2 Laˬsaˬbaˬ 33 - Akha

Yuˇdaˆ sahˬ paˬ Maˬnaˇseˬ

¹ Maˬnaˇseˬ-aˬ, tseˇ nyiꞈ kʼoꞈ kʼawˆ ngeh Yuˇdaˆ sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ ngaˬ tseˇ ngaˬ kʼoꞈ uˆ lahˇ-euˬ meh.

² Sahˬpaˬ Miˬyehˇ aˬ yawꞈ-euˬ tsawˇ haˬ deuˬ-ahˇ miˇ kʼahˬ kʼoeˇ kʼahˬ laꞈ kʼoeˇ sheuˬ uˇ gʼeh ngeh, miˇ kʼahˬ kʼoeˇ kʼahˬ laꞈ kʼoeˇ aˬ yawꞈ neh teh dzeh-euˬ tsawˇ jeuˬ kʼoeˇ deuˬ mˇ-euˬ jawꞈ dui dui-eu jeˬ-ahˇ Maˬnaˇseˬ caw teh--eu laꞈ kʼoeˇ Sahˬpaˬ Miˬyehˇ mehˬ shi aˬ yawꞈ iˬ baˇ mˇ-euˬ meh.

³ Aˬ yawꞈ-euˬ aˬ da Heˬsaˬgiˇ neh laˆ luˬ laˆ seˇ yaꞈ-euˬ lawˇ ciꞈ zaˬ deuˬ uˬ duˬ tahˬ-eu jawˇ duˬ kʼoeˇ deuˬ-ahˇ aˬ yawꞈ paˇ laˆ muiˬ geuꞈ-euˬ meh. Baˬlaˇ miˬ yehˇ-ahˇ uˬ duˬ tahˬ-eu gʼaˇ duˬ lawˇ duˬ deuˬ aˬ yawꞈ tsoˆ-awˇ, Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ deuˬ tehˆ-euˬ uˬ taꞈ, aˬ guiˇ deuˬ-ahˇ kʼawꞈ uˬ duˬ tahˬ-euˬ meh.

⁴ Mˬ maˬ maˬ byaˆ zaˇ ziˇ ngaˬ-ahˇ uˬ duˬ ya tahˬ meh lehˇ Sahˬpaˬ Miˬyehˇ neh ehˇ taˬ-euˬ Uˬ duˬ tahˬ nymˇ nymˇ ma laꞈ kʼoeˇ, lawˇ ciꞈ zaˬ deuˬ-euˬ lawˇ duˬ tsoˆ-euˬ meh.

⁵ Uˬ duˬ tahˬ nymˇ-euˬ kʼoeˇ paˆ ma paˆ-ehˇ jaˆ-eu pu kaˬ-ahˇ, aˬ guiˇ deuˬ-ahˇ uˬ duˬ tahˬ-eu lawˇ duˬ tsoˆ-euˬ meh.

⁶ Aˬ yawꞈ-euˬ aˬ li deuˬ-ahˇ Hiˬnoˬ deh kʼawꞈ laꞈ kʼoeˇ miˬ dzaˬ dzah puiˆ-awˇ lawˇ-euˬ meh. Ja maw maw-eu jeˬ hawˇ-eu mah loˬ loˬ-eu jeˬ aˬ yawꞈ mˇ-awˇ, nyiˇ paˬ shaˆ ma deuˬ-ahˇ aˬ yawꞈ gʼoe-euˬ meh. Sahˬpaˬ Miˬyehˇ nui ma pehˇ laˇ ngeh keuˆ ni, Sahˬpaˬ Miˬyehˇ mehˬ shi aˬ yawꞈ iˬ baˇ mˇ-euˬ meh.

