2 Laˬsaˬbaˬ 24 - Akha

Yuˇdaˆ sahˬ paˬ Yawˇshaˆ

¹ Yawˇshaˆ-aˬ, shiꞈ kʼoꞈ kʼawˆ ngeh Yuˇdaˆ sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ uˆ lahˇ-euˬ meh. Aˬ yawꞈ-euˬ aˬ ma-aˬ, Beˬlaˇsheˬba meuˬ-ahˇ jawˇ-eu Ziˇbyah pyeuꞈ-eu meh.

² Piˇ ma Yeˬhawˇyaˬdaˬ kʼaˇ dehꞈ kʼoeˇ keuˆ ni, Sahˬpaˬ Miˬyehˇ nui ma tsaˬ-eu jeˬ tehꞈ-ehˇ aˬ yawꞈ mˇ-euˬ meh.

³ Yeˬhawˇyaˬdaˬ neh Yawˇshaˆ-ahˇ miˬ zaˬ nyiˬ gʼaˬ poˆ nehˬ-awˇ, kʼoeˇ nyiˬ gʼaˬ o neh aˬ buˇ aˬ li gʼawˬ mya ni jawˇ le-euˬ meh.

⁴ Aˬ yawꞈ sahˬ paˬ geuꞈ-eu tiˬ kʼehˬ keuˆ laˇ ngeh, Uˬ duˬ tahˬ nymˇ nymˇ ma-ahˇ laˆ saˆ muiˬ-eu gʼaˇ duˬ aˬ yawꞈ noeˬ tsehˆ-euˬ meh.

⁵ Piˇ ma deuˬ hawˇ-eu Leˬbiˇ tsawˇ haˬ deuˬ-ahˇ, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ doe ni aˬ yawꞈ bi iˇ-awˇ, tiˬ kʼoꞈ tiˬ poˆ Uˬ duˬ tahˬ nymˇ nymˇ ma laˆ saˆ muiˬ gaˇ loˬ-eu pyuˇ deuˬ miˇ kʼahˬ zaˬ deuˬ kʼaˇ jawˇ gaˇ bi taꞈ uiˬ-iˇ-euˬ meh. Aˬ yawꞈ maꞈ yaw kawˇ-ehˇ iˇ ni aˬ yawꞈ ehˇ nehˬ taˬ-euˬ kʼawꞈ, Leˬbiˇ tsawˇ haˬ deuˬ nyi naˬ nyi naˬ-ehˇ jawˇ-eu meh.

⁶ Kʼoeˇ miˇ neh, aˬ yawꞈ maꞈ kʼoeˇ taˆ aˬ yuiꞈ geuꞈ luꞈ-eu Yeˬhawˇyaˬdaˬ-ahˇ aˬ yawꞈ kuˇ-awˇ ehˇ nehˬ-eu, “Sahˬpaˬ Miˬyehˇ jawˇ-eu Sehˬ gʼawˆ gʼaˇ duˬ Moˇseˬ neh Iˇsaˬleˬlaˆ aˇ maꞈ aˇ muˇ deuˬ-ahˇ bi taꞈ uiˬ-euˬ pyuˇ kʼoeˇ, Leˬbiˇ tsawˇ haˬ deuˬ Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ doe ni iˇ-awˇ taꞈ uiˬ ni, aˬ jeˬ miˇ neh nawˇ maˬ haw maˬ pyaˆ-ehˇ jawˇ te.”

⁷ (Haiˬ dui dui-eu zaˬ miˬ zaˬ pyeuꞈ-eu Aˬdaˬliˇ-euˬ mehˬ nah caw teh-euˬ tsawˇ haˬ deuˬ neh Uˬ duˬ tahˬ nymˇ nymˇ ma-ahˇ laˆ cawˆ-awˇ, kʼoeˇ gaˇ jaˆ-eu muiˬ-eu shawˇ-eu keu ka gʼawˬ mya ni Baˬlaˇ miˬ yehˇ-ahˇ uˬ duˬ tahˬ gaˇ zmˬ-euˬ meh.)

⁸ Pyuˇ daˬ bahˬ keuˆ tiˬ keuˆ taꞈ-awˇ, Uˬ duˬ tahˬ nymˇ nymˇ ma-euˬ lahˇ kʼehˬ-ahˇ bi jaˆ-eu gʼaˇ duˬ Leˬbiˇ tsawˇ haˬ deuˬ-ahˇ sahˬ paˬ dawˬ biꞈ-euˬ meh.

