2 Laˬsaˬbaˬ 14 - Akha

Yuˇdaˆ sahˬ paˬ Aˬsaˬ

¹ Sahˬ paˬ Aˬbiˇyaˬ shiˇ-awˇ, Daˬbiˇ-euˬ meuˬ-ahˇ jaˆ-eu sahˬ paˬ deuˬ-euˬ lmˬ bymˇ-ahˇ aˬ yawꞈ-ahˇ baꞈ pahˬ-euˬ meh. Aˬ yawꞈ-euˬ aˬ li Aˬsaˬ gʼaˬ aˬ yawꞈ-euˬ dah zaˇ sahˬ paˬ geuꞈ-awˇ, Aˬsaˬ uˆ lahˇ-eu uˬ moˆ, miˇ kʼahˬ kʼoeˇ kʼahˬ tseˇ kʼoꞈ byah ni coꞈ ngehˇ ni jaˆ-euˬ meh.

² Aˬsaˬ-aˬ, yaw tsaˬ yaw dawˇ jeˬ hawˇ-eu yaw muiˬ jeˬ mˇ-eu laꞈ kʼoeˇ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ nui ma tsaˬ ni dehꞈ-euˬ meh.

³ Aˬ cawˬ tsawˇ jeuˬ-euˬ lawˇ duˬ shehˇ duˬ hawˇ-eu lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ-ahˇ aˬ yawꞈ pyaˆ dzeh-awˇ, muiˬ-eu shawˇ-eu kʼaˬ lo kʼawˇ zeuˇ deuˬ hawˇ-eu Aˬsheˇlaˬ miˬ yehˇ ma-ahˇ taꞈ leˇ-eu mawˇ kawˇ deuˬ-ahˇ aˬ yawꞈ laˆ cawˆ-euˬ meh.

⁴ Aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ nui kʼahˇ mˇ-awˇ, aˬ yawꞈ neh mehˬ nehˬ tsoˆ nehˬ-euˬ jeˬ hawˇ-eu aˬ yawꞈ-euˬ zahˇ dawˬ kʼoꞈ dawˬ deuˬ-ahˇ naˇ haˬ geuꞈ ni, Yuˇdaˆ tsawˇ haˬ deuˬ-ahˇ aˬ yawꞈ dawˬ biꞈ-euˬ meh.

⁵ Yuˇdaˆ miˇ kʼahˬ-ahˇ jaˆ-eu meuˬ dawˬ tawˆ luꞈ laꞈ kʼoeˇ, lawˇ ciꞈ zaˬ deuˬ uˬ duˬ tahˬ-eu jawˇ duˬ hawˇ-eu yaw saw jeˬ doꞈ damˬ-eu lawˇ duˬ deuˬ-ahˇ aˬ yawꞈ laˆ cawˆ-euˬ miˇ neh, aˬ yawꞈ uˆ lahˇ-eu uˬ moˆ miˇ kʼahˬ kʼoeˇ kʼahˬ coꞈ ngehˇ ni jaˆ-euˬ meh.

⁶ Aˇ yamˬ kʼoeˇ yamˬ laꞈ kʼoeˇ, Yuˇdaˆ miˇ kʼahˬ-ahˇ jaˆ-eu meuˬ deuˬ-ahˇ ziꞈ dah ni aˬ yawꞈ tsoˆ ziꞈ-awˇ, guiˇ deuˆ-eu maˬ baw ni gʼawˬ mya kʼoꞈ dehꞈ-euˬ meh. Aˬ jeˬ miˇ neh ehˇ naˇ, Sahˬpaˬ Miˬyehˇ aˬ yawꞈ-ahˇ coꞈ ngehˇ ni gʼeh-eu jeˬ biꞈ nehˬ-euˬ meh.

⁷ Yuˇdaˆ tsawˇ haˬ deuˬ-ahˇ aˬ yawꞈ ehˇ nehˬ-eu, “Meuˬ heu deuˬ-ahˇ aˬ dui laˆ ziꞈ-eu laꞈ kʼoeˇ, meuˬ meuˬ lahˇ gawˬ-awˇ, meuˬ-ahˇ loꞈ-eu nymˇ hawˇ-eu piˬ tehˬ ziꞈ nya-eu meuˬ lahˇ laˇ gʼoˆ deuˬ jahˇ kaˇ-euˇ. Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-euˬ nui kʼahˇ aˬ dui mˇ-euˬ baˬ da neh, miˇ kʼahˬ heu kʼahˬ-ahˇ aˬ dui uˆ lahˇ ziꞈ nya-eu meh. Yawˬ pyawˬ na luꞈ aˬ dui-ahˇ aˬ yawꞈ haw piˇ luꞈ-eu meh.”

⁸ Sahˬ paˬ Aˬsaˬ-aˬ, Yuˇdaˆ miˇ kʼahˬ laꞈ kʼoeˇ, dehˬ daˬ duˬ hawˇ-eu gahˬ baꞈ-eu yehˇ smˬ seh gʼaˬ jawˇ-awˇ, Beˬyaˬmiˬ miˇ kʼahˬ laꞈ kʼoeˇ, dehˬ daˬ duˬ hawˇ-eu kaˆ baꞈ-eu yehˇ nyiˬ seh yehꞈ muiˇ gʼaˬ jawˇ-eu meh. Yehˇ kʼoeˇ deuˬ dawˬ tawˆ luꞈ nui ma kʼaˬ duˬ ni gʼeh-awˇ, yaw muiˬ paˬ-ehˇ dzaw nya taˬ-euˬ yehˇ deuˬ tehꞈ meh.

