2 Laˬsaˬbaˬ 4 - Akha

Uˬ duˬ tahˬ nymˇ nymˇ ma laꞈ kʼoeˇ zmˬ-eu keu ka deuˬ

¹ Sahˬ paˬ Sawˇlaˬmoˬ-aˬ, ngaˬ lmˇ oeˬ bawˬ byah-awˇ, nyiˬ lmˇ nui paˆ goˇ-eu lawˇ duˬ tiˬ hmˬ guiˬ shuiˇ neh jahˇ-euˬ meh.

² Yaw naꞈ paw ngaˬ caˆ, mehˬ kʼehˬ yaw jeˇ paw nyiˬ lmˇ nui paˆ hawˇ-eu, huˇ paˆ shiꞈ lmˇ nui paˆ byah-eu, yaw zah zah lehˇ gʼeh-eu guiˬ shuiˇ lah tiˬ lah aˬ yawꞈ jahˇ-euˬ meh.

³ Lah kʼoeˇ-euˬ mehˬ kʼehˬ daˇ bahˇ caw caw-ehˇ, tiˬ cehˆ kʼoeˇ taˆ tiˬ cehˆ, aˇ boꞈ nyiˬ cehˆ boꞈ-euˬ meh. Aˇ boꞈ kʼoeˇ-aˬ, mawˇ neˇ mawˇ kawˇ boꞈ taˬ-awˇ, guiˬ shuiˇ lah aˬ yawꞈ-ahˇ tiˬ poˆ tehꞈ-ehˇ kʼaˇ tawꞈ taˬ-euˬ meh.

⁴ Guiˬ shuiˇ lah kʼoeˇ guiˬ shuiˇ mawˇ neˇ mawˇ kawˇ tseˇ nyiꞈ kawˇ-euˬ daˇ tsuiꞈ-ahˇ daˇ luꞈ-eu meh. Mawˇ neˇ mawˇ kawˇ kʼoeˇ, laꞈ taˆ paw smˬ kawˇ, nahˇ ma ga kʼehˬ paw smˬ kawˇ, laꞈ oˆ paw smˬ kawˇ hawˇ-eu, nahˇ ma doˆ kʼehˬ paw smˬ kawˇ ciˬ pyawˇ taˬ-euˬ meh. Mawˇ neˇ mawˇ kawˇ kʼoeˇ deuˬ kʼoeˇ taˆ guiˬ shuiˇ lah kʼoeˇ jaˆ-awˇ, mawˇ kawˇ kʼoeˇ deuˬ guiˬ shuiˇ lah uˬ moˆ dawˬ dahˬ ciˬ ahˇ jiˇ taˬ-euˬ meh.

⁵ Guiˬ shuiˇ lah-euˬ byaˇ gʼaˇ kʼoeˇ laꞈ zaˬ tiˬ daˬ tuˇ-eu meh. Lah kʼoeˇ-euˬ mehˬ kʼehˬ daˇ bahˇ-aˬ, pyuˇ kʼmˬ maˬ-euˬ daˇ bahˇ loꞈ-ehˇ aˇ yehˆ aˇ boꞈ boꞈ taˬ-euˬ meh. Lah kʼoeˇ lah laꞈ kʼoeˇ, tsawˇ haˬ smˬ heˇ gʼaˬ dzuiꞈ loꞈ-eu iˇ cuꞈ deˇ leˇ-eu meh.

⁶ Sehˇ byehˇ tseˇ byehˇ aˬ yawꞈ maꞈ jahˇ-awˇ, Uˬ duˬ tahˬ nymˇ nymˇ ma-euˬ laꞈ oˆ paw pyawˬ-ahˇ ngaˬ byehˇ bi jaˆ-awˇ, laꞈ taˆ paw pyawˬ-ahˇ ngaˬ byehˇ bi jaˆ-euˬ meh. Sehˇ byehˇ kʼoeˇ deuˬ-aˬ, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu gʼaˇ duˬ deuˆ tm taˬ-euˬ jeˬ zaˬ tsiˬ shawˇ duˬ pyeuꞈ-awˇ, guiˬ shuiˇ lah kʼoeˇ-aˬ, piˇ ma deuˬ bi dzuiꞈ shawˇ-eu gʼaˇ duˬ meh.