⁹ Aˇ hu Miˬyehˇ-euˬ zaˬ kʼaˆ Moˇseˬ neh bawˇ tsahˬ bawˇ dahˇ-ahˇ pyuˇ taꞈ uiˬ-euˬ loꞈ-ehˇ, Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ-ahˇ kʼaˇ jawˇ-eu tsawˇ haˬ yawˬ gʼaˬ na luꞈ, Sahˬpaˬ Miˬyehˇ-ahˇ pyuˇ biꞈ laˇ-eu gʼaˇ duˬ, aˬ yawꞈ maꞈ bi tsaꞈ gaˬ doe-iˇ-euˬ meh.

¹⁰ Dawˬ kʼoeˇ dawˬ-ahˇ miˇ kʼahˬ zaˬ deuˬ hawˇ-eu aˬ yuiꞈ aˬ tsu geuꞈ-eu deuˬ nui ma tsaˬ-awˇ, bahˬ keuˆ kʼoeˇ keuˆ byah laˇ ngeh keuˆ ni pyuˇ yuˇ uiˬ laꞈ-euˬ meh.

¹¹ Bahˬ keuˆ kʼoeˇ keuˆ-ahˇ haw-eu pyaˆ-eu sahˬ paˬ-euˬ gaˇ mˇ-eu yaw huiˬ yaw mahˇ gʼaˬ jawˇ gaˇ, Leˬbiˇ tsawˇ haˬ deuˬ yawˬ nah na luꞈ bahˬ keuˆ kʼoeˇ baꞈ ha nehˬ-eu meh. Bahˬ keuˆ laꞈ kʼoeˇ pyuˇ kʼaˇ byah laˇ ngeh, sahˬ paˬ-euˬ jaˇ laˇ yuˇ-eu gʼaˬ hawˇ-eu piˇ ma yaw huiˬ gʼaˬ-euˬ dah zaˇ geuꞈ-eu gʼaˬ pyuˇ shehˆ doˇ yaꞈ-awˇ, bahˬ keuˆ kʼoeˇ keuˆ-ahˇ aˬ yawꞈ-euˬ jaˆ duˬ-ahˇ paˇ bi baꞈ taˬ-iˇ-euˬ meh. Kʼoeˇ loꞈ-ehˇ jahˇ-awˇ, pyuˇ gʼawˬ mya ni aˬ yawꞈ maꞈ taꞈ uiˬ-euˬ meh.

¹² Sahˬ paˬ Yawˇshaˆ hawˇ-eu Yeˬhawˇyaˬdaˬ aˬ nyaꞈ pyuˇ kʼoeˇ deuˬ yuˇ-awˇ, Uˬ duˬ tahˬ nymˇ nymˇ ma laˆ saˆ muiˬ gaˇ haw luꞈ pyaˆ luꞈ-eu deuˬ-ahˇ biꞈ-euˬ meh. Aˬ yawꞈ maꞈ kʼaˬ lo tsaˬ byaˆ gawˬ-eu deuˬ, laꞈ sawˆ sawˆ-eu deuˬ hawˇ-eu, ba jiˬ deuˬ-ahˇ aˇ poeˬ biꞈ nehˬ-awˇ, bi laˆ saˆ muiˬ-euˬ meh.

¹³ Gaˇ mˇ-eu tsawˇ haˬ yawˬ gʼaˬ na luꞈ leh jeh dui dui-eu laꞈ kʼoeˇ, Uˬ duˬ tahˬ nymˇ nymˇ ma-ahˇ aˬ yawꞈ yaw oeˇ loꞈ-ehˇ pyeuꞈ laˇ ni, ziꞈ dah ni laˆ saˆ muiˬ-euˬ meh.

¹⁴ Uˬ duˬ tahˬ nymˇ nymˇ ma laˆ saˆ muiˬ-eu gaˇ mˇ luiˆ gʼaˬ ngeh jawˇ, dzehˬ laˇ-euˬ shuiˇ hawˇ-eu pyuˇ deuˬ sahˬ paˬ Yawˇshaˆ hawˇ-eu Yeˬhawˇyaˬdaˬ aˬ ha nyaꞈ-ahˇ aˬ yawꞈ maꞈ a kʼoꞈ nehˬ-awˇ, Uˬ duˬ tahˬ nymˇ nymˇ ma-ahˇ loˬ-eu naˬ bo deuˬ hawˇ-eu nui jeˬ mˇ myawˬ keu ka deuˬ jahˇ gaˇ aˬ yawꞈ nyaꞈ zmˬ-euˬ meh. Yeˬhawˇyaˬdaˬ kʼaˇ dehꞈ kʼoeˇ keuˆ ni, Uˬ duˬ tahˬ nymˇ nymˇ ma laꞈ kʼoeˇ lawˇ-eu shehˇ-eu jeˬ-ahˇ maˬ tsehˆ leˇ ni mˇ-euˬ meh.

