2 Laˬsaˬbaˬ 27 - Akha

Yuˇdaˆ sahˬ paˬ Yoˇdaˬ

¹ Yoˇdaˬ -aˬ, aˬ yawꞈ-euˬ aˇ kʼoꞈ nyiˬ tseˇ ngaˬ kʼoꞈ kʼawˆ ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ tseˇ koꞈ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Zaˬdoˆ-euˬ aˬ buˇ Yeˬluˇshaˬ pyeuꞈ-eu meh.

² Aˬ yawꞈ-euˬ aˬ da Awˇziˇ loꞈ-ehˇ, Sahˬpaˬ Miˬyehˇ nui ma tsaˬ-eu jeˬ aˬ yawꞈ mˇ-euˬ meh. Ehˇ kʼawꞈ, aˬ yawꞈ-euˬ aˬ da loꞈ-ehˇ Uˬ duˬ tahˬ nymˇ nymˇ ma-ahˇ uˇ leˇ-awˇ yaw saw jeˬ doꞈ damˬ-eu jeˬ aˬ yawꞈ maˬ mˇ-a. Miˇ kʼahˬ zaˬ deuˬ-aˬ, iˬ baˇ mˇ mˇ-ehˇ jawˇ luꞈ-eu meh.

³ Yoˇdaˬ-aˬ, Uˬ duˬ tahˬ nymˇ nymˇ ma-euˬ Laꞈ taˆ pyawˬ lahˇ kʼehˬ jahˇ ahˇ-awˇ, Yeˬluˇsaˬlehˬ meuˬ-euˬ Awˇpeˬlaˇ lehˇ kuˇ-eu paw dzeˇ coeˇ-ahˇ meuˬ lahˇ ziꞈ dah ni paˇ gawˬ ziꞈ-euˬ meh.

⁴ Yuˇdaˆ miˇ kʼahˬ gawˬ jawˬ deuˬ-ahˇ aˬ yawꞈ meuˬ daˬ-awˇ, aˇ bawˇ sahˬ kʼaˆ doe ni loꞈ-eu nymˇ goˇ deuˬ hawˇ-eu taˆ deuˬ tsoˆ-euˬ meh.

⁵ Aˬmoˬ sahˬ paˬ-ahˇ aˬ yawꞈ guiˇ deuˆ gʼaˬ-awˇ, Aˬmoˬ tsawˇ haˬ deuˬ-ahˇ tiˬ kʼoꞈ-euˬ pyuˇ nyiˬ heˇ oeˬ tseˇ jawꞈ-i, cehˇ smˬ muiˇ daˇ hawˇ-eu, lawˬ loeˇ smˬ muiˇ daˇ kawˬ bi doˆ-euˬ meh. Smˇ kʼoꞈ keuˆ ni aˬ yawꞈ kʼoꞈ yawꞈ kʼoeˇ myaˆ ni kawˬ bi doˆ-euˬ meh.

⁶ Aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ Yoˇdaˬ saˇ jaˇ ziꞈ-eu miˇ neh, tiˬ jawˇ saˇ-iˬ tiˬ jawˇ aˬ yawꞈ baoˬ huiˬ laˇ luꞈ-eu meh.

⁷ Yoˇdaˬ uˆ lahˇ ngeh pyeuꞈ laˇ-euˬ gaˇ kawˆ nui deuˬ maˬ ehˇ, aˬ yawꞈ neh guiˇ deuˆ-euˬ gaˇ kawˆ deuˬ maˬ ehˇ, aˬ yawꞈ neh miˇ kʼahˬ-ahˇ uˆ lahˇ-euˬ gaˇ kawˆ maˬ ehˇ, Iˇsaˬleˬlaˆ hawˇ-eu Yuˇdaˆ sahˬ paˬ deuˬ gaˇ kawˆ boꞈ taˬ-euˬ Laˬsaˬbaˬ sahˬ boꞈ laꞈ kʼoeˇ boꞈ taˬ-euˬ meh.

⁸ Yoˇdaˬ-aˬ, nyiˬ tseˇ ngaˬ kʼoꞈ kʼawˆ ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ tseˇ koꞈ kʼoꞈ uˆ lahˇ-euˬ meh.

⁹ Aˬ yawꞈ shiˇ-awˇ, Daˬbiˇ-euˬ meuˬ laꞈ kʼoeˇ aˬ yawꞈ-ahˇ baꞈ pahˬ-awˇ, aˬ yawꞈ-euˬ aˬ li Aˬkaˆ gʼaˬ aˬ yawꞈ-euˬ dah zaˇ sahˬ paˬ geuꞈ-euˬ meh.