2 Sahˬpaˬ 11 - Akha

Aˬdaˬliˇ hawˇ-eu Yawˇshaˆ

¹ Sahˬ paˬ Aˬhaˬziˇ-euˬ aˬ ma Aˬdaˬliˇ-aˬ, aˬ yawꞈ-euˬ aˬ li shiˇ-euˬ gaˇ kawˆ ya gaˬ ngeh, sahˬ paˬ-euˬ miˬ sawˇ zaˬ deuˬ dawˬ tawˆ luꞈ-ahˇ sehꞈ jiˇ-euˬ meh.

² Aˬhaˬziˇ-euˬ aˬ li Yawˇshaˆ tiˬ gʼaˬ tehꞈ-ehˇ, maˬ bi sehꞈ ni dzeuˇ-iˇ-euˬ meh. Aˬ yawꞈ-ahˇ aˬ cawˬ sehꞈ-eu lehˇ gʼeh ngeh, Aˬhaˬziˇ-euˬ dmˇ ma pyeuꞈ-eu sahˬ paˬ Yeˬhawˇlamˬ-euˬ aˬ buˇ Yeˬhawˇsheˬba neh aˬ yawꞈ-ahˇ ka kʼoꞈ-euˬ meh. Aˬ yawꞈ-ahˇ maˬ ya bi sehꞈ-eu gʼaˇ duˬ, aˬ yawꞈ hawˇ-eu aˬ yawꞈ-ahˇ haw piˇ-eu zaˬ miˬ zaˬ-ahˇ, yuꞈ duˬ kuˆ lawˆ tiˬ lawˆ laꞈ kʼoeˇ, Yeˬhawˇsheˬba neh sheuˬ zaꞈ taˬ-euˬ meh.

³ Aˬdaˬliˇ sahˬ paˬ ma geuꞈ-awˇ uˆ lahˇ luꞈ-eu aˇ yamˬ laꞈ kʼoeˇ, Yeˬhawˇsheˬba gʼaˬ koꞈ kʼoꞈ byah ni Yawˇshaˆ-ahˇ bo saˆ-awˇ, Uˬ duˬ tahˬ nymˇ nymˇ ma laꞈ kʼoeˇ sheuˬ zaꞈ taˬ-euˬ meh.

⁴ Shiꞈ kʼoꞈ tiˬ kʼoꞈ keuˆ laˇ ngeh, sahˬ paˬ-ahˇ loꞈ piˇ-eu guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ hawˇ-eu, sahˬ paˬ-euˬ nymˇ-ahˇ loꞈ piˇ-eu guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ-ahˇ, “Uˬ duˬ tahˬ nymˇ nymˇ ma-ahˇ laˇ-awˬ” lehˇ piˇ ma Yeˬhawˇyaˬdaˬ kuˇ-awˇ, aˬ yawꞈ neh lehˬ hmˬ taˬ-euˬ loꞈ-ehˇ mˇ-eu gʼaˇ duˬ saˇ jaˇ dzaˬ-awˇ, sahˬ paˬ-euˬ aˬ li Yawˇshaˆ-ahˇ, aˬ yawꞈ maꞈ-euˬ mehˬ shi sheuˬ doˆ mehˬ nehˬ-euˬ meh.

⁵ Aˬ yawꞈ maꞈ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Jawˇ nah ngeh nah loꞈ piˇ-eu gaˇ naw maꞈ-ahˇ daˇ laˇ ngeh, naw maꞈ tsawˇ haˬ smˬ muˇ biˇ-awˇ, sahˬ paˬ-euˬ hawˇ nymˇ-ahˇ tiˬ muˇ ya loꞈ meh.

⁶ Nyiˬ muˇ tiˬ muˇ-aˬ, Suˇliˆ lahˇ kʼehˬ-ahˇ loꞈ-awˇ, yawˬ muˇ yawˬ-aˬ, aˬ cawˬ-euˬ jeˬ nah jawˇ-awˇ, lahˇ kʼehˬ-ahˇ ya loꞈ meh.

⁷ Jawˇ nah ngeh nah loꞈ-eu aˇ yamˬ jiˇ-euˬ kʼoeˇ nyiˬ muˇ-aˬ, Uˬ duˬ tahˬ nymˇ nymˇ ma-ahˇ, sahˬ paˬ-ahˇ ya loꞈ piˇ meh.

⁸ Naw maꞈ yawˬ gʼaˬ na luꞈ mi cehˇ tuˆ tehˬ taˬ-awˇ, sahˬ paˬ Yawˇshaˆ kʼaˇ iˇ gaˇ caw teh-awˇ ya loꞈ piˇ meh. Naw maꞈ-euˬ dawˬ peh kʼaˇ laˇ-eu tsawˇ haˬ-ahˇ, naw maꞈ ya sehꞈ meh.”

