2 Laˬsaˬbaˬ 30 - Akha

Baˬsaˬkaˬ bawˬ-iˬ gʼaˇ duˬ lehˬ hmˬ-euˬ

¹ Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ taˬ huiˬ-eu laꞈ kʼoeˇ Baˬsaˬkaˬ bawˬ-iˬ gʼeh-eu gʼaˇ duˬ, “Yeˬluˇsaˬlehˬ meuˬ-ahˇ jaˆ-eu Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma-ahˇ laˇ-awˬ” lehˇ, Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ doe ni Heˬsaˬgiˇ bi tsaꞈ gaˬ-iˇ-awˇ, Eˇpaˬleˬ miˇ kʼahˬ hawˇ-eu Maˬnaˇseˬ miˇ kʼahˬ-ahˇ kʼawꞈ, sahˬ boꞈ boꞈ-awˇ kuˇ-euˬ meh.

² Sahˬ paˬ hawˇ-eu, aˬ yawꞈ-euˬ yaw huiˬ yaw mahˇ deuˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ dawˬ tawˆ luꞈ, ba la nyiˬ siˬ tiˬ siˬ-ahˇ Baˬsaˬkaˬ bawˬ-iˬ gʼeh ma lehˇ bawˬ dzaˬ duˬ-euˬ meh.

³ Ba la yaw beh siˬ-ahˇ, aˇ yamˬ tsaˬ ni aˬ yawꞈ maꞈ bawˬ-iˬ maˬ gʼeh nya-a. Aˬ jeˬ miˇ neh ehˇ naˇ, gʼawˇ mawˇ shawˇ-eu zahˇ jahˇ gʼaˬ-euˬ piˇ ma deuˬ tiˬ loꞈ maˬ jawˇ-eu uˬ taꞈ, Yeˬluˇsaˬlehˬ meuˬ-ahˇ tsawˇ haˬ maˬ laˇ uiˬ dah-euˬ miˇ neh meh.

⁴ Aˬ yawꞈ maꞈ kʼoeˇ loꞈ-ehˇ mˇ ma lehˇ noeˬ taˬ-euˬ gaˇ, sahˬ paˬ gʼaˬ maˬ ehˇ, miˇ kʼahˬ zaˬ deuˬ maˬ ehˇ, nui kʼahˇ shiˇ-eu meh.

⁵ Kʼoeˇ miˇ neh, laꞈ taˆ paw pyawˬ-ahˇ jaˆ-eu Daˬ meuˬ-ahˇ neh laꞈ oˆ paw pyawˬ-ahˇ jaˆ-eu Beˬlaˇsheˬba meuˬ-ahˇ keuˆ ni kʼaˇ jawˇ-eu Iˇsaˬleˬlaˆ tsawˇ haˬ dawˬ tawˆ luꞈ-ahˇ, zahˇ dawˬ kʼoꞈ dawˬ jaˆ taˬ-euˬ loꞈ-ehˇ Baˬsaˬkaˬ bawˬ-iˬ gʼeh-eu gʼaˇ duˬ, “Yeˬluˇsaˬlehˬ meuˬ-ahˇ aˬ myah myah uiˬ laˇ-euˬ myaˆ maˬ tseˇ laˇ uiˬ jiˇ-awˬ” lehˇ aˬ yawꞈ maꞈ kuˇ-euˬ meh.

⁶ Sahˬ paˬ hawˇ-eu aˬ yawꞈ-euˬ yaw huiˬ yaw mahˇ deuˬ neh pyehˬ gʼeh-euˬ tsawˇ haˬ deuˬ kuˇ gaˬ-eu sahˬ boꞈ yuˇ-awˇ, Yuˇdaˆ miˇ kʼahˬ doe ni hawˇ-eu Iˇsaˬleˬlaˆ miˇ kʼahˬ doe ni iˇ-euˬ meh. Sahˬ boꞈ kʼoeˇ taꞈ heu loꞈ-ehˇ boꞈ taˬ-euˬ meh. “Iˇsaˬleˬlaˆ tsawˇ haˬ deuˬ-oˇ, Aˬshuˇliˆ sahˬ paˬ-euˬ laꞈ-ahˇ neh naw maꞈ ya buˬ-iˇ-euˬ meh. Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ pyeuꞈ-eu Sahˬpaˬ Miˬyehˇ jawˇ paw nymˬ-mˇ gʼoꞈ laˇ-awˬ.

