2 Laˬsaˬbaˬ 18 - Akha

Aˬhaˆ ya shiˇ meh lehˇ Miˇkaˬyaˇ ehˇ-euˬ

¹ Yuˇdaˆ sahˬ paˬ Yeˬhawˇshaˬpaˇ smˇ muiˬ muiˬ laˇ-awˇ tsawˇ myahˇ doˆ laˇ ngeh, aˬ yawꞈ-euˬ nymˇ kʼahˬ zaˬ tiˬ gʼaˬ hawˇ-eu Iˇsaˬleˬlaˆ sahˬ paˬ Aˬhaˆ-euˬ nymˇ kʼahˬ zaˬ tiˬ gʼaˬ bi sheuˬ dahˬ dzaˬ taꞈ-eu laꞈ kʼoeˇ, Aˬhaˆ nehˬ-ehˇ cawˬ cawˬ taꞈ-euˬ meh.

² Aˇ kʼoꞈ aˇ la ui cuiˆ myahˇ laˇ ngeh jawˇ, Saˬmaˬliˆ meuˬ-ahˇ Yeˬhawˇshaˬpaˇ le-awˇ, Aˬhaˆ jawˇ gaˇ dawˬ deh gʼa leˇ-euˬ meh. Yeˬhawˇshaˬpaˇ hawˇ-eu aˬ yawꞈ nehˬ-ehˇ le-euˬ deuˬ-ahˇ taˬ huiˬ-eu laꞈ kʼoeˇ, yawˇ hawˇ-eu mawˇ neˇ gʼawˬ mya ni Aˬhaˆ sehꞈ-awˇ, dzaˬ byawˇ lawˇ-euˬ meh. Giˇlaˆ miˇ kʼahˬ-ahˇ jaˆ-eu Laˬmoˆ meuˬ-ahˇ guiˇ deuˆ leˇ-eu gʼaˇ duˬ, Yeˬhawˇshaˬpaˇ-ahˇ aˬ yawꞈ cawˬ-euˬ meh.

³ “Giˇlaˆ miˇ kʼahˬ Laˬmoˆ meuˬ-ahˇ ngaˬ nehˬ-ehˇ guiˇ deuˆ leˇ ma loˇ” lehˇ, Yuˇdaˆ sahˬ paˬ Yeˬhawˇshaˬpaˇ-ahˇ Iˇsaˬleˬlaˆ sahˬ paˬ Aˬhaˆ naˇ haˬ-euˬ meh. Yeˬhawˇshaˬpaˇ ehˇ-eu, “Nawˇ kʼaˇ dah laˇ ngeh nawˬ nehˬ-ehˇ le-eu gʼaˇ duˬ ngaˇ lehˬ hmˬ dah taˬ-euˬ ma. Ngaˬ-euˬ guiˇ maꞈ kʼawꞈ lehˬ hmˬ dah taˬ-euˬ ma. Nga maꞈ nawˬ nehˬ-ehˇ guiˇ deuˆ leˇ ma.

⁴ Ehˇ kʼawꞈ, Sahˬpaˬ Miˬyehˇ-ahˇ jeˬ hu naˇ haˬ haw kaˇ-euˇ.”

⁵ Kʼoeˇ naˇ, Miˬyehˇ gʼaˇ duˬ ngehˬ dah-eu oeˬ yaˇ gʼaˬ-ahˇ Aˬhaˆ kuˇ uiˬ-awˇ “Giˇlaˆ miˇ kʼahˬ Laˬmoˆ meuˬ-ahˇ ngaˇ guiˇ deuˆ leˇ-eu tsaˬ nga loˇ, maˬ tsaˬ nga loˇ lehˇ ehˇ nehˬ laꞈ sheˇ” lehˇ naˇ haˬ-euˬ meh. “Deuˆ leˇ-awˬ. Miˬyehˇ nawˬ-ahˇ bi gʼaˬ leˇ nehˬ laꞈ tehꞈ-a” lehˇ, aˬ yawꞈ maꞈ ehˇ-eu meh.