⁹ Yeˬhawˇyaˬdaˬ-euˬ dawˬ-ahˇ yaw huiˬ yaw mahˇ kʼoeˇ deuˬ naˇ haˬ geuꞈ-awˇ, Jawˇ nah ngeh nah loꞈ-eu aˇ yamˬ jiˇ-euˬ aˬ yawꞈ maꞈ-euˬ tsawˇ haˬ deuˬ hawˇ-eu Jawˇ nah ngeh nah loꞈ-eu doˇ leˇ-euˬ aˬ yawꞈ maꞈ-euˬ tsawˇ haˬ deuˬ-ahˇ, aˬ yawꞈ jawˇ gaˇ sheuˬ laꞈ nehˬ-euˬ meh.

¹⁰ Uˬ duˬ tahˬ nymˇ nymˇ ma laꞈ kʼoeˇ jeˬ hmˬ taˬ-euˬ, sahˬ paˬ Daˬbiˇ-euˬ dehˬ daˬ duˬ hawˇ-eu gahˬ deuˬ aˬ yawꞈ yuˇ doˆ-awˇ, yaw huiˬ yaw mahˇ kʼoeˇ deuˬ-ahˇ biꞈ-euˬ meh.

¹¹ Kʼoeˇ naˇ, mi cehˇ tuˆ tehˬ luꞈ-eu tsawˇ haˬ deuˬ-ahˇ, Uˬ duˬ tahˬ nymˇ nymˇ ma-euˬ mehˬ shi paw bi loꞈ jawˬ-awˇ, sahˬ paˬ-ahˇ bi loꞈ piˇ-euˬ meh.

¹² Kʼoeˇ naˇ, Yeˬhawˇyaˬdaˬ neh Yawˇshaˆ-ahˇ laꞈ nyiˇ sheuˬ doˆ leꞈ-awˇ, shuiˇ uˬ kʼoˆ bi kʼoˆ-awˇ, sahˬ paˬ ka nehˬ ngeh ya gui-eu zahˇ dawˬ kʼoꞈ dawˬ sahˬ boꞈ tiˬ taꞈ biꞈ-awˇ, tsiˇ shehˆ daˆ-awˇ sahˬ paˬ ka nehˬ-euˬ meh. Kʼoeˇ ngeh, tsawˇ haˬ kʼoeˇ deuˬ laꞈ kʼawˆ tehˆ-awˇ, “Sahˬ paˬ ziˇ baw ziˇ za luꞈ-uˇ” lehˇ guˇ-eu meh.

¹³ Kʼoeˇ gaˇ loꞈ luꞈ-eu deuˬ hawˇ-eu kʼoeˇ gaˇ uiˬ laˇ-euˬ tsawˇ haˬ deuˬ lawꞈ gʼa luꞈ gaˇ, sahˬ paˬ ma Aˬdaˬliˇ ya gaˬ ngeh, tsawˇ haˬ uiˬ leˇ taˬ-awˇ jawˇ-eu Uˬ duˬ tahˬ nymˇ nymˇ ma-ahˇ yaw kawˇ-ehˇ le-euˬ meh.

¹⁴ Aˬ yawꞈ haw gʼeh ngeh, zahˇ sahˇ kʼoꞈ jaˆ-eu loꞈ-ehˇ, sahˬ paˬ yaw shuiꞈ kʼoeˇ gʼaˬ Uˬ duˬ tahˬ nymˇ nymˇ ma-euˬ gʼoˆ kʼehˬ-ahˇ yawꞈ luꞈ gaˇ ya mawˇ-euˬ meh. Yaw huiˬ yaw mahˇ deuˬ hawˇ-eu daˇ heh baw-eu tsawˇ haˬ deuˬ, sahˬ paˬ kʼoeˇ gʼaˬ-euˬ tiˬ jawˬ jawˇ luꞈ-awˇ, tsawˇ haˬ kʼoeˇ deuˬ laˬ kʼaˬ cehˇ-eu laꞈ kʼoeˇ, guˇ guˇ-ehˇ daˇ heh baw luꞈ-eu meh. Aˬdaˬliˇ nui ma cawˆ dui dui-eu laꞈ kʼoeˇ, aˬ yawꞈ dm luꞈ-eu mehˬ tsoeˬ cehˬ pyaˬ-awˇ, “Saˇ jaˇ puiˬ-euˬ ngaˇ. Saˇ jaˇ puiˬ-euˬ ngaˇ” lehˇ guˇ-eu meh.

