2 Laˬsaˬbaˬ 36 - Akha

Yuˇdaˆ sahˬ paˬ Yoˇaˬhaˆ

¹ Yuˇdaˆ miˇ kʼahˬ zaˬ deuˬ Yawˇshiˆ-euˬ aˬ li Yoˇaˬhaˆ-ahˇ sahˬ paˬ ka nehˬ-awˇ, Yeˬluˇsaˬlehˬ meuˬ-ahˇ jawˇ-awˇ bi uˆ lahˇ-euˬ meh.

² Yoˇaˬhaˆ-aˬ, nyiˬ tseˇ smˇ kʼoꞈ kʼawˆ ngeh Yuˇdaˆ miˇ kʼahˬ-euˬ sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ ba la smˇ siˬ uˆ lahˇ-euˬ meh.

³ Iˇjiˇtuˆ sahˬ paˬ Neˬkawˇ neh aˬ yawꞈ-ahˇ nyehꞈ-awˇ, Yuˇdaˆ miˇ kʼahˬ-ahˇ pyuˇ nyiˬ heˇ jawꞈ-i hawˇ-eu shuiˇ nyiˬ tseˇ jawꞈ-i taꞈ-euˬ meh.

⁴ Neˬkawˇ-aˬ, Yoˇaˬhaˆ-euˬ aˬ nyiˇ Eˇliˇkmˬ-ahˇ Yuˇdaˆ sahˬ paˬ ka nehˬ-awˇ, Yeˬhawˇyaˬkmˬ lehˇ tsawˇ myahˇ myahˇ paˇ nehˬ-eu meh. Yoˇaˬhaˆ gʼaˬ-ahˇ-aˬ, Neˬkawˇ neh Iˇjiˇtuˆ miˇ kʼahˬ-ahˇ nyehꞈ gʼeh-euˬ meh.

Yuˇdaˆ sahˬ paˬ Yeˬhawˇyaˬkmˬ

⁵ Yeˬhawˇyaˬkmˬ-aˬ, nyiˬ tseˇ ngaˬ kʼoꞈ kʼawˆ ngeh Yuˇdaˆ miˇ kʼahˬ-euˬ sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ tseˇ tiꞈ kʼoꞈ uˆ lahˇ-euˬ meh. Aˬ yawˬ-euˬ Miˬyehˇ pyeuꞈ-eu Sahˬpaˬ Miˬyehˇ mehˬ shi aˬ yawꞈ iˬ baˇ mˇ-euˬ meh.

⁶ Baˬbuˇloˬ sahˬ paˬ Neˬbuˬkaˬneˬzaˬ gʼaˬ Yuˇdaˆ miˇ kʼahˬ-ahˇ uˇ le-awˇ, Yeˬhawˇyaˬkmˬ-ahˇ shmˇ caˆ paꞈ-awˇ, Baˬbuˇloˬ miˇ kʼahˬ-ahˇ nyehꞈ daˆ leꞈ-euˬ meh.

⁷ Uˬ duˬ tahˬ nymˇ nymˇ ma laꞈ kʼoeˇ jaˆ-eu pyuˇ shuiˇ myawˬ gahˬ tiˬ paˆ na deuˬ-ahˇ Neˬbuˬkaˬneˬzaˬ yuˇ-awˇ, Baˬbuˇloˬ meuˬ-ahˇ aˬ yawꞈ-euˬ nymˇ-ahˇ bi jaˆ-euˬ meh.

⁸ Yeˬhawˇyaˬkmˬ neh mˇ-euˬ jawꞈ dui dui-eu gaˇ deuˬ maˬ ehˇ, aˬ yawꞈ neh mˇ-euˬ yaw haiˬ jeˬ maˬ ehˇ, aˬ yawꞈ neh kʼaˇ mˇ kʼaˇ shaˇ yaꞈ-euˬ yawˬ jeˬ na luꞈ, Iˇsaˬleˬlaˆ sahˬ paˬ deuˬ hawˇ-eu Yuˇdaˆ sahˬ paˬ deuˬ gaˇ kawˆ boꞈ taˬ-euˬ Laˬsaˬbaˬ sahˬ boꞈ laꞈ kʼoeˇ boꞈ ahˇ taˬ-euˬ meh. Aˬ yawꞈ-euˬ aˬ li Yeˬhawˇyaˬciˬ gʼaˬ aˬ yawꞈ-euˬ dah zaˇ sahˬ paˬ geuꞈ-euˬ meh.

