2 Laˬsaˬbaˬ 20 - Akha

Mawˇbaˆ tsawˇ jeuˬ hawˇ-eu Aˬmoˬ tsawˇ jeuˬ-ahˇ Yeˬhawˇshaˬpaˇ deuˆ gʼaˬ-euˬ

¹ Aˇ yamˬ ui cuiˆ myahˇ laˇ ngeh, Mawˇbaˆ tsawˇ jeuˬ guiˇ maꞈ hawˇ-eu Aˬmoˬ tsawˇ jeuˬ guiˇ maꞈ deuˬ-aˬ, aˬ yawꞈ maꞈ-ahˇ nui ma taꞈ-eu Myuˇniˆ tsawˇ jeuˬ nehˬ-ehˇ gm leˇ-awˇ, Yuˇdaˆ miˇ kʼahˬ-ahˇ guiˇ deuˆ-eu lehˇ uˇ le-euˬ meh.

² Dawˬ tsaꞈ tsaꞈ le-euˬ tsawˇ haˬ deuˬ Yeˬhawˇshaˬpaˇ jawˇ gaˇ oe-awˇ, “Eˬdoˬ miˇ kʼahˬ-ahˇ neh laˇ-euˬ myaˬ dui dui-eu guiˇ maꞈ tiˬ maꞈ nawˬ-ahˇ guiˇ deuˆ-eu lehˇ, Shiˇ-eu iˬ ma laˆ shaˆ nui baˬ paw oe luꞈ meh. Haˬzaˬzoˇtaˬmaˬ meuˬ-ahˇ aˬ yawꞈ maꞈ deuˆ gʼaˬ-euˬ meh” lehˇ tsaꞈ le-euˬ meh. (Haˬzaˬzoˇtaˬmaˬ meuˬ-ahˇ Eˬgeˬdiˇ meuˬ lehˇ kʼawꞈ kuˇ-eu meh.)

³ Yeˬhawˇshaˬpaˇ guˆ dui dui-awˇ, Sahˬpaˬ Miˬyehˇ neh bi ngehˬ gʼeh-eu gʼaˇ duˬ guiˬ lahˬ shaˇ-euˬ meh. Yuˇdaˆ miˇ kʼahˬ kʼahˬ lah ni maˬ dzaˬ-eu zahˇ jahˇ-eu gʼaˇ duˬ, aˬ yawꞈ dawˬ biꞈ gʼeh-euˬ meh.

⁴ Yuˇdaˆ miˇ kʼahˬ meuˬ yawˬ meuˬ na luꞈ-ahˇ jawˇ-eu tsawˇ haˬ deuˬ, Sahˬpaˬ Miˬyehˇ-ahˇ tahˬ shaˇ leˇ-eu gʼaˇ duˬ Yeˬluˇsaˬlehˬ meuˬ-ahˇ yaw kawˇ-ehˇ le-euˬ meh.

⁵ Kʼoeˇ naˇ, aˬ yawꞈ maꞈ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ, Uˬ duˬ tahˬ nymˇ nymˇ ma mehˬ shi pu kaˬ yaw shuiꞈ tsahˇ-ahˇ uiˬ leˇ taˬ-euˬ meh. Sahˬ paˬ Yeˬhawˇshaˬpaˇ kʼawꞈ le-awˇ, aˬ yawꞈ maꞈ-euˬ mehˬ shi yawꞈ-awˇ,

⁶ heu loꞈ-ehˇ guˇ guˇ-ehˇ guiˬ lahˬ shaˇ-euˬ meh. “Nga maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˇ mˬ kʼoeˇ taˆ jawˇ-awˇ miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ kʼoeˇ taˆ uˆ lahˇ luꞈ-eu meh. Nawˇ-aˬ, baoˬ huiˬ dui dui-eu miˇ neh, nawˬ-ahˇ tiˬ gʼaˬ-iˬ maˬ ciˬ daˬ peuˬ-a.

