2 Sahˬpaˬ 10 - Akha

Aˬhaˆ-euˬ zaˬ deuˬ uˆ deuˬ-ahˇ sehꞈ-euˬ

¹ Saˬmaˬliˆ meuˬ laꞈ kʼoeˇ, sahˬ paˬ Aˬhaˆ-euˬ zaˬ deuˬ uˆ deuˬ shiꞈ tseˇ gʼaˬ jawˇ-eu meh. Meuˬ kʼoeˇ meuˬ-ahˇ uˆ lahˇ-eu deuˬ jawˇ gaˇ maˬ ehˇ, tsawˇ mawˬ tsawˇ kʼaˆ deuˬ-ahˇ maˬ ehˇ, Aˬhaˆ-euˬ zaˬ deuˬ uˆ deuˬ-ahˇ bo saˆ luꞈ-eu deuˬ jawˇ gaˇ maˬ ehˇ, Yeˬhuˇ sahˬ boꞈ boꞈ-awˇ heu loꞈ-ehˇ ehˇ nehˬ-euˬ meh.

² “Naw maꞈ-aˬ, sahˬ paˬ-euˬ zaˬ deuˬ uˆ deuˬ-ahˇ haw luꞈ pyaˆ luꞈ-eu tsawˇ haˬ deuˬ pyeuꞈ-awˇ, mahˬ laˆ lawˬ deuˬ maˬ ehˇ, mahˬ deuˬ maˬ ehˇ, guiˇ deuˆ-eu keu ka deuˬ maˬ ehˇ, ziꞈ dah ni gʼeh-eu meuˬ deuˬ maˬ ehˇ, naw maꞈ-euˬ aˬ laꞈ laꞈ kʼoeˇ jaˆ-eu meh. Kʼoeˇ miˇ neh, sahˬ boꞈ heu taꞈ-ahˇ naw maꞈ ya mawˇ ngeh, heu loꞈ-ehˇ jahˇ-awˬ.

³ Sahˬ paˬ-euˬ zaˬ deuˬ uˆ deuˬ laꞈ kʼoeˇ aˬ cawˬ naˆ maˬ tseˇ gahˇ dzehˬ-eu gʼaˬ-ahˇ sahˬ paˬ ka nehˬ-awˇ, aˬ yawꞈ jawˇ paw pyawˬ-awˇ ngaˬ-ahˇ guiˇ deuˆ-awˬ.”

⁴ Saˬmaˬliˆ meuˬ-ahˇ jawˇ-eu tsawˇ haˬ deuˬ guˆ dui dui laˇ-awˇ, “Sahˬ paˬ Yoˇlamˬ hawˇ-eu sahˬ paˬ Aˬhaˬziˇ aˬ nyaꞈ kʼawꞈ aˬ yawꞈ-ahˇ maˬ ciˬ daˬ peuˬ gaˇ keuˆ-eu-aˬ, aˬ dui maꞈ aˬ yawꞈ-ahˇ aˬ joˆ-ehˇ ciˬ daˬ nmˇ” lehˇ ehˇ-eu meh.

⁵ Kʼoeˇ miˇ neh, sahˬ paˬ-euˬ nymˇ-ahˇ haw luꞈ pyaˆ luꞈ-eu yaw huiˬ yaw mahˇ deuˬ maˬ ehˇ, meuˬ-ahˇ uˆ lahˇ-eu yaw huiˬ yaw mahˇ deuˬ maˬ ehˇ, aˬ yuiꞈ aˬ tsu geuꞈ luꞈ-eu deuˬ maˬ ehˇ, sahˬ paˬ-euˬ zaˬ deuˬ uˆ deuˬ-ahˇ haw luꞈ pyaˆ luꞈ-eu deuˬ maˬ ehˇ, tiˬ gaˇ uiˬ leˇ jiˇ-awˇ, Yeˬhuˇ-ahˇ heu loꞈ-ehˇ bi tsaꞈ gaˬ-iˇ-euˬ meh. “Nga maꞈ nawˬ-euˬ zaˬ kʼaˆ ma. Nawˬ neh kʼaˇ kʼehˇ-euˬ jeˬ mˇ ma. Tsawˇ haˬ tiˬ gʼaˬ-ahˇ-iˬ nga maꞈ sahˬ paˬ maˬ ka nehˬ. Nawˬ-euˬ nui noeˬ tiˬ byah ni geuꞈ-awˬ.”

