2 Laˬsaˬbaˬ 29 - Akha

Yuˇdaˆ sahˬ paˬ Heˬsaˬgiˇ

¹ Heˬsaˬgiˇ-aˬ, nyiˬ tseˇ ngaˬ kʼoꞈ kʼawˆ ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ nyiˬ tseˇ gʼoeˬ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Zaˬkaˬliˇ-euˬ aˬ buˇ Aˬbiˇyaˬ meh.

² Aˬ yawꞈ-euˬ aˬ poeˬ sahˬ paˬ Daˬbiˇ-euˬ dehꞈ jeˬ dehꞈ kawˆ-ahˇ aˬ yawꞈ dzaw geuꞈ-awˇ, Sahˬpaˬ Miˬyehˇ nui ma tsaˬ-eu jeˬ mˇ-euˬ meh.

Uˬ duˬ tahˬ nymˇ nymˇ ma-ahˇ bi shawˇ laˇ-euˬ

³ Heˬsaˬgiˇ-aˬ, aˬ yawꞈ sahˬ paˬ pyeuꞈ laˇ ngeh kʼoꞈ ba la yaw beh siˬ-ahˇ, Uˬ duˬ tahˬ nymˇ nymˇ ma-euˬ lahˇ kʼehˬ deuˬ paˇ pah-awˇ, laˆ saˆ muiˬ-euˬ meh.

⁴ Piˇ ma deuˬ hawˇ-eu Leˬbiˇ tsawˇ haˬ deuˬ-ahˇ, Uˬ duˬ tahˬ nymˇ nymˇ ma-euˬ nahˇ ma doˆ kʼehˬ paw dzeˇ jaˆ-eu pu kaˬ-ahˇ aˬ yawꞈ kuˇ uiˬ-euˬ meh.

⁵ Kʼoeˇ naˇ, aˬ yawꞈ maꞈ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Naw maꞈ Leˬbiˇ tsawˇ haˬ deuˬ yawˬ ha-euˬ gʼawˇ mawˇ mˇ shawˇ-awˇ, naw maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma-ahˇ laˆ muiˬ laˆ shawˇ-awˬ. Uˬ duˬ tahˬ nymˇ nymˇ ma laꞈ kʼoeˇ jaˆ-eu yaw jawꞈ yaw laꞈ dawˬ tawˆ luꞈ yuˆ dzeh jiˇ-awˬ.

⁶ Aˬ dui-euˬ aˬ da deuˬ-aˬ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ saˇ jaˇ maˬ ziꞈ-ehˇ, aˬ yawꞈ nui ma maˬ tsaˬ-eu jeˬ mˇ-euˬ meh. Aˬ yawꞈ maꞈ aˬ yawꞈ-ahˇ byehˇ dzeh-awˇ, aˬ yawꞈ jawˇ-eu jawˇ duˬ-ahˇ naˇ kʼah ciˬ pyawˇ-euˬ meh.

⁷ Uˬ duˬ tahˬ nymˇ nymˇ ma-euˬ laˇ gʼoˆ aˬ yawꞈ maꞈ piˬ tehˬ-awˇ, tsiˇ kʼmˬ deuˬ kʼawꞈ bi doꞈ miˆ jiˇ-awˇ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ, yaw saw jeˬ doꞈ damˬ-eu maˬ ehˇ, miˬ dzaˬ dzah puiˆ-awˇ lawˇ-eu shehˇ-eu jeˬ maˬ ehˇ, maˬ mˇ ni byehˇ-euˬ meh.

⁸ Kʼoeˇ baˬ da neh, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ Sahˬpaˬ Miˬyehˇ nui ma pehˇ laˇ-awˇ, aˬ yawꞈ neh aˬ yawꞈ maꞈ-ahˇ jahˇ nehˬ-euˬ jeˬ-ahˇ tsawˇ haˬ yawˬ gʼaˬ na luꞈ tsawˬ guˆ-iˇ-euˬ meh. Gaˇ kawˆ heu naw maꞈ yaw muiˬ paˬ-ehˇ siˬ duˬ taˬ-euˬ meh.

