2 Laˬsaˬbaˬ 9 - Akha

Sawˇlaˬmoˬ jawˇ gaˇ Sheˬba sahˬ paˬ ma laˇ-euˬ

¹ Sawˇlaˬmoˬ tsawˇ myahˇ doˆ-eu gaˇ kawˆ Sheˬba sahˬ paˬ ma ya gaˬ ngeh, naꞈ dui dui-eu dawˬ deuˬ naˇ haˬ-awˇ tsawˇ gahˇ teh haw-eu gʼaˇ duˬ, Yeˬluˇsaˬlehˬ meuˬ-ahˇ le-euˬ meh. Aˬ yawꞈ le ngeh, zaˬ kʼaˆ gʼawˬ mya ni sheuˬ gʼeh-awˇ, dzaˇ muiˇ dzaˇ sawˇ, tsiˇ yaw saw jeˬ, aˇ poeˬ kʼaˆ-eu kʼaˬ lo sehˇ deuˬ hawˇ-eu, shuiˇ gʼawˬ mya ni, law taw neh tawˬ-awˇ le-euˬ meh. Sawˇlaˬmoˬ-ahˇ aˬ yawꞈ tahˬ puˬ ngeh, aˬ yawꞈ kʼaˇ noeˬ doˆ nya-eu yawˬ jeˬ na luꞈ naˇ haˬ-euˬ meh.

² Kʼaˇ naˇ haˬ-euˬ yawˬ jeˬ na luꞈ-ahˇ Sawˇlaˬmoˬ ehˇ kʼoꞈ nehˬ-euˬ meh. Sawˇlaˬmoˬ maˬ ehˇ kʼoꞈ nehˬ nya-eu tiˬ jeˬ-iˬ maˬ jaˆ-a.

³ Sawˇlaˬmoˬ-euˬ zaˬ siˬ tsawˇ gahˇ-ahˇ Sheˬba sahˬ paˬ ma ya gaˬ-awˇ, Sawˇlaˬmoˬ neh tsoˆ taˬ-euˬ sahˬ paˬ-euˬ hawˇ nymˇ-ahˇ kʼawꞈ ya mawˇ-euˬ meh.

⁴ Sawˇlaˬmoˬ-euˬ hawˬ jeh kʼoeˇ taˆ laˆ saˆ taˬ-euˬ dzaˬ dzaˬ dawˇ dawˇ deuˬ-ahˇ maˬ ehˇ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ jawˇ-eu nymˇ deuˬ-ahˇ maˬ ehˇ, sahˬ paˬ-euˬ nymˇ-ahˇ gaˇ mˇ-eu deuˬ hawˇ-eu aˬ yawꞈ maꞈ dm luꞈ-eu dm gʼaˬ dm lmˇ deuˬ-ahˇ maˬ ehˇ, aˬ yawꞈ dzaˬ ngeh dawˇ ngeh hawˬ lahˬ dzaˇ lahˬ lahˬ-eu zaˬ kʼaˆ deuˬ dm luꞈ-eu dm gʼaˬ dm lmˇ deuˬ-ahˇ maˬ ehˇ, Uˬ duˬ tahˬ nymˇ nymˇ ma laꞈ kʼoeˇ aˬ yawꞈ neh lawˇ-eu shehˇ-eu jeˬ-ahˇ maˬ ehˇ, Sheˬba sahˬ paˬ ma ya mawˇ ngeh, saꞈ maˬ gʼawˇ doˆ coeˇ-ehˇ tsoˆ leˇ gaˇ keuˆ ni zahˬ dui dui leˇ-euˬ meh.

⁵ Sahˬ paˬ Sawˇlaˬmoˬ-ahˇ aˬ yawꞈ ehˇ nehˬ-eu, “Ngaˬ-eu miˇ kʼahˬ-ahˇ jawˇ ngeh, nawˬ-euˬ gaˇ kawˆ hawˇ-eu nawˇ zaˬ siˬ tsawˇ gahˇ ahˇ-eu gaˇ kawˆ ya gaˬ-euˬ loꞈ-ehˇ aˬ diˇ aˬ maˇ ngeuˇ law hawˇ nga. Ngaˬ-euˬ gʼawˇ mawˇ laˇ keuˆ-awˇ maˬ mawˇ duˬ kʼoeˇ keuˆ ni, aˬ cawˬ ehˇ gaˇ ngaˇ maˬ jah-aˬ.