⁶ Ehˇ kʼawꞈ, Yeˬhawˇshaˬpaˇ ehˇ-eu, “Sahˬpaˬ Miˬyehˇ-ahˇ mehˬ bawˬ mˇ haw-eu gʼaˇ duˬ, Miˬyehˇ gʼaˇ duˬ ngehˬ dah-eu nui gʼaˬ tiˬ gʼaˬ-iˬ maˬ paˇ jawˇ meh loˇ.”

⁷ Aˬhaˆ ehˇ-eu, “Ymˇlahˬ-euˬ aˬ li Miˇkaˬyaˇ lehˇ myahˇ-euˬ tiˬ gʼaˬ jawˇ-a siˬ. Ehˇ kʼawꞈ, aˬ yawꞈ ngaˬ-ahˇ yaw muiˬ jeˬ tiˬ jeˬ-iˬ maˬ ngehˬ dah nehˬ laꞈ-eu miˇ neh, aˬ yawꞈ-ahˇ ngaˇ bye dui dui nya. Aˬ myah luꞈ maˬ muiˬ-eu jeˬ tehꞈ-ehˇ aˬ yawꞈ ngehˬ dah-eu meh.” Yeˬhawˇshaˬpaˇ ehˇ-eu, “Nawˇ teu loꞈ-ehˇ ehˇ-eu maˬ tsaˬ-eu paˬ.”

⁸ Kʼoeˇ naˇ, sahˬ paˬ Aˬhaˆ-aˬ, aˬ yawꞈ-euˬ saˇ naˇ-ahˇ gaˇ mˇ luꞈ-eu yaw huiˬ yaw mahˇ tiˬ gʼaˬ-ahˇ kuˇ-awˇ, Miˇkaˬyaˇ-ahˇ heu gaˇ yaw kawˇ-ehˇ sheuˬ laꞈ-awˬ” lehˇ ehˇ nehˬ-eu meh.

⁹ Iˇsaˬleˬlaˆ sahˬ paˬ hawˇ-eu Yuˇdaˆ sahˬ paˬ Yeˬhawˇshaˬpaˇ aˬ nyaꞈ-aˬ, sahˬ paˬ-euˬ dm gʼaˬ dm lmˇ dm-awˇ, Saˬmaˬliˆ meuˬ-euˬ laꞈ nyiˇ paw cehˇ baw duˬ-ahˇ, sahˬ paˬ nuiˇ-eu nuiˇ mahˬ-ahˇ nuiˇ luꞈ-eu meh. Miˬyehˇ gʼaˇ duˬ ngehˬ dah-eu deuˬ dawˬ tawˆ luꞈ kʼawꞈ, aˬ yawꞈ nyaꞈ-euˬ mehˬ shi miˬ yehˇ gʼaˇ duˬ ngehˬ dah ngehˬ dah-ehˇ jawˇ luꞈ-eu meh.

¹⁰ Aˬ yawꞈ maꞈ laꞈ kʼoeˇ Sheˬnaˬnahˬ-euˬ aˬ li Zeˬdaˬkiˇ gʼaˬ, shmˇ uˬ coeˇ tehˆ-awˇ, “Heu loꞈ-ehˇ gʼeh-eu uˬ coeˇ neh Suˇliˆ tsawˇ haˬ deuˬ-ahˇ naw maꞈ deuˆ-awˇ, naw maꞈ gʼaˬ leˇ tehꞈ-a lehˇ, Sahˬpaˬ Miˬyehˇ ehˇ-eu meh” lehˇ ngehˬ dah-euˬ meh.