⁹ Aˬ dui-euˬ aˬ da deuˬ-ahˇ aˬ cawˬ neh guiˇ bi deuˆ sehꞈ-awˇ, aˬ dui-euˬ miˬ sawˇ zaˬ deuˬ-ahˇ aˬ cawˬ nyehꞈ geuꞈ gʼeh-euˬ meh.

¹⁰ “Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ aˬ dui-ahˇ nui ma pehˇ-eu jeˬ byoˆ-iˇ ni, aˬ yawꞈ nehˬ-ehˇ dawˬ ma saˇ jaˇ dzaˬ-eu gʼaˇ duˬ nymˬ-mˇ ngaˇ noeˬ tsehˆ taˬ-euˬ ma.

¹¹ Ngaˬ li deuˬ-oˇ, aˇ yamˬ yawꞈ ngehꞈ-ehˇ taˬ paˇ bi dzeuˇ-iˇ. Yaw saw jeˬ doꞈ damˬ-eu gʼaˇ duˬ maˬ ehˇ, miˇ kʼahˬ zaˬ deuˬ aˬ yawꞈ-ahˇ uˬ duˬ tahˬ gaˇ bi sheuˬ gʼeh-eu gʼaˇ duˬ maˬ ehˇ, naw maꞈ-ahˇ Sahˬpaˬ Miˬyehˇ tseˇ doˆ-euˬ meh.”

¹² Kʼoeˇ gaˇ uiˬ laˇ taˬ-eu Leˬbiˇ tsawˇ haˬ deuˬ-aˬ, Kawˇ haˆ aˇ jeuˬ laꞈ kʼoeˇ, Aˬmaˬsehˇ-euˬ aˬ li Maˬhaˇ hawˇ-eu Aˬzaˬliˇ-euˬ aˬ li Yawˇlaˆ, Meˬlaˬliˇ aˇ jeuˬ laꞈ kʼoeˇ, Aˬbaˬdiˇ-euˬ aˬ li Giˇshaˆ hawˇ-eu Yeˬhaˬleˬlaˇ-euˬ aˬ li Aˬzaˬliˇ, Geˬlaˬshoˬ aˇ jeuˬ laꞈ kʼoeˇ, Zmˇnahˬ-euˬ aˬ li Yawˇaˬ hawˇ-eu Yawˇaˬ-euˬ aˬ li Eˬdeˬ

¹³ Eˇliˇzaˬpaˬ aˇ jeuˬ laꞈ kʼoeˇ, Shiˇmaˬliˇ hawˇ-eu Yoeˬlaˇ, Aˬsaˆ aˇ jeuˬ laꞈ kʼoeˇ, Zaˬkaˬliˇ hawˇ-eu Maˬtaˬniˇ,

¹⁴ Heˬmaˬ aˇ jeuˬ laꞈ kʼoeˇ, Yeˬhuˇlaˆ hawˇ-eu Shiˇmiˇ, Yeˬduˇdoˬ aˇ jeuˬ laꞈ kʼoeˇ, Sheˬmaˇyaˬ hawˇ-eu Awˇzeˬlaˇ, heu deuˬ meh.

¹⁵ Tsawˇ haˬ kʼoeˇ deuˬ yawˬ ha-euˬ aˇ jeuˬ aˇ ca deuˬ kuˇ uiˬ-awˇ, gʼawˇ mawˇ shawˇ-eu zahˇ jahˇ-euˬ meh. Kʼoeˇ naˇ, Sahˬpaˬ Miˬyehˇ-euˬ dawˬ-ahˇ gʼoe-awˇ sahˬ paˬ Heˬsaˬgiˇ neh aˬ yawꞈ maꞈ-ahˇ dawˬ biꞈ-euˬ loꞈ-ehˇ, Uˬ duˬ tahˬ nymˇ nymˇ ma-ahˇ aˬ yawꞈ maꞈ laˆ muiˬ laˆ shawˇ-euˬ meh.