⁷ Nawˇ-aˬ, nga maꞈ-euˬ Miˬyehˇ ma. Nawˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ miˇ kʼahˬ heu kʼahˬ-ahˇ uˇ laˇ ngeh, heu gaˇ jawˇ luꞈ-eu tsawˇ haˬ deuˬ-ahˇ nawˇ teh dzeh-awˇ, nawˬ-euˬ cawˬ Aˬbyaˬhaˬ-euˬ zaˬ deuˬ uˆ deuˬ pyeuꞈ-eu aˬ yawꞈ maꞈ-ahˇ miˇ kʼahˬ heu kʼahˬ nawˇ biꞈ tsehˆ nehˬ-euˬ meh.

^8-9 Aˬ yawꞈ maꞈ heu gaˇ jawˇ duˬ dah-awˇ, nawˬ-ahˇ taˬ huiˬ taˬ mahˇ-eu laꞈ kʼoeˇ uˬ duˬ tahˬ nymˇ tiˬ nymˇ tsoˆ-euˬ meh. Guiˇ deuˆ-eu jeˬ, naˇ-eu gawˇ-eu jeˬ, mehꞈ-eu shuꞈ-eu jeˬ, heu loꞈ-ehˇ gʼeh-eu shaˬ-eu zahˬ-eu tiˬ jeˬ na aˬ yawꞈ maꞈ kʼoeˇ taˆ bi keuˆ le-eu laꞈ kʼoeˇ, aˬ yawꞈ maꞈ-ahˇ kʼehˬ nehˬ kʼaˆ nehˬ ngeh, nawˬ-ahˇ uˬ duˬ tahˬ-eu Uˬ duˬ tahˬ nymˇ nymˇ ma mehˬ shi aˬ yawꞈ maꞈ yawꞈ laˇ nya ni, aˬ yawꞈ maꞈ noeˬ siˬ-awˇ tsoˆ-euˬ meh. Aˬ yawꞈ maꞈ shaˬ-eu zahˬ-eu jeˬ ya tahˬ puˬ ngeh, nawˬ-ahˇ guiˬ lahˬ shaˇ kʼaˇ za-awˇ, aˬ yawꞈ maꞈ-euˬ shaˇ dawˬ-ahˇ nawˇ gaˬ-eu laꞈ kʼoeˇ, ka kʼoꞈ nehˬ nya-eu meh.

¹⁰ “Nymˬ-mˇ, Aˬmoˬ tsawˇ jeuˬ, Mawˇbaˆ tsawˇ jeuˬ hawˇ-eu, Eˬdoˬ tsawˇ jeuˬ deuˬ nga maꞈ-ahˇ guiˇ deuˆ le luꞈ meh. Nga maꞈ-euˬ aˬ poeˬ aˬ bawˇ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ ngeh, tsawˇ jeuˬ kʼoeˇ deuˬ-euˬ miˇ kʼahˬ laꞈ kʼoeˇ aˬ yawꞈ maꞈ-ahˇ nawˇ maˬ bi le uˇ-a. Kʼoeˇ miˇ neh, nga maꞈ-euˬ aˬ poeˬ aˬ bawˇ deuˬ gaˇ jaw jaw-awˇ, tsawˇ jeuˬ kʼoeˇ deuˬ-ahˇ maˬ laˆ luˬ maˬ laˆ seˇ nehˬ-aˬ.

¹¹ Ehˇ kʼawꞈ, nga maꞈ-ahˇ aˬ yawꞈ maꞈ heu loꞈ-ehˇ jahˇ kʼoꞈ nehˬ laꞈ-eu meh. Nawˬ neh biꞈ laꞈ-euˬ miˇ kʼahˬ laꞈ kʼoeˇ nga maꞈ-ahˇ maˬ bi jawˇ ni teh dzeh-eu lehˇ aˬ yawꞈ maꞈ oe luꞈ-eu meh.

