2 Laˬsaˬbaˬ 10 - Akha

Laꞈ taˆ paw pyawˬ-ahˇ jawˇ-eu Iˇsaˬleˬlaˆ tsawˇ jeuˬ deuˬ Leˬhawˇbamˬ-ahˇ puiˬ-eu

¹ Leˬhawˇbamˬ-aˬ, aˬ yawꞈ-ahˇ sahˬ paˬ ka nehˬ-eu gʼaˇ duˬ, Iˇsaˬleˬlaˆ miˇ kʼahˬ laꞈ taˆ paw pyawˬ-ahˇ jawˇ-eu tsawˇ haˬ dawˬ tawˆ luꞈ uiˬ leˇ taˬ-euˬ Sheˬkmˬ meuˬ-ahˇ le-euˬ meh.

² Sahˬ paˬ Sawˇlaˬmoˬ-euˬ laꞈ-ahˇ neh ya buˬ-iˇ ni Iˇjiˇtuˆ miˇ kʼahˬ-ahˇ cehˆ jawˇ-iˇ-euˬ Neˬbaˇ-euˬ aˬ li Yeˬyawˇbamˬ gʼaˬ gaˇ kawˆ kʼoeˇ ya gaˬ ngeh, Iˇjiˇtuˆ miˇ kʼahˬ-ahˇ neh gʼoꞈ daˆ laˇ-euˬ meh.

³ Laꞈ taˆ paw pyawˬ-ahˇ jawˇ-eu Iˇsaˬleˬlaˆ tsawˇ jeuˬ deuˬ Yeˬyawˇbamˬ-ahˇ bi kuˇ kʼoꞈ laˬ-iˇ-awˇ, aˬ yawꞈ maꞈ dawˬ tawˆ luꞈ Leˬhawˇbamˬ jawˇ gaˇ iˇ-awˇ heu loꞈ-ehˇ ehˇ nehˬ-iˇ-euˬ meh.

⁴ “Nawˬ da-aˬ, nga maꞈ-ahˇ yaw kʼaˆ-ehˇ kʼehˇ dzaˬ-awˇ, maˬ gʼaˬ leˇ gaˇ keuˆ ni ciˬ baꞈ ciˬ pi nehˬ laꞈ-euˬ meh. Nga maꞈ-ahˇ nawˬ da neh ciˬ baꞈ ciˬ pi nehˬ laꞈ-euˬ jeˬ-ahˇ nawˇ yuˇ pyaˇ nehˬ laꞈ-awˇ, ui cuiˆ yaw saˇ saˇ-ehˇ bi dehꞈ laꞈ naˇ, nawˇ uˆ lahˇ-eu uˬ moˆ nga maꞈ saˇ jaˇ ziꞈ-awˇ dehꞈ ma.”

⁵ Leˬhawˇbamˬ ehˇ-eu, “Ngaˇ smˬ nah keuˆ ni shaˇ noeˬ haw la siˬ. Smˬ nah byah laˇ naˇ tiˬ poˆ paˇ laˇ lawˬ.”

⁶ Kʼoeˇ naˇ, aˬ yawꞈ-euˬ aˬ da Sawˇlaˬmoˬ-ahˇ nui noeˬ nui duˇ biꞈ-euˬ tsawˇ haˬ deuˬ pyeuꞈ-eu tsawˇ mawˬ tsawˇ kʼaˆ deuˬ nehˬ-ehˇ Leˬhawˇbamˬ ja uˇ haw-euˬ meh. “Tsawˇ haˬ heu deuˬ-ahˇ ngaˇ aˬ joˆ-ehˇ ehˇ kʼoꞈ nehˬ-eu tsaˬ nga lehˇ naw maꞈ ehˇ haw sheˇ” lehˇ, aˬ yawꞈ maꞈ-ahˇ aˬ yawꞈ naˇ haˬ-euˬ meh.