¹⁶ Piˇ ma deuˬ Uˬ duˬ tahˬ nymˇ nymˇ ma-euˬ laꞈ kʼoeˇ paw laˆ muiˬ laˆ shawˇ leˇ-awˇ, maˬ muiˬ maˬ shawˇ-eu yawˬ jeˬ na luꞈ pu ka yuˇ doˆ leꞈ-euˬ meh. Kʼoeˇ loꞈ-ehˇ yuˇ doˆ leꞈ-euˬ maˬ muiˬ maˬ shawˇ-eu yawˬ jeˬ na luꞈ-ahˇ Leˬbiˇ tsawˇ haˬ deuˬ paˇ yuˇ-awˇ, meuˬ meuˬ dzeˇ jaˆ-eu Giˇdaˬloˬ deh kʼawꞈ-ahˇ baꞈ dzeh-iˇ-euˬ meh.

¹⁷ Ba la yaw beh siˬ aˇ nah yaw beh nah-ahˇ aˬ yawꞈ maꞈ kʼoeˇ loꞈ-ehˇ mˇ dahˬ beh-awˇ, yehꞈ nah byah laˇ ngeh, keuˆ beh beh le-eu lawˆ ahˇ leˇ-ehˇ, Uˬ duˬ tahˬ nymˇ nymˇ ma nymˇ lah ni aˬ yawꞈ maꞈ mˇ shawˇ gʼaˬ-euˬ meh. Uˬ duˬ tahˬ nymˇ nymˇ ma laꞈ kʼoeˇ uˬ duˬ tahˬ nya ni, dzaiˇ yehꞈ nah aˬ yawꞈ maꞈ paˇ laˆ saˆ-awˇ, ba la kʼoeˇ siˬ tseˇ koꞈ nah tiˬ nah-ahˇ, yawˬ jeˬ na luꞈ laˆ saˆ gʼaˬ jiˇ-euˬ meh.

Uˬ duˬ tahˬ nymˇ nymˇ ma paˇ a kʼoꞈ nehˬ-euˬ

¹⁸ Leˬbiˇ tsawˇ haˬ deuˬ sahˬ paˬ Heˬsaˬgiˇ jawˇ gaˇ iˇ-awˇ, heu loꞈ-ehˇ ehˇ gaˬ-iˇ-euˬ meh. “Miˬ dzaˬ dzah puiˆ-awˇ lawˇ-eu jeˬ lawˇ duˬ maˬ ehˇ, muiˬ-eu shawˇ-eu kaˬ muˇ ciˬ daˆ duˬ hawˬ jeh maˬ ehˇ, kʼoeˇ gaˇ taꞈ leˇ-eu keu ka deuˬ maˬ ehˇ, dawˬ tawˆ luꞈ ahˇ leˇ-ehˇ, Uˬ duˬ tahˬ nymˇ nymˇ lah-ehˇ nga maꞈ mˇ shawˇ gʼaˬ jiˇ-euˬ ma.

¹⁹ Sahˬ paˬ Aˬkaˆ Miˬyehˇ-ahˇ saˇ jaˇ puiˬ ngeh aˬ yawꞈ neh yuˇ doˆ gʼeh-euˬ keu ka kʼoeˇ deuˬ dawˬ tawˆ luꞈ nga maꞈ paˇ yuˇ kʼoꞈ uiˬ laꞈ jiˇ-awˇ, mˇ shawˇ gʼaˬ jiˇ miˇ tsa, Sahˬpaˬ Miˬyehˇ-euˬ lawˇ duˬ mehˬ shi bi jaˆ taˬ-euˬ ma.”

²⁰ Sahˬ paˬ Heˬsaˬgiˇ-aˬ, nyi naˬ nyi naˬ-ehˇ maˬ jawˇ ni meuˬ kʼoeˇ taˆ aˬ yuiꞈ aˬ tsu geuꞈ luꞈ-eu deuˬ-ahˇ kuˇ uiˬ-awˇ, tiˬ kawˆ loꞈ-ehˇ Uˬ duˬ tahˬ nymˇ nymˇ ma-ahˇ le-euˬ meh.