¹² Nawˇ-aˬ, nga maꞈ-euˬ Miˬyehˇ ma. Aˬ yawꞈ maꞈ-ahˇ nawˇ kʼehˬ nehˬ kʼaˆ nehˬ-awˬ. Nga maꞈ-ahˇ ceh le-eu lehˇ oe luꞈ-eu myaˬ dui dui-eu guiˇ maꞈ heu maꞈ-ahˇ deuˆ ceh ceh-eu gʼaˇ duˬ, nga maꞈ noeˬ maˬ paˇ doˆ miˇ-a. Aˬ joˆ-ehˇ ya jahˇ paˬ nga lehˇ shaˇ noeˬ dui-euˬ miˇ-a. Ehˇ kʼawꞈ, nawˇ caw ba nehˬ laꞈ-eu jeˬ-ahˇ nga maꞈ noeˬ tmˬ luꞈ ma.”

¹³ Yuˇdaˆ tsawˇ haˬ dawˬ tawˆ luꞈ, aˬ yawꞈ maꞈ-euˬ miˬ sawˇ zaˬ deuˬ nehˬ-ehˇ Uˬ duˬ tahˬ nymˇ nymˇ ma mehˬ shi yawꞈ luꞈ-eu meh.

¹⁴ Tsawˇ haˬ aˇ maꞈ laꞈ kʼoeˇ jawˇ luꞈ-eu Leˬbiˇ tsawˇ haˬ tiˬ gʼaˬ kʼoeˇ taˆ Sahˬpaˬ Miˬyehˇ-euˬ yaw sahˇ keuˆ le-euˬ meh. Aˬ yawꞈ-aˬ, Zaˬkaˬliˇ-euˬ aˬ li Yaˬhaˬzeˬlaˇ lehˇ myahˇ-euˬ gʼaˬ meh. Aˬ yawꞈ-aˬ, Aˬsaˆ aˇ jeuˬ aˇ ca pyeuꞈ-awˇ, aˬ yawꞈ-euˬ tsuiꞈ-aˬ, Aˬsaˆ, Maˬtaˬniˇ, Yeˬzeˬlaˇ, Baˬnaˇyaˬ, Zaˬkaˬliˇ, Yaˬhaˬzeˬlaˇ lehˇ meh.

¹⁵ Yaˬhaˬzeˬlaˇ ehˇ-eu, “Sahˬ paˬ Yeˬhawˇshaˬpaˇ hawˇ-eu, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ kʼaˇ jawˇ-eu tsawˇ haˬ deuˬ-oˇ, myaˬ dui dui-eu guiˇ maꞈ heu maꞈ-ahˇ naw maꞈ guˆ-awˇ gʼaˬ taˬ baˬ. Guiˇ deuˆ-eu heu Miˬyehˇ-euˬ aˬ laꞈ laꞈ kʼoeˇ jaˆ-eu meh.

¹⁶ Naw maꞈ-ahˇ daˇ-eu jeˬ maˬ ngeuˇ-a. Ni shawˬ nah Ziˇzaˆ gʼaˬ lahˇ-ahˇ neh aˬ yawꞈ maꞈ doˆ laˇ-eu nehˬ-ehˇ, aˬ yawꞈ maꞈ-ahˇ deuˆ-iˇ-awˬ. Yeˬyoeˬlaˇ bawˇ tsahˬ bawˇ dahˇ paw tahˬ leˇ-eu deh kʼawꞈ mehˬ dzaˬ-ahˇ, aˬ yawꞈ maꞈ-ahˇ naw maꞈ ya tahˬ puˬ tehꞈ-a.

¹⁷ Guiˇ heu naw maꞈ maˬ ya deuˆ-a. Jawˇ duˬ yuˇ-awˇ loꞈ tawˬ-awˬ. Sahˬpaˬ Miˬyehˇ naw maꞈ-ahˇ bi gʼaˬ leˇ nehˬ laꞈ gaˇ naw maꞈ ya mawˇ tehꞈ-a. Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, gʼaˬ byehˆ maˬ byehˆ-ehˇ maˬ guˆ ni jawˇ-awˬ. Ni shawˬ nah aˬ yawꞈ maꞈ-ahˇ guiˇ deuˆ-iˇ-awˬ. Sahˬpaˬ Miˬyehˇ naw maꞈ nehˬ-ehˇ jawˇ tehꞈ-a.”

