2 Laˬsaˬbaˬ 7 - Akha

Uˬ duˬ tahˬ nymˇ nymˇ ma Miˬyehˇ-ahˇ a nehˬ-euˬ

¹ Sahˬ paˬ Sawˇlaˬmoˬ guiˬ lahˬ shaˇ gʼaˬ ngeh, mˬ kʼoeˇ taˆ neh miˬ dzaˬ oe ka-awˇ, lawˇ taˬ shehˇ taˬ-euˬ jeˬ-ahˇ puiˆ-euˬ meh. Uˬ duˬ tahˬ nymˇ nymˇ ma laꞈ kʼoeˇ kʼawꞈ, Sahˬpaˬ Miˬyehˇ-euˬ yaw shehꞈ kʼahˬ sehˇ bya byah jiˇ-euˬ meh.

² Uˬ duˬ tahˬ nymˇ nymˇ ma laꞈ kʼoeˇ yaw shehꞈ bya byah taˬ-euˬ miˇ neh, piˇ ma deuˬ maˬ uˇ leˇ nya-a.

³ Mˬ kʼoeˇ taˆ neh miˬ dzaˬ ga le-awˇ, Uˬ duˬ tahˬ nymˇ nymˇ ma laꞈ kʼoeˇ yaw shehꞈ bya gaˇ Iˇsaˬleˬlaˆ tsawˇ haˬ deuˬ ya mawˇ ngeh, miˇ tsa awˆ byaˆ-awˇ, Miˬyehˇ-ahˇ uˬ duˬ tahˬ-eu laꞈ kʼoeˇ, aˬ yawꞈ-euˬ guiˬ lahˬ hawˇ-eu mˬ maˬ maˬ byaˆ zaˇ ziˇ ziꞈ-eu aˬ yawꞈ-euˬ gʼoeˇ-eu gaˬ-eu jeˬ-ahˇ ja ceuˬ-euˬ meh.

⁴ Kʼoeˇ naˇ, Sawˇlaˬmoˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ Sahˬpaˬ Miˬyehˇ-ahˇ lawˇ nehˬ shehˇ nehˬ-euˬ meh.

⁵ Mawˇ neˇ nyiˬ muiˇ nyiˬ heˇ mawˇ hawˇ-eu, yawˇ tiˬ seh nyiˬ muiˇ mawˇ aˬ yawꞈ sehꞈ-awˇ, cawˬ cawˬ taꞈ-eu lawˇ-eu jeˬ lawˇ nehˬ-euˬ meh. Kʼoeˇ loꞈ-ehˇ, aˬ yawꞈ hawˇ-eu Iˇsaˬleˬlaˆ tsawˇ haˬ deuˬ, Sahˬpaˬ Miˬyehˇ-ahˇ Uˬ duˬ tahˬ nymˇ nymˇ ma a nehˬ-euˬ meh.

⁶ Piˇ ma deuˬ-aˬ, aˬ yawꞈ maꞈ gʼaˇ duˬ lehˬ hmˬ taˬ-euˬ jawˇ duˬ-ahˇ yawꞈ-euˬ meh. Leˬbiˇ tsawˇ haˬ deuˬ kʼawꞈ, aˬ yawꞈ maꞈ jawˇ paw mehˬ shiˬ pyawˇ-ehˇ yawꞈ-awˇ, sahˬ paˬ Daˬbiˇ neh Sahˬpaˬ Miˬyehˇ-ahˇ kʼaˇ ja ceuˬ ngeh jahˇ-euˬ loꞈ-ehˇ, sahˬ paˬ Daˬbiˇ neh biꞈ taˬ yaꞈ-euˬ deuˇ-mˬ cehˇ lehˇ,diˬ-awˇ ciˆ-awˇ, “Aˬ yawꞈ-euˬ Gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ-eu meh” lehˇ ehˇ-eu caˇ dawˬ kʼoeˇ bymˇ caˇ-awˇ, Sahˬpaˬ Miˬyehˇ-ahˇ ja ceuˬ-euˬ meh. Tsawˇ haˬ dawˬ tawˆ luꞈ yawꞈ-awˇ jawˇ ngeh, piˇ ma deuˬ daˇ heh baw-euˬ meh.