⁶ Nawˬ-euˬ zaˬ siˬ tsawˇ gahˇ gaˇ kawˆ tiˬ paˆ tehꞈ-ehˇ kʼawꞈ ngaˇ maˬ ya gaˬ law hawˇ ngaˬ. Nawˇ-aˬ, aˬ cawˬ ja-eu naˆ maˬ tseˇ zaˬ siˬ tsawˇ gahˇ ahˇ law hawˇ nga.

⁷ Aˬ myah luꞈ nawˬ nehˬ-ehˇ jawˇ-awˇ, zaˬ siˬ tsawˇ gahˇ ahˇ-eu nawˬ-euˬ dawˬ-ahˇ ya gaˬ luꞈ-eu nawˬ-eu gaˇ mˇ-eu tsawˇ haˬ deuˬ aˇ naˆ ni guiˬ lahˬ huiˬ-eu nga.

⁸ Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ. Aˬ yawꞈ-euˬ tsawˇ myahˇ uˬ moˆ nawˬ-ahˇ sahˬ paˬ geuꞈ-awˇ bi uˆ lahˇ-eu laꞈ kʼoeˇ, aˬ yawꞈ nawˬ-ahˇ aˇ naˆ ni nui kʼahˇ shiˇ-eu gaˇ kawˆ bi siˬ bi mawˇ-euˬ meh. Iˇsaˬleˬlaˆ tsawˇ jeuˬ-ahˇ aˬ yawꞈ gaˬ-awˇ, aˬ yawꞈ maꞈ-ahˇ aˬ myah luꞈ ngehˬ gʼeh dah teˬ mawꞈ-eu miˇ neh, zahˇ dawˬ kʼoꞈ dawˬ hawˇ-eu yaw tsaˬ yaw dawˇ jeˬ-ahˇ nawˇ bi mˇ byah-eu gʼaˇ duˬ, aˬ yawꞈ maꞈ kʼoeˇ taˆ nawˬ-ahˇ sahˬ paˬ bi geuꞈ-euˬ nga.”

⁹ Aˬ yawꞈ neh yuˇ laꞈ-euˬ laꞈ sawˬ deuˬ pyeuꞈ-eu shuiˇ nyiˬ heˇ oeˬ yaˇ jawꞈ-i dzehˬ ni maˬ ehˇ, dzaˇ muiˇ dzaˇ sawˇ deuˬ, tsiˇ yaw saw jeˬ hawˇ-eu aˇ poeˬ kʼaˆ-eu kʼaˬ lo sehˇ deuˬ maˬ ehˇ, sahˬ paˬ Sawˇlaˬmoˬ-ahˇ aˬ yawꞈ biꞈ-euˬ meh. Sheˬba sahˬ paˬ ma neh sahˬ paˬ Sawˇlaˬmoˬ-ahˇ biꞈ-euˬ loꞈ-ehˇ muiˬ-euˬ dzaˇ muiˇ dzaˇ sawˇ hawˇ-eu tsiˇ yaw saw jeˬ miˇ tsaˬ kʼoeˇ taˆ tiˬ gaˇ-iˬ maˬ jaˆ-a.

¹⁰ Awˇpiˇlaˆ miˇ kʼahˬ-ahˇ neh shuiˇ tawˬ kʼoꞈ laꞈ-euˬ sahˬ paˬ Hiˇlamˬ hawˇ-eu sahˬ paˬ Sawˇlaˬmoˬ-euˬ tsawˇ haˬ kʼoeˇ deuˬ, aˬ laˬ guˬ lehˇ kuˇ-eu shuˬ liˇ daˇ kawˬ tiˬ jeˬ hawˇ-eu aˇ poeˬ kʼaˆ-eu kʼaˬ lo sehˇ deuˬ kʼawꞈ tawˬ kʼoꞈ laꞈ-euˬ meh.

¹¹ Sahˬ paˬ Sawˇlaˬmoˬ-aˬ, daˇ kawˬ kʼoeˇ deuˬ-ahˇ, Uˬ duˬ tahˬ nymˇ nymˇ ma hawˇ-eu aˬ yawꞈ jawˇ-eu sahˬ paˬ-euˬ hawˇ nymˇ ahˇ dawˬ dzm tsoꞈ gaˇ maˬ ehˇ, caˇ dawˬ caˇ-eu tsawˇ haˬ deuˬ zmˬ-eu gʼaˇ duˬ, deuˇ-mˬ deuˬ jahˇ gaˇ maˬ ehˇ, geuꞈ-euˬ meh.