¹¹ Miˬyehˇ gʼaˇ duˬ ngehˬ dah luꞈ-eu deuˬ dawˬ tawˆ luꞈ, aˬ yawꞈ neh kʼaˇ ehˇ-euˬ loꞈ-ehˇ ehˇ-eu meh. “Laˬmoˆ meuˬ-ahˇ guiˇ deuˆ leˇ-awˬ. Naw maꞈ gʼaˬ leˇ tehꞈ-a. Sahˬpaˬ Miˬyehˇ naw maꞈ-ahˇ bi gʼaˬ leˇ nehˬ laꞈ tehꞈ-a” lehˇ aˬ yawꞈ maꞈ ehˇ-eu meh.

¹² Kʼoeˇ ngeh, Miˇkaˬyaˇ-ahˇ kuˇ laˬ-iˇ-euˬ yaw huiˬ yaw mahˇ kʼoeˇ gʼaˬ Miˇkaˬyaˇ-ahˇ ehˇ nehˬ-eu, “Miˬyehˇ gʼaˇ duˬ ngehˬ dah-eu deuˬ dawˬ tawˆ luꞈ, sahˬ paˬ guiˇ deuˆ-eu gʼaˬ leˇ tehꞈ-a lehˇ ehˇ-eu meh. Nawˇ kʼawꞈ kʼoeˇ loꞈ-ehˇ ehˇ-eu tsaˬ tehꞈ-a.”

¹³ Ehˇ kʼawꞈ, Miˇkaˬyaˇ ehˇ-eu, “Miˬyehˇ neh kʼaˇ bi ehˇ-euˬ loꞈ-ehˇ tehꞈ-ehˇ ngaˇ ehˇ ma lehˇ, dehꞈ luꞈ-eu Sahˬpaˬ Miˬyehˇ-euˬ mehˬ shi ngaˇ saˇ jaˇ dzaˬ-eu ma.”

¹⁴ Sahˬ paˬ Aˬhaˆ-euˬ mehˬ shi Miˇkaˬyaˇ le keuˆ ngeh, “Miˇkaˬyaˇ-oˇ, sahˬ paˬ Yeˬhawˇshaˬpaˇ nga nyaꞈ Laˬmoˆ meuˬ-ahˇ guiˇ deuˆ leˇ-eu tsaˬ meh loˇ, maˬ tsaˬ-a loˇ” lehˇ, sahˬ paˬ Aˬhaˆ naˇ haˬ-euˬ meh. “Deuˆ leˇ-awˬ. Nawˇ gʼaˬ leˇ tehꞈ-a. Sahˬpaˬ Miˬyehˇ nawˬ-ahˇ bi gʼaˬ leˇ nehˬ laꞈ tehꞈ-a” lehˇ, Miˇkaˬyaˇ ehˇ nehˬ-euˬ meh.

¹⁵ Ehˇ kʼawꞈ, Aˬhaˆ ehˇ-eu, “Sahˬpaˬ Miˬyehˇ-euˬ tsawˇ myahˇ uˬ moˆ nawˇ ngaˬ-ahˇ dawˬ ngehˬ cawˬ ngeh dawˇ coe ni ngehˬ-awˬ tmˇ-awˬ lehˇ ngaˇ nawˬ-ahˇ aˇ myaˆ poˆ ya ehˇ nehˬ nmˇ.”

¹⁶ Miˇkaˬyaˇ ehˇ-eu, “Yawˇ bo-eu yaw sahˇ maˬ baw-eu yawˇ deuˬ loꞈ-ehˇ, Iˇsaˬleˬlaˆ yehˇ deuˬ gawˬ jawˬ gawˬ duˇ doe ni cehˆ byaˆ taˬ-euˬ ngaˬ-ahˇ mawˇ le-euˬ meh. Kʼoeˇ ngeh, Sahˬpaˬ Miˬyehˇ ehˇ-eu, ‘Tsawˇ haˬ heu deuˬ-aˬ, aˬ yuiꞈ geuꞈ-awˇ sheuˬ gʼeh nehˬ-euˬ gʼaˬ, maˬ jawˇ-a. Aˬ yawꞈ maꞈ-ahˇ coꞈ ngehˇ ni bi gʼoꞈ-iˇ-awˬ’ lehˇ ehˇ-eu meh.”