Yuˇdaˆ sahˬ paˬ Yeˬhawˇyaˬciˬ

⁹ Yeˬhawˇyaˬciˬ-aˬ, tseˇ yehꞈ kʼoꞈ kʼawˆ ngeh Yuˇdaˆ sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ ba la smˇ siˬ uˬ taꞈ tseˇ nah uˆ lahˇ-euˬ meh. Aˬ yawꞈ kʼawꞈ, Sahˬpaˬ Miˬyehˇ mehˬ shi iˬ baˇ mˇ-euˬ meh.

¹⁰ Jawˇ la doˆ le ngeh, sahˬ paˬ Neˬbuˬkaˬneˬzaˬ neh Yeˬhawˇyaˬciˬ-ahˇ Baˬbuˇloˬ meuˬ-ahˇ nyehꞈ gʼeh-awˇ, Uˬ duˬ tahˬ nymˇ nymˇ ma laꞈ kʼoeˇ jaˆ-eu pyuˇ shuiˇ myawˬ gahˬ deuˬ kʼawꞈ yuˇ geuꞈ gʼeh-euˬ meh. Kʼoeˇ naˇ, Neˬbuˬkaˬneˬzaˬ neh Yeˬhawˇyaˬciˬ-euˬ aˬ zawˇ Zeˬdaˬkiˇ-ahˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ kʼoeˇ taˆ sahˬ paˬ bi geuꞈ-euˬ meh.

Yuˇdaˆ sahˬ paˬ Zeˬdaˬkiˇ

¹¹ Zeˬdaˬkiˇ-aˬ, nyiˬ tseˇ tiꞈ kʼoꞈ byah ngeh Yuˇdaˆ sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ tseˇ tiꞈ kʼoꞈ uˆ lahˇ-euˬ meh.

¹² Sahˬpaˬ Miˬyehˇ mehˬ shi aˬ yawꞈ iˬ baˇ mˇ-awˇ nui ma nahˬ yu ni maˬ taˬ-ehˇ, Sahˬpaˬ Miˬyehˇ gʼaˇ duˬ ngehˬ dah-eu Yeˬlaˬmiˇ-euˬ ehˇ dawˬ-ahˇ maˬ naˇ haˬ geuꞈ-a.

Yeˬluˇsaˬlehˬ meuˬ luˬ-iˇ seˇ-iˇ-euˬ

¹³ Zeˬdaˬkiˇ-aˬ, aˬ yawꞈ-ahˇ guˆ tsiˬ nyehꞈ-awˇ Miˬyehˇ-euˬ tsawˇ myahˇ uˬ moˆ saˇ jaˇ bi dzaˬ-euˬ gʼaˬ pyeuꞈ-eu Neˬbuˬkaˬneˬzaˬ-ahˇ puiˬ-euˬ meh. Aˬ yawꞈ iˬ baˇ noeˬ poˆ-euˬ maˬ baw ni nui ma gʼahˇ dui dui-eu laꞈ kʼoeˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ jawˇ paw maˬ gʼoꞈ leˇ ni dehꞈ-euˬ meh.

¹⁴ Kʼoeˇ uˬ taꞈ, Yuˇdaˆ miˇ kʼahˬ-ahˇ aˬ yuiꞈ aˬ tsu geuꞈ-eu deuˬ maˬ ehˇ, piˇ ma deuˬ maˬ ehˇ, miˇ kʼahˬ zaˬ deuˬ maˬ ehˇ, aˬ yawꞈ maꞈ-euˬ jawˬ jawˬ-ehˇ jawˇ-eu aˬ cawˬ tsawˇ jeuˬ deuˬ mˇ luꞈ-eu maˬ muiˬ maˬ jaˬ-eu jeˬ-ahˇ dzaw geuꞈ-awˇ, tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-eu laꞈ kʼoeˇ, Sahˬpaˬ Miˬyehˇ neh laˆ muiˬ laˆ shawˇ taˬ-euˬ Uˬ duˬ tahˬ nymˇ nymˇ ma-ahˇ laˆ jawꞈ-euˬ meh.

