2 Sahˬpaˬ 12 - Akha

Yuˇdaˆ sahˬ paˬ Yawˇshaˆ

¹ Sahˬ paˬ Yeˬhuˇ Iˇsaˬleˬlaˆ miˇ kʼahˬ-ahˇ uˆ lahˇ-euˬ shiꞈ kʼoꞈ tiˬ kʼoꞈ-ahˇ, Yawˇshaˆ gʼaˬ Yuˇdaˆ sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ oeˬ tseˇ kʼoꞈ byah ni uˆ lahˇ-euˬ meh. Aˬ yawꞈ-euˬ aˬ ma-aˬ, Beˬlaˇsheˬba meuˬ-ahˇ jawˇ-eu Ziˇbaˬ meh.

² Piˇ ma Yeˬhawˇyaˬdaˬ neh aˬ yawꞈ-ahˇ mehˬ nehˬ tsoˆ nehˬ-euˬ miˇ neh, aˬ yawꞈ-euˬ tiˬ ziˇ Sahˬpaˬ Miˬyehˇ nui ma tsaˬ-eu jeˬ mˇ-euˬ meh.

³ Ehˇ kʼawꞈ, lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ maˬ laˆ cawˆ ni bi jaˆ-euˬ miˇ neh, miˇ kʼahˬ zaˬ deuˬ kʼoeˇ gaˇ lawˇ-eu shehˇ-eu jeˬ mˇ-awˇ, yaw saw jeˬ doꞈ damˬ-euˬ meh.

⁴ Piˇ ma deuˬ-ahˇ Yawˇshaˆ kuˇ-awˇ, heu loꞈ-ehˇ ehˇ nehˬ-euˬ meh. “Aˬ myah myah luꞈ lawˇ laˇ shehˇ laˇ-eu deuˬ neh damˬ-euˬ pyuˇ maˬ ehˇ, nui ma keuˆ-awˇ damˬ nehˬ laˇ-euˬ pyuˇ maˬ ehˇ, lawˇ gaˇ shehˇ gaˇ taꞈ leˇ-awˇ kʼaˇ za laˇ-euˬ pyuˇ dawˬ tawˆ luꞈ, Uˬ duˬ tahˬ nymˇ nymˇ ma laꞈ kʼoeˇ jeˬ hmˬ taˬ-awˬ.

⁵ Piˇ ma aˬ yawꞈ gʼaˬ yawꞈ, yawˬ ha lawˇ-eu shehˇ-eu jeˬ kʼaˇ mˇ ngeh za-euˬ pyuˇ deuˬ jeˬ hmˬ-awˇ, Uˬ duˬ tahˬ nymˇ nymˇ ma laˆ saˆ muiˬ gaˇ, kʼaˇ loˬ-eu loꞈ-ehˇ ya zmˬ meh.”

⁶ Ehˇ kʼawꞈ, Yawˇshaˆ sahˬ paˬ geuꞈ-euˬ nyiˬ tseˇ kʼoꞈ keuˆ laˇ ngeh keuˆ ni, piˇ ma kʼoeˇ deuˬ Uˬ duˬ tahˬ nymˇ nymˇ ma maˬ laˆ saˆ muiˬ ni bi jaˆ-euˬ meh.

⁷ Kʼoeˇ miˇ neh, Yeˬhawˇyaˬdaˬ hawˇ-eu piˇ ma nui deuˬ-ahˇ aˬ yawꞈ kuˇ-awˇ ehˇ nehˬ-eu, “Aˬ jeˬ miˇ neh naw maꞈ Uˬ duˬ tahˬ nymˇ nymˇ ma maˬ laˆ saˆ muiˬ te. Aˬ kaˇ naˇ, naw maꞈ neh za-euˬ pyuˇ deuˬ-ahˇ naw maꞈ maˬ paˇ ya jeˬ hmˬ meh. Uˬ duˬ tahˬ nymˇ nymˇ ma laˆ saˆ nya ni, pyuˇ kʼoeˇ naw maꞈ ya a nehˬ meh.”

⁸ Kʼoeˇ ngeh, aˬ cawˬ neh damˬ nehˬ laˇ-euˬ pyuˇ deuˬ-ahˇ aˬ yawꞈ maꞈ maˬ jeˬ hmˬ-eu gʼaˇ duˬ piˇ ma deuˬ nui ma tsaˬ-euˬ meh. Uˬ duˬ tahˬ nymˇ nymˇ ma laˆ saˆ-eu gaˇ kawˆ, aˬ yawꞈ maꞈ maˬ mˇ lehˇ nui ma tsaˬ-euˬ meh.