⁷ Aˬ yawꞈ maꞈ ehˇ-eu, “Tsawˇ haˬ heu deuˬ-ahˇ nawˇ gʼawˬ shaˬ gaˬ-eu laꞈ kʼoeˇ, aˬ yawꞈ maꞈ nui kʼahˇ shiˇ ni yaw muiˬ-ehˇ shaˇ noeˬ-awˇ ehˇ kʼoꞈ nehˬ naˇ, aˬ yawꞈ maꞈ aˬ

⁸ Ehˇ kʼawꞈ, tsawˇ mawˬ tsawˇ kʼaˆ kʼoeˇ deuˬ-euˬ dawˬ-ahˇ aˬ yawꞈ maˬ naˇ haˬ ni, aˬ yawꞈ-ahˇ nui noeˬ nui duˇ biꞈ luꞈ-eu deuˬ pyeuꞈ-eu aˬ yawꞈ nehˬ-ehˇ tiˬ kawˆ loꞈ-ehˇ huiˬ laˇ-euˬ zaˬ guˬ deuˬ jawˇ gaˇ aˬ yawꞈ iˇ-euˬ meh.

⁹ Zaˬ guˬ kʼoeˇ deuˬ-ahˇ aˬ yawꞈ ehˇ nehˬ-eu, “Naw maꞈ ngaˬ-ahˇ aˬ joˆ-ehˇ gʼeh-eu nui noeˬ nui duˇ biꞈ nmˇ. Aˬ yawꞈ maꞈ-euˬ kʼaˆ behˆ ui cuiˆ yuˇ pyaˇ nehˬ laꞈ lehˇ ehˇ-eu tsawˇ haˬ kʼoeˇ deuˬ-ahˇ ngaˇ aˬ joˆ-ehˇ ya ehˇ kʼoꞈ nehˬ nmˇ.”

¹⁰ Aˬ yawꞈ maꞈ ehˇ-eu, “Tsawˇ haˬ kʼoeˇ deuˬ-ahˇ heu loꞈ-ehˇ ehˇ kʼoꞈ nehˬ-awˬ. ‘Ngaˬ-euˬ caˇ caˬ-aˬ ngaˬ da-euˬ joꞈ naˆ maˬ tseˇ tuˇ dzehˬ ma’ lehˇ ehˇ nehˬ-awˬ.

¹¹ ‘Ngaˬ da-aˬ, kah dui dui-eu kʼaˆ behˆ naw maꞈ-ahˇ ciˬ pi-euˬ meh. Ngaˇ-aˬ, kʼoeˇ naˆ maˬ tseˇ kah-eu kʼaˆ behˆ naw maꞈ-ahˇ paˇ ciˬ pi nehˬ ma. Ngaˬ da naw maꞈ-ahˇ aˇ caˆ neh juiꞈ-euˬ meh. Ehˇ kʼawꞈ, ngaˇ naw maꞈ-ahˇ boeˬ kaˬ laˬ ma nyehꞈ kawꞈ ma’ lehˇ ehˇ nehˬ-awˬ.”

¹² Smˬ nah byah laˇ ngeh, sahˬ paˬ Leˬhawˇbamˬ neh ehˇ nehˬ taˬ-euˬ loꞈ-ehˇ, Yeˬyawˇbamˬ hawˇ-eu tsawˇ haˬ kʼoeˇ deuˬ dawˬ tawˆ luꞈ aˬ yawꞈ jawˇ gaˇ oe-euˬ meh.

¹³ Tsawˇ mawˬ tsawˇ kʼaˆ deuˬ neh biꞈ-euˬ nui noeˬ nui duˇ-ahˇ sahˬ paˬ maˬ naˇ haˬ ni, tsawˇ haˬ kʼoeˇ deuˬ-ahˇ dawˬ kʼaˆ ngehˬ nehˬ-euˬ meh.

¹⁴ Zaˬ guˬ deuˬ neh biꞈ-euˬ nui noeˬ nui duˇ-ahˇ aˬ yawꞈ naˇ haˬ-awˇ, “Ngaˬ da-aˬ, naw maꞈ-ahˇ kʼaˆ behˆ yaw kah bi pi-euˬ meh. Kʼoeˇ naˆ maˬ tseˇ kah-eu kʼaˆ behˆ ngaˇ naw maꞈ-ahˇ paˇ ciˬ pi ma. Aˬ yawꞈ naw maꞈ-ahˇ aˇ caˆ neh juiꞈ-euˬ meh. Ngaˇ naw maꞈ-ahˇ boeˬ kaˬ laˬ ma neh nyehꞈ kawꞈ ma” lehˇ ehˇ nehˬ-euˬ meh.