¹⁵ Aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, Miˬyehˇ gʼaˇ duˬ ngehˬ dah-eu deuˬ-ahˇ maˬ tsehˆ leˇ ni pyehˬ gʼeh leꞈ-awˇ, aˬ yawꞈ-euˬ tsawˇ haˬ kʼoeˇ deuˬ-ahˇ bi mehˬ paˇ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ hawˇ-eu Uˬ duˬ tahˬ nymˇ nymˇ ma-ahˇ aˬ yawꞈ maˬ bi cawˆ-iˇ mawꞈ-a.

¹⁶ Aˇ saˬ saˬ laˇ ngeh, aˬ yawꞈ-euˬ tsawˇ haˬ deuˬ-ahˇ Sahˬpaˬ Miˬyehˇ nui ma pehˇ dui dui laˇ-awˇ, buˬ-iˇ law-iˇ-eu gaˇ ma maˬ dahˇ ehˇ pyeuꞈ laˇ ngeh keuˆ ni, Miˬyehˇ neh pyehˬ gʼeh leꞈ-euˬ deuˬ-ahˇ aˬ yawꞈ maꞈ ja bu ja doeˇ-awˇ, aˬ yawꞈ-euˬ ehˇ dawˬ-ahˇ maˬ naˇ haˬ geuꞈ-ehˇ, Miˬyehˇ gʼaˇ duˬ ngehˬ dah-eu deuˬ-ahˇ naˬ gʼa naˬ gʼa-ehˇ uiˇ-euˬ meh.

¹⁷ Kʼoeˇ miˇ neh, Sahˬpaˬ Miˬyehˇ neh Baˬbuˇloˬ sahˬ paˬ-ahˇ pyehˬ gʼeh leꞈ-awˇ, aˬ yawꞈ maꞈ-ahˇ guiˇ bi deuˆ le-euˬ meh. Sahˬpaˬ kʼoeˇ gʼaˬ Yuˇdaˆ tsawˇ haˬ zaˬ guˬ deuˬ-ahˇ Uˬ duˬ tahˬ nymˇ nymˇ ma laꞈ kʼoeˇ sehꞈ-euˬ meh. Tsawˇ mawˬ zaˬ guˬ maˬ ehˇ, kʼaˬ dzeˇ zaˬ hawˇ-eu zaˬ miˬ zaˬ maˬ ehˇ, naˇ-eu deuˬ hawˇ-eu jawˇ saˇ doˆ-eu deuˬ maˬ ehˇ, maˬ tseˇ paˆ ni, tiˬ gʼaˬ-ahˇ-iˬ gʼawˬ shaˬ maˬ gaˬ nehˬ ni sehꞈ-euˬ meh. Aˬ yawꞈ maꞈ dawˬ tawˆ luꞈ-ahˇ Neˬbuˬkaˬneˬzaˬ-euˬ aˬ laꞈ laꞈ kʼoeˇ Miˬyehˇ neh a nehˬ-euˬ meh.

¹⁸ Sahˬ paˬ kʼoeˇ gʼaˬ Uˬ duˬ tahˬ nymˇ nymˇ ma-ahˇ maˬ ehˇ, kʼoeˇ gaˇ jaˆ-eu pyuˇ shuiˇ myawˬ gahˬ deuˬ-ahˇ maˬ ehˇ, Yuˇdaˆ sahˬ paˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ-euˬ pyuˇ shuiˇ myawˬ gahˬ deuˬ-ahˇ maˬ ehˇ, goˬ doe jiˇ-awˇ, yawˬ jeˬ na luꞈ Baˬbuˇloˬ miˇ kʼahˬ-ahˇ yuˇ kʼoꞈ gʼeh jiˇ-euˬ meh.

¹⁹ Uˬ duˬ tahˬ nymˇ nymˇ ma hawˇ-eu meuˬ aˬ yawꞈ-ahˇ, sahˬ paˬ-euˬ hawˇ nymˇ deuˬ hawˇ-eu kʼaˇ muiˬ kʼaˇ jaˬ-eu yawˬ jeˬ na luꞈ nehˬ-ehˇ tiˬ kawˆ loꞈ-ehˇ miˬ dzaˬ keuˬ dzeh jiˇ-awˇ, meuˬ meuˬ lahˇ laˆ byaˆ-euˬ meh.