¹⁸ Kʼoeˇ naˇ, sahˬ paˬ Yeˬhawˇshaˬpaˇ baˬ ba miˇ tsa tuˆ ni awˆ byaˆ-awˇ, tsawˇ haˬ dawˬ tawˆ luꞈ aˬ yawꞈ nehˬ-ehˇ awˆ byaˆ-awˇ, Sahˬpaˬ Miˬyehˇ-ahˇ uˬ duˬ tahˬ-euˬ meh.

¹⁹ Leˬbiˇ tsawˇ jeuˬ pyeuꞈ-eu Kawˇhaˆ aˇ jeuˬ hawˇ-eu Kawˇlaˆ aˇ jeuˬ deuˬ tuˇ laˇ-awˇ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ yaw kʼaˆ-ehˇ guˇ-awˇ ja ceuˬ-euˬ meh.

²⁰ Yawˬ nah yawˬ uˬ shawˬ yaw naꞈ-ehˇ, Teˬkawˬ meuˬ dawˬ peh jaˆ-eu bawˇ tsahˬ bawˇ dahˇ-ahˇ aˬ yawꞈ maꞈ iˇ-euˬ meh. Aˬ yawꞈ maꞈ doˆ-iˇ ngeh, aˬ yawꞈ maꞈ-ahˇ Yeˬhawˇshaˬpaˇ heu loꞈ-ehˇ ehˇ nehˬ-euˬ meh. “Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ naw maꞈ gʼoe-awˇ, nui ma ziꞈ dah ni taˬ-awˬ. Aˬ yawꞈ-euˬ gʼaˇ duˬ ngehˬ dah-eu gʼaˬ neh ehˇ-euˬ dawˬ-ahˇ naw maꞈ jah-awˬ. Kʼoeˇ loꞈ-ehˇ jah naˇ, naw maꞈ gʼaˬ leˇ tehꞈ-a.”

²¹ Aˬ yawꞈ maꞈ-ahˇ aˬ yawꞈ kʼoeˇ loꞈ-ehˇ ehˇ nehˬ gʼaˬ ngeh, caˇ dawˬ caˇ-eu tsawˇ haˬ tiˬ paˆ na deuˬ-ahˇ aˬ yawꞈ heu loꞈ-ehˇ dawˬ biꞈ nehˬ-euˬ meh. “Zahˇ sahˇ kʼoꞈ-ahˇ taꞈ leˇ-eu muiˬ-eu shawˇ-eu gaˇ mˇ ngeh naw maꞈ dm-euˬ pehˇ kʼahˬ pehˇ mahˇ kʼoeˇ dm-awˇ, guiˇ maꞈ-euˬ mehˬ hu paw cah-awˇ, heu loꞈ-ehˇ caˇ-awˬ. ‘Sahˬpaˬ Miˬyehˇ-ahˇ ja ceuˬ-awˬ. Aˬ yawꞈ-euˬ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ-eu meh’ lehˇ caˇ-awˬ.”

²² Aˬ yawꞈ maꞈ Sahˬpaˬ Miˬyehˇ-ahˇ ja ceuˬ-awˇ caˇ dahˬ beh ngeh, muiˇ-eu deuˬ-euˬ guiˇ maꞈ deuˬ-ahˇ Sahˬpaˬ Miˬyehˇ laˆ bahˬ laˆ baˆ nehˬ-euˬ meh.

²³ Aˬmoˬ tsawˇ haˬ deuˬ hawˇ-eu Mawˇbaˆ tsawˇ haˬ deuˬ Eˬdoˬ guiˇ maꞈ-ahˇ deuˆ-awˇ, dawˬ tawˆ luꞈ deuˆ sehꞈ jiˇ nehˬ-euˬ meh. Kʼoeˇ naˇ, aˬ yawꞈ maꞈ yaw kaˬ yaw kʼaˆ-ehˇ paˇ deuˆ ceh ceh-euˬ meh.