¹⁷ Yeˬhawˇshaˬpaˇ-ahˇ Aˬhaˆ ehˇ nehˬ-eu, “Tsawˇ haˬ heu gʼaˬ ngaˬ-ahˇ yaw muiˬ jeˬ tiˬ jeˬ-iˬ maˬ ngehˬ dah nehˬ laꞈ-a lehˇ ngaˇ nawˬ-ahˇ ehˇ-euˬ maˬ ngeuˇ-a loˇ. Aˬ myah luꞈ maˬ muiˬ-eu jeˬ tehꞈ-ehˇ ngehˬ dah-eu meh.”

¹⁸ Miˇkaˬyaˇ paˇ ehˇ-eu, “Sahˬpaˬ Miˬyehˇ ehˇ gaˇ naˇ haˬ sheˇ. Sahˬpaˬ Miˬyehˇ-aˬ, mˬ kʼoeˇ taˆ aˬ yawꞈ-euˬ nuiˇ mahˬ-ahˇ nuiˇ luꞈ-awˇ, aˬ yawꞈ-euˬ mˬ taˆ gʼaˬ kʼehˇ dawˬ tawˆ luꞈ aˬ yawꞈ dawˬ peh yawꞈ luꞈ-eu ngaˬ-ahˇ mawˇ laˇ miˇ-a.

¹⁹ Kʼoeˇ ngeh, Laˬmoˆ meuˬ-ahˇ Aˬhaˆ le-awˇ, aˬ cawˬ neh bi deuˆ sehꞈ ni, aˬ yawꞈ-ahˇ aˬ suˇ gʼaˬ mehˇ shuiˇ shuiˇ-iˇ nmˇ lehˇ, Sahˬpaˬ Miˬyehˇ ehˇ ngeh, mˬ taˆ gʼaˬ kʼehˇ deuˬ tiˬ gʼaˬ tiˬ jeˬ ehˇ-eu meh.

²⁰ Kʼoeˇ ngeh, yaw sahˇ tiˬ sahˇ mehˬ hu paw doˆ laˇ-awˇ, Sahˬpaˬ Miˬyehˇ-euˬ dawˬ peh le-awˇ, ‘Aˬ yawꞈ-ahˇ ngaˇ mehˇ shuiˇ shuiˇ-iˇ ma’ lehˇ ehˇ-eu meh. ‘Aˬ joˆ-ehˇ shuiˇ-iˇ nmˇ’ lehˇ aˬ yawꞈ-ahˇ Sahˬpaˬ Miˬyehˇ naˇ haˬ-euˬ meh.

²¹ Aˬ yawꞈ ehˇ-eu, ‘Ngaˇ iˇ-awˇ, Aˬhaˆ-ahˇ Miˬyehˇ gʼaˇ duˬ ngehˬ dah nehˬ-eu deuˬ dawˬ tawˆ luꞈ jaˬ myawꞈ myawꞈ ni jahˇ ma’ lehˇ ehˇ-eu meh. ‘Mehˇ shuiˇ shuiˇ-iˇ-awˬ. Nawˬ neh mehˇ shuiˇ shuiˇ-euˬ gaˇ tawˆ laˇ tehꞈ-a’ lehˇ, Sahˬpaˬ Miˬyehˇ ehˇ nehˬ-euˬ meh.

²² Heu-aˬ, aˬ joˆ-ehˇ pyeuꞈ laˇ gʼaˬ-euˬ gaˇ kawˆ meh. Nawˬ-ahˇ Miˬyehˇ gʼaˇ duˬ ngehˬ dah nehˬ luꞈ-eu heu deuˬ jaˬ myawꞈ myawꞈ ni Sahˬpaˬ Miˬyehˇ neh jahˇ nehˬ taˬ-euˬ meh. Luˬ-iˇ seˇ-iˇ-eu jeˬ-ahˇ nawˇ ya tahˬ puˬ tehꞈ-a lehˇ Sahˬpaˬ Miˬyehˇ ehˇ tsehˆ gʼaˬ taˬ-euˬ meh.”

