2 Laˬsaˬbaˬ 35 - Akha

Yawˇshiˆ Baˬsaˬkaˬ Bawˬ-iˬ gʼeh-euˬ

¹ Sahˬpaˬ Yawˇshiˆ-aˬ, Sahˬpaˬ Miˬyehˇ-ahˇ taˬ huiˬ taˬ mahˇ-eu laꞈ kʼoeˇ, Yeˬluˇsaˬlehˬ meuˬ-ahˇ Baˬsaˬkaˬ Bawˬ-iˬ gʼeh-euˬ meh. Ba la yaw beh siˬ tseˇ oeˬ nah tiˬ nah-ahˇ bawˬ-iˬ gʼeh-eu gʼaˇ duˬ jeˬ zaˬ sehꞈ-euˬ meh.

² Piˇ ma deuˬ-ahˇ Uˬ duˬ tahˬ nymˇ nymˇ ma laꞈ kʼoeˇ aˬ yawꞈ maꞈ ya mˇ-eu gaˇ bi mˇ-awˇ, yaw muiˬ paˬ-ehˇ mˇ-eu gʼaˇ duˬ gʼaˬ biꞈ nehˬ-euˬ meh.

³ Iˇsaˬleˬlaˆ tsawˇ haˬ deuˬ-ahˇ mehˬ nehˬ tsoˆ nehˬ-eu deuˬ pyeuꞈ-eu Sahˬpaˬ Miˬyehˇ-ahˇ gʼawˇ mawˇ a nehˬ taˬ-euˬ Leˬbiˇ tsawˇ haˬ deuˬ-ahˇ kʼawꞈ, aˬ yawꞈ heu loꞈ-ehˇ mehˬ nehˬ tsoˆ nehˬ-euˬ meh. “Muiˬ-eu shawˇ-eu Dawˬ ma saˇ jaˇ Bahˬ keuˆ-ahˇ, Daˬbiˇ-euˬ aˬ li sahˬ paˬ Sawˇlaˬmoˬ neh tsoˆ-euˬ Uˬ duˬ tahˬ nymˇ nymˇ ma laꞈ kʼoeˇ baꞈ taˬ-euˬ meh. Naw maꞈ-aˬ, bahˬ keuˆ kʼoeˇ-ahˇ doe doe-ehˇ baꞈ baꞈ-ehˇ maˬ paˇ ya cah ni, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ hawˇ-eu aˬ yawꞈ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ gʼaˇ duˬ gaˇ ya mˇ meh.

⁴ Sahˬ paˬ Daˬbiˇ hawˇ-eu aˬ yawꞈ-euˬ aˬ li sahˬ paˬ Sawˇlaˬmoˬ neh mehˬ taˬ yaꞈ-euˬ loꞈ-ehˇ, naw maꞈ yawˬ ha aˇ jeuˬ yawˬ ha Uˬ duˬ tahˬ nymˇ nymˇ ma laꞈ kʼoeˇ jawˇ duˬ ya yuˇ meh.

⁵ Iˇsaˬleˬlaˆ tsawˇ jeuˬ tsawˇ ca aˬ yawꞈ ca yawꞈ-ahˇ caw ba nya-eu gʼaˇ duˬ, naw maꞈ aˇ muˇ muˇ-awˇ lehˬ hmˬ taˬ-awˬ.

⁶ Baˬsaˬkaˬ Bawˬ-iˬ-ahˇ geuꞈ-eu yawˇ deuˬ hawˇ-eu ciꞈ myehꞈ deuˬ-ahˇ naw maꞈ ya sehꞈ meh. Moˇseˬ-ahˇ gʼoe-awˇ Sahˬpaˬ Miˬyehˇ neh mehˬ taˬ tsoˆ taˬ yaꞈ-euˬ dawˬ deuˬ-ahˇ naw maꞈ-euˬ aˬ yuiꞈ aˬ nyiˇ Iˇsaˬleˬlaˆ tsawˇ haˬ deuˬ caw teh nya ni, nymˬ-mˇ naw maꞈ-euˬ gʼawˇ mawˇ mˇ shawˇ-awˇ, lawˇ-eu shehˇ-eu jeˬ mˇ-eu gʼaˇ duˬ lehˬ hmˬ-awˬ.”