Yuˇdaˆ miˇ kʼahˬ Sahˬpaˬ Miˬyehˇ-ahˇ byehˇ dzeh-euˬ

¹⁵ Aˬ yawꞈ-euˬ aˇ kʼoꞈ tiˬ yaˇ smˬ tseˇ kʼoꞈ kʼawˆ laˇ ngeh, mawˬ dui dui laˇ-awˇ shiˇ-euˬ meh.

¹⁶ Iˇsaˬleˬlaˆ tsawˇ jeuˬ gʼaˇ duˬ maˬ ehˇ, Miˬyehˇ gʼaˇ duˬ maˬ ehˇ, Uˬ duˬ tahˬ nymˇ nymˇ ma gʼaˇ duˬ maˬ ehˇ, aˬ yawꞈ neh mˇ taˬ yaꞈ-euˬ gaˇ deuˬ-ahˇ aˬ cawˬ noeˬ keuˆ-awˇ, Daˬbiˇ-euˬ Meuˬ-ahˇ jaˆ-eu sahˬ paˬ deuˬ-euˬ lmˬ bymˇ-ahˇ baꞈ pahˬ nehˬ-euˬ meh.

¹⁷ Ehˇ kʼawꞈ, Yeˬhawˇyaˬdaˬ shiˇ dzeuˇ ngeh jawˇ, Yuˇdaˆ miˇ kʼahˬ-euˬ aˬ yuiꞈ aˬ tsu deuˬ-aˬ, sahˬ paˬ Yawˇshaˆ-ahˇ aˬ yawꞈ maꞈ-euˬ ehˇ dawˬ naˇ haˬ ni muˇ-euˬ meh.

¹⁸ Kʼoeˇ miˇ neh, miˇ kʼahˬ zaˬ deuˬ aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ uˬ duˬ tahˬ-eu jeˬ-ahˇ byehˇ dzeh-awˇ, Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ deuˬ hawˇ-eu tahˬ pahˬ aˬ ma mawˇ kawˇ nui deuˬ-ahˇ uˬ duˬ tahˬ-euˬ meh. Aˬ yawꞈ maꞈ kʼoeˇ loꞈ-ehˇ iˬ baˇ mˇ-euˬ baˬ da neh, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ kʼoeˇ taˆ Sahˬpaˬ Miˬyehˇ nui ma pehˇ-eu jeˬ keuˆ le luꞈ-eu meh.

¹⁹ Tsawˇ haˬ kʼoeˇ deuˬ aˬ yawꞈ jawˇ paw gʼoꞈ kʼoꞈ laˇ ni, aˬ yawꞈ gʼaˇ duˬ ngehˬ dah-eu tsawˇ haˬ deuˬ-ahˇ Sahˬpaˬ Miˬyehˇ pyehˬ gʼeh kʼawꞈ, aˬ yawꞈ maꞈ maˬ naˇ haˬ-a.

²⁰ Kʼoeˇ naˇ, piˇ ma Yeˬhawˇyaˬdaˬ-euˬ aˬ li Zaˬkaˬliˇ kʼoeˇ taˆ Miˬyehˇ-euˬ yaw sahˇ keuˆ le-euˬ meh. Tsawˇ haˬ kʼoeˇ deuˬ mawˇ nya gaˇ aˬ yawꞈ yawꞈ-awˇ ehˇ-eu, “Aˬ jeˬ miˇ neh Sahˬpaˬ Miˬyehˇ-euˬ ehˇ dawˬ-ahˇ naw maꞈ maˬ naˇ haˬ geuꞈ-ehˇ, yawˬ haˇ yawˬ ha ya luˬ ya seˇ-iˇ ni mˇ luꞈ te lehˇ, naw maꞈ-ahˇ Sahˬpaˬ Miˬyehˇ naˇ haˬ luꞈ meh. Naw maꞈ aˬ yawꞈ-ahˇ byehˇ dzeh-euˬ miˇ neh, aˬ yawꞈ kʼawꞈ naw maꞈ-ahˇ byehˇ dzeh-euˬ meh.”

²¹ Zaˬkaˬliˇ-ahˇ sehꞈ-eu gʼaˇ duˬ aˬ yawꞈ maꞈ mehˬ bawˬ mˇ-awˇ, sahˬ paˬ neh dawˬ biꞈ-euˬ loꞈ-ehˇ, Uˬ duˬ tahˬ nymˇ nymˇ ma-euˬ pu ka, Zaˬkaˬliˇ-ahˇ kʼaˬ lo biˬ-euˬ meh.