¹⁵ Sahˬ paˬ Leˬhawˇbamˬ-aˬ, tsawˇ haˬ kʼoeˇ deuˬ gʼaˇ duˬ yaw muiˬ paˬ-ehˇ maˬ shaˇ noeˬ nehˬ-a. Aˬ jeˬ miˇ neh ehˇ naˇ, Shiˇloˬ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Aˬhiˇyaˬ-ahˇ gʼoe-awˇ, Miˬyehˇ pyeuꞈ-eu Sahˬpaˬ Miˬyehˇ neh Neˬbaˇ-euˬ aˬ li Yeˬyawˇbamˬ-ahˇ ehˇ nehˬ-euˬ dawˬ byah laˇ ni, Sahˬpaˬ Miˬyehˇ nui ma tsaˬ-eu miˇ neh meh.

¹⁶ Aˬ yawꞈ maꞈ neh shaˇ-euˬ dawˬ-ahˇ sahˬ paˬ Leˬhawˇbamˬ maˬ naˇ haˬ nehˬ gaˇ tsawˇ haˬ kʼoeˇ deuˬ ya mawˇ ngeh, heu loꞈ-ehˇ guˇ-eu meh. “Daˬbiˇ neh aˬ dui-ahˇ biꞈ taˬ-euˬ aˬ jeˬ jaˆ ta. Yeˬshehˇ-euˬ aˬ li-ahˇ aˬ dui maꞈ aˬ jeˬ taꞈ ta. Iˇsaˬleˬlaˆ tsawˇ haˬ deuˬ-oˇ, yawˬ ha-euˬ iˇ kahˇ-ahˇ gʼoꞈ leˇ jiˇ-awˬ. Daˬbiˇ-oˇ, nawˬ-euˬ nymˇ jiˇ-ahˇ nawˇ haw piˇ-awˬ de.” Kʼoeˇ ngeh jawˇ, Iˇsaˬleˬlaˆ tsawˇ haˬ kʼoeˇ deuˬ, yawˬ ha-euˬ nymˇ jiˇ kʼaˇ jaˆ gaˇ gʼoꞈ leˇ jiˇ-euˬ meh.

¹⁷ Leˬhawˇbamˬ-aˬ, Yuˇdaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ-ahˇ tehꞈ-ehˇ sahˬ paˬ geuꞈ-awˇ uˆ lahˇ-euˬ meh.

¹⁸ Sahˬ paˬ Leˬhawˇbamˬ-aˬ, myawˬ kʼaˆ mˇ-eu deuˬ-ahˇ haw-eu pyaˆ-eu gʼaˬ pyeuꞈ-eu Aˬdawˇniˇlamˬ-ahˇ, Iˇsaˬleˬlaˆ tsawˇ haˬ kʼoeˇ deuˬ jawˇ gaˇ bi le-euˬ meh. Ehˇ kʼawꞈ, aˬ yawꞈ maꞈ neh aˬ yawꞈ-ahˇ kʼaˬ lo biˬ sehꞈ-euˬ meh. Kʼoeˇ loꞈ-ehˇ pyeuꞈ laˇ ngeh, sahˬ paˬ Leˬhawˇbamˬ gʼaˬ aˬ yawꞈ-euˬ mahˬ laˆ lawˬ-ahˇ yaw kawˇ-ehˇ dziˬ leˇ-awˇ, Yeˬluˇsaˬlehˬ meuˬ-ahˇ cehˆ gʼoꞈ-euˬ meh.

¹⁹ Aˇ yamˬ kʼoeˇ yamˬ-ahˇ neh naˇ, laꞈ taˆ paw jaˆ-eu Iˇsaˬleˬlaˆ miˇ kʼahˬ-ahˇ jawˇ-eu tsawˇ haˬ deuˬ, iˬ nah keuˆ ni Daˬbiˇ-euˬ nymˇ jiˇ-ahˇ puiˬ-euˬ meh.