2 Laˬsaˬbaˬ 17 - Akha

Yeˬhawˇshaˬpaˇ sahˬ paˬ pyeuꞈ laˇ-euˬ

¹ Aˬsaˬ-euˬ aˬ li Yeˬhawˇshaˬpaˇ gʼaˬ aˬ yawꞈ aˬ da-euˬ dah zaˇ sahˬ paˬ geuꞈ-awˇ, Iˇsaˬleˬlaˆ miˇ kʼahˬ naˆ maˬ tseˇ aˬ yawꞈ-euˬ miˇ kʼahˬ gʼaˬ kʼaˆ laˇ ni leh jeh-euˬ meh.

² Yuˇdaˆ miˇ kʼahˬ laꞈ kʼoeˇ jaˆ-eu ziꞈ dah ni tsoˆ taˬ-euˬ meuˬ deuˬ-ahˇ maˬ ehˇ, meuˬ-ahˇ gaˇ mahˇ kaˬ-eu jawˇ duˬ deuˬ-ahˇ maˬ ehˇ, Eˇpaˬleˬ miˇ kʼahˬ laꞈ kʼoeˇ aˬ yawꞈ-euˬ aˬ da Aˬsaˬ neh deuˆ za taˬ-euˬ meuˬ deuˬ-ahˇ maˬ ehˇ, aˬ yawꞈ-euˬ guiˇ maꞈ deuˬ bi jawˇ byah-euˬ meh.

³ Yeˬhawˇshaˬpaˇ-ahˇ Sahˬpaˬ Miˬyehˇ guiˬ lahˬ biꞈ-eu meh. Aˬ jeˬ miˇ neh ehˇ naˇ, yaw beh aˬ yawꞈ aˬ da yaw muiˬ paˬ-ehˇ dehꞈ ngeh loꞈ-ehˇ aˬ yawꞈ dehꞈ-awˇ, Baˬlaˇ miˬ yehˇ-ahˇ uˬ duˬ maˬ tahˬ-a.

⁴ Aˬ yawꞈ aˬ da-euˬ Miˬyehˇ-ahˇ aˬ yawꞈ uˬ duˬ tahˬ-awˇ, Miˬyehˇ-euˬ zahˇ dawˬ kʼoꞈ dawˬ-ahˇ naˇ haˬ geuꞈ-eu laꞈ kʼoeˇ, Iˇsaˬleˬlaˆ miˇ kʼahˬ-ahˇ uˆ lahˇ-eu sahˬ paˬ deuˬ loꞈ-ehˇ maˬ gʼeh ni aˬ yawꞈ dehꞈ-euˬ meh.

⁵ Yuˇdaˆ miˇ kʼahˬ-ahˇ yaw muiˬ paˬ-ehˇ uˆ lahˇ gʼaˬ nya ni, Yeˬhawˇshaˬpaˇ-ahˇ Sahˬpaˬ Miˬyehˇ yaw muiˬ paˬ-ehˇ caw ba nehˬ-awˇ, miˇ kʼahˬ zaˬ dawˬ tawˆ luꞈ aˬ yawꞈ-ahˇ laꞈ sawˬ biꞈ laˇ-eu miˇ neh, aˬ yawꞈ smˇ muiˬ muiˬ dui dui laˇ-awˇ, aˬ cawˬ aˬ yawꞈ-ahˇ taˬ huiˬ taˬ mahˇ-eu meh.

⁶ Sahˬpaˬ Miˬyehˇ-euˬ nui kʼahˇ mˇ-eu gʼaˇ duˬ aˬ yawꞈ-euˬ nui ma gʼawˇ mawˇ a nehˬ taˬ-awˇ, Yuˇdaˆ miˇ kʼahˬ laꞈ kʼoeˇ kʼaˇ jaˆ-eu lawˇ ciꞈ zaˬ deuˬ-euˬ uˬ duˬ tahˬ-eu jawˇ duˬ dawˬ tawˆ luꞈ hawˇ-eu, Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ dawˬ tawˆ luꞈ aˬ yawꞈ laˆ cawˆ jiˇ-euˬ meh.

⁷ Aˬ yawꞈ sahˬ paˬ geuꞈ-eu smˇ kʼoꞈ tiˬ kʼoꞈ-ahˇ, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ-ahˇ bi mehˬ bi tsoˆ-eu gʼaˇ duˬ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ pyehˬ gʼeh-euˬ meh. Yaw huiˬ yaw mahˇ kʼoeˇ deuˬ-aˬ, Beˬheˬlaˇ, Awˇbaˬdiˇ, Zaˬkaˬliˇ, Naˬdaˬneˬlaˇ hawˇ-eu, Miˇkaˬyaˇ meh.

⁸ Leˬbiˇ tsawˇ haˬ gʼoeˬ gʼaˬ hawˇ-eu piˇ ma nyiˬ gʼaˬ kʼawꞈ aˬ yawꞈ maꞈ nehˬ-ehˇ iˇ-euˬ meh. Leˬbiˇ tsawˇ haˬ deuˬ-aˬ, Sheˬmaˇyaˬ, Neˬdaˬniˇ, Zeˬbaˬdiˇ, Aˬsaˬheˬlaˇ, Sheˬmiˇlaˬmoˇ, Yeˬhawˇnaˬdaˬ, Aˬdawˇniˇyaˆ, Tawˇbiˇyaˆ hawˇ-eu, Tawˇbaˬdawˇniˇyaˆ meh. Piˇ ma kʼoeˇ nyiˬ gʼaˬ-aˬ Eˇliˇshaˬmaˇ hawˇ-eu Yeˬhawˇlamˬ meh.