⁹ Zeˬlahˬ lehˇ myahˇ-euˬ Suˬdaˬ tsawˇ haˬ tiˬ gʼaˬ, yehˇ tiˬ lam gʼaˬ hawˇ-eu mahˬ laˆ lawˬ smˬ yaˇ laˇ lehˬ hmˬ-awˇ, Yuˇdaˆ miˇ kʼahˬ-ahˇ uˇ laˇ-awˇ, Maˬleˇshaˬ meuˬ-ahˇ keuˆ ni laˇ keuˆ-euˬ meh.

¹⁰ Aˬsaˬ gʼeh aˬ yawꞈ-ahˇ guiˇ deuˆ-eu lehˇ doˆ-iˇ-awˇ, guiˇ guiˇ maꞈ nyiˬ maꞈ luꞈ Maˬleˇshaˬ meuˬ dawˬ peh jaˆ-eu Zeˬpaˬdaˬ deh kʼawꞈ-ahˇ, guiˇ daˬ daˬ-awˇ jawˇ duˬ yuˇ taˬ-euˬ meh.

¹¹ Kʼoeˇ ngeh, Aˬsaˬ-aˬ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ heu loꞈ-ehˇ guiˬ lahˬ shaˇ-euˬ meh. “Sahˬpaˬ Miˬyehˇ-oˇ, gʼaˬ baˬ-eu guiˇ maꞈ tiˬ maꞈ-ahˇ gʼaˬ kʼaˆ dui dui-eu guiˇ maꞈ tiˬ maꞈ loꞈ-ehˇ nawˇ caw ba nya-eu meh. Nga maꞈ-eu Miˬyehˇ pyeuꞈ-eu Sahˬpaˬ Miˬyehˇ-oˇ, nga maꞈ-ahˇ nymˬ-mˇ caw ba le-awˬ. Aˬ jeˬ miˇ neh ehˇ naˇ, nga maꞈ nawˬ-ahˇ gʼoe-awˇ, nawˬ-euˬ tsawˇ myahˇ uˬ moˆ myaˬ dui dui-eu guiˇ maꞈ heu maꞈ-ahˇ deuˆ -eu lehˇ oe-euˬ ma. Sahˬpaˬ Miˬyehˇ-oˇ, nawˇ-aˬ nga maꞈ-euˬ Miˬyehˇ ma. Nawˬ-ahˇ deuˆ gʼaˬ ma lehˇ tsawˇ haˬ tiˬ gʼaˬ-iˬ maˬ noeˬ doˆ peuˬ-a.”

¹² Aˬsaˬ hawˇ-eu Yuˇdaˆ guiˇ maꞈ guiˇ deuˆ-iˇ ngeh, Suˬdaˬ guiˇ maꞈ-ahˇ Sahˬpaˬ Miˬyehˇ deuˆ gʼaˬ-awˇ, Suˬdaˬ tsawˇ haˬ deuˬ cehˆ byaˆ-euˬ meh.

¹³ Kʼoeˇ naˇ, Aˬsaˬ hawˇ-eu aˬ yawꞈ-euˬ guiˇ maꞈ deuˬ Geˬlawˬ meuˬ-ahˇ keuˆ ni Suˬdaˬ tsawˇ haˬ kʼoeˇ deuˬ-euˬ mehˬ nah teh-euˬ meh. Suˬdaˬ tsawˇ haˬ deuˬ gʼawˬ mya ni bi deuˆ sehꞈ-euˬ miˇ neh, guiˇ maˬ deuˆ nya-ehˇ pyeuꞈ-iˇ-euˬ meh. Sahˬpaˬ Miˬyehˇ hawˇ-eu aˬ yawꞈ-euˬ guiˇ maꞈ neh aˬ yawꞈ maꞈ-ahˇ deuˆ gʼaˬ-euˬ meh. Yuˇdaˆ tsawˇ haˬ deuˬ mˇ myawˬ gʼawˬ mya ni deuˆ za-euˬ meh.

¹⁴ Geˬlawˬ meuˬ jawˬ jawˬ-ehˇ jaˆ-eu meuˬ deuˬ-ahˇ kʼawꞈ, aˬ yawꞈ maꞈ laˆ cawˆ nehˬ jiˇ nya-euˬ meh. Aˬ jeˬ miˇ neh ehˇ naˇ, kʼoeˇ gaˇ jawˇ-eu tsawˇ haˬ deuˬ Sahˬpaˬ Miˬyehˇ-ahˇ guˆ dui dui-iˇ-euˬ meh. Yuˇdaˆ yehˇ deuˬ meuˬ kʼoeˇ deuˬ-ahˇ goˬ doe-awˇ, mˇ myawˬ gʼawˬ mya ni za-euˬ meh.

¹⁵ Yawˇ bo-eu tsawˇ haˬ tiˬ paˆ na deuˬ-euˬ sehˬ gʼawˆ deuˬ-ahˇ kʼawꞈ aˬ yawꞈ maꞈ deuˆ-awˇ, yawˇ hawˇ-eu law taw gʼawˬ mya ni deuˆ za-euˬ meh. Kʼoeˇ naˇ, aˬ yawꞈ maꞈ Yeˬluˇsaˬlehˬ meuˬ-ahˇ gʼoꞈ leˇ-euˬ meh.