⁷ Aˬ yawꞈ kʼawꞈ naw maꞈ jawˇ paw gʼoꞈ le tehꞈ-a. Yawˬ ha-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ saˇ jaˇ maˬ ziꞈ-eu naw maꞈ-euˬ aˬ da deuˬ hawˇ-eu naw maꞈ-euˬ aˬ yuiꞈ aˬ nyiˇ Iˇsaˬleˬlaˆ tsawˇ haˬ deuˬ loꞈ-ehˇ taˬ gʼeh. Aˬ yawꞈ maꞈ-ahˇ aˬ yawꞈ yaw kʼaˆ kʼaˆ-ehˇ kʼehˬ nehˬ-euˬ naw maꞈ ya mawˇ-euˬ meh.

⁸ Aˬ yawꞈ maꞈ loꞈ-ehˇ nui ma maˬ gʼahˇ ni, Sahˬpaˬ Miˬyehˇ-euˬ ehˇ dawˬ naˇ haˬ-awˬ. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh mˬ maˬ maˬ byaˆ zaˇ ziˇ bi muiˬ bi shawˇ laˇ gʼaˬ-euˬ Yeˬluˇsaˬlehˬ meu-ahˇ jaˆ-eu Uˬ duˬ tahˬ nymˇ nymˇ ma-ahˇ laˇ-awˇ, aˬ yawꞈ naw maꞈ-ahˇ nui ma pehˇ-eu jeˬ byoˆ-iˇ ni, aˬ yawꞈ-ahˇ uˬ duˬ tahˬ laˇ-awˬ.

⁹ Naw maꞈ Sahˬpaˬ Miˬyehˇ jawˇ paw gʼoꞈ laˇ naˇ, naw maꞈ-euˬ aˬ yuiꞈ aˬ nyiˇ deuˬ-ahˇ nyehꞈ gʼeh-euˬ tsawˇ haˬ deuˬ naw maꞈ-euˬ aˬ yuiꞈ aˬ nyiˇ kʼoeˇ deuˬ-ahˇ gʼawˬ shaˬ haw gaˬ-awˇ, iˇ kʼahˇ-ahˇ bi gʼoꞈ laˇ tehꞈ-a. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, gʼawˬ shaˬ gaˬ nya-awˇ, caw ba nya-eu miˇ neh, naw maꞈ aˬ yawꞈ jawˇ paw gʼoꞈ laˇ naˇ, aˬ yawꞈ naw maꞈ-ahˇ ha geuꞈ nehˬ laꞈ tehꞈ-a.”

¹⁰ Sahˬ boꞈ biꞈ ha leˇ-euˬ tsawˇ haˬ deuˬ-aˬ, Eˇpaˬleˬ tsawˇ jeuˬ hawˇ-eu Maˬnaˇseˬ tsawˇ jeuˬ deuˬ jawˇ-eu miˇ kʼahˬ-ahˇ jaˆ-eu meuˬ yawˬ meuˬ na luꞈ-ahˇ le-awˇ, laꞈ taˆ paw pyawˬ-ahˇ Zeˬbuˬloˬ tsawˇ jeuˬ jawˇ gaˇ keuˆ ni le keuˆ-euˬ meh. Ehˇ kʼawꞈ, tsawˇ haˬ kʼoeˇ deuˬ aˬ yawꞈ maꞈ-ahˇ uiˇ uiˇ-ehˇ naˬ gʼa-eu meh.

¹¹ Ehˇ kʼawꞈ, Aˬshaˬ tsawˇ jeuˬ, Maˬnaˇseˬ tsawˇ jeuˬ hawˇ-eu Zeˬbuˬluˬ tsawˇ jeuˬ laꞈ kʼoeˇ, Yeˬluˇsaˬlehˬ meuˬ-ahˇ oe mawꞈ-eu deuˬ kʼawꞈ, keuˬ-eu meh.

¹² Yuˇdaˆ miˇ kʼahˬ laꞈ kʼoeˇ kʼawꞈ Miˬyehˇ jawˇ-awˇ, sahˬ paˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ-euˬ mehˬ nah miˇ kʼahˬ zaˬ deuˬ caw teh-awˇ, nui ma tiˬ siˬ tehꞈ-ehˇ taˬ-eu laꞈ kʼoeˇ Miˬyehˇ-euˬ ehˇ dawˬ naˇ haˬ geuꞈ ni caw ba nehˬ-euˬ meh.

Baˬsaˬkaˬ bawˬ-iˬ gʼeh-euˬ

¹³ Dehˬ tseˬ maˬ ahˇ-eu kaˬ muˇ dzaˬ-eu bawˬ-iˬ gʼeh-eu gʼaˇ duˬ, ba la nyiˬ siˬ tiˬ siˬ-ahˇ, Yeˬluˇsaˬlehˬ meuˬ laꞈ kʼoeˇ tsawˇ haˬ gʼawˬ mya ni uiˬ laˇ-euˬ meh.