²¹ Sahˬ paˬ-euˬ nymˇ jiˇ hawˇ-eu Yuˇdaˆ miˇ kʼahˬ zaˬ deuˬ-euˬ iˬ baˇ buˬ-iˇ ni maˬ ehˇ, Uˬ duˬ tahˬ nymˇ nymˇ ma bi shawˇ laˇ ni lawˇ-eu gʼaˇ duˬ maˬ ehˇ, mawˇ neˇ mawˇ gaw shiꞈ mawˇ, yawˇ aˬ buˬ shiꞈ mawˇ, yawˇ zaˬ shiꞈ mawˇ hawˇ-eu, ciꞈ myehꞈ ciꞈ buˬ shiꞈ mawˇ aˬ yawꞈ maꞈ tsahˇ laꞈ-euˬ meh. Jeˬ zaˬ kʼoeˇ deuˬ-ahˇ lawˇ duˬ kʼoeˇ taˆ lawˇ-eu gʼaˇ duˬ, Aˬloˬ-euˬ zaˬ deuˬ uˆ deuˬ pyeuꞈ-eu piˇ ma deuˬ-ahˇ sahˬ paˬ Heˬsaˬgiˇ dawˬ biꞈ-euˬ meh.

²² Piˇ ma kʼoeˇ deuˬ mawˇ neˇ deuˬ-ahˇ jeˬ huˬ sehꞈ-awˇ lawˇ-euˬ meh. Kʼoeˇ naˇ, yawˇ aˬ buˬ deuˬ hawˇ-eu yawˇ zaˬ deuˬ-ahˇ tiˬ jeˬ saˇ-iˬ tiˬ jeˬ sehꞈ-awˇ lawˇ-euˬ meh. Aˬ yawꞈ jeˬ yawꞈ sehꞈ-awˇ lawˇ ngeh, lawˇ duˬ-ahˇ shiˬ byaˆ shehˬ-euˬ meh.

²³ Aˇ saˬ saˬ laˇ jawˬ-ehˇ, sahˬ paˬ hawˇ-eu uˬ duˬ tahˬ laˇ-euˬ tsawˇ haˬ deuˬ jawˇ gaˇ ciꞈ myehꞈ ciꞈ buˬ kʼoeˇ deuˬ aˬ yawꞈ maꞈ tsahˇ gʼeh-awˇ, ciꞈ myehꞈ deuˬ kʼoeˇ taˆ aˬ laꞈ bi cawˬ daˆ-euˬ meh.

²⁴ Kʼoeˇ naˇ, miˇ kʼahˬ zaˬ dawˬ tawˆ luꞈ iˬ baˇ buˬ-iˇ ni, piˇ ma deuˬ ciꞈ myehꞈ kʼoeˇ deuˬ-ahˇ sehꞈ-awˇ, lawˇ duˬ kʼoeˇ taˆ ciꞈ myehꞈ shiˬ shehˆ daˆ-awˇ lawˇ-euˬ meh. Aˬ jeˬ miˇ neh ehˇ naˇ, “Iˇsaˬleˬlaˆ tsawˇ jeuˬ dawˬ tawˆ luꞈ gʼaˇ duˬ miˬ dzaˬ dzah puiˆ-awˇ lawˇ-eu jeˬ hawˇ-eu iˬ baˇ shawˇ-eu lawˇ-eu jeˬ lawˇ-awˬ” lehˇ, sahˬ paˬ Heˬsaˬgiˇ neh dawˬ biꞈ taˬ-euˬ meh.

²⁵ Sahˬ paˬ Daˬbiˇ-ahˇ Miˬyehˇ gʼaˇ duˬ ngehˬ dah nehˬ-euˬ gʼaˬ pyeuꞈ-eu Gaˆ hawˇ-eu, Miˬyehˇ gʼaˇ duˬ ngehˬ dah-eu Naˬdaˬ-ahˇ gʼoe-awˇ, Sahˬpaˬ Miˬyehˇ neh sahˬ paˬ Daˬbiˇ-ahˇ mehˬ nehˬ tsoˆ nehˬ taˬ-euˬ dawˬ deuˬ-ahˇ sahˬ paˬ Heˬsaˬgiˇ caw teh-eu laꞈ kʼoeˇ, Leˬbiˇ tsawˇ haˬ deuˬ-ahˇ cehˇ lehˇ, deuˇ mˬ hawˇ-eu, bawˬ law bi yuˇ-awˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ bi jawˇ-euˬ meh.