⁹ Kʼoeˇ naˇ, Yeˬhawˇyaˬdaˬ bahˬ keuˆ tiˬ keuˆ yuˇ-awˇ, bahˬ keuˆ kʼawˬ pymˬ-ahˇ maˇ byoe taꞈ byoe-awˇ, Uˬ duˬ tahˬ nymˇ nymˇ ma-ahˇ uˇ leˇ kʼehˬ aˇ maˇ paw dzeˇ, lawˇ duˬ-euˬ dawˬ peh bi jaˆ-euˬ meh. Gʼoˆ kʼehˬ dawˬ peh gaˇ mˇ-eu piˇ ma gʼaˬ uˬ duˬ tahˬ laˇ-euˬ deuˬ neh damˬ nehˬ-euˬ pyuˇ dawˬ tawˆ luꞈ yuˇ-awˇ, bahˬ keuˆ laꞈ kʼoeˇ dawˆ ahˇ-euˬ meh.

¹⁰ Bahˬ keuˆ laꞈ kʼoeˇ pyuˇ myaˬ laˇ-euˬ ya mawˇ ngeh jawˇ, sahˬ paˬ-euˬ saˇ naˇ-ahˇ jaˇ laˇ yuˇ-eu paw yaw huiˬ geuꞈ-eu gʼaˬ hawˇ-eu piˇ ma yaw huiˬ gʼaˬ pyuˇ kʼoeˇ gui haw-awˇ, pyuˇ pehˇ zeuˇ laꞈ kʼoeˇ dawˆ ahˇ taˬ-eu meh.

¹¹ Pyuˇ kʼoeˇ deuˬ-ahˇ jaˇ laˇ yaw muiˬ paˬ-ehˇ yuˇ gʼaˬ ngeh jawˇ, Uˬ duˬ tahˬ nymˇ nymˇ ma laˆ saˆ-eu paw aˬ yuiꞈ geuꞈ luꞈ-eu deuˬ-euˬ laꞈ-ahˇ a nehˬ-awˇ, laꞈ myawˬ laꞈ sawˆ mˇ-eu deuˬ-ahˇ maˬ ehˇ, nymˇ tsoˆ-eu deuˬ-ahˇ maˬ ehˇ,

¹² kʼaˬ lo tsaˬ byaˆ gawˬ-eu deuˬ-ahˇ maˬ ehˇ, kʼaˬ lo tsaˬ byaˆ taꞈ-eu deuˬ-ahˇ maˬ ehˇ, daˇ kawˬ hawˇ-eu kʼaˬ lo zeuˇ gaˇ maˬ ehˇ, nui gaˇ maˬ ehˇ, kʼaˇ loˬ-eu tsahˇ-ahˇ bi biꞈ-euˬ meh.

¹³ Ehˇ kʼawꞈ, pyuˇ kʼmˬ maˬ deuˬ, naˬ bo deuˬ, daˇ heh deuˬ, tsiˇ kʼmˬ doꞈ gaˇ zmˬ-eu keu ka deuˬ hawˇ-eu, pyuˇ hawˇ-eu shuiˇ neh kʼaˇ jahˇ taˬ-euˬ keu ka deuˬ zeuˇ gaˇ, pyuˇ kʼoeˇ deuˬ maˬ zmˬ-a.

¹⁴ Uˬ duˬ tahˬ nymˇ nymˇ ma laˆ saˆ luꞈ-eu tsawˇ haˬ deuˬ-ahˇ gʼaˬ gaˇ poeˬ biꞈ-eu gʼaˇ duˬ hawˇ-eu, kʼoeˇ gaˇ loˬ-eu daˇ kawˬ daˇ laꞈ deuˬ zeuˇ-eu gʼaˇ duˬ tehꞈ-ehˇ, pyuˇ kʼoeˇ deuˬ zmˬ-euˬ meh.

¹⁵ Gaˇ mˇ gaˇ haw luꞈ pyaˆ luꞈ-eu tsawˇ haˬ kʼoeˇ deuˬ nui ma dawˇ dui dui-eu miˇ neh, pyuˇ gaˇ kawˆ pyehˆ tseˇ haw-eu maˬ loˬ-a.

