2 Laˬsaˬbaˬ 15 - Akha

Yuˇdaˆ miˇ kʼahˬ muiˬ laˇ ni Aˬsaˬ mˇ-euˬ

¹ Miˬyehˇ-euˬ Yaw sahˇ Awˇdehˇ-euˬ aˬ li Aˬzaˬyiˇ kʼoeˇ taˆ keuˆ le-euˬ meh.

² Kʼoeˇ naˇ, Aˬsaˬ jawˇ gaˇ iˇ-awˇ ehˇ nehˬ-eu, “Sahˬ paˬ Aˬsaˬ hawˇ-eu, Yuˇdaˆ miˇ kʼahˬ, Beˬyaˬmiˬ miˇ kʼahˬ-ahˇ jawˇ-eu tsawˇ haˬ dawˬ tawˆ luꞈ ngaˇ ehˇ gaˇ naˇ haˬ sheˇ. Naw maꞈ Sahˬpaˬ Miˬyehˇ laꞈ kʼoeˇ kʼaˇ jawˇ kʼoeˇ keuˆ ni, aˬ yawꞈ kʼawꞈ naw maꞈ nehˬ-ehˇ jawˇ tehꞈ-a. Naw maꞈ aˬ yawꞈ-ahˇ poˆ naˇ, aˬ yawꞈ naw maꞈ-ahˇ bi mawˇ laꞈ tehꞈ-a. Ehˇ kʼawꞈ, naw maꞈ aˬ yawꞈ-ahˇ byehˇ dzeh naˇ, aˬ yawꞈ kʼawꞈ naw maꞈ-ahˇ byehˇ dzeh tehꞈ-a.

³ Aˇ yamˬ gʼawˬ myahˇ ni, Iˇsaˬleˬlaˆ tsawˇ haˬ laꞈ kʼoeˇ, aˬ diˇ aˬ maˇ Miˬyehˇ pyeuꞈ-eu Sahˬpaˬ Miˬyehˇ maˬ jawˇ-ehˇ, aˬ yawꞈ maꞈ-ahˇ mehˬ nehˬ tsoˆ nehˬ-eu piˇ ma deuˬ maˬ jawˇ-eu uˬ taꞈ, zahˇ dawˬ kʼoꞈ dawˬ kʼawꞈ maˬ jaˆ ni dehꞈ-euˬ meh.

⁴ Ehˇ kʼawꞈ, shaˬ-eu zahˬ-eu jeˬ-ahˇ ya tahˬ puˬ ngeh, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ jawˇ gaˇ aˬ yawꞈ maꞈ paˇ gʼoꞈ poˆ laˇ-euˬ meh.

⁵ Aˬ yawꞈ maꞈ aˬ yawꞈ-ahˇ poˆ-awˇ, poˆ mawˇ-euˬ meh. Aˇ nah aˇ yamˬ kʼoeˇ yamˬ laꞈ kʼoeˇ, tsawˇ haˬ tiˬ gʼaˬ-iˬ tiˬ jeˬ-iˬ maˬ ca laˇ ni maˬ iˇ maˬ laˇ tsehˆ nya-a. Aˬ jeˬ miˇ neh ehˇ naˇ, miˇ kʼahˬ yawˬ kʼahˬ na luꞈ laꞈ kʼoeˇ, guˆ-eu gaˆ-eu jeˬ hawˇ-eu maˬ tsaˬ maˬ dzoeˇ leˇ-eu jeˬ jaˆ luꞈ-eu meh.

⁶ Miˇ kʼahˬ tiˬ kʼahˬ tiˇ kʼahˬ kʼaˆ dzaˬ-awˇ, meuˬ tiˬ meuˬ tiˇ meuˬ nawˬ dzaˬ-eu meh. Aˬ jeˬ miˇ neh ehˇ naˇ, shaˬ-eu zahˬ-eu jeˬ hawˇ-eu guˆ-eu gaˆ-eu jeˬ, aˬ yawꞈ maꞈ kʼoeˇ taˆ Miˬyehˇ bi keuˆ le luꞈ-eu meh.

⁷ Ehˇ kʼawꞈ, naw maꞈ gʼaˬ byehˆ maˬ byehˆ ni, nui ma kʼaˬ duˬ ni taˬ-awˬ. Naw maꞈ neh mˇ-euˬ gaˇ baˬ da neh guiˬ lahˬ za tehꞈ-a.”

