2 Laˬsaˬbaˬ 13 - Akha

Aˬbiˇyaˬ hawˇ-eu Yeˬyawˇbamˬ guiˇ deuˆ-euˬ

¹ Sahˬ paˬ Yeˬhawˇbamˬ Iˇsaˬleˬlaˆ miˇ kʼahˬ-ahˇ uˆ lahˇ-eu tseˇ yehꞈ kʼoꞈ tiˬ kʼoꞈ-ahˇ, Aˬbiˇyaˬ gʼaˬ Yuˇdaˆ miˇ kʼahˬ-euˬ sahˬ paˬ pyeuꞈ laˇ-euˬ meh.

² Aˬ yawꞈ Yeˬluˇsaˬlehˬ meuˬ-ahˇ jawˇ-awˇ, smˇ kʼoꞈ byah ni uˆ lahˇ-euˬ meh. Aˬ yawꞈ-euˬ aˬ ma-aˬ, Giˇbyaˬ meuˬ-ahˇ jawˇ-eu Uˇleˬlaˇ-euˬ aˬ buˇ Miˇkaˬyaˇ meh. Aˬbiˇyaˬ hawˇ-eu Yeˬyawˇbamˬ aˬ nyaꞈ guiˇ deuˆ ceh ceh-euˬ meh.

³ Aˬbiˇyaˬ gʼaˬ yehˇ oeˬ seh gʼaˬ jawˇ-awˇ, Yeˬyawˇbamˬ gʼaˬ yehˇ yehꞈ seh gʼaˬ sheuˬ-awˇ aˬ yawꞈ-ahˇ deuˆ-euˬ meh.

⁴ Guiˇ maꞈ kʼoeˇ nyiˬ maꞈ Eˇpaˬleˬ miˇ kʼahˬ gawˬ jawˬ gawˬ duˇ-ahˇ tahˬ puˬ-euˬ meh. Sahˬ paˬ Aˬbiˇyaˬ gʼaˬ Zeˬmaˬleˬ gawˬ jawˬ-ahˇ daˆ leˇ-awˇ, Yeˬyawˇbamˬ hawˇ-eu Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ guˇ-awˇ ehˇ nehˬ-euˬ meh. “Ngaˇ ehˇ gaˇ naˇ haˬ sheˇ.

⁵ Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, Daˬbiˇ nehˬ-ehˇ maˬ poˆ maˬ paˇ laˇ nya-eu saˇ jaˇ dzaˬ taꞈ-eu laꞈ kʼoeˇ, Daˬbiˇ hawˇ-eu aˬ yawꞈ-euˬ zaˬ deuˬ uˆ deuˬ Iˇsaˬleˬlaˆ miˇ kʼahˬ kʼoeˇ taˆ aˬ myah luꞈ ya uˆ lahˇ meh lehˇ ehˇ tsehˆ taˬ-euˬ naw maꞈ maˬ siˬ nya te loˇ.

⁶ Neˬbaˇ-euˬ aˬ li Yeˬyawˇbamˬ-aˬ, aˬ yawꞈ-euˬ sahˬ paˬ Sawˇlaˬmoˬ-ahˇ puiˬ-euˬ meh.

⁷ Aˇ nah, gaˇ dahˇ maˬ tsoeˬ-eu haiˬ-eu tsawˇ haˬ deuˬ-ahˇ aˬ yawꞈ kuˇ uiˬ-awˇ, Sawˇlaˬmoˬ-euˬ aˬ li Leˬhawˇbamˬ-ahˇ yehˬ baw-ehˇ gʼeh-euˬ meh. Kʼoeˇ ngeh, Leˬhawˇbamˬ gʼaˬ aˇ kʼoꞈ nahˬ-awˇ maˬ mˇ maˬ shaˇ nya-euˬ miˇ neh, aˬ yawꞈ maꞈ-ahˇ maˬ ciˬ daˬ nya-aˬ.

⁸ Nymˬ-mˇ poˆ jawˇ-aˬ, Daˬbiˇ-euˬ zaˬ deuˬ uˆ deuˬ-euˬ laꞈ-ahˇ jaˆ-eu Sahˬpaˬ Miˬyehˇ-euˬ miˇ kʼahˬ-ahˇ naw maꞈ guiˇ deuˆ-eu gʼeh te loˇ. Naw maꞈ guiˇ guiˇ maꞈ myaˬ dui dui-awˇ, naw maꞈ-euˬ miˬyehˇ bi geuꞈ-eu lehˇ Yeˬyawˇbamˬ neh jahˇ-euˬ shuiˇ mawˇ neˇ mawˇ kawˇ kʼawꞈ naw maꞈ nehˬ-ehˇ jaˆ luꞈ meh.