⁶ Yeˬhuˇ sahˬ boꞈ tiˬ taꞈ boꞈ-awˇ, “Naw maꞈ ngaˇ jawˇ paw pyawˬ-awˇ, ngaˬ-euˬ ehˇ dawˬ geuꞈ ma lehˇ ngeuˇ naˇ, ni shawˬ nah aˇ yamˬ heu yamˬ-ahˇ, sahˬ paˬ Aˬhaˆ-euˬ zaˬ deuˬ uˆ deuˬ-euˬ uˬ duˬ, Yeˬzaˬleˬlaˇ meuˬ-ahˇ ngaˇ jawˇ gaˇ yuˇ keuˆ laꞈ-awˬ” lehˇ, aˬ yawꞈ maꞈ-ahˇ paˇ ehˇ nehˬ-euˬ meh. Sahˬ paˬ Aˬhaˆ-euˬ zaˬ deuˬ uˆ deuˬ shiꞈ tseˇ gʼaˬ-ahˇ Saˬmaˬliˆ meuˬ-ahˇ jawˇ-eu aˬ yuiꞈ aˬ tsu deuˬ haw piˇ-awˇ cu luꞈ-eu meh.

⁷ Yeˬhuˇ-euˬ sahˬ boꞈ-ahˇ ya mawˇ ngeh, aˬ yuiꞈ aˬ tsu kʼoeˇ deuˬ Aˬhaˆ-euˬ zaˬ deuˬ uˆ deuˬ pyeuꞈ-eu kʼoeˇ shiꞈ tseˇ gʼaˬ-ahˇ sehꞈ-awˇ, uˬ duˬ kʼoeˇ deuˬ kʼaˆ kaˇ laꞈ kʼoeˇ shaˇ dawˆ-awˇ, Yeˬzaˬleˬlaˇ meuˬ-ahˇ Yeˬhuˇ jawˇ gaˇ bi sha ha leˇ-euˬ meh.

⁸ Aˬhaˆ-euˬ zaˬ deuˬ uˆ deuˬ-euˬ uˬ duˬ deuˬ yuˇ keuˆ laꞈ-euˬ gaˇ kawˆ Yeˬhuˇ-ahˇ ehˇ gaˬ nehˬ ngeh, “Meuˬ lahˇ kʼehˬ dawˬ peh nyiˬ bymˇ gʼoˆ bymˇ-awˇ, uˬ bya bi jaˆ bya-awˬ” lehˇ dawˬ biꞈ-euˬ meh.

⁹ Uˬ shawˬ keuˆ le ngeh, meuˬ lahˇ kʼehˬ-ahˇ aˬ yawꞈ iˇ-awˇ, kʼoeˇ gaˇ jawˇ-eu tsawˇ haˬ deuˬ-ahˇ, heu loꞈ-ehˇ ehˇ nehˬ-euˬ meh. “Ngaˇ-aˬ, sahˬ paˬ Yoˇlamˬ-ahˇ puiˬ-awˇ sehꞈ-euˬ gʼaˬ ma. Gaˇ kawˆ heu naw maꞈ kʼoeˇ taˆ iˬ baˇ maˬ jaˆ-a. Ehˇ kʼawꞈ ni, zaˬ heu deuˬ-ahˇ sehꞈ-euˬ aˬ suˇ gʼaˬ-a.