¹² Sahˬ paˬ Sawˇlaˬmoˬ-aˬ, Sheˬba sahˬ paˬ ma neh aˬ yawꞈ-ahˇ laꞈ sawˬ biꞈ nehˬ-euˬ loꞈ-ehˇ, aˬ yawꞈ kʼawꞈ laꞈ sawˬ paˇ biꞈ kʼoꞈ nehˬ-euˬ uˬ taꞈ, Sheˬba sahˬ paˬ ma kʼaˇ shaˇ-eu yawˬ jeˬ na luꞈ aˬ yawꞈ biꞈ nehˬ-euˬ meh. Kʼoeˇ naˇ, Sheˬba sahˬ paˬ ma hawˇ-eu aˬ yawꞈ-euˬ zaˬ kʼaˆ deuˬ Sheˬba miˇ kʼahˬ-ahˇ gʼoꞈ-iˇ-euˬ meh.

Sahˬ paˬ Sawˇlaˬmoˬ-euˬ pyuˇ shuiˇ myawˬ gahˬ

¹³ Aˬ yawꞈ kʼoꞈ yawꞈ sahˬ paˬ Sawˇlaˬmoˬ neh za-euˬ shuiˇ-aˬ, tiˬ muiˇ smˬ heˇ jawꞈ-i ehˇ gʼaˬ ni byah-eu meh.

¹⁴ Baw gaꞈ deuˬ hawˇ-eu jeˬ gaꞈ jeˬ kʼa gʼeh-eu deuˬ neh kawˬ doˆ nehˬ-euˬ deuˬ maˬ gui ahˇ-ehˇ, kʼoeˇ myaˆ ni gʼeh-eu shuiˇ aˬ yawꞈ za-euˬ meh. Aˬleˬbyaˇ sahˬ paˬ deuˬ hawˇ-eu, Iˇsaˬleˬlaˆ miˇ kʼahˬ laꞈ kʼoeˇ jaˆ-eu meuˬ deuˬ-ahˇ uˆ lahˇ-eu yaw huiˬ yaw mahˇ deuˬ kʼawꞈ, aˬ yawꞈ-ahˇ pyuˇ hawˇ-eu shuiˇ yuˇ ha laˇ-eu meh.

¹⁵ Sawˇlaˬmoˬ-aˬ, dehˬ daˬ duˬ yaw huiˬ nyiˬ yaˇ hmˬ jahˇ-awˇ, aˬ yawꞈ hmˬ yawꞈ-ahˇ diˬ puˬ neh tehˆ-euˬ shuiˇ oeˬ jawꞈ-i dzehˬ ni yaw-euˬ meh.

¹⁶ Dehˬ daˬ duˬ yaw nyiˇ smˬ yaˇ hmˬ paˇ jahˇ-awˇ, aˬ yawꞈ hmˬ yawꞈ-ahˇ diˬ puˬ neh tehˆ-euˬ shuiˇ nyiˬ jawꞈ-i ehˇ gʼaˬ ni yaw-euˬ meh. Dehˬ daˬ duˬ kʼoeˇ deuˬ-ahˇ, Leˬbaˬnoˬ sahˬ kʼaˆ lehˇ kuˇ-euˬ Nymˇ ma lawˆ laꞈ kʼoeˇ aˬ yawꞈ bi jaˆ-euˬ meh.

¹⁷ Sahˬ paˬ Sawˇlaˬmoˬ-aˬ, dzoeˬ dzaˬ nuiˇ mahˬ mahˬ ma tiˬ mahˬ ya ma juiˇ neh jahˇ-awˇ, maˇ jawˆ ni gʼeh-eu shuiˇ yaw-euˬ meh.

¹⁸ Nuiˇ mahˬ kʼoeˇ mahˬ-ahˇ daˆ leˇ-eu dawˬ dzm dawˬ tehꞈ koꞈ tehꞈ baw-awˇ, shuiˇ yaw taˬ-euˬ aˬ kuiˇ cawˬ taˬ duˬ tiˬ hmˬ jahˇ tsoꞈ taˬ-euˬ meh. Nuiˇ mahˬ-euˬ kʼoeˇ paˆ ma paˆ-ehˇ aˬ laꞈ baꞈ daˆ duˬ jaˆ-awˇ, aˇ laˬ jaˬ shiˇ mawˇ kawˇ tiˬ paw dzeˇ paˆ tiˬ kawˇ yawꞈ luꞈ-eu meh.