⁹ Aˬloˬ-euˬ zaˬ deuˬ uˆ deuˬ pyeuꞈ-eu Sahˬpaˬ Miˬyehˇ-euˬ piˇ ma deuˬ hawˇ-eu Leˬbiˇ tsawˇ haˬ deuˬ-ahˇ naw maꞈ teh dzeh-euˬ meh. Aˬ cawˬ tsawˇ jeuˬ mˇ gaˇ haw-awˇ, aˬ yawꞈ maꞈ-euˬ dah zaˇ, piˇ ma deuˬ naw maꞈ tseˇ doˆ-awˇ bi jawˇ-euˬ meh. Tsawˇ haˬ aˬ geu gʼaˬ ma kaˬ, mawˇ neˇ mawˇ gaw tiˬ mawˇ hawˇ-eu yawˇ shiꞈ mawˇ tsahˇ laꞈ nya naˇ, naw maꞈ-euˬ miˬyehˇ lehˇ kuˇ-eu miˬyehˇ yawꞈ ngehꞈ kʼoeˇ deuˬ-euˬ piˇ ma geuꞈ-eu gʼaˇ duˬ yawˬ haˇ yawˬ ha gʼawˇ mawˇ a nehˬ nya meh.

¹⁰ “Ehˇ kʼawꞈ, nga maꞈ-aˬ, aˬ dui maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ iˬ nah keuˆ ni gʼoe luꞈ-awˇ, aˬ yawꞈ-ahˇ maˬ byehˇ dzeh ni dehꞈ luꞈ ma. Aˬloˬ-euˬ zaˬ deuˬ uˆ deuˬ pyeuꞈ-eu piˇ ma deuˬ Sahˬpaˬ Miˬyehˇ-euˬ gaˇ mˇ luꞈ-awˇ, Leˬbiˇ tsawˇ haˬ deuˬ aˬ yawꞈ maꞈ-ahˇ caw mˇ luꞈ meh.

¹¹ Yaw saw jeˬ doꞈ damˬ-eu hawˇ-eu, jeˬ zaˬ yuˇ-awˇ mawˇ lah-ehˇ miˬ dzaˬ-ahˇ dzah puiˆ-awˇ law-eu jeˬ, yawˬ shawˬ yawˬ miˇ na luꞈ aˬ yawꞈ maꞈ mˇ luꞈ meh. Zahˇ sahˇ kʼoꞈ-ahˇ taꞈ leˇ-awˇ shawˇ jehˆ ni gʼeh-eu hawˬ jeh kʼoeˇ taˆ, kaˬ muˇ lawˇ-eu jeˬ aˬ yawꞈ maꞈ lawˇ-awˇ, yawˬ miˇ na luꞈ, shuiˇ neh jahˇ taˬ-euˬ tsiˇ kʼmˬ doꞈ taˬ duˬ kʼoeˇ taˆ, aˬ yawꞈ maꞈ tsiˇ kʼmˬ doꞈ daˆ taˬ-euˬ meh. Sahˬpaˬ Miˬyehˇ neh dawˬ kʼaˇ biꞈ taˬ-euˬ loꞈ-ehˇ nga maꞈ mˇ luꞈ ma. Ehˇ kʼawꞈ, naw maꞈ aˬ yawꞈ-ahˇ byehˇ dzeh-euˬ meh.

¹² Miˬyehˇ aˬ yawꞈ-euˬ gʼawˇ mawˇ nga maꞈ kʼoeˇ taˆ aˬ yuiꞈ geuꞈ luꞈ-awˇ, aˬ yawꞈ-euˬ piˇ ma deuˬ kʼawꞈ daˇ heh yuˇ-awˇ heu gaˇ jawˇ luꞈ-eu laꞈ kʼoeˇ, nga maꞈ naw maꞈ-ahˇ guiˇ deuˆ-eu gʼaˇ duˬ daˇ heh baw gaˬ-eu lehˇ lehˬ hmˬ taˬ-euˬ meh. Iˇsaˬleˬlaˆ tsawˇ haˬ deuˬ-oˇ, naw maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guiˇ deuˆ-eu lehˇ taˬ leh jeh. Naw maꞈ maˬ deuˆ gʼaˬ nya-a.”

¹³ Kʼoeˇ ngeh, Yeˬyawˇbamˬ-aˬ, aˬ yawꞈ-euˬ yehˇ tiˬ paˆ na deuˬ-ahˇ ciˬ cuˇ ni bi iˇ-awˇ, Yuˇdaˆ guiˇ maꞈ-ahˇ naˇ kʼah paw neh bi deuˆ kʼoeˬ-awˇ, tiˬ paˆ deuˬ-aˬ mehˬ shi paw ciˬ daˬ-awˇ deuˆ-eu lehˇ lehˬ hmˬ-euˬ meh.

