2 Laˬsaˬbaˬ 28 - Akha

Yuˇdaˆ sahˬ paˬ Aˬkaˆ

¹ Aˬkaˆ-aˬ, aˇ kʼoꞈ nyiˬ tseˇ kʼawˆ ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ tseˇ koꞈ kʼoꞈ uˆ lahˇ-euˬ meh. Aˬ yawꞈ-euˬ aˬ poeˬ sahˬ paˬ Daˬbiˇ-euˬ dehꞈ jeˬ dehꞈ kawˆ-ahˇ aˬ yawꞈ maˬ caw teh ni, Sahˬpaˬ Miˬyehˇ nui ma maˬ tsaˬ-eu jeˬ aˬ yawꞈ mˇ-euˬ meh.

² Ehˇ kʼawꞈ, Iˇsaˬleˬlaˆ sahˬ paˬ deuˬ-ahˇ aˬ yawꞈ dzaw geuꞈ-eu uˬ taꞈ, Baˬlaˇ miˬ yehˇ-ahˇ uˬ duˬ tahˬ-eu gʼaˇ duˬ tahˬ pahˬ aˬ ma mawˇ kawˇ tehˆ-euˬ meh.

³ Iˇsaˬleˬlaˆ tsawˇ haˬ deuˬ miˇ kʼahˬ kʼoeˇ kʼahˬ-ahˇ jawˇ uˇ leˇ ngeh, Sahˬpaˬ Miˬyehˇ neh bi teh doˆ-euˬ kʼoeˇ gaˇ jawˇ-eu tsawˇ oeˇ deuˬ-euˬ jawꞈ dui dui-eu zahˇ sahˇ kʼoꞈ-ahˇ aˬ yawꞈ dzaw geuꞈ-awˇ, Hiˬnoˬ deh kʼawꞈ-ahˇ yaw saw jeˬ doꞈ damˬ-awˇ, lawˇ-eu shehˇ-euˬ uˬ taꞈ, aˬ yawꞈ-euˬ aˬ li deuˬ-ahˇ miˬ dzaˬ dzah puiˆ-awˇ tahˬ pahˬ aˬ ma mawˇ kawˇ-ahˇ lawˇ nehˬ-euˬ meh.

⁴ Gawˬ duˇ uˬ du hawˇ-eu naˇ shmˇ muiˬ-eu aˇ bawˇ dawˬ pehˬ-ahˇ kʼaˇ jaˆ-eu lawˇ ciꞈ zaˬ deuˬ uˬ duˬ tahˬ-eu jawˇ duˬ-ahˇ, lawˇ-eu shehˇ-eu jeˬ hawˇ-eu yaw saw jeˬ doꞈ damˬ-euˬ meh.

Suˇliˆ miˇ kʼahˬ hawˇ-eu Iˇsaˬleˬlaˆ miˇ kʼahˬ nehˬ-ehˇ guiˇ deuˆ-euˬ

⁵ Aˬ yawꞈ kʼoeˇ loꞈ-ehˇ dehꞈ-eu miˇ neh, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ aˬ yawꞈ-ahˇ Suˇliˆ sahˬ paˬ-euˬ aˬ laꞈ laꞈ kʼoeˇ a nehˬ-awˇ, Suˇliˆ sahˬ paˬ neh guiˇ bi deuˆ gʼaˬ-eu laꞈ kʼoeˇ, aˬ yawꞈ-euˬ miˇ kʼahˬ zaˬ gʼawˬ mya ni Daˬmaˬsehˇ meuˬ-ahˇ bi nyehꞈ gʼeh-euˬ meh. Aˬ yawꞈ-ahˇ Iˇsaˬleˬlaˆ sahˬ paˬ-euˬ aˬ laꞈ laꞈ kʼoeˇ tiˬ poˆ paˇ a nehˬ-awˇ, aˬ yawꞈ-euˬ tsawˇ haˬ gʼawˬ mya ni bi deuˆ sehꞈ-awˇ sm dui dui-euˬ meh.

⁶ Leˬmaˬliˇ-euˬ aˬ li Iˇsaˬleˬlaˆ sahˬ paˬ Peˬkah neh, tiˬ nah laꞈ kʼoeˇ tehꞈ-ehˇ kʼaˬ dui dui-eu Yuˇdaˆ yehˇ tiˬ seh nyiˬ muiˇ gʼaˬ bi deuˆ sehꞈ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ yawꞈ maꞈ byehˇ dzeh-euˬ miˇ neh kʼoeˇ loꞈ-ehˇ ya daˬ-euˬ meh.