²⁶ Kʼoeˇ miˇ neh, Leˬbiˇ tsawˇ haˬ deuˬ sahˬ paˬ Daˬbiˇ neh zmˬ-euˬ caˇ dawˬ caˇ gaˇ zmˬ-eu keu ka kʼoeˇ deuˬ yuˇ-awˇ yawꞈ-eu loꞈ-ehˇ, piˇ ma deuˬ kʼawꞈ, daˇ heh tuˆ tehˬ-awˇ yawꞈ luꞈ-eu meh.

²⁷ Miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ Heˬsaˬgiˇ dawˬ biꞈ-awˇ, lawˇ dahˬ shehˇ dahˬ beh ngeh, miˇ kʼahˬ zaˬ deuˬ Sahˬpaˬ Miˬyehˇ-ahˇ caˇ-awˇ ja ceuˬ-awˇ, caˇ dawˬ caˇ gaˇ zmˬ-eu keu ka yuˇ luꞈ-eu deuˬ kʼawꞈ, daˇ heh baw, bawˬ law baw-awˇ, deuˇ mˬ diˬ, cehˇ lehˇ ciˆ-eu laꞈ kʼoeˇ ja ceuˬ-euˬ meh.

²⁸ Kʼoeˇ gaˇ kʼaˇ jawˇ-eu tsawˇ haˬ yawˬ gʼaˬ na luꞈ uˬ duˬ tahˬ-awˇ, kʼaˇ lawˇ kʼaˇ shehˇ-euˬ jeˬ dawˬ tawˆ luꞈ puiˆ byoˆ jiˇ ngeh keuˆ ni, daˇ heh baw-awˇ caˇ dawˬ caˇ-euˬ meh.

²⁹ Kʼoeˇ naˇ, sahˬ paˬ Heˬsaˬgiˇ hawˇ-eu tsawˇ haˬ dawˬ tawˆ luꞈ pawˬ tsuiꞈ pawˬ dmˬ dmˬ-awˇ, Miˬyehˇ-ahˇ uˬ duˬ tahˬ-euˬ meh.

³⁰ Kʼoeˇ naˇ, sahˬ paˬ hawˇ-eu miˇ kʼahˬ-ahˇ aˬ yuiꞈ aˬ tsu geuꞈ-eu deuˬ, Leˬbiˇ tsawˇ haˬ deuˬ-ahˇ, “Daˬbiˇ hawˇ-eu Miˬyehˇ gʼaˇ duˬ ngehˬ dah-eu Aˬsaˆ neh boꞈ-euˬ, Sahˬpaˬ Miˬyehˇ-ahˇ ja ceuˬ-eu caˇ dawˬ caˇ-awˬ” lehˇ ehˇ nehˬ-euˬ meh. Kʼoeˇ ngeh, tsawˇ haˬ yawˬ gʼaˬ na luꞈ laˬ kʼaˬ cehˇ taˆ ni caˇ dawˬ caˇ-eu laꞈ kʼoeˇ, pawˬ tsuiꞈ pawˬ dmˬ dmˬ-awˇ Miˬyehˇ-ahˇ uˬ duˬ tahˬ-euˬ meh.