⁹ Aˬ yawꞈ maꞈ Sahˬpaˬ Miˬyehˇ-euˬ zahˇ dawˬ kʼoꞈ dawˬ sahˬ boꞈ yuˇ-awˇ, Yuˇdaˆ miˇ kʼahˬ meuˬ yawˬ meuˬ na luꞈ doe ni mehˬ nehˬ tsoˆ nehˬ iˇ-euˬ meh.

Yeˬhawˇshaˬpaˇ-euˬ baoˬ kʼahˬ sehˇ

¹⁰ Yuˇdaˆ miˇ kʼahˬ-euˬ jawˬ jawˬ-ehˇ jaˆ-eu miˇ kʼahˬ dawˬ tawˆ luꞈ sahˬ paˬ Yeˬhawˇshaˬpaˇ-ahˇ guiˇ maˬ deuˆ peuˬ ni Sahˬpaˬ Miˬyehˇ jahˇ-euˬ meh.

¹¹ Piˇliˇtiˆ tsawˇ haˬ tiˬ paˆ na deuˬ-aˬ, Yeˬhawˇshaˬpaˇ jawˇ gaˇ pyuˇ gʼawˬ mya ni hawˇ-eu nui jeˬ laꞈ sawˬ sha ha laˇ-awˇ, Aˬlaˆ tsawˇ haˬ tiˬ paˆ na deuˬ-aˬ, yawˇ shiꞈ heˇ shiꞈ yaˇ mawˇ hawˇ-eu ciꞈ myehꞈ shiꞈ heˇ shiꞈ yaˇ mawˇ sha ha laˇ-euˬ meh.

¹² Kʼoeˇ miˇ neh, Yeˬhawˇshaˬpaˇ tiˬ nah saˇ-iˬ tiˬ nah baoˬ huiˬ laˇ luꞈ-eu meh. Yuˇdaˆ miˇ kʼahˬ doe ni, taˆ deuˬ hawˇ-eu meuˬ deuˬ aˬ yawꞈ laˆ ziꞈ-euˬ meh.

¹³ Yuˇdaˆ miˇ kʼahˬ meuˬ deuˬ laꞈ kʼoeˇ dzaˬ dzaˬ dawˇ dawˇ tiˬ byah ni tawˬ ahˇ taˬ-euˬ meh. Guiˇ deuˆ-eu paw tsawˇ myahˇ doˆ-eu yaw huiˬ yaw mahˇ deuˬ-ahˇ, Yeˬluˇsaˬlehˬ meuˬ-ahˇ bi jawˇ-euˬ meh.

¹⁴ Yawˬ ha-euˬ aˇ jeuˬ aˇ ca kʼoeˇ taˆ yawˬ ha aˬ yuiꞈ geuꞈ-euˬ deuˬ-aˬ, heu loꞈ-ehˇ meh. Yuˇdaˆ aˇ jeuˬ aˇ ca guiˇ maꞈ deuˬ kʼoeˇ taˆ aˬ yuiꞈ geuꞈ-awˇ uˆ lahˇ-eu gʼaˬ-aˬ, Aˬdaˬnahˬ pyeuꞈ-awˇ, aˬ yawꞈ-euˬ yehˇ smˬ seh gʼaˬ jawˇ-eu meh.

¹⁵ Aˬ yuiꞈ geuꞈ-euˬ nyiˬ gʼaˬ tiˬ gʼaˬ-aˬ, Yeˬhawˇhaˬnaˬ pyeuꞈ-awˇ, aˬ yawꞈ-euˬ yehˇ nyiˬ seh yehꞈ muiˇ gʼaˬ jawˇ-eu meh.

¹⁶ Aˬ yuiꞈ geuꞈ-euˬ smˇ gʼaˬ tiˬ gʼaˬ-aˬ, Ziˇkaˬliˇ-euˬ aˬ li Aˬmaˬsiˇ pyeuꞈ-awˇ, aˬ yawꞈ-euˬ yehˇ nyiˬ seh gʼaˬ jawˇ-eu meh. (Aˬmaˬsiˇ-aˬ, yawˬ haˇ yawˬ ha nui ma keuˆ-awˇ Sahˬpaˬ Miˬyehˇ-euˬ gaˇ mˇ-euˬ meh.)

¹⁷ Beˬyaˬmiˬ aˇ jeuˬ aˇ ca guiˇ maꞈ deuˬ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, tsawˇ myahˇ doˆ-eu yehˇ tiˬ gʼaˬ pyeuꞈ-eu Eˇleˬdaˬ meh. Dehˬ daˬ duˬ hawˇ-eu kaˆ baꞈ-euˬ yehˇ nyiˬ seh gʼaˬ-ahˇ aˬ yawꞈ uˆ lahˇ-euˬ meh.

¹⁸ Aˬ yuiꞈ geuꞈ-euˬ nyiˬ gʼaˬ tiˬ gʼaˬ-aˬ, Yeˬhawˇzaˬbaˆ pyeuꞈ-awˇ, guiˇ deuˆ-eu gʼaˇ duˬ keu ka biꞈ loꞈ taˬ-euˬ yehˇ tiˬ seh yehꞈ muiˇ gʼaˬ-ahˇ aˬ yawꞈ uˆ lahˇ-eu meh.

¹⁹ Tsawˇ haˬ heu deuˬ Yeˬluˇsaˬlehˬ meuˬ-ahˇ jawˇ-awˇ, sahˬ paˬ-euˬ yehˇ geuꞈ luꞈ-eu meh. Kʼoeˇ uˬ taꞈ, Yuˇdaˆ miˇ kʼahˬ laꞈ kʼoeˇ jaˆ-eu ziꞈ dah ni tsoˆ taˬ-euˬ meuˬ deuˬ-ahˇ kʼawꞈ, yehˇ nui deuˬ aˬ yawꞈ bi jawˇ-euˬ meh.