⁷ Sawˇlaˬmoˬ-aˬ, Uˬ duˬ tahˬ nymˇ nymˇ ma-euˬ lahˇ laꞈ kʼoeˇ jaˆ-eu pu kaˬ gʼahˇ ceh kʼoeˇ tsahˇ-ahˇ mˇ shawˇ-awˇ, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ maˬ ehˇ, dzaˬ la gʼo cehˇ lawˇ-eu jeˬ maˬ ehˇ, cawˬ cawˬ taꞈ-eu lawˇ-eu jeˬ lawˇ gaˇ sehꞈ-euˬ jeˬ zaˬ-euˬ tsiˇ deuˬ maˬ ehˇ, kʼoeˇ gaˇ lawˇ-euˬ meh. Lawˇ-eu jeˬ kʼoeˇ deuˬ dawˬ tawˆ luꞈ guiˬ shuiˇ neh jahˇ taˬ-euˬ lawˇ duˬ kʼoeˇ hmˬ kʼoeˇ taˆ lawˇ kʼaˇ maˬ deˇ-eu miˇ neh, aˬ yawꞈ kʼoeˇ loꞈ-ehˇ lawˇ-euˬ meh.

⁸ Sawˇlaˬmoˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ, shiꞈ nah keuˆ ni Sehˬ gʼawˆ-euˬ Bawˬ-iˬ gʼeh-euˬ meh. Laꞈ taˆ paw pyawˬ-ahˇ jaˆ-eu Haˬmaˆ gʼaˬ lahˇ-ahˇ keuˆ ni jawˇ-eu tsawˇ haˬ deuˬ hawˇ-eu, laꞈ oˆ paw Iˇjiˇtuˆ miˇ kʼahˬ-euˬ miˇ kaˬ-ahˇ keuˆ ni jawˇ-eu tsawˇ haˬ deuˬ uiˬ laˇ taˬ-awˇ, tsawˇ haˬ aˇ maꞈ myaˬ dui dui-eu meh.

⁹ Aˬ yawꞈ maꞈ lawˇ duˬ Miˬyehˇ-ahˇ a nehˬ-euˬ shiꞈ nah ga-awˇ, bawˬ-iˬ shiꞈ nah paˇ gʼeh-euˬ meh. Aˇ saˬ saˬ ngeh nah, aˇ saˬ saˬ-eu bawˬ-iˬ gʼeh-euˬ meh.

¹⁰ Aˇ saˬ saˬ-eu bawˬ-iˬ gʼeh gʼaˬ-awˇ yawˬ nah yawˬ-aˬ , ba la shiꞈ siˬ tiˬ siˬ nyiˬ tseˇ smˬ nah tiˬ nah meh. Kʼoeˇ ngeh nah-ahˇ, Sawˇlaˬmoˬ Iˇsaˬleˬlaˆ tsawˇ haˬ deuˬ-ahˇ bi gʼoꞈ-iˇ-euˬ meh. Sahˬpaˬ Miˬyehˇ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ jeuˬ-ahˇ maˬ ehˇ, Daˬbiˇ-ahˇ maˬ ehˇ, Sawˇlaˬmoˬ-ahˇ maˬ ehˇ, aˬ yawꞈ neh biꞈ-euˬ guiˬ lahˬ yaw dzahˇ deuˬ baˬ da neh aˬ yawꞈ maꞈ laˬ kʼaˬ cehˇ dui dui-euˬ meh.