⁷ Sahˬ paˬ Yawˇshiˆ-aˬ, Baˬsaˬkaˬ Bawˬ-iˬ laꞈ kʼoeˇ miˇ kʼahˬ zaˬ deuˬ bi geuꞈ-eu gʼaˇ duˬ aˬ yawꞈ neh cu taˬ-euˬ jeˬ zaˬ laꞈ kʼoeˇ, yawˇ deuˬ, yawˇ zaˬ deuˬ hawˇ-eu ciꞈ myehꞈ ciꞈ zaˬ deuˬ dawˬ tawˆ luꞈ smˬ muiˇ mawˇ hawˇ-eu, mawˇ neˇ mawˇ gaw smˬ heˇ mawˇ damˬ nehˬ-euˬ meh.

⁸ Aˬ yawꞈ-euˬ gaˇ mˇ-eu yaw huiˬ yaw mahˇ deuˬ kʼawꞈ, miˇ kʼahˬ zaˬ deuˬ, piˇ ma deuˬ hawˇ-eu Leˬbiˇ tsawˇ haˬ deuˬ gʼaˇ duˬ, nui ma keuˆ-awˇ damˬ nehˬ-euˬ meh. Uˬ duˬ tahˬ nymˇ nymˇ ma laꞈ kʼoeˇ haw-eu pyaˆ-eu yaw huiˬ yaw mahˇ deuˬ pyeuꞈ-eu Piˇ ma Yaw huiˬ gʼaˬ Hiˇlaˬkiˇ, Zaˬkaˬliˇ hawˇ-eu Yeˬheˬlaˇ aˬ ha maꞈ kʼawꞈ, bawˬ-iˬ gʼeh gaˇ bi lawˇ bi shehˇ-eu gʼaˇ duˬ, yawˇ zaˬ hawˇ-eu ciꞈ myehꞈ ciꞈ zaˬ nyiˬ heˇ koꞈ yaˇ mawˇ, mawˇ neˇ mawˇ gaw smˬ yaˇ mawˇ, piˇ ma deuˬ-ahˇ biꞈ nehˬ-euˬ meh.

⁹ Leˬbiˇ tsawˇ haˬ aˬ yuiꞈ aˬ tsu deuˬ pyeuꞈ-eu Kawˇnaˬniˇ, Sheˬmaˇyaˬ hawˇ-eu Naˬdaˬneˬlaˇ aˬ nyaꞈ nmˇ, Yeˬzeˬlaˇ, Yawˇzaˬbaˆ, aˬ ha oeˬ gʼaˬ kʼawꞈ, Leˬbiˇ tsawˇ haˬ deuˬ bi lawˇ bi shehˇ-eu gʼaˇ duˬ, yawˇ zaˬ hawˇ-eu ciꞈ myehꞈ ciꞈ zaˬ ngaˬ heˇ mawˇ, mawˇ neˇ mawˇ gaw ngaˬ yaˇ mawˇ damˬ nehˬ-euˬ meh.

¹⁰ Baˬsaˬkaˬ Bawˬ-iˬ gʼeh-eu gʼaˇ duˬ yawˬ jeˬ na luꞈ lehˬ hmˬ dah jiˇ ngeh jawˇ, sahˬ paˬ neh dawˬ biꞈ taˬ-euˬ loꞈ-ehˇ piˇ ma deuˬ hawˇ-eu Leˬbiˇ tsawˇ haˬ deuˬ jawˇ duˬ yuˇ-euˬ meh.

¹¹ Yawˇ zaˬ hawˇ-eu ciꞈ myehꞈ ciꞈ zaˬ deuˬ sehꞈ gʼaˬ ngeh jawˇ, piˇ ma deuˬ lawˇ duˬ-ahˇ shiˬ byaˆ-awˇ, Leˬbiˇ tsawˇ haˬ deuˬ baˆ kʼoˆ yawˆ-euˬ meh.

¹² Moˇseˬ-euˬ zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ lawˇ nya shehˇ nya ni, Iˇsaˬleˬlaˆ tsawˇ jeuˬ tsawˇ ca aˬ yawꞈ ca yawꞈ-ahˇ miˬ dzaˬ dzah puiˆ-awˇ lawˇ-eu gʼaˇ duˬ lehˬ hmˬ taˬ-euˬ jeˬ zaˬ deuˬ biˇ nehˬ-euˬ meh.