⁷ Ziˇkaˬliˇ lehˇ myahˇ-euˬ Iˇsaˬleˬlaˆ yehˇ tiˬ gʼaˬ neh, sahˬ paˬ Aˬkaˆ-euˬ aˬ li Mawˇseˬyaˇ-ahˇ maˬ ehˇ, sahˬ paˬ-euˬ nymˇ-ahˇ haw-eu pyaˆ-eu gʼaˬ pyeuꞈ-eu Aˬzaˬliˇkmˬ-ahˇ maˬ ehˇ, sahˬ paˬ-euˬ laꞈ oˆ teˬ ni gʼeh-eu gʼaˬ pyeuꞈ-eu Eˇlaˬkaˬnaˬ-ahˇ maˬ ehˇ, sehꞈ-euˬ meh.

⁸ Yuˇdaˆ tsawˇ haˬ deuˬ-aˬ, Iˇsaˬleˬlaˆ tsawˇ haˬ deuˬ-euˬ aˬ yuiꞈ aˬ nyiˇ pyeuꞈ kʼawꞈ, zaˬ miˬ zaˬ nyiˬ seh gʼaˬ hawˇ-eu zaˬ deuˬ-ahˇ Iˇsaˬleˬlaˆ tsawˇ haˬ deuˬ nyehꞈ kʼoꞈ gʼeh-awˇ, pyuˇ shuiˇ myawˬ gahˬ deuˬ kʼawꞈ gʼawˬ mya ni yuˇ kʼoꞈ geuꞈ gʼeh-euˬ meh.

Miˬyehˇ gʼaˇ duˬ ngehˬ dah-eu Awˇdehˇ

⁹ Sahˬpaˬ Miˬyehˇ gʼaˇ duˬ ngehˬ dah-eu Awˇdehˇ lehˇ myahˇ-euˬ tiˬ gʼaˬ Saˬmaˬliˆ meuˬ-ahˇ jawˇ-eu meh. Yuˇdaˆ tsawˇ haˬ deuˬ nyehꞈ-awˇ Saˬmaˬliˆ meuˬ-ahˇ gʼoꞈ uˇ laˇ luꞈ-eu Iˇsaˬleˬlaˆ guiˇ maꞈ-ahˇ aˬ yawꞈ tahˬ puˬ-iˇ-awˇ, heu loꞈ-ehˇ ehˇ nehˬ-euˬ meh. “Naw maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, Yuˇdaˆ miˇ kʼahˬ-ahˇ nui ma pehˇ-eu miˇ neh, naw maꞈ-ahˇ aˬ yawꞈ maꞈ kʼoeˇ taˆ bi gʼaˬ leˇ nehˬ laꞈ-euˬ meh. Ehˇ kʼawꞈ, naw maꞈ neh aˬ yawꞈ maꞈ-ahˇ kʼaˇ sehꞈ mawꞈ-eu sehꞈ-euˬ gaˇ kawˆ, mˬ kʼoeˇ taˆ keuˆ ni aˬ yawꞈ-ahˇ gaˬ keuˆ leˇ taˬ-euˬ meh.

¹⁰ Nymˬ-mˇ Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ-ahˇ jawˇ-eu kʼaˬ dzeˇ zaˬ hawˇ-eu zaˬ miˬ zaˬ heu deuˬ-ahˇ naw maꞈ-euˬ zaˬ kʼaˆ bi geuꞈ ma lehˇ naw maꞈ noeˬ luꞈ-eu meh. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ naw maꞈ mˇ bahˬ gʼaˬ-euˬ gaˇ kawˆ naw maꞈ maˬ siˬ te loˇ.

¹¹ Ngaˇ ehˇ gaˇ naˇ haˬ sheˇ. Naw maꞈ neh nyehꞈ laꞈ-euˬ tsawˇ haˬ heu deuˬ-aˬ, naw maꞈ-euˬ aˬ yuiꞈ aˬ nyiˇ pyeuꞈ-eu meh. Aˬ yawꞈ maꞈ-ahˇ bi gʼoꞈ-iˇ-awˬ. Maˬ bi gʼoꞈ-iˇ naˇ, Sahˬpaˬ Miˬyehˇ nui ma pehˇ-eu laꞈ kʼoeˇ naw maꞈ-ahˇ kʼehˬ nehˬ kʼaˆ nehˬ laꞈ tehꞈ-a.”