Sawˇlaˬmoˬ jawˇ gaˇ Miˬyehˇ paˇ oe-euˬ

¹¹ Uˬ duˬ tahˬ nymˇ nymˇ ma hawˇ-eu sahˬ paˬ jawˇ-eu hawˇ nymˇ Sawˇlaˬmoˬ tsoˆ gʼaˬ-awˇ, kʼoeˇ gaˇ taꞈ leˇ-eu gaˇ deuˬ aˬ yawˬ neh noeˬ taˬ-euˬ loꞈ-ehˇ yaw muiˬ paˬ-ehˇ mˇ luiˆ shaˇ luiˆ gʼaˬ jiˇ ngeh,

¹² uˬ ciꞈ paw Sahˬpaˬ Miˬyehˇ aˬ yawꞈ jawˇ gaˇ oe-euˬ meh. Sawˇlaˬmoˬ-ahˇ aˬ yawꞈ ehˇ-eu, “Nawˬ-euˬ guiˬ lahˬ shaˇ dawˬ-ahˇ ngaˇ ya gaˬ-awˇ, Uˬ duˬ tahˬ nymˇ nymˇ ma heu ngaˬ-ahˇ lawˇ-eu shehˇ-eu jawˇ duˬ bi pyeuꞈ-eu ngaˇ nui ma tsaˬ-eu ma.

¹³ Uˬ yehˇ maˬ bi yehˇ le-eu gʼaˇ duˬ ngaˇ mˬ piˬ tehˬ ngeh maˬ ehˇ, dzaˬ la gʼo cehˇ bi laˆ cawˆ-eu gʼaˇ duˬ ngaˇ nyehˇ bahˇ pyehˬ gʼeh leꞈ ngeh maˬ ehˇ, ngaˬ-euˬ tsawˇ haˬ deuˬ kʼoeˇ taˆ naˇ gawˇ gawˇ ma bi keuˆ le ngeh maˬ ehˇ,

¹⁴ aˬ yawꞈ maꞈ ngaˬ-ahˇ guiˬ lahˬ shaˇ-eu laꞈ kʼoeˇ, aˬ yawꞈ maꞈ neh mˇ-euˬ yaw haiˬ jeˬ-ahˇ noeˬ poˆ-awˇ byehˇ dzeh naˇ, aˬ yawꞈ maꞈ-euˬ shaˇ dawˬ-ahˇ mˬ kʼoeˇ taˆ ngaˇ naˇ haˬ-awˇ, aˬ yawꞈ maꞈ-ahˇ iˬ baˇ pyehˬ nehˬ-eu laꞈ kʼoeˇ, aˬ yawꞈ maꞈ-euˬ miˇ kʼahˬ paˇ bi baw paˇ bi za le ma.

¹⁵ Uˬ duˬ tahˬ nymˇ nymˇ ma heu-ahˇ ngaˇ maˬ tsehˆ leˇ ni haw-awˇ, heu gaˇ shaˇ-eu shaˇ dawˬ deuˬ ya gaˬ ni aˬ myah luꞈ naˬ bawˇ ciˬ kʼmˇ taˬ ma.

¹⁶ Aˬ jeˬ miˇ neh ehˇ naˇ, nymˇ heu nymˇ mˬ maˬ maˬ byaˆ zaˇ ziˇ ngaˬ-ahˇ uˬ duˬ tahˬ-eu jawˇ duˬ pyeuꞈ ni, ngaˬ neh tseˇ doˆ taˬ-awˇ, mˇ shawˇ taˬ-euˬ ma. Nymˇ heu nymˇ-ahˇ ngaˇ aˬ myah luꞈ haw piˇ loꞈ piˇ ma.

¹⁷ Nawˬ da Daˬbiˇ loꞈ-ehˇ, nawˇ ngaˬ-ahˇ saˇ jaˇ ziꞈ-eu laꞈ kʼoeˇ uˬ duˬ tahˬ -awˇ, ngaˬ-euˬ zahˇ dawˬ kʼoꞈ dawˬ deuˬ-ahˇ caw teh-eu laꞈ kʼoeˇ, ngaˬ neh nawˬ-ahˇ dawˬ kʼaˇ biꞈ taˬ-euˬ yawˬ jeˬ na luꞈ mˇ naˇ,

¹⁸ Iˇsaˬleˬlaˆ miˇ kʼahˬ-ahˇ aˬ yawꞈ-euˬ zaˬ deuˬ uˆ deuˬ aˬ myah luꞈ ya uˆ lahˇ tehꞈ-a lehˇ nawˬ da Daˬbiˇ-ahˇ ngaˬ neh dzaˬ taˬ-euˬ saˇ jaˇ dawˬ kʼoeˇ dawˬ-ahˇ ngaˇ ziꞈ ma.