²⁴ Kʼaˇ shuiꞈ deh yaˇ-ahˇ jaˆ-eu loꞈ-eu nymˇ goˇ-ahˇ Yuˇdaˆ tsawˇ haˬ deuˬ le keuˆ-awˇ, muiˇ-eu deuˬ jawˇ paw haw gʼeh-iˬ ngeh, dawˬ tawˆ luꞈ yaw shiˇ-ehˇ ga gaˇ ya mawˇ-euˬ meh. Tiˬ gʼaˬ-iˬ maˬ dzeuˇ-iˇ ni shiˇ jiˇ-euˬ meh.

²⁵ Yeˬhawˇshaˬpaˇ hawˇ-eu aˬ yawꞈ-euˬ yehˇ deuˬ mˇ myawˬ yuˇ geuꞈ-iˇ-eu lehˇ iˇ ngeh, mawˇ neˇ deuˬ, dzaˬ dzaˬ dawˇ dawˇ deuˬ, dm gʼaˬ dm lmˇ deuˬ hawˇ-eu, aˇ poeˬ kʼaˆ-eu nui jeˬ mˇ myawˬ gʼawˬ mya ni mawˇ-euˬ meh. Smˬ nah keuˆ ni mˇ myawˬ kʼoeˇ deuˬ aˬ yawꞈ maꞈ yuˇ uiˬ-euˬ meh. Ehˇ kʼawꞈ, aˇ dzehˬ-ehˇ myaˬ-eu miˇ neh, dawˬ tawˆ luꞈ maˬ yuˇ uiˬ jiˇ coeˇ-a.

²⁶ Oeˬ nah tiˬ nah-ahˇ Beˬlaˬkaˬ deh kʼawˬ-ahˇ aˬ yawꞈ maꞈ uiˬ leˇ-awˇ, Sahˬpaˬ Miˬyehˇ-ahˇ ja ceuˬ-euˬ meh. Kʼoeˇ miˇ neh, jawˇ duˬ kʼoeˇ tsahˇ-ahˇ Beˬlaˬkaˬ lehˇ kuˇ-euˬ meh.

²⁷ Yeˬhawˇshaˬpaˇ-aˬ, aˬ yawꞈ-euˬ yehˇ deuˬ sheuˬ-awˇ, laˬ kʼaˬ cehˇ taˆ ni Yeˬluˇsaˬlehˬ meuˬ-ahˇ gʼoꞈ leˇ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ-ahˇ muiˇ-eu deuˬ-ahˇ Sahˬpaˬ Miˬyehˇ deuˆ gʼaˬ nehˬ-euˬ meh.

²⁸ Aˬ yawꞈ maꞈ Yeˬluˇsaˬlehˬ meuˬ-ahˇ gʼoꞈ keuˆ leˇ ngeh, deuˇ-mˬ diˬ, daˇ heh baw-awˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma-ahˇ le-euˬ meh.

²⁹ Iˇsaˬleˬlaˆ tsawˇ jeuˬ-ahˇ muiˇ-eu deuˬ-ahˇ Sahˬpaˬ Miˬyehˇ neh deuˆ gʼaˬ-euˬ gaˇ kawˆ kʼaˇ ya gaˬ-euˬ tsawˇ jeuˬ yawˬ jeuˬ na luꞈ, guˆ dui dui-iˇ-euˬ meh.

³⁰ Yeˬhawˇshaˬpaˇ-euˬ miˇ kʼahˬ coꞈ ngehˇ ni jaˆ-awˇ, aˬ yawꞈ-euˬ miˇ kʼahˬ yawˬ paw yawˬ coeˇ na luꞈ-ahˇ, Sahˬpaˬ Miˬyehˇ haw piˇ nehˬ-euˬ meh.

Yeˬhawˇshaˬpaˇ uˆ lahˇ-eu aˇ yamˬ jiˇ le-euˬ

³¹ Yeˬhawˇshaˬpaˇ-aˬ, smˬ tseˇ ngaˬ kʼoꞈ kʼawˆ ngeh Yuˇdaˆ miˇ kʼahˬ-ahˇ uˆ lahˇ-eu sahˬ paˬ pyeuꞈ laˇ-awˇ, nyiˬ tseˇ ngaˬ kʼoꞈ keuˆ ni Yeˬluˇsaˬlehˬ meuˬ-ahˇ jawˇ-awˇ uˆ lahˇ-euˬ meh. Aˬ yawꞈ-euˬ aˬ ma-aˬ, Shiˇlaˬhiˇ-euˬ aˬ buˇ Aˬzuˇbaˬ pyeuꞈ-eu meh.

