇshehˇ nui ma pehˇ laˇ-awˇ ehˇ-eu, “Ngaˬ laꞈ koꞈ laꞈ byah ni beuˆ paˬ law meh tawˇ. Ehˇ law nmˇ-aˬ, Suˇliˆ tsawˇ haˬ deuˬ-ahˇ nawˇ yaw muiˬ paˬ-ehˇ gʼaˬ leˇ tehꞈ-a. Smˇ laꞈ tehꞈ-ehˇ beuˆ-euˬ miˇ neh, smˬ poˆ maˬ ngeuˇ naˇ maˬ paˇ gʼaˬ leˇ nya ngaˇ.”

²⁰ Kʼoeˇ naˇ, Eˇliˇshehˇ shiˇ-awˇ, baꞈ pahˬ nehˬ-euˬ meh. Aˬ yawꞈ kʼoꞈ yawꞈ, Mawˇbaˆ tsawˇ haˬ deuˬ aˇ muˇ muˇ muˇ-ehˇ, Iˇsaˬleˬlaˆ miˇ kʼahˬ-ahˇ ceh laˇ-eu meh.

²¹ Tiˬ poˆ-aˬ, tsawˇ haˬ baꞈ pahˬ luꞈ ngeh, aˇ muˇ kʼoeˇ tiˬ muˇ laˇ luꞈ gaˇ ya mawˇ-awˇ, tsawˇ shiˇ-ahˇ Eˇliˇshehˇ-euˬ lmˬ bymˇ laꞈ kʼoeˇ baꞈ ahˇ yaꞈ-awˇ, cehˆ jiˇ-euˬ meh. Tsawˇ shiˇ kʼoeˇ Eˇliˇshehˇ-euˬ shaˬ yoeˬ-ahˇ ga tuˆ-euˬ nehˬ-ehˇ, tiˬ poˆ tehꞈ-ehˇ gʼoꞈ dehꞈ laˇ-awˇ, gawˬ yawꞈ yawꞈ laˇ-euˬ meh.

Iˇsaˬleˬlaˆ tsawˇ haˬ deuˬ hawˇ-eu Suˇliˆ tsawˇ haˬ deuˬ guiˇ deuˆ-euˬ

²² Yeˬhawˇhaˆ sahˬ paˬ geuꞈ-awˇ uˆ lahˇ-euˬ aˇ nah aˇ yamˬ-ahˇ, Suˇliˆ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ maˬ tsehˆ leˇ ni kʼehˬ nehˬ kʼaˆ nehˬ-euˬ meh.

²³ Ehˇ kʼawꞈ, Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ gʼawˬ shaˬ gaˬ-eu laꞈ kʼoeˇ, Aˬbyaˬhaˬ, Iˇtsaˆ, Yaˬkoˆ aˬ ha maꞈ-ahˇ aˬ yawꞈ neh dzaˬ taˬ-euˬ dawˬ ma saˇ jaˇ baˬ da neh, aˬ yawꞈ-euˬ tsawˇ jeuˬ-ahˇ aˬ yawꞈ maˬ ngehˇ leˇ coeˇ-ehˇ, cawˆ-iˇ jiˇ gaˇ maˬ bi keuˆ ni caw ba nehˬ-euˬ meh.

²⁴ Suˇliˆ sahˬ paˬ Haˬzeˬlaˇ shiˇ ngeh, aˬ yawꞈ-euˬ aˬ li Beˬhaˬdaˇ gʼaˬ sahˬ paˬ pyeuꞈ laˇ-euˬ meh.

²⁵ Kʼoeˇ naˇ, Iˇsaˬleˬlaˆ sahˬ paˬ Yeˬhawˇshaˆ neh Beˬhaˬdaˇ-ahˇ guiˇ smˬ poˆ deuˆ gʼaˬ-awˇ, Yeˬhawˇshaˆ-euˬ aˬ da Yeˬhawˇhaˆ gʼaˬ sahˬ paˬ geuꞈ-awˇ uˆ lahˇ ngeh Beˬhaˬdaˇ neh deuˆ geuꞈ taˬ-euˬ meuˬ deuˬ paˇ deuˆ kʼoꞈ geuꞈ-euˬ meh.