¹⁹ Dawˬ dzm dawˬ tehꞈ aˬ yawꞈ tehꞈ yawꞈ-euˬ kʼoeˇ paˆ ma paˆ-ehˇ aˇ laˬ jaˬ shiˇ mawˇ kawˇ tiˬ paw tiˬ kawˇ yawꞈ luꞈ-awˇ, aˇ laˬ jaˬ shiˇ mawˇ kawˇ kʼoeˇ dawˬ tawˆ luꞈ tseˇ nyiꞈ kawˇ byah-eu meh. Nuiˇ mahˬ kʼoeˇ mahˬ-ahˇ duˇ-eu nuiˇ mahˬ miˇ kʼahˬ tiˬ kʼahˬ-ahˇ-iˬ maˬ jaˆ haw-aˬ.

²⁰ Sahˬ paˬ Sawˇlaˬmoˬ-euˬ naˬ bo dawˬ tawˆ luꞈ shuiˇ naˬ bo tehꞈ-ehˇ pyeuꞈ-awˇ, Leˬbaˬnoˬ sahˬ kʼaˆ lehˇ kuˇ-eu Nymˇ ma lawˆ-ahˇ kʼaˇ jaˆ-eu mˇ myawˬ keu ka dawˬ tawˆ luꞈ, maˇ jawˆ ni gʼeh-eu shuiˇ neh tehꞈ-ehˇ jahˇ taˬ-euˬ meh. Sawˇlaˬmoˬ uˆ lahˇ-eu aˇ nah aˇ yamˬ laꞈ kʼoeˇ, pyuˇ-ahˇ aˇ poeˬ kʼaˆ-eu jeˬ lehˇ maˬ sawˇ-a.

²¹ Sahˬ paˬ Hiˇlamˬ-euˬ saˇ baoˬ aˇ maꞈ nehˬ-ehˇ iˇ luꞈ laˇ luꞈ-eu iˬ ma laˆ shaˆ-ahˇ cah-eu saˇ baoˬ aˇ maꞈ tiˬ maꞈ aˬ yawꞈ jawˇ-eu meh. Aˬ yawꞈ-euˬ saˇ baoˬ kʼoeˇ maꞈ, smˇ kʼoꞈ tiˬ poˆ gʼoꞈ doˆ laˇ-awˇ, shuiˇ, pyuˇ, ya ma juiˇ hawˇ-eu aˇ myoꞈ deuˬ tawˬ kʼoꞈ laꞈ-eu meh.

²² Sahˬ paˬ Sawˇlaˬmoˬ-aˬ, miˇ tsaˬ kʼoeˇ taˆ kʼaˇ jawˇ-eu sahˬ paˬ dawˬ tawˆ luꞈ naˆ maˬ tseˇ smˇ muiˬ muiˬ dui dui-awˇ, zaˬ siˬ tsawˇ gahˇ ahˇ dzehˬ-eu meh.

²³ Miˬyehˇ neh aˬ yawꞈ-ahˇ biꞈ taˬ-euˬ yaw muiˬ yaw doeˇ tseˇ paˆ nya-eu zaˬ siˬ tsawˇ gahˇ-ahˇ, sahˬ paˬ kʼoeˇ deuˬ gaˬ mawꞈ-eu miˇ neh, aˬ yawꞈ jawˇ gaˇ laˇ-awˇ naˇ haˬ laˇ-euˬ meh.

²⁴ Aˬ yawꞈ maꞈ yawˬ gʼaˬ na luꞈ, shuiˇ hawˇ-eu pyuˇ myawˬ guˇ, pehˇ kʼahˬ pehˇ mahˇ, guiˇ deuˆ-eu keu ka, tsiˇ yaw saw, dzaˇ muiˇ dzaˇ sawˇ, mahˬ hawˇ-eu mahˬ shaˆ lawˬ, heu loꞈ-ehˇ gʼeh-eu laꞈ sawˬ deuˬ Sawˇlaˬmoˬ jawˇ gaˇ yuˇ laꞈ nehˬ-eu meh. Aˬ yawꞈ kʼoꞈ yawꞈ, kʼoeˇ loꞈ-ehˇ laꞈ sawˬ biꞈ ha laˇ-eu meh.