⁷ Aˬ yawꞈ maꞈ shuiˇ yuˇ-awˇ aˬ myah myah luꞈ jahˇ haw-euˬ hui ni ahˇ-eu tsiˇ kʼmˬ doꞈ taˬ duˬ tseˇ hmˬ jahˇ-awˇ, Uˬ duˬ tahˬ nymˇ nymˇ ma laꞈ kʼoeˇ, laꞈ oˆ paw ngaˬ hmˬ, laꞈ taˆ paw ngaˬ hmˬ bi jaˆ-euˬ meh.

⁸ Hawˬ jeh tseˇ jeh jahˇ-awˇ, uˬ duˬ tahˬ nymˇ nymˇ ma laꞈ kʼoeˇ, laꞈ oˆ paw ngaˬ jeh, laꞈ taˆ paw ngaˬ jeh bi jaˆ-euˬ meh. Shuiˇ iˇ cuꞈ naˬ bo tiˬ yaˇ bo kʼawꞈ aˬ yawꞈ maꞈ jahˇ-euˬ meh.

⁹ Piˇ ma deuˬ gʼaˇ duˬ laꞈ kʼoeˇ pu kaˬ hawˇ-eu laꞈ nyiˇ pu kaˬ aˬ yawꞈ maꞈ taw paˆ-euˬ meh. Pu kaˬ kʼoeˇ nyiˬ kaˬ-euˬ yaw kaˬ-ahˇ jaˆ-eu laˇ gʼoˆ deuˬ-ahˇ guiˬ shuiˇ yaw-euˬ meh.

¹⁰ Guiˬ shuiˇ lah kʼoeˇ lah-ahˇ, Uˬ duˬ tahˬ nymˇ nymˇ ma-euˬ laꞈ oˆ pyawˬ nahˇ ma doˆ kʼehˬ paw dzeˇ coeˇ-ehˇ bi jaˆ-euˬ meh.

¹¹ Huˇlamˬ-aˬ, oeˬ lahˬ deuˬ, ni ceuˆ deuˬ hawˇ-eu, naˬ bo deuˬ kʼawꞈ kʼaˇ-euˬ meh. Kʼoeˇ loꞈ-ehˇ, sahˬ paˬ Sawˇlaˬmoˬ-ahˇ aˬ yawꞈ mˇ nehˬ ma lehˇ saˇ jaˇ dzaˬ taˬ-euˬ yawˬ jeˬ na luꞈ mˇ gʼaˬ shaˇ gʼaˬ jiˇ-euˬ meh. Aˬ yawꞈ neh jahˇ-euˬ deuˬ-aˬ, heu deuˬ meh.

¹² kʼawˇ zeuˇ zeuˇ ma nyiˬ zeuˇ, kʼawˇ zeuˇ kʼoeˇ nyiˬ zeuˇ-euˬ uˬ duˬ-ahˇ tsahˬ-eu naˬ bo-ahˇ duˇ-eu uˬ dzo nyiˬ hmˬ, uˬ dzo kʼoeˇ nyiˬ hmˬ-ahˇ tsoꞈ-eu aˇ caˆ caˆ pyehꞈ aˇ baˇ,

¹³ uˬ dzo aˬ yawꞈ hmˬ yawꞈ-euˬ jawˬ jawˬ-ehˇ aˇ cehˆ nyiˬ cehˆ baw-ehˇ tsoꞈ taˬ-euˬ, guiˬ shuiˇ neh jahˇ taˬ-euˬ aˇ ka uˆ aˇ siˬ aˇ baˇ oeˬ yaˇ baˇ,

¹⁴ laˆ lawˬ tseˇ laˇ hawˇ-eu laˆ lawˬ kʼoeˇ taˆ bi jaˆ-euˬ sehˇ byehˇ tseˇ byehˇ,

¹⁵ guiˬ shuiˇ lah hawˇ-eu, lah kʼoeˇ daˬ luꞈ-eu mawˇ neˇ mawˇ kawˇ tseˇ nyiꞈ kawˇ,