¹⁰ Heu-aˬ, Sahˬpaˬ Miˬyehˇ neh kʼaˇ ehˇ taˬ-euˬ yawˬ jeˬ na luꞈ, aˬ diˇ aˬ maˇ pyeuꞈ laˇ-eu gaˇ kawˆ saˇ kiˇ meh. Sahˬpaˬ Miˬyehˇ-aˬ, aˬ yawꞈ gʼaˇ duˬ ngehˬ dah-eu gʼaˬ pyeuꞈ-eu Eˇliˇyaˆ-ahˇ gʼoe-awˇ, aˬ yawꞈ neh ehˇ taˬ-euˬ loꞈ-ehˇ bi pyeuꞈ laˇ-euˬ meh.”

¹¹ Kʼoeˇ naˇ, Yeˬzaˬleˬlaˇ meuˬ-ahˇ jawˇ-eu Aˬhaˆ-euˬ aˇ jeuˬ aˇ ca dawˬ tawˆ luꞈ-ahˇ maˬ ehˇ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ maˬ ehˇ, aˬ yawꞈ-ahˇ gʼoe-eu cawˬ deuˬ-ahˇ maˬ ehˇ, aˬ yawꞈ-euˬ piˇ ma deuˬ-ahˇ maˬ ehˇ, tiˬ gʼaˬ-iˬ maˬ bi dehꞈ ni Yeˬhuˇ neh sehꞈ jiˇ-euˬ meh.

Sahˬ paˬ Aˬhaˬziˇ-euˬ aˬ yuiꞈ aˬ nyiˇ deuˬ-ahˇ sehꞈ-euˬ

¹² Kʼoeˇ naˇ, Saˬmaˬliˆ meuˬ-ahˇ Yeˬhuˇ le-euˬ meh. Gaˇ pehˇ-ahˇ, Yawˇ bo-eu deuˬ-euˬ sehꞈ gʼawˆ lehˇ kuˇ-eu tsahˇ-ahˇ,

¹³ Yuˇdaˆ sahˬ paˬ Aˬhaˬziˇ-euˬ aˬ yuiꞈ aˬ nyiˇ tiˬ deuˬ-ahˇ aˬ yawꞈ tahˬ puˬ-awˇ, “Naw maꞈ aˬ suˇ gʼaˬ te” lehˇ naˇ haˬ ngeh, “Nga maꞈ Aˬhaˬziˇ-euˬ aˬ yuiꞈ aˬ nyiˇ deuˬ ma. Yeˬzaˬleˬlaˇ meuˬ-ahˇ le-awˇ, Sahˬ paˬ-euˬ miˬ zaˬ Yeˬsaˬbeˬlaˇ-euˬ zaˬ deuˬ hawˇ-eu, sahˬ paˬ-euˬ aˬ yuiꞈ aˬ nyiˇ deuˬ jawˇ gaˇ dawˬ deh gʼa leˇ-eu lehˇ laˇ-euˬ ma” lehˇ, aˬ yawꞈ maꞈ ehˇ-eu meh.

¹⁴ “Tsawˇ haˬ heu deuˬ-ahˇ yaw dehꞈ-ehˇ nyehꞈ-awˬ” lehˇ, aˬ yawꞈ-euˬ tsawˇ haˬ deuˬ-ahˇ Yeˬhuˇ dawˬ biꞈ ngeh, aˬ yawꞈ maꞈ-ahˇ yaw dehꞈ-ehˇ nyehꞈ jiˇ-euˬ meh. Kʼoeˇ naˇ, kʼoeˇ gaˇ jaˆ-eu duˬ kʼahˬ tiˬ kʼahˬ-ahˇ nyehꞈ ahˇ yaꞈ-awˇ, kʼoeˇ gaˇ bi jawˇ sehꞈ-euˬ meh. Dawˬ tawˆ luꞈ oeˬ tseˇ nyiꞈ gʼaˬ byah-awˇ, tiˬ gʼaˬ-iˬ maˬ dzeuˇ-iˇ ni shiˇ jiˇ-euˬ meh.