¹³ Leˬbiˇ tsawˇ haˬ deuˬ-aˬ, Baˬsaˬkaˬ Bawˬ-iˬ-ahˇ sehꞈ-euˬ jeˬ zaˬ deuˬ-ahˇ zahˇ sahˇ kʼoꞈ jaˆ-eu loꞈ-ehˇ miˬ dzaˬ-ahˇ tehˬ ba-awˇ, muiˬ-eu shawˇ-eu lawˇ-eu jeˬ-ahˇ, miˇ tsaˬ oeˬ lahˬ, guiˬ ba hawˇ-eu, mui za deuˬ laꞈ kʼoeˇ caꞈ-awˇ, tsawˇ haˬ dawˬ tawˆ luꞈ-ahˇ yaw kawˇ-ehˇ biˇ nehˬ-euˬ meh.

¹⁴ Kʼoeˇ loꞈ-ehˇ jahˇ gʼaˬ ngeh, Leˬbiˇ tsawˇ haˬ deuˬ-aˬ, yawˬ ha gʼaˇ duˬ hawˇ-eu Aˬloˬ-euˬ zaˬ deuˬ uˆ deuˬ pyeuꞈ-eu piˇ ma deuˬ gʼaˇ duˬ shaˬ jiˇ lehˬ hmˬ taˬ-euˬ meh. Aˬ jeˬ miˇ neh ehˇ naˇ, piˇ ma deuˬ-aˬ, mawˇ lah-ehˇ miˬ dzaˬ-ahˇ dzah puiˆ-awˇ ya lawˇ-eu jeˬ zaˬ deuˬ hawˇ-eu jeˬ zaˬ-euˬ tsiˇ deuˬ dzah puiˆ dzah puiˆ-ehˇ jawˇ-eu miˇ neh, uˬ ciꞈ zahˇ le ngeh keuˆ ni maˬ laˆ dah nya-a.

¹⁵ Caˇ dawˬ caˇ-eu deuˬ pyeuꞈ-eu Leˬbiˇ tsawˇ jeuˬ Aˬsaˆ aˇ ca deuˬ-aˬ, sahˬ paˬ Daˬbiˇ, Aˬsaˆ, Heˬmaˬ hawˇ-eu sahˬ paˬ-ahˇ Miˬyehˇ gʼaˇ duˬ ngehˬ dah nehˬ-eu gʼaˬ pyeuꞈ-eu Yeˬduˇdoˬ aˬ ha maꞈ neh mehˬ taˬ yaꞈ-euˬ loꞈ-ehˇ, aˬ yawꞈ maꞈ-ahˇ biꞈ taˬ-euˬ jawˇ duˬ-ahˇ ya jawˇ-eu meh. Uˬ duˬ tahˬ nymˇ nymˇ ma -euˬ lahˇ kʼehˬ deuˬ-ahˇ loꞈ-eu deuˬ-aˬ, aˬ yawꞈ maꞈ-euˬ loꞈ duˬ-ahˇ byehˇ yaꞈ-awˇ bawˬ-iˬ gʼeh gaˇ iˇ-eu maˬ loˬ-a. Aˬ jeˬ miˇ neh ehˇ naˇ, Leˬbiˇ tsawˇ haˬ nui deuˬ neh aˬ yawꞈ maꞈ gʼaˇ duˬ Baˬsaˬkaˬ Bawˬ-iˬ lehˬ hmˬ nehˬ-eu meh.

¹⁶ Yawˇshiˆ neh dawˬ biꞈ-euˬ loꞈ-ehˇ, Baˬsaˬkaˬ Bawˬ-iˬ gʼeh-eu maˬ ehˇ, lawˇ duˬ kʼoeˇ taˆ miˬ dzaˬ dzah puiˆ-awˇ lawˇ-eu jeˬ maˬ ehˇ, Sahˬpaˬ Miˬyehˇ-ahˇ uˬ duˬ tahˬ-eu gaˇ yawˬ jeˬ na luꞈ kʼoeˇ ngeh nah mˇ jiˇ-euˬ meh.