¹⁶ oeˬ lahˬ deuˬ, ni ceuˆ deuˬ, shaˬ jiˇ kuˆ seuˬ deuˬ hawˇ-eu, kʼaˇ loˬ-eu yawˬ jeˬ na luꞈ jahˇ gʼaˬ jiˇ-euˬ meh. Uˬ duˬ tahˬ nymˇ nymˇ ma laꞈ kʼoeˇ zmˬ-eu gʼaˇ duˬ pyeuꞈ-eu mˇ myawˬ keu ka heu deuˬ dawˬ tawˆ luꞈ-ahˇ, sahˬ paˬ Sawˇlaˬmoˬ neh dawˬ biꞈ taˬ-eu loꞈ-ehˇ, guiˇ nyiˬ ni gʼeh-eu guiˬ shuiˇ neh Huˇlamˬ kʼaˇ-euˬ meh.

¹⁷ Sahˬ paˬ Sawˇlaˬmoˬ-aˬ, mˇ myawˬ keu ka kʼoeˇ deuˬ-ahˇ, Suˇkoˆ hawˇ-eu Zeˬleˬdaˬ yaw kaˬ-ahˇ, Yawˇdaˬ lawˇ baˬ deh kʼawꞈ-ahˇ jaˆ-eu guiˬ shuiˇ kʼaˇ duˬ-ahˇ bi kʼaˇ-euˬ meh.

¹⁸ Mˇ myawˬ keu ka kʼaˇ-euˬ myaˬ dui dui-eu miˇ neh, guiˬ shuiˇ aˇ myaˆ ni jiˇ leˇ-euˬ tiˬ gʼaˬ-iˬ maˬ saˆ haw jiˇ coeˇ-a.

¹⁹ Sahˬ paˬ Sawˇlaˬmoˬ-aˬ, Uˬ duˬ tahˬ nymˇ nymˇ ma laꞈ kʼoeˇ geuꞈ-eu gʼaˇ duˬ, shuiˇ neh jahˇ taˬ-euˬ keu ka deuˬ kʼawꞈ bi jahˇ-euˬ meh. Kʼoeˇ deuˬ-aˬ, lawˇ duˬ hawˇ-eu Miˬyehˇ-ahˇ lawˇ nehˬ-euˬ kaˬ muˇ ciˬ daˆ-eu hawˬ jeh deuˬ,

²⁰ yaw beh ehˇ taˬ-euˬ loꞈ-ehˇ, Muiˬ dui shawˇ dui dui-eu jawˇ duˬ-euˬ mehˬ shi bi doꞈ-eu gʼaˇ duˬ, maˇ jawˆ ni gʼeh-eu shuiˇ neh jahˇ taˬ-euˬ tsiˇ kʼmˬ doꞈ taˬ duˬ hawˇ-eu tsiˇ kʼmˬ deuˬ,

²¹ shuiˇ shuiˇ yehˆ deuˬ, shuiˇ tsiˇ kʼmˬ deuˬ hawˇ-eu shuiˇ ciˆ nyawˆ deuˬ,

²² tsiˇ kʼmˬ laˆ saˆ doꞈ-eu shuiˇ daˇ ceh deuˬ, shuiˇ naˬ bo deuˬ, tsiˇ yaw saw jeˬ dawˆ ahˇ-eu shuiˇ kʼmˬ maˬ deuˬ hawˇ-eu, doꞈ luꞈ-eu miˬ jiˆ pehˆ ahˇ-eu shuiˇ mui za heu deuˬ meh. Keu ka heu deuˬ dawˬ tawˆ luꞈ-ahˇ, maˇ jawˆ ni gʼeh-eu shuiˇ neh kʼaˇ-euˬ meh. Uˬ duˬ tahˬ nymˇ nymˇ ma-euˬ laꞈ nyiˇ paw jaˆ-eu laˇ gʼoˆ dawˬ tawˆ luꞈ hawˇ-eu, Muiˬ dui shawˇ dui dui-eu jawˇ duˬ-ahˇ uˇ leˇ-eu laˇ gʼoˆ dawˬ tawˆ luꞈ-ahˇ shuiˇ yaw-euˬ meh.