¹⁵ Yeˬhawˇyaˬdaˬ-aˬ, Aˬdaˬliˇ-ahˇ Uˬ duˬ tahˬ nymˇ nymˇ ma laꞈ kʼoeˇ maˬ bi sehꞈ mawꞈ-eu miˇ neh, “Aˬdaˬliˇ-ahˇ heu gaˇ loꞈ luꞈ-eu deuˬ-euˬ yaw kaˬ-ahˇ neh sheuˬ doˆ gʼeh-awˇ, aˬ yawꞈ-ahˇ ka kʼoꞈ-eu lehˇ kʼaˇ leh jeh-eu deuˬ-ahˇ sehꞈ-awˬ” lehˇ, guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ-ahˇ ehˇ nehˬ-euˬ meh.

¹⁶ Kʼoeˇ ngeh, aˬ yawꞈ maꞈ Aˬdaˬliˇ-ahˇ nyehꞈ-awˇ, sahˬ paˬ-euˬ hawˇ nymˇ-ahˇ sheuˬ gʼeh-awˇ, Mahˬ lahˇ kʼehˬ lehˇ kuˇ-eu lahˇ kʼehˬ dawˬ peh sehꞈ dzeh-euˬ meh.

Baˬlaˇ miˬ yehˇ-euˬ uˬ duˬ tahˬ nymˇ laˆ cawˆ nehˬ-euˬ

¹⁷ Sahˬ paˬ hawˇ-eu tsawˇ haˬ kʼoeˇ deuˬ Sahˬpaˬ Miˬyehˇ-euˬ tsawˇ haˬ pyeuꞈ laˇ ni, Sahˬpaˬ Miˬyehˇ hawˇ-eu aˬ yawꞈ maꞈ yaw kaˬ-ahˇ, Yeˬhawˇyaˬdaˬ neh dawˬ ma saˇ jaˇ dzaˬ nehˬ-euˬ meh. Sahˬ paˬ hawˇ-eu miˇ kʼahˬ zaˬ kʼoeˇ deuˬ-euˬ yaw kaˬ-ahˇ kʼawꞈ, aˬ yawꞈ dawˬ ma saˇ jaˇ dzaˬ nehˬ-euˬ meh.

¹⁸ Kʼoeˇ naˇ, miˇ kʼahˬ zaˬ dawˬ tawˆ luꞈ Baˬlaˇ miˬ yehˇ-euˬ uˬ duˬ tahˬ nymˇ-ahˇ le-awˇ laˆ cawˆ leˇ-euˬ meh. Tahˬ paˬ aˬ ma mawˇ kawˇ deuˬ hawˇ-eu lawˇ duˬ deuˬ-ahˇ aˬ yawꞈ maꞈ deh meuˇ-awˇ, Baˬlaˇ miˬyehˇ-euˬ piˇ ma pyeuꞈ-eu Maˬtaˬ-ahˇ lawˇ duˬ mehˬ shi sehꞈ-euˬ meh. Loꞈ-eu guiˇ maꞈ deuˬ-ahˇ Yeˬhawˇyaˬdaˬ kʼehˇ-awˇ, Uˬ duˬ tahˬ nymˇ nymˇ ma -ahˇ bi loꞈ piˇ-euˬ meh.

¹⁹ Kʼoeˇ naˇ, aˬ yawꞈ maˬ ehˇ, aˬ yawꞈ-euˬ yaw huiˬ yaw mahˇ deuˬ maˬ ehˇ, sahˬ paˬ-ahˇ loꞈ piˇ-eu guiˇ maꞈ deuˬ maˬ ehˇ, sahˬ paˬ-euˬ nymˇ-ahˇ loꞈ piˇ-eu guiˇ maꞈ deuˬ maˬ ehˇ, sahˬ paˬ-ahˇ Uˬ duˬ tahˬ nymˇ nymˇ ma-ahˇ neh sahˬ paˬ-euˬ hawˇ nymˇ-ahˇ sheuˬ ha ngeh, miˇ kʼahˬ zaˬ dawˬ tawˆ luꞈ aˬ yawꞈ maꞈ-euˬ mehˬ nah caw teh-euˬ meh. Yawˇshaˆ-aˬ, guiˇ maꞈ deuˬ loꞈ-eu lahˇ kʼehˬ paw neh uˇ leˇ-awˇ, dzoeˬ dzaˬ nuiˇ mahˬ-ahˇ nuiˇ-euˬ meh.

²⁰ Miˇ kʼahˬ zaˬ dawˬ tawˆ luꞈ laˬ kʼaˬ cehˇ dui dui-eu meh. Sahˬ paˬ-euˬ nymˇ-ahˇ Aˬdaˬliˇ-ahˇ sehꞈ-euˬ miˇ neh, meuˬ meuˬ lah-ehˇ ciˬ cuˇ ni jaˆ-eu meh.

²¹ Yawˇshaˆ-aˬ, aˇ kʼoꞈ shiꞈ kʼoꞈ byah ngeh neh Yuˇdaˆ miˇ kʼahˬ-ahˇ uˆ lahˇ-eu sahˬ paˬ pyeuꞈ laˇ-euˬ meh.