2 Laˬsaˬbaˬ 26 - Akha

Yuˇdaˆ sahˬ paˬ Awˇziˇ

¹ Yuˇdaˆ miˇ kʼahˬ zaˬ dawˬ tawˆ luꞈ, tseˇ koꞈ kʼoꞈ byah-eu Awˇziˇ-ahˇ, aˬ yawꞈ aˬ da Aˬmaˬziˇ-euˬ dah zaˇ sahˬ paˬ bi geuꞈ-euˬ meh.

² Aˬ yawꞈ-euˬ aˬ da Aˬmaˬziˇ shiˇ dzeuˇ gʼaˬ ngeh, Eˇlaˆ meuˬ-ahˇ Awˇziˇ paˇ deuˆ za kʼoꞈ-awˇ tsoˆ muiˬ-euˬ meh.

³ Awˇziˆ-aˬ, tseˇ koꞈ kʼoꞈ kʼawˆ ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ oeˬ tseˇ nyiꞈ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Yeˬluˇsaˬlehˬ meuˬ-ahˇ jawˇ-eu Yeˬkawˇliˇ meh.

⁴ Aˬ yawꞈ-euˬ aˬ da Aˬmaˬziˇ loꞈ-ehˇ, Sahˬpaˬ Miˬyehˇ nui ma tsaˬ-eu jeˬ aˬ yawꞈ mˇ-euˬ meh.

⁵ Guiˬ lahˬ saꞈ laˇ paw taꞈ leˇ-awˇ, aˬ yawꞈ-ahˇ nui noeˬ nui duˇ biꞈ-eu gʼaˬ pyeuꞈ-eu Zaˬkaˬliˇ kʼaˇ dehꞈ kʼoeˇ keuˆ ni, Sahˬpaˬ Miˬyehˇ-ahˇ aˬ yawꞈ saˇ jaˇ ziꞈ-awˇ, Miˬyehˇ aˬ yawꞈ-ahˇ guiˬ lahˬ biꞈ nehˬ-euˬ meh.

⁶ Piˇliˇtiˆ tsawˇ haˬ deuˬ-ahˇ aˬ yawꞈ guiˇ deuˆ-awˇ, Gaˬdaˇ meuˬ, Jmˬnyaˬ meuˬ hawˇ-eu Aˬshaˬdoˇ meuˬ heu deuˬ-euˬ meuˬ meuˬ lahˇ deuˬ-ahˇ aˬ yawꞈ laˆ byaˆ jiˇ-awˇ, Aˬshaˬdoˇ meuˬ dawˬ peh hawˇ-eu Piˇliˇtiˆ miˇ kʼahˬ doe ni ziꞈ dah ni gʼeh-eu meuˬ deuˬ aˬ yawꞈ tsoˆ-euˬ meh.

⁷ Piˇliˇtiˆ tsawˇ haˬ deuˬ, Guˇbaˬlaˇ meuˬ-ahˇ jawˇ-eu Aˬlaˆ tsawˇ haˬ deuˬ hawˇ-eu, Myuˇniˆ tsawˇ haˬ deuˬ-ahˇ aˬ yawꞈ guiˇ deuˆ gʼaˬ nya ni Miˬyehˇ aˬ yawꞈ-ahˇ caw ba nehˬ-euˬ meh.

⁸ Aˬmoˬ tsawˇ haˬ deuˬ kʼawꞈ aˬ yawꞈ-ahˇ kawˬ taꞈ ha nehˬ laˇ-awˇ, aˬ yawꞈ baoˬ huiˬ dui dui laˇ-euˬ miˇ neh, Iˇjiˇtuˆ miˇ kʼahˬ-ahˇ keuˆ ni aˬ yawꞈ tsawˇ myahˇ doˆ-euˬ meh.

⁹ Yeˬluˇsaˬlehˬ meuˬ-euˬ meuˬ lahˇ-ahˇ jaˆ-eu Laꞈcoeˇ lahˇ kʼehˬ, Deh kʼawꞈ lahˇ kʼehˬ hawˇ-eu meuˬ lahˇ laꞈ coeˇ-ahˇ, meuˬ-ahˇ loꞈ piˇ-eu nymˇ goˇ tsoˆ-eu laꞈ kʼoeˇ, meuˬ lahˇ-ahˇ aˬ yawꞈ ziꞈ dah ni laˆ ziꞈ-euˬ meh.