⁸ Awˇdehˇ-euˬ a li Aˬzaˬyiˇ neh Miˬyehˇ gʼaˇ duˬ ngehˬ dah-euˬ dawˬ kʼoeˇ dawˬ-ahˇ Aˬsaˬ ya gaˬ ngeh, nui ma laꞈ kʼoeˇ gʼaˬ ahˇ dui dui laˇ-awˇ, Yuˇdaˆ miˇ kʼahˬ hawˇ-eu Beˬyaˬmiˬ miˇ kʼahˬ laꞈ kʼoeˇ kʼaˇ jaˆ-eu tahˬ pahˬ aˬ ma mawˇ kawˇ dawˬ tawˆ luꞈ hawˇ-eu, Eˇpaˬleˬ miˇ kʼahˬ gawˬ jawˬ gawˬ duˇ-ahˇ aˬ yawꞈ neh deuˆ za-euˬ meuˬ deuˬ-ahˇ kʼaˇ jaˆ-eu tahˬ pahˬ aˬ ma mawˇ kawˇ dawˬ tawˆ luꞈ-ahˇ aˬ yawꞈ yuˇ dzeh-euˬ meh. Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma-euˬ pu ka jaˆ-eu lawˇ duˬ-ahˇ aˬ yawꞈ laˆ muiˬ-euˬ meh.

⁹ Eˇpaˬleˬ miˇ kʼahˬ, Maˬnaˇseˬ miˇ kʼahˬ hawˇ-eu Suˇmoˬ miˇ kʼahˬ-ahˇ jawˇ-eu tsawˇ haˬ gʼawˬ mya ni Aˬsaˬ jawˇ paw cehˆ uˇ le-awˇ, aˬ yawꞈ-euˬ miˇ kʼahˬ laꞈ kʼoeˇ jawˇ luꞈ-eu meh. Aˬ jeˬ miˇ neh ehˇ naˇ, aˬ yawꞈ nehˬ-ehˇ Sahˬpaˬ Miˬyehˇ jawˇ-eu aˬ yawꞈ maꞈ ya mawˇ-euˬ meh. Aˬ yawꞈ maꞈ dawˬ tawˆ luꞈ hawˇ-eu, Yuˇdaˆ tsawˇ haˬ, Beˬyaˬmiˬ tsawˇ haˬ deuˬ-ahˇ aˬ yawꞈ kuˇ uiˬ-euˬ meh.

¹⁰ Aˬsaˬ sahˬ paˬ geuꞈ-euˬ tseˇ ngaˬ kʼoꞈ tiˬ kʼoꞈ ba la smˇ siˬ tiˬ siˬ-ahˇ Yeˬluˇsaˬlehˬ meuˬ-ahˇ aˬ yawꞈ maꞈ uiˬ laˇ jiˇ-euˬ meh.

¹¹ Aˬ yawꞈ maꞈ neh guiˇ deuˆ za laꞈ-euˬ deuˬ laꞈ kʼoeˇ, mawˇ neˇ shiꞈ yaˇ mawˇ hawˇ-eu yawˇ shiꞈ heˇ mawˇ, Sahˬpaˬ Miˬyehˇ-ahˇ aˬ yawꞈ maꞈ lawˇ nehˬ-euˬ meh.

¹² Aˬ yawꞈ maꞈ-euˬ nui ma gʼawˇ mawˇ dawˬ tawˆ luꞈ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ ma lehˇ, aˬ yawꞈ maꞈ dawˬ ma saˇ jaˇ dzaˬ-euˬ meh.

¹³ Huiˬ zaˬ nyiˇ zaˬ hawˇ-eu zaˬ miˬ zaˬ yo maˬ tseˇ ni, aˬ yawꞈ-ahˇ uˬ duˬ maˬ tahˬ-eu tsawˇ haˬ aˬ geu gʼaˬ maˬ kaˬ, bi sehꞈ ma lehˇ aˬ yawꞈ maꞈ saˇ jaˇ dzaˬ-euˬ meh.