Aˬhaˆ-euˬ aˬ yuiꞈ aˬ nyiˇ dawˬ tawˆ luꞈ-ahˇ sehꞈ jiˇ-euˬ

¹⁵ Mehˬ hu paw Yeˬhuˇ paˇ le leꞈ ngeh, Leˬkaˆ-euˬ aˬ li Yawˇnaˬdehˇ-ahˇ gaˇ pehˇ tahˬ puˬ-euˬ meh. “Aˇ nyaꞈ nui noeˬ tiˬ jeˬ tehꞈ ma. Nawˇ ngaˇ jawˇ paw pyawˬ ma loˇ” lehˇ, Yawˇnaˬdehˇ-ahˇ Yeˬhuˇ naˇ haˬ ngeh, “Pyawˬ ma” lehˇ Yawˇnaˬdehˇ ehˇ-eu meh. Kʼoeˇ naˇ, “Nawˬ-euˬ aˬ laꞈ cawˬ ja leꞈ-awˬ” lehˇ Yeˬhuˇ ehˇ-awˇ, Yawˇnaˬdehˇ-euˬ aˬ laꞈ-ahˇ gʼeu-awˇ, mahˬ laˆ lawˬ kʼoeˇ taˆ gʼeu daˆ nehˬ-euˬ meh.

¹⁶ “Ngaˬ nehˬ-ehˇ laˇ-awˇ, Sahˬpaˬ Miˬyehˇ gʼaˇ duˬ ngaˇ gaˇ aˇ naˆ ni mˇ nga lehˇ haw laˇ sheˇ” lehˇ, Yeˬhuˇ ehˇ-eu meh. Kʼoeˇ naˇ, aˬ yawꞈ nyaꞈ mahˬ laˆ lawˬ tiˬ kawˆ loꞈ-ehˇ dziˬ-awˇ, Saˬmaˬliˆ meuˬ-ahˇ le gʼeh leꞈ-euˬ meh.

¹⁷ Aˬ yawꞈ maꞈ Saˬmaˬliˆ meuˬ-ahˇ le keuˆ ngeh, Aˬhaˆ-euˬ aˬ yuiꞈ aˬ nyiˇ tiˬ gʼaˬ-iˬ maˬ bi dzeuˇ-iˇ ni, Yeˬhuˇ neh sehꞈ jiˇ-euˬ meh. Kʼoeˇ loꞈ-ehˇ pyeuꞈ laˇ tehꞈ-a lehˇ, Eˇliˇyaˆ-ahˇ Sahˬpaˬ Miˬyehˇ neh ehˇ nehˬ taˬ-euˬ jaˆ-eu meh.

Baˬlaˇ miˬ yehˇ-ahˇ uˬ duˬ tahˬ-eu deuˬ-ahˇ sehꞈ-euˬ

¹⁸ Saˬmaˬliˆ meuˬ-ahˇ jawˇ-eu tsawˇ haˬ deuˬ-ahˇ Yeˬhuˇ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Sahˬpaˬ Aˬhaˆ-aˬ, Baˬlaˇ miˬyehˇ-euˬ nui kʼahˇ ui cuiˆ na tehꞈ-ehˇ mˇ byah-euˬ meh. Ngaˇ-aˬ, kʼoeˇ naˆ maˬ tseˇ mˇ byah ma.