¹⁴ Yeˬluˇsaˬlehˬ meuˬ laꞈ kʼoeˇ lawˇ gaˇ shehˇ gaˇ hawˇ-eu yaw saw jeˬ doꞈ damˬ gaˇ zmˬ-eu lawˇ duˬ dawˬ tawˆ luꞈ aˬ yawꞈ maꞈ yuˇ-awˇ, Giˇdaˬlo deh kʼawꞈ-ahˇ baꞈ dzeh-iˇ-euˬ meh.

¹⁵ Ba la kʼoeˇ siˬ tseˇ oeˬ nah tiˬ nah-ahˇ, Baˬsaˬkaˬ bawˬ-iˬ gʼaˇ duˬ yawˇ zaˬ deuˬ sehꞈ-euˬ meh. Zahˇ sahˇ kʼoꞈ-ahˇ tsaˬ ni maˬ shawˇ-eu piˇ ma deuˬ hawˇ-eu Leˬbiˇ tsawˇ haˬ deuˬ-aˬ, shaꞈ dawˇ dui dui-eu laꞈ kʼoeˇ, yawˬ ha-euˬ gʼawˇ mawˇ shawˇ-euˬ meh. Kʼoeˇ ngeh jawˇ, Uˬ duˬ tahˬ nymˇ nymˇ ma laꞈ kʼoeˇ miˬ dzaˬ dzah puiˆ-awˇ lawˇ-eu jeˬ, aˬ yawꞈ maꞈ lawˇ nya-euˬ meh.

¹⁶ Miˬyehˇ-euˬ tsawˇ haˬ pyeuꞈ-eu Moˇseˬ-euˬ zahˇ dawˬ kʼoꞈ dawˬ laꞈ kʼoeˇ mehˬ taˬ tsoˆ taˬ-euˬ loꞈ-ehˇ, Uˬ duˬ tahˬ nymˇ nymˇ ma laꞈ kʼoeˇ aˬ yawꞈ maꞈ jawˇ duˬ yuˇ-euˬ meh. Leˬbiˇ tsawˇ haˬ deuˬ piˇ ma deuˬ-ahˇ shiˬ biꞈ miˇ nehˬ-awˇ, piˇ ma deuˬ lawˇ duˬ-ahˇ byaˆ shehˬ-euˬ meh.

¹⁷ Tsawˇ haˬ gʼawˬ mya ni maˬ shawˇ-eu miˇ neh, Baˬsaˬkaˬ bawˬ-iˬ gʼaˇ duˬ yawˇ zaˬ maˬ sehꞈ nya-ehˇ, aˬ yawꞈ maꞈ gʼaˇ duˬ Leˬbiˇ tsawˇ haˬ deuˬ yawˇ zaˬ kʼoeˇ deuˬ sehꞈ-awˇ, Sahˬpaˬ Miˬyehˇ-ahˇ damˬ nehˬ-euˬ meh.

¹⁸ Kʼoeˇ uˬ taꞈ, kʼoeˇ gaˇ oe taˬ-euˬ Eˇpaˬleˬ tsawˇ haˬ, Maˬnaˇseˬ tsawˇ haˬ, Iˇsaˬkaˬ tsawˇ haˬ hawˇ-eu, Zeˬbuˬloˬ tsawˇ haˬ gʼawˬ mya ni gʼawˇ mawˇ shawˇ-eu zahˇ maˬ jahˇ-ehˇ Baˬsaˬkaˬ bawˬ-iˬ dzaˬ-euˬ miˇ neh, zahˇ sahˇ kʼoꞈ-ahˇ bahˬ dui dui-euˬ meh. Kʼoeˇ miˇ neh, aˬ yawꞈ maꞈ gʼaˇ duˬ sahˬ paˬ Heˬsaˬgiˇ heu loꞈ-ehˇ guiˬ lahˬ shaˇ-euˬ meh.

¹⁹ “Nga maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, maˬ shawˇ-eu tsawˇ haˬ pyeuꞈ kʼawꞈ nui ma keuˆ dui dui-awˇ nawˬ-ahˇ uˬ duˬ tahˬ luꞈ-eu tsawˇ haˬ heu deuˬ-ahˇ, nawˇ gʼawˬ shaˬ gaˬ-eu laꞈ kʼoeˇ iˬ baˇ pyehˬ nehˬ-awˬ.”

²⁰ Heˬsaˬgiˇ-euˬ shaˇ dawˬ-ahˇ Sahˬpaˬ Miˬyehˇ naˇ haˬ-awˇ, tsawˇ haˬ kʼoeˇ deuˬ-ahˇ tiˬ jeˬ-iˬ maˬ bi guˬ leˇ ni iˬ baˇ pyehˬ nehˬ-euˬ meh.