²² Sahˬ paˬ Yawˇshaˆ-aˬ, Zaˬkaˬliˇ-euˬ aˬ da Yeˬhawˇyaˬdaˬ neh aˬ yawꞈ-ahˇ ngehˬ gʼeh caw ba nehˬ-euˬ deuˬ-ahˇ maˬ noeˬ keuˆ-ehˇ Zaˬkaˬliˇ-ahˇ bi sehꞈ-euˬ meh. Zaˬkaˬliˇ shiˇ leˇ ngeh, “Naw maꞈ neh mˇ-euˬ jeˬ-ahˇ Sahˬpaˬ Miˬyehˇ mawˇ-awˇ, naw maꞈ-ahˇ kʼehˬ nehˬ kʼaˆ nehˬ luꞈ-uˇ” lehˇ ehˇ-awˇ shiˇ-euˬ meh.

Sahˬpaˬ Yawˇshaˆ shiˇ-euˬ

²³ Kʼoeˇ ngeh kʼoꞈ jawˇ la doˆ le ngeh, Suˇliˆ guiˇ maꞈ Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ guiˇ deuˆ le-awˇ, aˬ yuiꞈ aˬ tsu dawˬ tawˆ luꞈ-ahˇ sehꞈ jiˇ yaꞈ-awˇ, pyuˇ shuiˇ myawˬ gahˬ gʼawˬ mya ni Daˬmaˬsehˇ meuˬ-ahˇ yuˇ kʼoꞈ gʼeh-euˬ meh.

²⁴ Suˇliˆ guiˇ maꞈ yaw cuiˆ kʼawꞈ, myaˬ dui dui-eu Yuˇdaˆ guiˇ maꞈ-ahˇ deuˆ gʼaˬ-euˬ meh. Aˬ jeˬ miˇ neh ehˇ naˇ, Yuˇdaˆ tsawˇ haˬ deuˬ-aˬ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ byehˇ dzeh-euˬ miˇ neh, kʼoeˇ loꞈ-ehˇ bi deuˆ gʼaˬ ni Sahˬpaˬ Miˬyehˇ jahˇ-euˬ meh. Kʼoeˇ loꞈ-ehˇ jahˇ-awˇ, sahˬ paˬ Yawˇshaˆ-ahˇ kʼehˬ nehˬ kʼaˆ nehˬ-euˬ meh.

²⁵ Aˬ yawꞈ-ahˇ yaw kʼaˆ-ehˇ bi deuˆ naˇ-awˇ, Suˇliˆ guiˇ maꞈ deuˬ gʼoꞈ dzeuˇ jiˇ ngeh, aˬ yawꞈ-euˬ yaw huiˬ yaw mahˇ nyiˬ gʼaˬ aˬ yawꞈ-ahˇ puiˬ-awˇ, aˬ yawꞈ-euˬ yuꞈ zaˇ kʼoeˇ taˆ aˬ yawꞈ-ahˇ sehꞈ-eu laꞈ kʼoeˇ, piˇ ma Yeˬhawˇyaˬdaˬ-euˬ aˬ li-ahˇ aˬ yawꞈ neh sehꞈ-euˬ aˇ poeˬ laꞈ poˆ poˆ nehˬ-euˬ meh. Daˬbiˇ-euˬ meuˬ laꞈ kʼoeˇ aˬ yawꞈ-ahˇ baꞈ pahˬ nehˬ-euˬ meh. Ehˇ kʼawꞈ, sahˬ paˬ-euˬ lmˬ bymˇ-ahˇ maˬ baꞈ pahˬ nehˬ-a.

²⁶ Aˬ yawꞈ-ahˇ puiˬ-euˬ kʼoeˇ nyiˬ gʼaˬ-aˬ, Shiˇmyaˆ lehˇ myahˇ-euˬ Aˬmoˬ ma euˬ aˬ li Zaˬbaˆ hawˇ-eu, Shmˇliˆ lehˇ myahˇ-euˬ Mawˇbaˆ ma-euˬ aˬ li Yeˬhawˇzaˬbaˆ aˬ nyaꞈ meh.

²⁷ Sahˬpaˬ deuˬ gaˇ kawˆ boꞈ taˬ-euˬ sahˬ boꞈ deuˬ gaˇ kawˆ ja sawˇ-eu sahˬ boꞈ laꞈ kʼoeˇ, Yawˇshaˆ-euˬ aˬ li deuˬ gaˇ kawˆ maˬ ehˇ, Yawˇshaˆ-ahˇ Miˬyehˇ gʼaˇ duˬ ngehˬ dah nehˬ-euˬ gaˇ kawˆ deuˬ maˬ ehˇ, aˬ yawꞈ neh Uˬ duˬ tahˬ nymˇ nymˇ ma laˆ saˆ muiˬ-euˬ gaˇ kawˆ maˬ ehˇ, boꞈ ahˇ taˬ-euˬ meh. Aˬ yawꞈ-euˬ aˬ li Aˬmaˬziˇ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.