¹⁹ Baˬlaˇ miˬ yehˇ gʼaˇ duˬ ngehˬ dah-eu deuˬ dawˬ tawˆ luꞈ maˬ ehˇ, aˬ yawꞈ-ahˇ uˬ duˬ kʼaˇ tahˬ-euˬ deuˬ dawˬ tawˆ luꞈ maˬ ehˇ, aˬ yawꞈ-euˬ piˇ ma deuˬ dawˬ tawˆ luꞈ maˬ ehˇ, kuˇ uiˬ jiˇ-awˬ. Tiˬ gʼaˬ-iˬ maˬ dzeˇ ni bi uiˬ laˇ jiˇ-awˬ. Aˬ jeˬ miˇ neh ehˇ naˇ, Baˬlaˇ miˬ yehˇ-ahˇ huiˬ dui dui-eu lawˇ-eu shehˇ-eu jeˬ ngaˇ lawˇ nehˬ-euˬ lehˇ lehˬ hmˬ taˬ-euˬ miˇ neh, maˬ laˇ-euˬ tsawˇ haˬ aˬ geu gʼaˬ maˬ kaˬ, ya shiˇ tehꞈ-a.” Baˬlaˇ miˬ yehˇ-ahˇ uˬ duˬ kʼaˇ tahˬ-eu tsawˇ haˬ dawˬ tawˆ luꞈ-ahˇ Yeˬhuˇ sehꞈ mawꞈ-euˬ miˇ neh, kʼoeˇ loꞈ-ehˇ tsawˇ gahˇ gahˇ-euˬ meh.

²⁰ Kʼoeˇ naˇ, “Baˬlaˇ miˬ yehˇ-ahˇ taˬ huiˬ taˬ mahˇ-eu laꞈ kʼoeˇ uˬ duˬ ya tahˬ-eu aˇ nah meh lehˇ guˇ gaˬ-awˬ” lehˇ Yeˬhuˇ dawˬ biꞈ ngeh, aˬ yawꞈ maꞈ guˇ-euˬ meh.

²¹ Iˇsaˬleˬlaˆ miˇ kʼahˬ doe ni Yeˬhuˇ tsawˇ haˬ pyehˬ gʼeh-awˇ kʼoeˇ loꞈ-ehˇ bi guˇ gaˬ ngeh, Baˬlaˇ miˬ yehˇ-ahˇ uˬ duˬ kʼaˇ tahˬ-eu tsawˇ haˬ dawˬ tawˆ luꞈ, tiˬ gʼaˬ-iˬ maˬ dzeˇ ni uiˬ laˇ jiˇ-awˇ, Baˬlaˇ miˬ yehˇ-euˬ uˬ duˬ tahˬ nymˇ-ahˇ uˇ leˇ-awˇ, uˬ duˬ tahˬ nymˇ tiˬ teuˇ uˇ byah jiˇ-euˬ meh.

²² Kʼoeˇ naˇ, “Pehˇ kʼahˬ pehˇ mahˇ deuˬ yuˇ doˆ leꞈ-awˇ, uˬ duˬ tahˬ laˇ-euˬ tsawˇ haˬ deuˬ-ahˇ biꞈ-awˬ” lehˇ, muiˬ-eu shawˇ-eu pehˇ kʼahˬ pehˇ mahˇ deuˬ jeˬ hmˬ-eu piˇ ma-ahˇ Yeˬhuˇ ehˇ nehˬ-euˬ meh.

²³ Yeˬhuˇ-aˬ, Leˬkaˆ-euˬ aˬ li Yawˇnaˬdehˇ nehˬ-ehˇ Baˬlaˇ miˬ yehˇ-euˬ uˬ duˬ tahˬ nymˇ-ahˇ uˇ leˇ-awˇ, “Baˬlaˇ miˬ yehˇ-ahˇ uˬ duˬ tahˬ-eu deuˬ maˬ ngeuˇ-ehˇ, Sahˬpaˬ Miˬyehˇ-ahˇ uˬ duˬ tahˬ-eu deuˬ heu gaˇ maˬ ya keuˬ ni, yaw muiˬ paˬ-ehˇ haw-awˬ” lehˇ, tsawˇ haˬ kʼoeˇ deuˬ-ahˇ ehˇ nehˬ-euˬ meh.

