2 Laˬsaˬbaˬ 19 - Akha

Yeˬhuˇ neh Yeˬhawˇshaˬpaˇ-ahˇ mehˬ nehˬ-euˬ

¹ Yuˇdaˆ sahˬ paˬ Yeˬhawˇshaˬpaˇ-aˬ, Yeˬluˇsaˬlehˬ meuˬ-ahˇ jaˆ-eu sahˬ paˬ-euˬ nymˇ-ahˇ yaw muiˬ paˬ-ehˇ gʼoꞈ keuˆ-iˇ-euˬ meh.

² Haˬnaˬniˇ-euˬ aˬ li Yeˬhuˇ lehˇ myahˇ-euˬ Miˬyehˇ gʼaˇ duˬ ngehˬ dah-eu tiˬ gʼaˬ aˬ yawꞈ jawˇ gaˇ iˇ-awˇ, heu loꞈ-ehˇ ehˇ nehˬ-euˬ meh. “Nui ma maˬ dawˇ-eu tsawˇ haˬ-ahˇ caw ba-awˇ, Sahˬpaˬ Miˬyehˇ-ahˇ bye-eu tsawˇ haˬ nehˬ-ehˇ mˇ taꞈ shaˇ taꞈ-eu tsaˬ meh lehˇ nawˇ noeˬ te loˇ. Nawˬ neh mˇ-euˬ gaˇ baˬ da neh Sahˬpaˬ Miˬyehˇ nui ma pehˇ-eu jeˬ nawˬ-euˬ kʼoeˇ taˆ keuˆ le luꞈ meh.

³ Ehˇ kʼawꞈ, nawˬ-euˬ laꞈ kʼoeˇ yaw muiˬ jeˬ ahˇ-a siˬ. Aˬ jeˬ miˇ neh ehˇ naˇ, miˇ kʼahˬ zaˬ deuˬ uˬ duˬ tahˬ luꞈ-eu Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ dawˬ tawˆ luꞈ-ahˇ nawˇ laˆ cawˆ jiˇ-awˇ, Sahˬpaˬ Miˬyehˇ-euˬ nui noeˬ-ahˇ nawˇ caw teh-euˬ meh.”

Yeˬhawˇshaˬpaˇ yaˇ kʼaˬ daˇ-eu deuˬ tseˇ doˆ-euˬ

⁴ Sahˬ paˬ Yeˬhawˇshaˬpaˇ-aˬ, Yeˬluˇsaˬlehˬ meuˬ-ahˇ jawˇ kʼawꞈ, miˇ kʼahˬ zaˬ deuˬ kʼaˇ jawˇ gaˇ cah doe-euˬ meh. Laꞈ oˆ paw pyawˬ-ahˇ jaˆ-eu Beˬlaˇsheˬba meuˬ-ahˇ neh, laꞈ taˆ paw Eˇpaˬleˬ miˇ kʼahˬ gawˬ jawˬ gawˬ duˇ-ahˇ keuˆ ni cah doe-awˇ, miˇ kʼahˬ zaˬ deuˬ-ahˇ aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ jawˇ gaˇ gʼoꞈ kʼoꞈ laˇ-awˬ lehˇ kuˇ-euˬ meh.

⁵ Yuˇdaˆ miˇ kʼahˬ-ahˇ jaˆ-eu ziꞈ dah ni tsoˆ taˬ-euˬ meuˬ yawˬ meuˬ na luꞈ laꞈ kʼoeˇ, yaˇ kʼaˬ daˇ-eu deuˬ aˬ yawꞈ tseˇ doˆ-awˇ, yaˇ kʼaˬ bi daˇ-euˬ meh.

⁶ Yaˇ kʼaˬ daˇ-eu deuˬ-ahˇ aˬ yawꞈ heu loꞈ-ehˇ mehˬ nehˬ tsoˆ nehˬ-euˬ meh. “Naw maꞈ yaˇ kʼaˬ daˇ ngeh yaw muiˬ paˬ-ehˇ shaˇ noeˬ -awˇ daˇ-awˬ. Aˬ jeˬ miˇ neh ehˇ naˇ, tsawˇ haˬ zaˬ-euˬ baoˬ-ahˇ gʼoe-awˇ naw maꞈ yaˇ kʼaˬ daˇ-eu maˬ ngeuˇ-a. Sahˬpaˬ Miˬyehˇ-euˬ baoˬ-ahˇ gʼoe-awˇ daˇ-eu meh. Naw maꞈ yaˇ kʼaˬ daˇ ngeh, aˬ yawꞈ naw maꞈ nehˬ-ehˇ jawˇ-eu meh.

⁷ Naw maꞈ Sahˬpaˬ Miˬyehˇ-ahˇ guˆ-eu laꞈ kʼoeˇ yaw muiˬ paˬ-ehˇ mˇ-awˬ. Aˬ jeˬ miˇ neh ehˇ naˇ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, jaˬ myawꞈ myawꞈ-eu jeˬ-ahˇ maˬ ehˇ, myaˆ pyawˬ huiˬ nyiˇ tseˇ-eu jeˬ-ahˇ maˬ ehˇ, laꞈ nmꞈ nmꞈ-eu jeˬ-ahˇ maˬ ehˇ, iˬ baˇ maˬ pyehˬ nehˬ-a.”