³¹ Tsawˇ haˬ kʼoeˇ deuˬ-ahˇ Heˬsaˬgiˇ ehˇ nehˬ-eu, “Nymˬ-mˇ poˆ jawˇ naw maꞈ shawˇ laˇ gʼaˬ-euˬ meh. Kʼoeˇ miˇ neh, Sahˬpaˬ Miˬyehˇ-euˬ guiˬ lahˬ-ahˇ ja ceuˬ-eu lawˇ-euˬ jeˬ yuˇ laꞈ-awˇ lawˇ-awˬ lehˇ ehˇ nehˬ-euˬ meh. Aˬ yawꞈ-euˬ ehˇ dawˬ-ahˇ aˬ yawꞈ maꞈ naˇ haˬ-awˇ, tsawˇ haˬ tiˬ paˆ na deuˬ nui ma keuˆ dui dui-eu laꞈ kʼoeˇ miˬ dzaˬ dzah puiˆ-awˇ lawˇ-eu jeˬ kʼawꞈ yuˇ laꞈ-euˬ meh.

³² Miˬ dzaˬ dzah puiˆ-awˇ lawˇ-eu jeˬ Sahˬpaˬ Miˬyehˇ-ahˇ lawˇ nehˬ-eu gʼaˇ duˬ, mawˇ neˇ mawˇ gaw shiꞈ tseˇ mawˇ, yawˇ aˬ buˬ tiˬ yaˇ mawˇ hawˇ-eu, yawˇ zaˬ nyiˬ yaˇ mawˇ aˬ yawꞈ maꞈ tsahˇ laꞈ-euˬ meh.

³³ Tsawˇ haˬ aˇ maꞈ-ahˇ bi dzaˬ-eu lawˇ-eu jeˬ gʼaˇ duˬ kʼawꞈ, mawˇ neˇ mawˇ gaw koꞈ yaˇ mawˇ hawˇ-eu yawˇ smˬ heˇ mawˇ aˬ yawꞈ maˬ tsahˇ laꞈ-euˬ meh.

³⁴ Jeˬ zaˬ kʼoeˇ deuˬ dawˬ tawˆ luꞈ-ahˇ sehꞈ jiˇ coeˇ ni piˇ ma maˬ jawˇ myaˬ-eu miˇ neh, caw mˇ caw shaˇ-eu gʼaˇ duˬ piˇ ma nui deuˬ yawˬ ha-euˬ gʼawˇ mawˇ mˇ shawˇ gʼaˬ ngeh keuˆ ni, gaˇ kʼoeˇ mˇ luiˆ nya ni Leˬbiˇ tsawˇ haˬ deuˬ caw ba nehˬ-euˬ meh. Leˬbiˇ tsawˇ haˬ deuˬ-aˬ, yawˬ ha-euˬ gʼawˇ mawˇ yaw shawˇ shawˇ-ehˇ dehꞈ-eu paw, piˇ ma deuˬ naˆ maˬ tseˇ saˇ jaˇ taˬ nya-eu meh.

³⁵ Piˇ ma deuˬ-aˬ, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ ya lawˇ-eu uˬ taꞈ, tsawˇ haˬ aˇ maꞈ dzaˬ-eu gʼaˇ duˬ lawˇ-euˬ jeˬ zaˬ deuˬ-euˬ tsiˇ deuˬ ya dzah puiˆ-eu gaˇ hawˇ-eu, miˬ dzaˬ dzah puiˆ-awˇ lawˇ-euˬ jeˬ nehˬ-ehˇ lawˇ caw-eu aˬ gaꞈ dzaˇ uiˇ shehˆ sehꞈ-eu gaˇ kʼawꞈ ya mˇ-eu meh. Kʼoeˇ loꞈ-ehˇ, Uˬ duˬ tahˬ nymˇ nymˇ ma laꞈ kʼoeˇ uˬ duˬ tahˬ-eu jeˬ-ahˇ aˬ yawꞈ maꞈ aˇ dahˬ paˇ beh poˆ-euˬ meh.

³⁶ Gaˇ heu deuˬ yaw kawˇ-ehˇ mˇ pyeuꞈ nya ni Miˬyehˇ aˬ yawꞈ maꞈ-ahˇ caw ba-euˬ miˇ neh, sahˬ paˬ Heˬsaˬgiˇ hawˇ-eu miˇ kʼahˬ zaˬ deuˬ laˬ kʼaˬ cehˇ dui dui-euˬ meh.