¹⁹ Ehˇ kʼawꞈ, nawˇ hawˇ-eu nawˬ-euˬ tsawˇ haˬ deuˬ, ngaˬ-euˬ zahˇ dawˬ kʼoꞈ dawˬ deuˬ hawˇ-eu ngaˬ neh biꞈ taˬ-euˬ dawˬ deuˬ-ahˇ maˬ naˇ haˬ geuꞈ ni miˬ yehˇ nui deuˬ-ahˇ uˬ duˬ tahˬ naˇ,

²⁰ ngaˬ neh naw maꞈ-ahˇ biꞈ taˬ-euˬ miˇ kʼahˬ heu kʼahˬ laꞈ kʼoeˇ neh naw maꞈ-ahˇ ngaˇ teh dzeh-awˇ, ngaˬ-ahˇ uˬ duˬ tahˬ-eu jawˇ duˬ bi pyeuꞈ-eu gʼaˇ duˬ ngaˬ neh mˇ shawˇ taˬ-euˬ Uˬ duˬ tahˬ nymˇ nymˇ ma heu nymˇ-ahˇ ngaˇ byehˇ dzeh ma. Uˬ duˬ tahˬ nymˇ nymˇ ma heu nymˇ-ahˇ tsawˇ jeuˬ dawˬ tawˆ luꞈ ja bu ja doeˇ-awˇ, kʼaˇ jahˇ mawꞈ-eu jahˇ tehꞈ-a.

²¹ “Nymˬ-mˇ aˇ yamˬ laꞈ kʼoeˇ, Uˬ duˬ tahˬ nymˇ nymˇ ma heu nymˇ-ahˇ taˬ huiˬ taˬ mahˇ dui dui luꞈ meh. Ehˇ kʼawꞈ, aˬ kaˇ heu gaˇ kʼaˇ iˇ kʼaˇ laˇ tsehˆ-eu tsawˇ haˬ deuˬ zahˬ dui dui leˇ-eu laꞈ kʼoeˇ, ‘Aˬ jeˬ miˇ neh miˇ kʼahˬ heu kʼahˬ hawˇ-eu Uˬ duˬ tahˬ nymˇ nymˇ ma heu nymˇ-ahˇ Sahˬpaˬ Miˬyehˇ heu loꞈ-ehˇ jahˇ nehˬ-euˬ ta’ lehˇ ya ehˇ gaˇ keuˆ tehꞈ-a.

²² Kʼoeˇ ngeh, aˬ yawꞈ maꞈ-ahˇ aˬ cawˬ heu loꞈ-ehˇ ehˇ kʼoꞈ nehˬ tehꞈ-a. ‘Aˬ yawꞈ maꞈ-euˬ aˬ poeˬ aˬ bawˇ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-euˬ aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ yawꞈ maꞈ byehˇ dzeh-euˬ miˇ neh, kʼoeˇ loꞈ-ehˇ jahˇ nehˬ gaˇ ya daˬ-euˬ meh. Aˬ yawꞈ maꞈ miˬ yehˇ nui deuˬ-ahˇ gʼoe-awˇ uˬ duˬ tahˬ-euˬ meh. Kʼoeˇ miˇ neh, heu loꞈ-ehˇ gʼeh-eu luˬ-iˇ seˇ-iˇ-euˬ jeˬ aˬ yawꞈ maꞈ kʼoeˇ taˆ bi keuˆ le-euˬ meh’ lehˇ ehˇ kʼoꞈ nehˬ tehꞈ-a.”