¹² Iˇsaˬleˬlaˆ miˇ kʼahˬ laꞈ kʼoeˇ aˬ yuiꞈ aˬ tsu geuꞈ luꞈ-eu deuˬ laꞈ kʼoeˇ ahˇ-eu Yeˬhawˇhaˬnaˬ-euˬ aˬ li Aˬzaˬliˇ, Meˬshiˇleˬmoˇ-euˬ aˬ li Beˬleˬkiˇ, Shaˬlmˬ-euˬ aˬ li Yeˬhiˇzaˬgiˇ hawˇ-eu Haˬdaˬlehˇ-euˬ aˬ li Aˬmaˬsaˬ aˬ ha oeˬ gʼaˬ kʼawꞈ, guiˇ maꞈ kʼoeˇ maꞈ kʼoeˇ loꞈ-ehˇ mˇ gaˇ nui ma maˬ tsaˬ-a.

¹³ Aˬ yawꞈ maꞈ ehˇ-eu, “Naw maꞈ neh nyehꞈ laꞈ-euˬ tsawˇ haˬ teu deuˬ-ahˇ heu gaˇ taˬ sheuˬ uˇ laꞈ. Sahˬpaˬ Miˬyehˇ nui ma pehˇ-awˇ aˬ dui-ahˇ kʼehˬ nehˬ laꞈ paˬ-ehˇ yaw beh neh aˬ dui neh aˬ yawꞈ-ahˇ mˇ bahˬ taˬ-euˬ iˬ baˇ jaˆ luꞈ-eu ma. Aˬ dui-euˬ iˬ baˇ paˇ myaˬ dzehˬ laˇ ni naw maꞈ mˇ-eu gʼeh te loˇ.”

¹⁴ Kʼoeˇ ngeh, guiˇ maꞈ kʼoeˇ maꞈ-aˬ, aˬ yawꞈ maꞈ neh nyehꞈ laꞈ-euˬ tsawˇ haˬ deuˬ hawˇ-eu aˬ yawꞈ maꞈ neh deuˆ za laꞈ-euˬ pyuˇ shuiˇ myawˬ gahˬ deuˬ-ahˇ, miˇ kʼahˬ zaˬ deuˬ hawˇ-eu aˬ yuiꞈ aˬ tsu deuˬ-ahˇ a nehˬ-euˬ meh.

¹⁵ Aˬ yawꞈ maꞈ neh deuˆ za laꞈ-euˬ myawˬ deuˬ yuˇ-awˇ, aˬ yawꞈ maꞈ neh nyehꞈ laꞈ-euˬ tsawˇ haˬ deuˬ-ahˇ dm gʼaˬ dm lmˇ bi biˇ nehˬ-eu gʼaˇ duˬ, aˬ yawꞈ maꞈ-ahˇ laˆ tsoeˬ-eu aˬ yuiꞈ aˬ tsu kʼoeˇ oeˬ gʼaˬ-ahˇ tseˇ doˆ-euˬ meh. Aˬ yuiꞈ aˬ tsu kʼoeˇ oeˬ gʼaˬ-aˬ, tsawˇ haˬ kʼoeˇ deuˬ-ahˇ, mehˬ tsoeˬ deuˬ, sehˬ nawˆ deuˬ hawˇ-eu dzaˬ dzaˬ dawˇ dawˇ biꞈ loꞈ nehˬ-awˇ, maˇ kʼehˬ maˇ naˇ deuˬ-ahˇ saˬ loˬ tsiˇ lehꞈ-awˇ laˆ saˆ nehˬ-euˬ meh. Gaˇ ma maˬ cah nya-ehˇ pyeuꞈ-iˇ-euˬ deuˬ-ahˇ mahˬ tahˬ laˆ bi dziˬ-awˇ, nyehꞈ laꞈ-euˬ tsawˇ haˬ kʼoeˇ deuˬ dawˬ tawˆ luꞈ-ahˇ, Yuˇdaˆ miˇ kʼahˬ-euˬ miˇ kaˬ-ahˇ jaˆ-eu daoˇ aˇ bawˇ-euˬ meuˬ lehˇ kuˇ-eu Yeˬliˇkoˇ meuˬ-ahˇ sheuˬ ha kʼoꞈ nehˬ-iˇ-euˬ meh. Kʼoeˇ naˇ, Iˇsaˬleˬlaˆ tsawˇ haˬ deuˬ Saˬmaˬliˆ meuˬ-ahˇ gʼoꞈ leˇ-euˬ meh.