²⁴ Kʼoeˇ naˇ, Yeˬhuˇ hawˇ-eu Yawˇnaˬdehˇ aˬ nyaꞈ, Baˬlaˇ miˬ yehˇ-ahˇ, lawˇ-eu shehˇ-eu jeˬ hawˇ-eu miˬ dzaˬ dzah puiˆ-awˇ lawˇ-eu jeˬ lawˇ nehˬ-eu lehˇ, uˬ duˬ tahˬ nymˇ-ahˇ uˇ leˇ-euˬ meh. Tsawˇ haˬ yehꞈ tseˇ gʼaˬ-ahˇ laꞈ nyiˇ paw bi loꞈ-awˇ, heu loꞈ-ehˇ ehˇ nehˬ taˬ-euˬ meh. “Tsawˇ haˬ heu deuˬ dawˬ tawˆ luꞈ-ahˇ naw maꞈ ya sehꞈ jiˇ meh. Tiˬ gʼaˬ na cehˆ dzeuˇ naˇ, bi cehˆ dzeuˇ-euˬ gʼaˬ-ahˇ sehꞈ ma.”

²⁵ Yeˬhuˇ lawˇ-eu shehˇ-eu jeˬ mˇ gʼaˬ-euˬ nehˬ-ehˇ, “Laꞈ kʼoeˇ uˇ leˇ-awˇ tiˬ gʼaˬ-iˬ maˬ bi dzeuˇ-iˇ ni sehꞈ jiˇ-awˬ” lehˇ, loꞈ luꞈ-eu tsawˇ haˬ deuˬ hawˇ-eu yaw huiˬ yaw mahˇ deuˬ-ahˇ dawˬ biꞈ-euˬ meh. Kʼoeˇ ngeh, aˬ yawꞈ maꞈ mi cehˇ gʼeu doˆ-awˇ uˇ leˇ-awˇ, dawˬ tawˆ luꞈ sehꞈ jiˇ-awˇ laꞈ nyiˇ paw gʼeu doˆ leꞈ-euˬ meh. Kʼoeˇ naˇ, uˬ duˬ tahˬ nymˇ kʼoeˇ nymˇ-euˬ laꞈ kʼoeˇ paw jaˆ-eu muiˬ-eu shawˇ-eu jawˇ duˬ-ahˇ aˬ yawꞈ maꞈ uˇ leˇ -euˬ meh.

²⁶ Kʼoeˇ gaˇ jaˆ-eu muiˬ-eu shawˇ-eu kʼawˇ zeuˇ baꞈ doˆ-awˇ, miˬ dzaˬ dzah puiˆ dzeh-euˬ meh.

²⁷ Muiˬ-eu shawˇ-eu kʼawˇ zeuˇ kʼoeˇ zeuˇ maˬ ehˇ, uˬ duˬ tahˬ nymˇ kʼoeˇ nymˇ maˬ ehˇ, aˬ yawꞈ maꞈ neh laˆ cawˆ jiˇ-awˇ, uˬ duˬ tahˬ nymˇ kʼoeˇ nymˇ-ahˇ, iˬ nah keuˆ ni gaˇ nyiˇ iˇ duˬ geuꞈ-euˬ meh.

²⁸ Iˇsaˬleˬlaˆ miˇ kʼahˬ laꞈ kʼoeˇ Baˬlaˇ miˬ yehˇ-ahˇ uˬ duˬ tahˬ-eu jeˬ-ahˇ, Yeˬhuˇ neh kʼoeˇ loꞈ-ehˇ laˆ byoˆ-euˬ meh.

²⁹ Ehˇ kʼawꞈ, Beˬdeˬlaˇ meuˬ hawˇ-eu Daˬ meuˬ laꞈ kʼoeˇ shuiˇ mawˇ neˇ mawˇ kawˇ ka tuˇ-awˇ, Iˇsaˬleˬlaˆ tsawˇ haˬ deuˬ kʼoeˇ gaˇ uˬ duˬ tahˬ ni sheuˬ gʼeh-euˬ gʼaˬ pyeuꞈ-eu sahˬ paˬ Yeˬyawˇbamˬ-ahˇ aˬ yawꞈ dzaw geuꞈ-awˇ, kʼoeˇ loꞈ-ehˇ gʼeh-eu iˬ baˇ aˬ yawꞈ mˇ-euˬ meh.