¹⁷ Kʼoeˇ gaˇ kʼaˇ uiˬ laˇ-euˬ Iˇsaˬleˬlaˆ tsawˇ haˬ dawˬ tawˆ luꞈ, shiꞈ nah keuˆ ni Baˬsaˬkaˬ Bawˬ-iˬ hawˇ-eu Dehˬ tseˬ maˬ ahˇ-eu Kaˬ muˇ dzaˬ-eu Bawˬ-iˬ gʼeh-euˬ meh.

¹⁸ Miˬyehˇ gʼaˇ duˬ ngehˬ dah-eu Saˬmeuˬlaˆ-euˬ ziˇ-ahˇ neh iˬ nah keuˆ ni, heu loꞈ-ehˇ gʼeh-eu Baˬsaˬkaˬ Bawˬ-iˬ tiˬ jawˇ-iˬ maˬ gʼeh haw-aˬ. Sahˬ paˬ Yawˇshiˆ, piˇ ma deuˬ, Leˬbiˇ tsawˇ haˬ deuˬ hawˇ-eu, Yuˇdaˆ miˇ kʼahˬ, Iˇsaˬleˬlaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ jawˇ-eu tsawˇ haˬ heu deuˬ neh gʼeh-euˬ Baˬsaˬkaˬ Bawˬ-iˬ heu poˆ loꞈ-ehˇ, dzeuˇ laˇ ngeh sahˬ paˬ tiˬ gʼaˬ-iˬ maˬ gʼeh haw-aˬ.

¹⁹ Sahˬ paˬ Yawˇshiˆ uˆ lahˇ-eu tseˇ yehꞈ kʼoꞈ aˬ yawꞈ kʼoꞈ-ahˇ, Baˬsaˬkaˬ Bawˬ-iˬ kʼoeˇ poˆ gʼeh-euˬ meh.

Sahˬ paˬ Yawˇshiˆ ziˇ jiˇ-euˬ

²⁰ Uˬ duˬ tahˬ nymˇ nymˇ ma gʼaˇ duˬ kʼoeˇ deuˬ dawˬ tawˆ luꞈ-ahˇ sahˬ paˬ Yawˇshiˆ mˇ gʼaˬ jiˇ ngeh, Iˇjiˇtuˆ sahˬ paˬ Neˬkawˇ gʼaˬ guiˇ maꞈ sheuˬ laꞈ-awˇ, Uˇpaˬlaˇ lawˇ baˬ lawˇ deh jaˆ-eu Kaˬsheˬmiˇ meuˬ-ahˇ guiˇ deuˆ laˇ-euˬ meh. Yawˇshiˆ gʼaˬ kʼawꞈ, aˬ yawꞈ maꞈ-ahˇ deuˆ-eu lehˇ luˆ-iˇ-euˬ meh.

²¹ Kʼoeˇ ngeh, Neˬkawˇ gʼaˬ Yawˇshiˆ-ahˇ ehˇ-eu, “Yuˇdaˆ sahˬ paˬ-oˇ, ngaˇ deuˆ luꞈ-eu guiˇ heu nawˬ-ahˇ tiˬ jeˬ-iˬ maˬ taꞈ. Nawˬ-ahˇ deuˆ-eu lehˇ ngaˇ laˇ-euˬ maˬ ngeuˇ. Ngaˬ-ahˇ muiˇ-eu deuˬ-ahˇ deuˆ-eu lehˇ laˇ-euˬ ma. Guiˇ yaw kawˇ-ehˇ deuˆ leˇ-awˬ lehˇ Miˬyehˇ ngaˬ-ahˇ ehˇ-eu meh. Miˬyehˇ-aˬ, ngaˇ jawˇ paw pyawˬ luꞈ meh. Kʼoeˇ miˇ neh ngaˬ-ahˇ taˬ ceh le. Ceh le naˇ, Miˬyehˇ nawˬ-ahˇ laˆ luˬ laˆ seˇ nehˬ laꞈ tehꞈ-a.”

²² Ehˇ kʼawꞈ, Yawˇshiˆ gʼaˬ guiˇ deuˆ ma lehˇ noeˬ tsehˆ-awˇ, Miˬyehˇ neh Neˬkawˇ-ahˇ bi ehˇ-euˬ dawˬ-ahˇ maˬ naˇ haˬ ni, aˬ cawˬ maˬ bi haw siˬ-eu gʼaˇ duˬ mehˬ tsoeˬ pyehˇ-awˇ, Meˬgiˇdoˬ deh ga-ahˇ guiˇ deuˆ-iˇ-euˬ meh.