¹⁰ Deh ga doe ni kʼawꞈ, ziꞈ dah ni gʼeh-eu loꞈ-eu nymˇ goˇ deuˬ tsoˆ taˬ-awˇ, iˇ cuꞈ lah gʼawˬ mya ni duˬ taˬ-euˬ meh. Aˬ jeˬ miˇ neh ehˇ naˇ, nahˇ ma ga kʼehˬ paw gawˬ jawˬ dawˬ dahˬ hawˇ-eu deh ga deuˬ-ahˇ, aˬ yawꞈ jeˬ zaˬ gʼawˬ mya ni cu taˬ-euˬ meh. Ka dzaˬ ka dawˇ-eu paw aˬ yawꞈ nui ma ahˇ-eu loꞈ-ehˇ gawˬ jawˬ gawˬ duˇ doe ni aˬ gaꞈ yaˇ kmˇ mˇ-eu gʼaˇ duˬ maˬ ehˇ, miˇ muiˬ muiˬ-eu miˇ tsaˬ deuˬ yawꞈ ngehꞈ-ehˇ maˬ bi jaˆ ni mˇ dzaˬ-eu gʼaˇ duˬ maˬ ehˇ, miˇ kʼahˬ zaˬ deuˬ-ahˇ aˬ yawꞈ gʼaˬ biꞈ-euˬ meh.

¹¹ Yaw muiˬ paˬ-ehˇ dzaw nya taˬ-awˇ, guiˇ deuˆ-eu gʼaˇ duˬ lehˬ hmˬ dah taˬ-euˬ guiˇ maꞈ maꞈ ma tiˬ maꞈ aˬ yawꞈ jawˇ-eu meh. Aˬ yawꞈ-euˬ jaˇ laˇ yuˇ-eu deuˬ pyeuꞈ-eu Yeˬyeˬlaˇ hawˇ-eu Maˬseˬyaˇ aˬ nyaꞈ, sahˬ paˬ-euˬ gaˇ mˇ-eu yaw huiˬ yaw mahˇ tiˬ gʼaˬ pyeuꞈ-eu Haˬnaˬniˇyaˆ neh mehˬ nehˬ tsoˆ nehˬ-euˬ loꞈ-ehˇ, guiˇ maꞈ maꞈ ma-euˬ jaˇ laˇ yuˇ taˬ-euˬ meh.

¹² Guiˇ maꞈ kʼoeˇ taˆ aˬ yuiꞈ geuꞈ-awˇ uˆ lahˇ-eu yaw huiˬ yaw mahˇ nyiˬ heˇ koꞈ yaˇ gʼaˬ jawˇ-eu meh.

¹³ Aˬ yawꞈ maꞈ-euˬ laꞈ oˆ jawˇ-awˇ, sahˬ paˬ-ahˇ muiˇ-eu deuˬ-ahˇ guiˇ deuˆ-eu gʼaˇ duˬ lehˬ hmˬ taˬ-euˬ guiˇ deuˆ nya dui dui-eu yehˇ smˬ seh shiꞈ heˇ ngaˬ yaˇ gʼaˬ jawˇ-eu meh.

¹⁴ Guiˇ maꞈ deuˬ guiˇ deuˆ ngeh bi zmˬ-eu gʼaˇ duˬ, dehˬ daˬ duˬ, gahˬ, shmˇ uˬ kʼoˆ, shmˇ pehˇ kʼahˬ, kaˆ, kaˆ myaˬ hawˇ-eu kʼaˬ lo miˬ siˬ deuˬ, Awˇziˇ neh biꞈ taˬ-euˬ meh.

¹⁵ Yeˬluˇsaˬlehˬ meuˬ laꞈ kʼoeˇ guiˇ deuˆ-eu keu ka jahˇ doˆ-eu aˬ yawꞈ-euˬ tsawˇ haˬ deuˬ-aˬ, kaˆ myaˬ gʼawˬ mya ni daˬ-awˇ beuˆ-eu keu ka deuˬ maˬ ehˇ, loꞈ-eu nymˇ goˇ hawˇ-eu meuˬ lahˇ laꞈ coeˇ-ahˇ neh kʼaˬ lo lo ma ka deh nya-eu keu ka deuˬ maˬ ehˇ, jahˇ doˆ-euˬ meh. Miˬyehˇ aˬ yawꞈ-ahˇ caw ba-eu miˇ neh, aˬ yawꞈ-euˬ tsawˇ myahˇ yawˬ gaˇ na luꞈ gaˬ doe jiˇ-awˇ, baoˬ huiˬ-eu tsawˇ haˬ tiˬ gʼaˬ pyeuꞈ laˇ-euˬ meh.

Awˇziˇ-ahˇ Miˬyehˇ kʼehˬ nehˬ-eu

¹⁶ Sahˬ paˬ Awˇziˇ baoˬ huiˬ laˇ ngeh jawˇ, aˬ yawꞈ nui ma huiˬ laˇ-euˬ miˇ neh, luˬ-iˇ seˇ-iˇ-eu jeˬ aˬ yawꞈ kʼoeˇ taˆ keuˆ le-euˬ meh. Uˬ duˬ tahˬ nymˇ nymˇ ma laꞈ kʼoeˇ aˬ yawꞈ uˇ leˇ-awˇ, yaw saw jeˬ lawˇ-eu lawˇ duˬ kʼoeˇ taˆ aˬ yawꞈ-euˬ gʼawˇ mawˇ yaw saw jeˬ doꞈ-awˇ lawˇ-eu laꞈ kʼoeˇ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ yawꞈ mˇ bahˬ-euˬ meh.