Aˬshuˇliˆ sahˬ paˬ-ahˇ Aˬkaˆ laꞈ jeuˬ shaˇ-euˬ

¹⁶ Aˇ yamˬ kʼoeˇ yamˬ laꞈ kʼoeˇ, Aˬshuˇliˆ sahˬ paˬ jawˇ gaˇ sahˬ paˬ Aˬkaˆ tsawˇ haˬ pyehˬ gʼeh-awˇ, “Caw ba le-awˬ” lehˇ bi shaˇ leˇ-euˬ meh.

¹⁷ Aˬ jeˬ miˇ neh ehˇ naˇ, Eˬdoˬ tsawˇ haˬ deuˬ paˇ uˇ laˇ-awˇ, Yuˇdaˆ miˇ kʼahˬ-ahˇ deuˆ gʼaˬ-awˇ tsawˇ haˬ gʼawˬ mya ni nyehꞈ gʼeh-euˬ meh.

¹⁸ Aˬ yawꞈ kʼoeˇ yamˬ-ahˇ, nahˇ ma ga kʼehˬ paw gawˬ jawˬ dawˬ dahˬ-ahˇ jaˆ-eu meuˬ deuˬ hawˇ-eu Yuˇdaˆ miˇ kʼahˬ laꞈ oˆ paw dzaˬ-ahˇ jaˆ-eu meuˬ deuˬ-ahˇ, Piˇliˇtiˆ tsawˇ haˬ deuˬ uˇ laˇ-awˇ guiˇ deuˆ-euˬ meh. Behˬsheˬmehˇ meuˬ, Aiˬjaˬloˬ meuˬ, Geˬdeˬlawˇ meuˬ heu deuˬ hawˇ-eu, Sawˇkawˇ meuˬ, Tmˇnahˬ meuˬ hawˇ-eu Gmˇzoˬ meuˬ heu deuˬ-ahˇ, tahˬ gʼoꞈ tahˬ jawˇ jaˆ-eu pu deuˬ ahˇ leˇ-ehˇ, aˬ yawꞈ maꞈ deuˆ gʼaˬ-awˇ, jawˇ geuꞈ-euˬ meh.

¹⁹ Yuˇdaˆ sahˬ paˬ Aˬkaˆ-aˬ, miˇ kʼahˬ zaˬ deuˬ-ahˇ aˬ yawꞈ kʼaˇ uˆ lahˇ mawꞈ-eu loꞈ-ehˇ uˆ lahˇ-eu uˬ taꞈ, Sahˬpaˬ Miˬyehˇ-ahˇ yaw zeu maˬ baw-eu miˇ neh, Sahˬpaˬ Miˬyehˇ neh Yuˇdaˆ miˇ kʼahˬ kʼoeˇ taˆ shaˬ-eu zahˬ-eu jeˬ bi keuˆ le-euˬ meh.

²⁰ Aˬshuˇliˆ sahˬ paˬ Tiˇgaˬlaˇpaˬleˬsaˬ-aˬ, Aˬkaˆ-ahˇ maˬ caw ba nehˬ-eu uˬ taꞈ, laˆ shaˬ laˆ zahˬ nehˬ-euˬ meh.

²¹ Kʼoeˇ ngeh jawˇ, Uˬ duˬ tahˬ nymˇ nymˇ ma-ahˇ maˬ ehˇ, sahˬ paˬ-euˬ hawˇ nymˇ-ahˇ maˬ ehˇ, miˇ kʼahˬ zaˬ kʼoeˇ taˆ aˬ yuiꞈ aˬ tsu geuꞈ-eu deuˬ-euˬ nymˇ-ahˇ maˬ ehˇ, kʼaˇ jaˆ luꞈ-eu shuiˇ dawˬ tawˆ luꞈ Aˬkaˆ neh yuˇ jiˇ-awˇ, Aˬshuˇliˆ sahˬ paˬ-ahˇ biꞈ nehˬ-euˬ meh. Ehˇ kʼawꞈ, gaˇ dahˇ maˬ tsoeˬ leˇ-a.