¹⁴ Dawˬ ma saˇ jaˇ kʼoeˇ hmˬ-ahˇ ziꞈ ma lehˇ, Sahˬpaˬ Miˬyehˇ-euˬ tsawˇ myahˇ uˬ moˆ aˬ yawꞈ maꞈ yaw kʼaˆ-ehˇ guˇ-euˬ meh. Kʼoeˇ naˇ, aˬ yawꞈ maꞈ guˇ guˇ-ehˇ daˇ heh baw-euˬ meh.

¹⁵ Yuˇdaˆ miˇ kʼahˬ zaˬ dawˬ tawˆ luꞈ laˬ kʼaˬ cehˇ-eu meh. Aˬ jeˬ miˇ neh ehˇ naˇ, aˬ yawꞈ maꞈ-euˬ nui ma gʼawˇ mawˇ dawˬ tawˆ luꞈ dawˬ ma saˇ jaˇ dzaˬ-euˬ meh. Sahˬpaˬ Miˬyehˇ-ahˇ uˬ duˬ tahˬ-eu jeˬ laꞈ kʼoeˇ aˬ yawꞈ maꞈ nui kʼahˇ shiˇ-eu miˇ neh, aˬ yawꞈ maꞈ-ahˇ Sahˬpaˬ Miˬyehˇ ha geuꞈ-awˇ, aˬ yawꞈ maꞈ-euˬ miˇ kʼahˬ yawˬ pyawˬ na luꞈ-ahˇ coꞈ ngehˇ ni gʼeh-eu jeˬ bi keuˆ le-euˬ meh.

¹⁶ Sahˬ paˬ Aˬsaˬ-aˬ, aˬ yawꞈ-euˬ aˬ piˬ Mawˇkah-ahˇ, sahˬ paˬ-euˬ aˬ ma geuꞈ-eu aˇ yaˬ yuˇ dzeh nehˬ-euˬ meh. Aˬ jeˬ miˇ nehˇ ehˇ naˇ, aˬ yawꞈ-euˬ aˬ piˬ gʼaˬ Aˬsheˇlaˬ miˬyehˇ ma gʼaˇ duˬ tahˬ pahˬ aˬ ma mawˇ kawˇ jahˇ-eu laꞈ kʼoeˇ, yaw jawꞈ jeˬ mˇ-euˬ meh. Tahˬ pahˬ aˬ ma mawˇ kawˇ kʼoeˇ hmˬ-ahˇ aˬ yawꞈ tuˇ dzeh-awˇ, ceuꞈ paˆ jiˇ-awˇ, Giˇdaˬloˬ deh kʼawꞈ-ahˇ miˬ dzaˬ dzah puiˆ dzeh-euˬ meh.

¹⁷ Miˇ kʼahˬ kʼoeˇ kʼahˬ laꞈ kʼoeˇ kʼaˇ jaˆ-eu lawˇ ciꞈ zaˬ deuˬ uˬ duˬ tahˬ-euˬ jawˇ duˬ dawˬ tawˆ luꞈ-ahˇ Aˬsaˬ maˬ laˆ cawˆ jiˇ-euˬ kʼawꞈ, aˬ yawꞈ-euˬ ziˇ jiˇ ngeh keuˆ ni Sahˬpaˬ Miˬyehˇ-ahˇ saˇ jaˇ ziꞈ-eu laꞈ kʼoeˇ dehꞈ-euˬ meh.

¹⁸ Aˬ yawꞈ-euˬ aˬ da Aˬbiˇyaˬ neh Miˬyehˇ-ahˇ kʼaˇ damˬ nehˬ-euˬ jeˬ dawˬ tawˆ luꞈ hawˇ-eu, aˬ yawꞈ neh damˬ nehˬ-euˬ shuiˇ hawˇ-eu pyuˇ neh jahˇ taˬ-euˬ myawˬ deuˬ-ahˇ, Uˬ duˬ tahˬ nymˇ nymˇ ma laꞈ kʼoeˇ aˬ yawꞈ bi jaˆ-euˬ meh.

¹⁹ Aˬ yawꞈ uˆ lahˇ-eu smˬ tseˇ ngaˬ kʼoꞈ tiˬ kʼoꞈ maˬ keuˆ laˇ kʼoeˇ keuˆ ni, guiˇ deuˆ-eu maˬ paˇ baw ni dehꞈ-euˬ meh.