¹⁷ Piˇ ma Aˬzaˬyiˇ hawˇ-eu nui ma kʼaˬ duˬ ni gʼeh-eu piˇ ma yehꞈ tseˇ gʼaˬ aˬ yawꞈ-euˬ mehˬ nah caw teh uˇ gʼeh-euˬ meh.

¹⁸ Aˬ yawꞈ maꞈ ehˇ-eu, “Awˇziˇ-oˇ, Sahˬpaˬ Miˬyehˇ-ahˇ yaw saw jeˬ doꞈ damˬ-eu gaˇ heu nawˇ mˇ-eu zahˇ sahˇ kʼoꞈ-ahˇ maˬ tsaˬ-a. Aˬloˬ-euˬ zaˬ deuˬ uˆ deuˬ tehꞈ-ehˇ heu loꞈ-ehˇ mˇ-eu gʼaˇ duˬ gʼawˇ mawˇ a nehˬ taˬ-euˬ meh. Muiˬ-eu shawˇ-eu jawˇ duˬ heu tsahˇ-ahˇ neh doˆ-iˇ-awˬ. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ nawˇ mˇ bahˬ-euˬ miˇ neh, aˬ yawꞈ-euˬ guiˬ lahˬ nawˇ maˬ paˇ za nya meh.”

¹⁹ Awˇziˇ-aˬ, Uˬ duˬ tahˬ nymˇ nymˇ ma laꞈ kʼoeˇ jaˆ-eu yaw saw jeˬ doꞈ damˬ-eu lawˇ duˬ dawˬ peh, yaw saw jeˬ doꞈ daˆ-eu kʼmˬ maˬ yuˇ-awˇ piˇ ma kʼoeˇ deuˬ-ahˇ nui ma pehˇ-eu laꞈ kʼoeˇ yawꞈ luꞈ-eu meh. Kʼoeˇ ngeh, nyawˬ naˇ-eu maˇ naˇ aˬ yawꞈ-euˬ naˇ kʼawˇ-ahˇ ja pyuˬ ni naˇ doˆ laˇ-euˬ meh.

²⁰ Aˬzaˬyiˇ hawˇ-eu piˇ ma kʼoeˇ deuˬ aˬ yawꞈ-euˬ naˇ kʼawˇ-ahˇ haw duˬ-awˇ, nyawˬ naˇ luꞈ gaˇ ya mawˇ ngeh, aˬ yawꞈ-ahˇ Uˬ duˬ tahˬ nymˇ nymˇ ma-euˬ laꞈ nyiˇ teh doˆ-euˬ meh. Aˬ yawꞈ gʼeh, yaw kawˇ-ehˇ doˆ-iˇ-euˬ meh. Aˬ jeˬ miˇ neh ehˇ naˇ, Sahˬpaˬ Miˬyehˇ aˬ yawꞈ-ahˇ kʼehˬ nehˬ gʼaˬ-euˬ meh.

²¹ Sahˬ paˬ Awˇziˇ-aˬ, naˇ gawˇ kʼoeˇ hmˬ baˬ da neh, kʼoeˇ ngeh nah neh aˇ dahˬ beh-awˇ ziˇ dehꞈ jiˇ ngeh keuˆ ni maˬ shawˇ-eu tsawˇ haˬ tiˬ gʼaˬ pyeuꞈ-euˬ meh. Uˬ duˬ tahˬ nymˇ nymˇ ma-ahˇ maˬ le uˇ nya-eu miˇ neh, aˬ yawꞈ-euˬ nymˇ laꞈ kʼoeˇ tehꞈ-ehˇ jawˇ-euˬ meh. Aˬ yawꞈ gaˇ maˬ paˇ mˇ ni, miˇ kʼahˬ-ahˇ uˆ lahˇ-eu gaˇ-ahˇ, aˬ yawꞈ-euˬ aˬ li Yoˇdaˬ mˇ-euˬ meh.

²² Sahˬ paˬ Awˇziˇ uˆ lahˇ-euˬ aˇ yamˬ laꞈ kʼoeˇ aˬ yawꞈ neh kʼaˇ mˇ yaꞈ-euˬ gaˇ kawˆ nui deuˬ dawˬ tawˆ luꞈ-ahˇ aˇ dahˬ beh gaˇ neh aˇ saˬ saˬ gaˇ keuˆ ni, Aˬmoˆ-euˬ aˬ li Miˬyehˇ gʼaˇ duˬ ngehˬ dah-eu Iˇsaˬyaˇ neh boꞈ taˬ-euˬ meh.

²³ Awˇziˇ shiˇ-awˇ, sahˬ paˬ deuˬ-ahˇ baꞈ pahˬ-eu miˇ tsaˬ-ahˇ baꞈ pahˬ nehˬ-euˬ meh. Ehˇ kʼawꞈ, aˬ yawꞈ nyawˬ naˇ-eu baˬ da neh, sahˬ paˬ-euˬ lmˬ bymˇ-ahˇ aˬ yawꞈ-ahˇ maˬ baꞈ pahˬ nehˬ-a. Aˬ yawꞈ-euˬ aˬ li Yoˇdaˬ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.