²¹ Yeˬluˇsaˬlehˬ meuˬ-ahˇ uiˬ laˇ taˬ-euˬ Iˇsaˬleˬlaˆ tsawˇ haˬ kʼoeˇ deuˬ, shiꞈ nah keuˆ ni laˬ kʼaˬ cehˇ dui dui-eu laꞈ kʼoeˇ, dehˬ tseˬ maˬ ahˇ-eu kaˬ muˇ dzaˬ-eu bawˬ-iˬ gʼeh-awˇ, Leˬbiˇ tsawˇ haˬ deuˬ hawˇ-eu piˇ ma deuˬ kʼawꞈ, nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ-ahˇ aˬ yawꞈ nah yawꞈ ja ceuˬ-euˬ meh.

²² Sahˬpaˬ Miˬyehˇ-ahˇ uˬ duˬ tahˬ ngeh sheuˬ gʼeh-eu nya dui dui-eu miˇ neh, Leˬbiˇ tsawˇ haˬ deuˬ-ahˇ Heˬsaˬgiˇ ja ceuˬ nehˬ-euˬ meh. Shiꞈ nah keuˆ ni, aˬ yawꞈ maꞈ-ahˇ oꞈ-eu shaˬ bymˇ deuˬ dzaˬ-eu laꞈ kʼoeˇ cawˬ cawˬ taꞈ-eu lawˇ-eu jeˬ lawˇ-awˇ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ yawꞈ maꞈ ja ceuˬ-euˬ meh.

Bawˬ-iˬ shiꞈ nah paˇ gʼeh-euˬ

²³ Kʼoeˇ naˇ, dzaiˇ shiꞈ nah bawˬ-iˬ paˇ gʼeh-eu gʼaˇ duˬ tsawˇ haˬ aˇ maꞈ dawˬ tawˆ luꞈ nui ma tsaˬ-awˇ, laˬ kʼaˬ tiˬ cehˇ bawˬ-iˬ gʼehˬ-euˬ meh.

²⁴ Tsawˇ haˬ aˇ maꞈ deuˬ bi dzaˬ-eu gʼaˇ duˬ, mawˇ neˇ tiˬ heˇ mawˇ hawˇ-eu yawˇ shiꞈ heˇ mawˇ sahˬ paˬ Heˬsaˬgiˇ damˬ nehˬ-euˬ meh. Yaw huiˬ yaw mahˇ deuˬ kʼawꞈ, mawˇ neˇ tiˬ heˇ mawˇ hawˇ-eu yawˇ tiˬ muiˇ mawˇ paˇ damˬ nehˬ-euˬ meh. Piˇ ma gʼawˬ mya ni gʼawˇ mawˇ shawˇ-eu zahˇ jahˇ-euˬ meh.

²⁵ Yuˇdaˆ miˇ kʼahˬ-ahˇ jawˇ-eu tsawˇ haˬ deuˬ maˬ ehˇ, Leˬbiˇ tsawˇ haˬ deuˬ maˬ ehˇ, laꞈ taˆ paw neh oe-euˬ deuˬ maˬ ehˇ, Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ-ahˇ jawˇ duˬ dah-awˇ jawˇ-eu aˬ cawˬ tsawˇ jeuˬ deuˬ maˬ ehˇ, kʼaˇ uiˬ laˇ-euˬ deuˬ dawˬ tawˆ luꞈ laˬ kʼaˬ cehˇ dui dui-eu meh.

²⁶ Yeˬluˇsaˬlehˬ meuˬ meuˬ lah ni laˬ kʼaˬ cehˇ dui dui-eu meh. Aˬ jeˬ miˇ neh ehˇ naˇ, Daˬbiˇ-euˬ aˬ li sahˬ paˬ Sawˇlaˬmoˬ uˆ lahˇ ngeh neh naˇ, iˬ nah keuˆ ni heu loꞈ-ehˇ gʼeh-eu jeˬ tiˬ poˆ-iˬ maˬ jahˇ pyeuꞈ haw-euˬ miˇ neh meh.

²⁷ Tsawˇ haˬ kʼoeˇ deuˬ-ahˇ Sahˬpaˬ Miˬyehˇ guiˬ lahˬ biꞈ-eu gʼaˇ duˬ, piˇ ma deuˬ hawˇ-eu Leˬbiˇ tsawˇ haˬ deuˬ guiˬ lahˬ shaˇ-euˬ meh. Mˬ kʼoeˇ taˆ aˬ yawꞈ-euˬ nymˇ-ahˇ jawˇ luꞈ-eu Miˬyehˇ aˬ yawꞈ maꞈ-euˬ shaˇ dawˬ-ahˇ gaˬ-awˇ, ha geuꞈ nehˬ-euˬ meh.