²⁰ Maˬ shiˇ-ehˇ kʼaˇ dzeˇ-eu deuˬ-ahˇ Baˬbuˇloˬ miˇ kʼahˬ-ahˇ aˬ yawꞈ nyehꞈ kʼoꞈ gʼeh-awˇ, Paˇshaˇ miˇ kʼahˬ dzoeˬ dzaˬ-eu yamˬ maˬ keuˆ laˇ kʼoeˇ keuˆ ni, aˬ yawꞈ hawˇ-eu aˬ yawꞈ-euˬ zaˬ deuˬ uˆ deuˬ-euˬ zaˬ kʼaˆ bi geuꞈ-euˬ meh.

²¹ Miˬyehˇ gʼaˇ duˬ ngehˬ dah-eu Yeˬlaˬmiˇ-ahˇ gʼoe-awˇ, Sahˬpaˬ Miˬyehˇ neh ehˇ taˬ-euˬ dawˬ deuˬ kʼoeˇ loꞈ-ehˇ byah laˇ-euˬ meh. “Jawˇ nah maˬ tawˬ-euˬ miˇ kʼahˬ kʼoeˇ kʼahˬ, tsawˇ haˬ maˬ jawˇ-ehˇ ciˬ cuˇ ni jaˆ-eu laꞈ kʼoeˇ, shiꞈ tseˇ kʼoꞈ jawˇ nah tawˬ-awˇ gʼaˬ naˬ ya naˬ dehˆ tehꞈ-a” lehˇ ehˇ taˬ-euˬ meh.

Yuˇdaˆ tsawˇ haˬ deuˬ-ahˇ bi gʼoꞈ leˇ-euˬ

²² Paˇshaˇ miˇ kʼahˬ-ahˇ sahˬ paˬ Guˇluˆ uˆ lahˇ-euˬ yaw beh kʼoꞈ-ahˇ, Miˬyehˇ gʼaˇ duˬ ngehˬ dah-eu Yeˬlaˬmiˇ-ahˇ gʼoe-awˇ ehˇ taˬ-euˬ dawˬ kʼoeˇ dawˬ byah laˇ ni, Sahˬpaˬ Miˬyehˇ jahˇ-euˬ meh. Guˇluˆ sahˬ paˬ sahˬ boꞈ boꞈ-awˇ, aˬ yawꞈ-euˬ miˇ kʼahˬ doe ni bi gui gaˬ-iˇ-eu gʼaˇ duˬ, aˬ yawꞈ-euˬ nui ma-ahˇ Sahˬpaˬ Miˬyehˇ laˆ saˆ nehˬ-euˬ meh. Sahˬ boꞈ kʼoeˇ taꞈ heu loꞈ-ehˇ boꞈ taˬ-euˬ meh.

²³ “Heu-aˬ, Paˇshaˇ sahˬpa Guˇluˆ-euˬ dawˬ pyeuꞈ-eu meh. Mˬ kʼoeˇ taˆ jawˇ-eu Miˬyehˇ pyeuꞈ-eu Sahˬpaˬ Miˬyehˇ-aˬ, miˇ tsaˬ heu dawˬ tawˆ luꞈ kʼoeˇ taˆ ngaˬ-ahˇ bi uˆ lahˇ laꞈ-awˇ, Yuˇdaˆ miˇ kʼahˬ Yeˬluˇsaˬlehˬ meuˬ-ahˇ aˬ yawꞈ gʼaˇ duˬ Uˬ duˬ tahˬ nymˇ tiˬ nymˇ tsoˆ-awˬ lehˇ aˬ yawꞈ ngaˬ-ahˇ kʼehˇ-eu meh. Nymˬ-mˇ, Miˬyehˇ-euˬ tsawˇ haˬ kʼaˇ ngeuˇ-eu naw maꞈ dawˬ tawˆ luꞈ kʼoeˇ gaˇ le-awˬ. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ nehˬ-ehˇ jawˇ luꞈ-uˇ.”