⁷ “Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ miˇ kʼahˬ dawˬ tawˆ luꞈ laꞈ kʼoeˇ, Yeˬluˇsaˬlehˬ meuˬ laꞈ kʼoeˇ jaˆ-eu Uˬ duˬ tahˬ nymˇ nymˇ ma heu nymˇ-aˬ, ngaˬ-ahˇ uˬ duˬ bi tahˬ-eu gʼaˇ duˬ ngaˬ neh tseˇ doˆ taˬ-euˬ jawˇ duˬ pyeuꞈ-eu ma” lehˇ, Daˬbiˇ hawˇ-eu Sawˇlaˬmoˬ aˬ nyaꞈ da zaˬ-ahˇ Miˬyehˇ ehˇ taˬ-euˬ Uˬ duˬ tahˬ nymˇ nymˇ ma kʼoeˇ nymˇ laꞈ kʼoeˇ, Maˬnaˇseˬ neh tahˬ pahˬ aˬ ma mawˇ kawˇ bi jaˆ-euˬ meh.

⁸ Kʼoeˇ uˬ taꞈ, “Iˇsaˬleˬlaˆ tsawˇ haˬ deuˬ ngaˬ-euˬ ehˇ dawˬ-ahˇ naˇ haˬ geuꞈ jiˇ-awˇ, ngaˬ-euˬ zaˬ kʼaˆ Moˇseˬ neh aˬ yawꞈ maꞈ-ahˇ biꞈ taˬ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ caw teh naˇ, aˬ yawꞈ maꞈ-euˬ aˬ poeˬ aˬ bawˇ deuˬ-ahˇ ngaˬ neh biꞈ taˬ-euˬ miˇ kʼahˬ heu kʼahˬ laꞈ kʼoeˇ neh, aˬ yawꞈ maꞈ-ahˇ tiˬ jawˇ-iˬ maˬ bi teh doˆ” lehˇ Miˬyehˇ ehˇ taˬ-euˬ meh.

⁹ Sahˬpaˬ Miˬyehˇ aˬ yawꞈ-euˬ tsawˇ haˬ deuˬ-ahˇ miˇ kʼahˬ kʼoeˇ kʼahˬ laꞈ kʼoeˇ sheuˬ uˇ gʼeh ngeh, aˬ yawꞈ neh teh dzeh nehˬ-euˬ kʼoeˇ gaˇ jawˇ-eu tsawˇ oeˇ deuˬ neh mˇ-euˬ iˬ baˇ naˆ maˬ tseˇ huiˬ dzehˬ-eu iˬ baˇ-ahˇ, Yuˇdaˆ miˇ kʼahˬ zaˬ deuˬ mˇ ni Maˬnaˇseˬ sheuˬ gʼeh-euˬ meh.

Maˬnaˇseˬ iˬ baˇ noeˬ poˆ-eu

¹⁰ Maˬnaˇseˬ hawˇ-eu aˬ yawꞈ-euˬ tsawˇ haˬ deuˬ-ahˇ kʼoeˇ loꞈ-ehˇ maˬ dehꞈ-eu gʼaˇ duˬ Sahˬpaˬ Miˬyehˇ ehˇ nehˬ kʼawꞈ, aˬ yawꞈ maꞈ maˬ naˇ haˬ geuꞈ-a.

¹¹ Kʼoeˇ miˇ neh, Aˬshuˇliˆ guiˇ maꞈ deuˬ-ahˇ Yuˇdaˆ miˇ kʼahˬ laꞈ kʼoeˇ Sahˬpaˬ Miˬyehˇ bi uˇ le-euˬ meh. Aˬ yawꞈ maꞈ Maˬnaˇseˬ-ahˇ nyehꞈ-awˇ, naˇ mehˇ-ahˇ shmˇ kuˆ seuˬ siˇ ceuˬ-awˇ, shmˇ caˆ paꞈ-eu laꞈ kʼoeˇ, Baˬbuˇloˬ meuˬ-ahˇ tsahˇ gʼeh-euˬ meh.

¹² Aˬ yawꞈ kʼoeˇ loꞈ-ehˇ ya daˬ ngeh, nui ma nahˬ laˇ-awˇ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ jawˇ paw noeˬ pyawˇ kʼoꞈ laˇ-awˇ, caw ba nehˬ laꞈ-awˬ lehˇ shaˇ-euˬ meh.