³⁰ Yeˬhuˇ-ahˇ Sahˬpaˬ Miˬyehˇ ehˇ nehˬ-eu, “Aˬhaˆ-euˬ zaˬ deuˬ uˆ deuˬ-ahˇ ngaˬ neh kʼaˇ bi jahˇ mawꞈ-euˬ yawˬ jeˬ na luꞈ, nawˇ jahˇ nehˬ gʼaˬ-euˬ meh. Kʼoeˇ miˇ neh, nawˬ-euˬ zaˬ nawˬ-euˬ uˆ deuˬ oeˬ ziˇ keuˆ ni Iˇsaˬleˬlaˆ miˇ kʼahˬ-ahˇ sahˬ paˬ ya geuꞈ tehꞈ-a lehˇ, nawˬ-ahˇ ngaˇ saˇ jaˇ dzaˬ-eu ma.”

³¹ Ehˇ kʼawꞈ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ Yeˬhuˇ yaw muiˬ paˬ-ehˇ maˬ caw teh-ehˇ, Iˇsaˬleˬlaˆ tsawˇ haˬ deuˬ iˬ baˇ mˇ ni sheuˬ gʼeh-euˬ gʼaˬ pyeuꞈ-eu Yeˬyawˇbamˬ-ahˇ aˬ yawꞈ dzaw geuꞈ-awˇ yaw dehꞈ dehꞈ-euˬ meh.

Yeˬhuˇ ziˇ jiˇ-euˬ

³² Aˇ nah aˇ yamˬ kʼoeˇ yamˬ laꞈ kʼoeˇ, Sahˬpaˬ Miˬyehˇ-aˬ, Iˇsaˬleˬlaˆ miˇ kʼahˬ nyiˇ le ni jahˇ luꞈ-eu meh. Suˇliˆ sahˬ paˬ Haˬzeˬlaˇ neh, Iˇsaˬleˬlaˆ miˇ kʼahˬ tiˬ paˆ paˆ deuˆ geuꞈ-euˬ meh.

³³ Luˇbeˬ tsawˇ jeuˬ hawˇ-eu Maˬnaˇseˬ tsawˇ jeuˬ tiˬ paˆ jawˇ-eu, Yawˇdaˬ lawˇ baˬ nahˇ ma doˆ kʼehˬ paw dzeˇ baˬ-ahˇ jaˆ-eu Giˇlaˆ miˇ kʼahˬ hawˇ-eu Baˬshaˬ gahˬ kaˬ ahˇ leˇ-ehˇ, laꞈ oˆ paw Aˬnoˬ lawˇ baˬ lawˇ dzeˇ jaˆ-eu Aˬyawˬ meuˬ-ahˇ keuˆ ni, aˬ yawꞈ neh deuˆ geuꞈ-euˬ meh.

³⁴ Yeˬhuˇ neh mˇ-euˬ huiˬ-eu gaˇ deuˬ hawˇ-eu, aˬ yawꞈ neh kʼaˇ mˇ kʼaˇ shaˇ yaꞈ-euˬ jeˬ dawˬ tawˆ luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

³⁵ Aˬ yawꞈ ziˇ jiˇ-awˇ, Saˬmaˬliˆ meuˬ-ahˇ aˬ yawꞈ-ahˇ baꞈ pahˬ-euˬ meh. Aˬ yawꞈ-euˬ aˬ li Yeˬhawˇhaˆ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

³⁶ Yeˬhuˇ-aˬ, Saˬmaˬliˆ meuˬ-ahˇ jawˇ-awˇ, Iˇsaˬleˬlaˆ miˇ kʼahˬ-ahˇ nyiˬ tseˇ yehꞈ kʼoꞈ uˆ lahˇ-euˬ meh.