³² Aˬ yawꞈ-euˬ mehˬ hu sahˬ paˬ geuꞈ-awˇ uˆ lahˇ yaꞈ-euˬ aˬ yawꞈ-euˬ aˬ da Aˬsaˬ loꞈ-ehˇ, Sahˬpaˬ Miˬyehˇ mehˬ shi yaw tsaˬ yaw dawˇ jeˬ tehꞈ-ehˇ aˬ yawꞈ mˇ-euˬ meh.

³³ Ehˇ kʼawꞈ lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ-ahˇ aˬ yawꞈ maˬ laˆ cawˆ-ehˇ, miˇ kʼahˬ zaˬ deuˬ aˬ yawꞈ maꞈ-euˬ aˬ poeˬ aˬ bawˇ deuˬ-euˬ miˬ yehˇ jawˇ gaˇ, nui ma gʼawˇ mawˇ dawˬ tawˆ luꞈ noeˬ paˇ-awˇ maˬ gʼoꞈ poˆ laˇ-a.

³⁴ Yeˬhawˇshaˬpaˇ neh kʼaˇ mˇ kʼaˇ shaˇ yaꞈ-euˬ yawˬ jeˬ na luꞈ aˇ dahˬ beh gaˇ neh aˇ saˬ saˬ gaˇ keuˆ ni, Haˬnaˬniˇ-euˬ aˬ li Yeˬhuˇ neh boꞈ-euˬ Laˬsaˬbaˬ sahˬ boꞈ laꞈ kʼoeˇ boꞈ ahˇ taˬ-euˬ meh. Sahˬ boꞈ kʼoeˇ taꞈ-aˬ, Iˇsaˬleˬlaˆ tsawˇ jeuˬ-euˬ sahˬ paˬ deuˬ gaˇ kawˆ boꞈ taˬ-euˬ Laˬsaˬbaˬ sahˬ boꞈ laꞈ kʼoeˇ ahˇ-eu aˇ deuˆ tiˬ deuˆ pyeuꞈ-eu meh.

³⁵ Tiˬ poˆ-aˬ, maˬ muiˬ maˬ jaˬ-eu gʼawˬ mya jeˬ mˇ-eu Iˇsaˬleˬlaˆ sahˬ paˬ Aˬhaˬziˇ nehˬ-ehˇ, Yuˇdaˆ sahˬ paˬ Yeˬhawˇshaˬpaˇ nui ma taꞈ-euˬ meh.

³⁶ Iˬ ma laˆ shaˆ lawˇ deh-ahˇ jaˆ-eu Eˬzoˇgeˇbaˬ meuˬ-ahˇ, iˬ ma laˆ shaˆ-ahˇ cah-eu saˇ baoˬ deuˬ aˬ yawꞈ nyaꞈ jahˇ-euˬ meh.

³⁷ Ehˇ kʼawꞈ, Maˬleˇshaˬ meuˬ-ahˇ jawˇ-eu Doˇdaˬbaˬhuˇ-euˬ aˬ li Eˇliˇzaˬ neh, Yeˬhawˇshaˬpaˇ-ahˇ Miˬyehˇ gʼaˇ duˬ ngehˬ dah-eu laꞈ kʼoeˇ, “Aˬhaˬziˇ-ahˇ nawˇ nui ma taꞈ-eu miˇ neh, nawˬ neh mˇ gʼaˬ shaˇ gʼaˬ taˬ-euˬ jeˬ-ahˇ Sahˬpaˬ Miˬyehˇ laˆ luˬ laˆ seˇ tehꞈ-a” lehˇ ehˇ nehˬ-euˬ meh. Kʼoeˇ naˇ, saˇ baoˬ kʼoeˇ deuˬ cawˆ-iˇ jiˇ-awˇ, maˬ doˆ-iˇ nya-ehˇ pyeuꞈ-iˇ-euˬ meh.