²³ Guiˇ deuˆ luꞈ ngeh, Iˇjiˇtuˆ tsawˇ haˬ deuˬ-euˬ kaˆ myaˬ sahˬ paˬ Yawˇshiˆ-ahˇ zaw leˇ-euˬ meh. Kʼoeˇ ngeh, “Ngaˬ-ahˇ sheuˬ doˆ nehˬ laꞈ-awˬ. Aˇ dzehˬ-ehˇ laˆ zaw-euˬ nya” lehˇ, aˬ yawꞈ-euˬ zaˬ kʼaˆ deuˬ-ahˇ aˬ yawꞈ dawˬ biꞈ nehˬ-euˬ meh.

²⁴ Kʼoeˇ naˇ, aˬ yawꞈ-euˬ mahˬ laˆ lawˬ laꞈ kʼoeˇ neh aˬ yawꞈ maꞈ aˬ yawꞈ-ahˇ ciˬ doˆ-awˇ, kʼoeˇ gaˇ jaˆ-eu aˬ yawꞈ-eu mahˬ laˆ lawˬ yawˬ laˇ yawˬ-ahˇ ciˬ ahˇ-awˇ, Yeˬluˇsaˬlehˬ meuˬ-ahˇ sheuˬ kʼoꞈ gʼeh-euˬ meh. Yeˬluˇsaˬlehˬ meuˬ-ahˇ aˬ yawꞈ shiˇ-awˇ, sahˬ paˬ-euˬ lmˬ bymˇ-ahˇ baꞈ pahˬ nehˬ-euˬ meh. Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ dawˬ tawˆ luꞈ aˬ yawꞈ shiˇ gaˇ tsawˇ ngoeˇ ngoeˇ-euˬ meh.

²⁵ Miˬyehˇ gʼaˇ duˬ ngehˬ dah-eu Yeˬlaˬmiˇ neh, sahˬ paˬ Yawˇshiˆ shiˇ-euˬ gaˇ tsawˇ ngoeˇ ngoeˇ nehˬ-eu caˇ dawˬ tiˬ bymˇ yuˇ doˆ-euˬ meh. Aˬ yawꞈ gʼaˇ duˬ tsawˇ ngoeˇ kʼaˇ ngoeˇ ngeh, caˇ dawˬ caˇ-eu Iˇsaˬleˬlaˆ tsawˇ haˬ kʼaˬ dzeˇ zaˬ zaˬ miˬ zaˬ dawˬ tawˆ luꞈ, tsawˇ ngoeˇ caˇ dawˬ heu bymˇ caˇ-eu zahˇ pyeuꞈ-iˇ-euˬ meh. Tsawˇ ngoeˇ ngoeˇ-eu caˇ dawˬ deuˬ boꞈ ahˇ taˬ-euˬ sahˬ boꞈ laꞈ kʼoeˇ, caˇ dawˬ heu bymˇ ahˇ-eu meh.

^26-27 Sahˬpaˬ Miˬyehˇ gʼaˇ duˬ aˬ yawꞈ nui ma keuˆ-euˬ gaˇ kawˆ maˬ ehˇ, zahˇ dawˬ kʼoꞈ dawˬ-ahˇ aˬ yawꞈ naˇ haˬ geuꞈ-euˬ gaˇ kawˆ maˬ ehˇ, aˬ yawꞈ yaw dehꞈ dehꞈ-euˬ gaˇ kawˆ aˇ dahˬ beh gaˇ neh aˇ saˬ saˬ gaˇ keuˆ ni maˬ ehˇ, aˬ yawꞈ neh kʼaˇ mˇ kʼaˇ shaˇ-euˬ yawˬ jeˬ na luꞈ-ahˇ, Iˇsaˬleˬlaˆ sahˬ paˬ deuˬ hawˇ-eu Yuˇdaˆ sahˬ paˬ deuˬ gaˇ kawˆ boꞈ taˬ-euˬ Laˬsaˬbaˬ sahˬ boꞈ laꞈ kʼoeˇ boꞈ ahˇ taˬ-euˬ meh.