⁸ Yeˬluˇsaˬlehˬ meuˬ laꞈ kʼoeˇ kʼawꞈ, Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ mˇ bahˬ-euˬ jeˬ doˆ laˇ ngeh maˬ ehˇ, meuˬ laꞈ kʼoeˇ jawˇ-eu tsawˇ haˬ deuˬ tiˬ gʼaˬ tiˇ gʼaˬ ja dzaˬ-eu jeˬ doˆ laˇ ngeh maˬ ehˇ, yaˇ kʼaˬ daˇ-eu gʼaˇ duˬ, Leˬbiˇ tsawˇ haˬ deuˬ, piˇ ma deuˬ hawˇ-eu, aˬ yuiꞈ aˬ tsu geuꞈ luꞈ-eu miˇ kʼahˬ zaˬ tiˬ paˆ na deuˬ-ahˇ Yeˬhawˇshaˬpaˇ tseˇ doˆ-euˬ meh.

⁹ Aˬ yawꞈ maꞈ-ahˇ aˬ yawꞈ heu loꞈ-ehˇ mehˬ nehˬ tsoˆ nehˬ-euˬ meh. “Naw maꞈ Sahˬpaˬ Miˬyehˇ-ahˇ guˆ-awˇ, kʼaˇ mˇ kʼaˇ shaˇ-eu yawˬ jeˬ na luꞈ laꞈ kʼoeˇ aˬ yawꞈ-ahˇ saˇ jaˇ ziꞈ-awˇ, aˬ yawꞈ-euˬ ehˇ dawˬ naˇ haˬ naˇ haˬ-ehˇ, yawˬ ha-ahˇ daˇ-eu gaˇ ya mˇ meh.

¹⁰ Meuˬ nui deuˬ-ahˇ jawˇ luꞈ-eu naw maꞈ-euˬ miˇ kʼahˬ zaˬ deuˬ, tsawˇ haˬ sehꞈ-euˬ maˬ ehˇ, miˇ kʼahˬ zahˇ sahˇ kʼoꞈ-ahˇ mˇ bahˬ-euˬ maˬ ehˇ, zahˇ dawˬ kʼoꞈ dawˬ-ahˇ mˇ bahˬ-euˬ maˬ ehˇ, kʼoeˇ loꞈ-ehˇ gʼeh-eu gaˇ kawˆ doˆ laˇ-awˇ naw maꞈ jawˇ gaˇ laˇ keuˆ ngeh, aˬ yawꞈ maꞈ-ahˇ yaˇ kʼaˬ daˇ nehˬ-eu aˇ yamˬ laꞈ kʼoeˇ Sahˬpaˬ Miˬyehˇ-ahˇ maˬ ya mˇ bahˬ-eu gʼaˇ duˬ, aˬ joˆ-ehˇ ya ngehˬ ya tmˇ-awˇ, aˬ joˆ-ehˇ ya dehꞈ-eu gaˇ kawˆ deuˬ, aˬ yawꞈ maꞈ-ahˇ yaw muiˬ paˬ-ehˇ mehˬ nehˬ tsoˆ nehˬ-awˬ. Naw maꞈ kʼoeˇ loꞈ-ehˇ maˬ mehˬ maˬ tsoˆ nehˬ naˇ, naw maꞈ hawˇ-eu naw maꞈ-euˬ miˇ kʼahˬ zaˬ kʼoeˇ deuˬ kʼoeˇ taˆ, Sahˬpaˬ Miˬyehˇ nui ma pehˇ-eu jeˬ keuˆ le tehꞈ-a. Ehˇ kʼawꞈ, kʼoeˇ loꞈ-ehˇ mehˬ nehˬ tsoˆ nehˬ naˇ, naw maꞈ iˬ baˇ maˬ ahˇ-a.

¹¹ Piˇ ma Yaw huiˬ gʼaˬ pyeuꞈ-eu Aˬmaˬliˇ-aˬ, uˬ duˬ tahˬ-eu zahˇ sahˇ kʼoꞈ paw taꞈ leˇ-eu gaˇ dawˬ tawˆ luꞈ-ahˇ jahˇ jiˇ nya-eu baoˬ jaˆ-awˇ, Yuˇdaˆ miˇ kʼahˬ-ahˇ haw pyaˆ uˆ lahˇ-eu gʼaˬ pyeuꞈ-eu Iˇshaˬmeˬlaˇ-euˬ aˬ li Zeˬbaˬdiˇ-aˬ, miˇ kʼahˬ zahˇ sahˇ kʼoꞈ-ahˇ taꞈ-eu gaˇ yawˬ jeˬ na luꞈ-ahˇ jahˇ jiˇ nya-eu baoˬ jaˆ-eu meh. Leˬbiˇ tsawˇ haˬ deuˬ-aˬ, saˇ naˇ gaˇ mˇ-eu paw haw-eu pyaˆ-eu deuˬ ya geuꞈ meh. Nui ma kʼaˬ duˬ ni mˇ-awˬ. Yaw tsaˬ yaw dawˇ dawˇ-ehˇ mˇ-eu deuˬ jawˇ paw Sahˬpaˬ Miˬyehˇ pyawˬ luꞈ-uˇ.”