Aˬkaˆ neh mˇ-euˬ iˬ baˇ

²² Aˬkaˆ-aˬ, aˬ yawꞈ kʼoeˇ taˆ shaˬ dui zahˬ dui dui-eu jeˬ keuˆ le luꞈ ngeh, yaw beh naˆ maˬ tseˇ Sahˬpaˬ Miˬyehˇ mehˬ shi aˬ yawꞈ iˬ baˇ mˇ-euˬ meh.

²³ Aˬ yawꞈ-ahˇ guiˇ deuˆ gʼaˬ-euˬ Suˇliˆ tsawˇ haˬ deuˬ-euˬ miˬ yehˇ deuˬ-ahˇ aˬ yawꞈ lawˇ-eu shehˇ-eu jeˬ mˇ-euˬ meh. “Suˇliˆ miˬ yehˇ deuˬ Suˇliˆ sahˬ paˬ deuˬ-ahˇ caw ba nehˬ-eu loꞈ-ehˇ, ngaˇ kʼawꞈ aˬ yawꞈ maꞈ-ahˇ lawˇ nehˬ shehˇ nehˬ naˇ, ngaˬ-ahˇ kʼawꞈ caw ba nehˬ laꞈ-eu duˇ” lehˇ aˬ yawꞈ noeˬ-euˬ meh. Ehˇ kʼawꞈ, aˬ yawꞈ-euˬ nui noeˬ kʼoeˇ aˬ yawꞈ kʼoeˇ taˆ hawˇ-eu aˬ yawꞈ-euˬ miˇ kʼahˬ kʼoeˇ taˆ, luˬ-iˇ seˇ-iˇ-eu jeˬ bi keuˆ le-euˬ meh.

²⁴ Kʼoeˇ uˬ taꞈ, Uˬ duˬ tahˬ nymˇ nymˇ ma laꞈ kʼoeˇ jaˆ-eu mˇ myawˬ keu ka deuˬ-ahˇ aˬ yawˬ laˆ kʼehꞈ laˆ kʼoeˆ jiˇ-euˬ meh. Uˬ duˬ tahˬ nymˇ nymˇ ma -ahˇ aˬ yawꞈ piˬ tehˬ-awˇ, Yeˬluˇsaˬlehˬ meuˬ doe ni lawˇ duˬ deuˬ baꞈ taˬ doe-awˇ bi jaˆ-euˬ meh.

²⁵ Aˬ cawˬ tsawˇ jeuˬ-euˬ miˬyehˇ deuˬ-ahˇ yaw saw jeˬ doꞈ damˬ-eu gʼaˇ duˬ, Yuˇdaˆ miˇ kʼahˬ laꞈ kʼoeˇ jaˆ-eu meuˬ yaw huiˬ yaw nyiˇ yawˬ meuˬ na luꞈ laꞈ kʼoeˇ, lawˇ ciꞈ zaˬ deuˬ-euˬ uˬ duˬ tahˬ-euˬ jawˇ duˬ deuˬ aˬ yawꞈ tsoˆ-euˬ meh. Aˬ yawꞈ kʼoeˇ loꞈ-ehˇ mˇ-eu laꞈ kʼoeˇ, aˬ yawꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ nui ma pehˇ-eu jeˬ aˬ yawꞈ kʼoeˇ taˆ bi keuˆ le-euˬ meh.

²⁶ Aˬ yawꞈ uˆ lahˇ-euˬ aˇ nah aˇ yamˬ laꞈ kʼoeˇ kʼaˇ pyeuꞈ laˇ-euˬ gaˇ kawˆ nui deuˬ dawˬ tawˆ luꞈ aˇ dahˬ beh gaˇ neh aˇ saˬ saˬ gaˇ keuˆ ni, Iˇsaˬleˬlaˆ sahˬ paˬ deuˬ hawˇ-eu Yuˇdaˆ sahˬ paˬ deuˬ gaˇ kawˆ boꞈ taˬ-euˬ Laˬsaˬbaˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²⁷ Sahˬ paˬ Aˬkaˆ shiˇ-awˇ, Yeˬluˇsaˬlehˬ meuˬ laꞈ kʼoeˇ baꞈ pahˬ nehˬ-euˬ meh. Ehˇ kʼawꞈ, sahˬ paˬ-euˬ lmˬ bymˇ-ahˇ maˬ baꞈ pahˬ nehˬ-a. Kʼoeˇ naˇ, aˬ yawꞈ-euˬ aˬ li Heˬsaˬgiˇ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.