¹³ Maˬnaˇseˬ-euˬ shaˇ dawˬ-ahˇ Sahˬpaˬ Miˬyehˇ naˇ haˬ nehˬ-awˇ, aˬ yawꞈ-ahˇ Yeˬluˇsaˬlehˬ meuˬ-ahˇ bi gʼoꞈ-iˇ-awˇ, aˬ yawꞈ-euˬ miˇ kʼahˬ-ahˇ paˇ bi uˆ lahˇ-euˬ meh. Kʼoeˇ ngeh, Sahˬpaˬ Miˬyehˇ-aˬ, aˬ diˇ aˬ maˇ Miˬyehˇ pyeuꞈ-eu gaˇ kawˆ Maˬnaˇseˬ siˬ duˬ-euˬ meh.

¹⁴ Kʼoeˇ naˇ kʼah, Daˬbiˇ-euˬ meuˬ-euˬ nahˇ ma doˆ kʼehˬ paw Giˇhoˬ lawˇ gawˆ deh kʼawꞈ-ahˇ neh dahˬ beh-awˇ, laꞈ taˆ paw pyawˬ-ahˇ Ngaˬ shaˬ-euˬ lahˇ kʼehˬ hawˇ-eu Awˇpeˬlaˇ lehˇ kuˇ-eu jawˇ duˬ-ahˇ keuˆ ni jaˆ-eu meuˬ meuˬ lahˇ laꞈ nyiˇ lahˇ-ahˇ, Maˬnaˇseˬ paˇ gawˬ goˇ-euˬ meh. Yuˇdaˆ miˇ kʼahˬ laꞈ kʼoeˇ jaˆ-eu ziꞈ dah ni tsoˆ taˬ-euˬ meuˬ yawˬ meuˬ na luꞈ laꞈ kʼoeˇ, guiˇ maꞈ tiˬ maꞈ hawˇ-eu guiˇ maꞈ-ahˇ uˆ lahˇ-eu yaw huiˬ tiˬ gʼaˬ bi jawˇ-euˬ meh.

¹⁵ Uˬ duˬ tahˬ nymˇ nymˇ ma laꞈ kʼoeˇ jaˆ-eu aˬ cawˬ tsawˇ jeuˬ-euˬ miˬ yehˇ deuˬ hawˇ-eu aˬ yawꞈ neh bi jaˆ-euˬ tahˬ pahˬ aˬ ma mawˇ kawˇ maˬ ehˇ, Uˬ duˬ tahˬ nymˇ nymˇ ma tsoˆ taˬ-euˬ gawˬ duˇ-ahˇ hawˇ-eu Yeˬluˇsaˬlehˬ meuˬ doe ni jaˆ-eu lawˇ ciꞈ zaˬ deuˬ-euˬ lawˇ duˬ deuˬ maˬ ehˇ, dawˬ tawˆ luꞈ aˬ yawꞈ yuˇ-awˇ, meuˬ-euˬ laꞈ nyiˇ baꞈ dzeh-iˇ-euˬ meh.

¹⁶ Sahˬpaˬ Miˬyehˇ-ahˇ uˬ duˬ tahˬ gaˇ jaˆ-eu lawˇ duˬ-ahˇ aˬ yawꞈ laˆ muiˬ-awˇ, cawˬ cawˬ taꞈ-eu lawˇ-eu jeˬ hawˇ-eu guiˬ lahˬ-ahˇ noeˬ keuˆ-eu lawˇ-eu jeˬ lawˇ-euˬ meh. Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ, Yuˇdaˆ miˇ kʼahˬ zaˬ dawˬ tawˆ luꞈ-ahˇ aˬ yawꞈ dawˬ biꞈ-euˬ meh.

¹⁷ Miˇ kʼahˬ zaˬ deuˬ, uˬ duˬ tahˬ-eu jawˇ duˬ deuˬ-ahˇ lawˇ-eu shehˇ-eu jeˬ-ahˇ maˬ byehˇ dzeh ni mˇ luꞈ kʼawꞈ, Sahˬpaˬ Miˬyehˇ-ahˇ tehꞈ-ehˇ aˬ yawꞈ maꞈ lawˇ-euˬ shehˇ-euˬ meh.