²⁵ Sahˬ paˬ Sawˇlaˬmoˬ-aˬ, aˬ yawꞈ-euˬ mahˬ laˆ lawˬ deuˬ hawˇ-eu mahˬ deuˬ taˬ-eu gʼaˇ duˬ mahˬ mahˬ kuˆ oeˬ heˇ kuˆ jaˆ-awˇ, dziˬ mahˬ tiˬ muiˇ nyiˬ heˇ mawˇ jawˇ-eu meh. Yeˬluˇsaˬlehˬ meuˬ laꞈ kʼoeˇ tiˬ deuˬ bi jawˇ-awˇ, nui deuˬ-ahˇ meuˬ gʼawˬ mya meuˬ laꞈ kʼoeˇ bi jawˇ-euˬ meh.

²⁶ Uˇpaˬlaˇ lawˇ baˬ-ahˇ neh Piˇliˇtiˆ miˇ kʼahˬ hawˇ-eu Iˇjiˇtuˆ miˇ kʼahˬ-ahˇ keuˆ ni jaˆ-eu miˇ kʼahˬ deuˬ-ahˇ uˆ lahˇ-eu sahˬ paˬ dawˬ tawˆ luꞈ kʼoeˇ taˆ, huiˬ dzehˬ-eu sahˬ paˬ-aˬ, Sawˇlaˬmoˬ pyeuꞈ-eu meh.

²⁷ Aˬ yawꞈ uˆ lahˇ luꞈ-eu aˇ nah aˇ yamˬ-ahˇ, Yeˬluˇsaˬlehˬ meuˬ laꞈ kʼoeˇ pyuˇ kʼaˬ lo loꞈ-ehˇ byehˬ-awˇ, shuˬ liˇ daˇ kawˬ kʼawꞈ, siˬ guˬ daˇ kawˬ loꞈ-ehˇ jaˆ myaˬ dui dui-eu meh.

²⁸ Muˬ saˬ liˬ miˇ kʼahˬ hawˇ-eu miˇ kʼahˬ yawˬ kʼahˬ na luꞈ-ahˇ jawˇ-eu mahˬ deuˬ aˬ yawꞈ zeuˇ geuꞈ-euˬ meh.

Sawˇlaˬmoˬ ziˇ jiˇ-euˬ

²⁹ Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Naˬdaˬ-euˬ Laˬsaˬbaˬ sahˬ boꞈ laꞈ kʼoeˇ maˬ ehˇ, Shiˇloˬ meuˬ-ahˇ jawˇ-eu Aˬhiˇyaˬ neh Miˬyehˇ gʼaˇ duˬ ngehˬ dah-euˬ sahˬ boꞈ laꞈ kʼoeˇ maˬ ehˇ, Miˬyehˇ gʼaˇ duˬ ngehˬ dah-eu Iˇdoˬ neh Iˇsaˬleˬlaˆ sahˬ paˬ Yeˬyawˇbamˬ-euˬ gaˇ kawˆ-ahˇ taꞈ leˇ-awˇ Miˬyehˇ gʼaˇ duˬ ngehˬ dah-eu laꞈ kʼoeˇ boꞈ taˬ-euˬ sahˬ boꞈ laꞈ kʼoeˇ maˬ ehˇ, Sawˇlaˬmoˬ ziˇ jiˇ ngeh keuˆ ni dehꞈ yaꞈ jawˇ yaꞈ-euˬ gaˇ kawˆ dzeˇ-eu deuˬ-ahˇ, aˇ dahˬ beh gaˇ neh aˇ saˬ saˬ gaˇ keuˆ ni boꞈ taˬ-euˬ meh.

³⁰ Sawˇlaˬmoˬ-aˬ, Yeˬluˇsaˬlehˬ meuˬ-ahˇ jawˇ-awˇ, Iˇsaˬleˬlaˆ miˇ kʼahˬ-ahˇ oeˬ tseˇ kʼoꞈ uˆ lahˇ-euˬ meh.

³¹ Aˬ yawꞈ ziˇ jiˇ-awˇ, Daˬbiˇ-euˬ meuˬ laꞈ kʼoeˇ baꞈ pahˬ nehˬ-euˬ meh. Kʼoeˇ naˇ, aˬ yawꞈ-euˬ aˬ li Leˬhawˇbamˬ gʼaˬ aˬ yawꞈ-euˬ dah zaˇ sahˬ paˬ geuꞈ-euˬ meh.