²³ Kʼoeˇ naˇ, Miˬyehˇ gʼaˇ duˬ ngehˬ dah-eu Zeˬdaˬkiˇ gʼaˬ Miˇkaˬyaˇ jawˇ gaˇ le-awˇ, Miˇkaˬyaˇ-euˬ baˬ ba-ahˇ tehˆ-awˇ ehˇ-eu, “Sahˬpaˬ Miˬyehˇ-euˬ yaw sahˇ aˬ myah neh ngaˇ jawˇ gaˇ neh aˬ myah doˆ-iˇ-awˇ, nawˬ-ahˇ dawˬ paˇ ngehˬ cawˬ le taˬ.”

²⁴ Miˇkaˬyaˇ ehˇ-eu, “Nymˇ naˇ kʼah paw nawˇ ya cehˆ zaꞈ-iˇ-eu aˇ yamˬ keuˆ laˇ ngeh, gaˇ kawˆ heu nawˇ ya siˬ duˬ tehꞈ-a.”

²⁵ Kʼoeˇ naˇ, Aˬ haˇ-aˬ, aˬ yawꞈ-euˬ gaˇ mˇ-eu yaw huiˬ yaw mahˇ tiˬ gʼaˬ-ahˇ, heu loꞈ-ehˇ ehˇ nehˬ-euˬ meh. “Miˇkaˬyaˇ-ahˇ paꞈ-awˇ, meuˬ-ahˇ uˆ lahˇ-eu gʼaˬ pyeuꞈ-eu Aˬmoˬ hawˇ-eu sahˬ paˬ-euˬ aˬ li Yawˇshaˆ jawˇ gaˇ nyehꞈ gʼeh-awˬ.

²⁶ Ngaˇ tiˬ jeˬ-iˬ maˬ ca laˇ ni gʼoꞈ keuˆ laˇ ngeh keuˆ ni, tsawˇ haˬ heu gʼaˬ-ahˇ paꞈ kuˆ-ahˇ dawˆ-awˇ, kaˬ muˇ hawˇ-eu iˇ cuꞈ tehꞈ-ehˇ bi dzaˬ bi dawˇ-awˇ bi jawˇ tawˬ-awˬ.”

²⁷ Miˇkaˬyaˇ ehˇ-eu, “Nawˇ tiˬ jeˬ-iˬ maˬ gʼeh ni gʼoꞈ keuˆ le lawˬ naˇ, Sahˬpaˬ Miˬyehˇ ngaˬ-ahˇ gʼoe-awˇ dawˬ bi ngehˬ dah nehˬ laꞈ-euˬ maˬ ngeuˇ-aˇ. Ngaˬ neh ehˇ-euˬ dawˬ-ahˇ yawˬ gʼaˬ na luꞈ naˇ haˬ taˬ-awˬ.”

Aˬhaˆ shiˇ-euˬ

²⁸ Kʼoeˇ naˇ, Iˇsaˬleˬlaˆ sahˬ paˬ Aˬhaˆ hawˇ-eu Yuˇdaˆ sahˬ paˬ Yeˬhawˇshaˬpaˇ aˬ nyaꞈ, Giˇlaˆ miˇ kʼahˬ-ahˇ jaˆ-eu Laˬmoˆ meuˬ-ahˇ guiˇ deuˆ leˇ-euˬ meh.

²⁹ “Aˇ nyaꞈ guiˇ deuˆ ngeh, ngaˬ-ahˇ aˬ cawˬ maˬ bi haw siˬ-eu gʼaˇ duˬ mehˬ tsoeˬ pyehˇ-awˇ deuˆ ma. Ehˇ kʼawꞈ, nawˇ-aˬ sahˬ paˬ-euˬ dm gʼaˬ dm lmˇ dm-awˇ deuˆ-awˬ” lehˇ, Yeˬhawˇshaˬpaˇ-ahˇ Aˬhaˆ ehˇ nehˬ-euˬ meh. Kʼoeˇ naˇ, Iˇsaˬleˬlaˆ sahˬ paˬ gʼaˬ aˬ cawˬ maˬ bi haw siˬ ni mehˬ tsoeˬ pyehˇ-awˇ guiˇ deuˆ-euˬ meh.