Maˬnaˇseˬ ziˇ jiˇ-euˬ

¹⁸ Maˬnaˇseˬ Miˬyehˇ-ahˇ guiˬ lahˬ shaˇ-euˬ gaˇ kawˆ maˬ ehˇ, Miˬyehˇ gʼaˇ duˬ ngehˬ dah-eu Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ myahˇ uˬ moˆ aˬ yawꞈ-ahˇ ehˇ nehˬ le-euˬ gaˇ kawˆ deuˬ maˬ ehˇ, aˬ yawꞈ neh kʼaˇ mˇ kʼaˇ shaˇ-euˬ gaˇ dawˬ tawˆ luꞈ-ahˇ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ Laˬsaˬbaˬ sahˬ boꞈ laꞈ kʼoeˇ boꞈ ahˇ taˬ-euˬ meh.

¹⁹ Aˬ yawꞈ-euˬ guiˬ lahˬ shaˇ dawˬ-ahˇ Miˬyehˇ naˇ haˬ geuꞈ nehˬ-euˬ gaˇ kawˆ maˬ ehˇ, aˬ yawꞈ iˬ baˇ maˬ noeˬ poˆ mi naˆ-ehˇ yaw haiˬ jeˬ mˇ-euˬ gaˇ kawˆ, lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ tsoˆ-euˬ gaˇ kawˆ, Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ tehˆ-euˬ gaˇ kawˆ hawˇ-eu, tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-euˬ gaˇ kawˆ heu deuˬ dawˬ tawˆ luꞈ maˬ ehˇ, Miˬyehˇ gʼaˇ duˬ ngehˬ dah-eu deuˬ-euˬ Laˬsaˬbaˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²⁰ Maˬnaˇseˬ shiˇ-awˇ, sahˬ paˬ-euˬ nymˇ-ahˇ aˬ yawꞈ-ahˇ baꞈ pahˬ nehˬ-euˬ meh. Kʼoeˇ naˇ, aˬ yawꞈ-euˬ aˬ li Aˬmo gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

Yuˇdaˆ sahˬ paˬ Aˬmo

²¹ Aˬmo-aˬ, nyiˬ tseˇ nyiꞈ kʼoꞈ byah ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ nyiˬ kʼoꞈ uˆ lahˇ-euˬ meh.

²² Aˬ yawꞈ-euˬ aˬ da Maˬnaˇseˬ loꞈ-ehˇ Sahˬpaˬ Miˬyehˇ mehˬ shi aˬ yawꞈ iˬ baˇ mˇ-awˇ, aˬ yawꞈ aˬ da uˬ duˬ tahˬ-euˬ tahˬ pahˬ aˬ ma mawˇ kawˇ kʼoeˇ deuˬ-ahˇ uˬ duˬ tahˬ-euˬ meh.

²³ Ehˇ kʼawꞈ, aˬ yawꞈ-euˬ aˬ da loꞈ-ehˇ aˬ yawꞈ nui ma maˬ nahˬ laˇ-ehˇ, Sahˬpaˬ Miˬyehˇ jawˇ paw maˬ gʼoꞈ kʼoꞈ laˇ ni, aˬ da gʼaˬ naˆ maˬ tseˇ iˬ baˇ mˇ dui dui-euˬ meh.

²⁴ Aˬmo-euˬ gaˇ mˇ-eu yaw huiˬ yaw mahˇ deuˬ Aˬmo-ahˇ puiˬ-awˇ, sahˬ paˬ-euˬ nymˇ laꞈ kʼoeˇ aˬ yawꞈ-ahˇ sehꞈ-euˬ meh.

²⁵ Aˬmo-ahˇ sehꞈ kʼoeˬ-euˬ tsawˇ haˬ kʼoeˇ deuˬ-ahˇ Yuˇdaˆ miˇ kʼahˬ zaˬ deuˬ neh paˇ sehꞈ poˆ-awˇ, aˬ yawꞈ-euˬ aˬ li Yawˇshiˆ-ahˇ sahˬ paˬ bi geuꞈ-euˬ meh.