¹⁴ Yuˇdaˆ guiˇ maꞈ deuˬ jawˬ jawˬ-ehˇ haw-awˇ, aˬ cawˬ aˬ yawꞈ maꞈ-ahˇ loꞈ jawˬ taˬ-euˬ gaˇ ya mawˇ ngeh, Sahˬpaˬ Miˬyehˇ-ahˇ “Caw ba le-awˬ” lehˇ guˇ-awˇ, piˇ ma deuˬ daˇ heh baw-euˬ meh.

¹⁵ Yuˇdaˆ guiˇ maꞈ deuˬ yaw kʼaˆ-ehˇ guˇ-awˇ, Aˬbiˇyaˬ sheuˬ gʼeh-eu laꞈ oˆ jawˇ-eu laꞈ kʼoeˇ, le-awˇ deuˆ-euˬ meh. Yeˬyawˇbamˬ hawˇ-eu Iˇsaˬleˬlaˆ guiˇ maꞈ deuˬ-ahˇ Miˬyehˇ deuˆ gʼaˬ-euˬ meh.

¹⁶ Iˇsaˬleˬlaˆ tsawˇ haˬ deuˬ cehˆ byaˆ-awˇ, Miˬyehˇ neh Yuˇdaˆ tsawˇ haˬ deuˬ-ahˇ Iˇsaˬleˬlaˆ tsawˇ haˬ deuˬ kʼoeˇ taˆ bi gʼaˬ leˇ-euˬ meh.

¹⁷ Aˬbiˇyaˬ hawˇ-eu aˬ yawꞈ-euˬ guiˇ maꞈ deuˬ neh, Iˇsaˬleˬlaˆ tsawˇ haˬ deuˬ-ahˇ yaw kʼaˆ-ehˇ deuˆ deuˬ nehˬ-awˇ, nya dui dui-eu Iˇsaˬleˬlaˆ yehˇ ngaˬ seh gʼaˬ byah ni sehꞈ nehˬ-euˬ meh.

¹⁸ Kʼoeˇ loꞈ-ehˇ, Yuˇdaˆ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ deuˆ gʼaˬ-euˬ meh. Aˬ jeˬ miˇ neh ehˇ naˇ, Yuˇdaˆ tsawˇ haˬ deuˬ-aˬ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gʼoe-euˬ meh.

¹⁹ Aˬbiˇyaˬ-aˬ, Yeˬhawˇbamˬ-euˬ mehˬ nah teh-awˇ, Yeˬyawˇbamˬ-euˬ meuˬ deuˬ pyeuꞈ-eu Beˬdeˬlaˇ meuˬ, Yeˬshaˬnahˬ meuˬ, Eˇpyoˬ meuˬ heu deuˬ hawˇ-eu, meuˬ heu deuˬ-euˬ daw peh jaˆ-eu pu deuˬ-ahˇ deuˆ za-euˬ meh.

²⁰ Aˬbiˇyaˬ uˆ lahˇ-eu aˇ nah aˇ yamˬ laꞈ kʼoeˇ, Yeˬyawˇbamˬ gʼaˬ baoˬ maˬ jaˆ-ehˇ pyeuꞈ-iˇ-euˬ meh. Aˇ saˬ saˬ ngeh, Sahˬpaˬ Miˬyehˇ neh aˬ yawꞈ-ahˇ bi shiˇ-awˇ, aˬ yawꞈ ziˇ jiˇ-euˬ meh.

²¹ Ehˇ kʼawꞈ, Aˬbiˇyaˬ gʼaˬ baoˬ ahˇ dzehˬ laˇ-euˬ meh. Aˬ yawꞈ-euˬ miˬ zaˬ tseˇ oeˬ gʼaˬ jawˇ-awˇ, aˬ li nyiˬ tseˇ nyiꞈ li hawˇ-eu aˬ buˇ tseˇ koꞈ buˇ jawˇ-euˬ meh.

²² Aˬbiˇyaˬ aˬ joˆ-ehˇ ngehˬ-awˇ tmˇ-awˇ, aˬ jeˬ mˇ yaꞈ shaˇ yaꞈ-euˬ gaˇ kawˆ kʼaˇ dzeˇ-eu deuˬ-ahˇ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Iˇdoˬ-euˬ Laˬsaˬbaˬ sahˬ boꞈ laꞈ kʼoeˇ boꞈ taˬ-euˬ meh.