¹⁶ Dziˇ dzoˆ tsoeˬ-eu lawˇ-eu jeˬ lawˇ-eu deuˬ hawˇ-eu, iˬ baˇ shawˇ-eu lawˇ-eu jeˬ lawˇ-eu deuˬ neh biꞈ-euˬ pyuˇ deuˬ, bahˬ keuˆ kʼoeˇ keuˆ laꞈ kʼoeˇ maˬ dawˆ ahˇ-a. Aˬ jeˬ miˇ neh ehˇ naˇ, kʼoeˇ-aˬ, piˇ ma deuˬ-ahˇ oꞈ-eu shaˬ bymˇ meh.

¹⁷ Aˇ yamˬ kʼoeˇ yamˬ laꞈ kʼoeˇ, Suˇliˆ sahˬ paˬ Haˬzeˬlaˇ neh Gaˬdaˇ meuˬ-ahˇ deuˆ gʼaˬ-awˇ, Yeˬluˇsaˬlehˬ meuˬ-ahˇ guiˇ deuˆ le-eu lehˇ noeˬ tsehˆ taˬ-euˬ meh.

¹⁸ Kʼoeˇ ngeh, Yuˇdaˆ sahˬ paˬ Yawˇshaˆ-aˬ, aˬ yawꞈ-euˬ mehˬ hu sahˬ paˬ geuꞈ dzeuˇ yaꞈ-euˬ deuˬ pyeuꞈ-eu, Yeˬhawˇshaˬpaˇ, Yeˬhawˇlamˬ, Aˬhaˬziˇ aˬ ha maꞈ neh Sahˬpaˬ Miˬyehˇ-ahˇ damˬ nehˬ-euˬ pyuˇ shuiˇ myawˬ gahˬ dawˬ tawˆ luꞈ maˬ ehˇ, aˬ yawꞈ neh damˬ taˬ-euˬ pyuˇ shuiˇ myawˬ gahˬ deuˬ maˬ ehˇ, Uˬ duˬ tahˬ nymˇ nymˇ ma hawˇ-eu sahˬ paˬ-euˬ hawˇ nymˇ laꞈ kʼoeˇ kʼaˇ jaˆ-eu shuiˇ dawˬ tawˆ luꞈ maˬ ehˇ, yuˇ uiˬ jiˇ-awˇ, sahˬ paˬ Haˬzeˬlaˇ-ahˇ laꞈ sawˬ biꞈ leˇ-euˬ meh. Kʼoeˇ naˇ, Yeˬluˇsaˬlehˬ meuˬ-ahˇ sahˬ paˬ Haˬzeˬlaˇ guiˇ maˬ deuˆ ni byehˇ-euˬ meh.

¹⁹ Sahˬ paˬ Yawˇshaˆ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²⁰ Aˬ yawꞈ-euˬ gaˇ mˇ-eu yaw huiˬ yaw mahˇ deuˬ aˬ yawꞈ-ahˇ puiˬ-awˇ, Yeˬluˇsaˬlehˬ meuˬ-euˬ nahˇ ma doˆ kʼehˬ paw pyawˬ-ahˇ jaˆ-eu Siˇlaˬ meuˬ-ahˇ iˇ-eu gaˇ ma-ahˇ miˇ tsaˬ ciˬ dzm-awˇ tsoˆ taˬ-euˬ nymˇ laꞈ kʼoeˇ, aˬ yawꞈ-ahˇ sehꞈ-euˬ meh.

²¹ Aˬ yawꞈ-ahˇ sehꞈ-euˬ yaw huiˬ yaw mahˇ kʼoeˇ deuˬ-aˬ, Shiˇmyaˆ-euˬ aˬ li Yawˇzaˬkaˬ hawˇ-eu Shoˇmeuˬ-euˬ aˬ li Yeˬhawˇzaˬbaˆ aˬ nyaꞈ meh. Daˬbiˇ-euˬ meuˬ laꞈ kʼoeˇ jaˆ-eu sahˬ paˬ-euˬ lmˬ bymˇ-ahˇ Yawˇshaˆ-ahˇ baꞈ pahˬ nehˬ-awˇ, aˬ yawꞈ-euˬ aˬ li Aˬmaˬziˇ gʼaˬ aˬ yawꞈ-euˬ dah zaˇ sahˬ paˬ geuꞈ-euˬ meh.