³⁰ Suˇliˆ sahˬ paˬ-aˬ, aˬ yawꞈ-euˬ mahˬ laˆ lawˬ deuˬ-ahˇ uˆ lahˇ-eu yaw huiˬ deuˬ-ahˇ, Iˇsaˬleˬlaˆ sahˬ paˬ-ahˇ maˬ ngeuˇ naˇ tiˬ gʼaˬ-ahˇ-iˬ taˬ deuˆ lehˇ dawˬ biꞈ taˬ-euˬ meh.

³¹ Kʼoeˇ miˇ neh, sahˬ paˬ Yeˬhawˇshaˬpaˇ-ahˇ ya mawˇ ngeh, aˬ yawꞈ maꞈ dawˬ tawˆ luꞈ Iˇsaˬleˬlaˆ sahˬ paˬ meh lehˇ noeˬ-awˇ, aˬ yawꞈ-ahˇ tehꞈ-ehˇ ga jawˬ-awˇ deuˆ-euˬ meh. Ehˇ kʼawꞈ, Yeˬhawˇshaˬpaˇ guˇ doˆ laˇ ngeh, Sahˬpaˬ Miˬyehˇ aˬ yawꞈ-ahˇ ka kʼoꞈ-euˬ meh. Aˬ yawꞈ maꞈ aˬ yawꞈ-ahˇ ga jawˬ-awˇ maˬ ya deuˆ ni Miˬyehˇ jahˇ-euˬ meh.

³² Aˬ yawꞈ Iˇsaˬleˬlaˆ sahˬ paˬ maˬ ngeuˇ-eu gaˇ, mahˬ laˆ lawˬ-ahˇ uˆ lahˇ-eu Suˇliˆ tsawˇ haˬ yaw huiˬ yaw mahˇ kʼoeˇ deuˬ ya mawˇ ngeh, aˬ yawꞈ-ahˇ teh teh-ehˇ maˬ deuˆ ni byehˇ-euˬ meh.

³³ Ehˇ kʼawꞈ, Suˇliˆ yehˇ tiˬ gʼaˬ neh beuˆ gʼeh leꞈ-euˬ kaˆ myaˬ tiˬ myaˬ-aˬ, sahˬ paˬ Aˬhaˆ dm luꞈ-eu shmˇ pehˇ kʼahˬ maˇ byoe-ahˇ maˬ noeˬ maˬ duˇ-ehˇ beuˆ ahˇ gʼeh-awˇ, aˬ yawꞈ-ahˇ zaw leˇ-euˬ meh. Aˬ yawꞈ-euˬ mahˬ laˆ lawˬ teh-eu gʼaˬ-ahˇ, “Ngaˬ-ahˇ zaw laˇ-euˬ miˇ-a. Mehˬ nah paw zeuˆ pyawˇ-awˇ, guiˇ deuˆ luꞈ gaˇ neh iˇ doˆ gʼeh-awˬ” lehˇ, aˬ yawꞈ ehˇ nehˬ-euˬ meh.

³⁴ Guiˇ yaw kʼaˆ -ehˇ deuˆ luꞈ ngeh, aˬ yawꞈ-euˬ mahˬ laˆ lawˬ kʼoeˇ taˆ aˬ cawˬ-ahˇ kʼawˬ daˇ-awˇ, Suˇliˆ tsawˇ haˬ deuˬ jawˇ paw ciˬ pyawˇ-awˇ jawˇ-euˬ meh. Nahˇ ma ga ahˇ ngeh yamˬ-ahˇ aˬ yawꞈ shiˇ tsehˆ-euˬ meh.