2 Gawˇliˬtu 8 - Akha

Ka li zaˬ pyuˇ damˬ-eu

¹ Aˬ yuiꞈ aˬ nyiˇ Ka li zaˬ deuˬ-oˇ, Maˬgeˬdawˇniˆ miˇ kʼahˬ-ahˇ jawˇ-eu Ka li zaˬ aˇ muˇ deuˬ kʼoeˇ taˆ Miˬyehˇ guiˬ lahˬ keuˆ le-euˬ gaˇ kawˆ naw maꞈ-ahˇ bi siꞈ mawꞈ miˇ-a.

² Shaˬ-eu zahˬ-eu gʼawˬ mya jeˬ lawˬ haw gaˇ aˬ yawꞈ maꞈ ya daˬ-euˬ kʼawꞈ, maˬ ehˇ jiˇ coeˇ ni laꞈ kʼaˬ cehˇ-eu meh. Kʼoeˇ miˇ neh aˬ yawꞈ maꞈ yaw shaˬ shaˬ dui dui kʼawꞈ, damˬ nehˬ-eu paw tiˬ pawꞈ-iˬ gʼaˬ byehˆ maˬ byehˆ-a.

³ Aˬ yawꞈ maꞈ kʼaˇ gʼeh nya gaˇ keuˆ ni damˬ nehˬ-eu uˬ taꞈ, maˬ gʼeh nya gaˇ keuˆ ni kʼawꞈ damˬ-eu meh lehˇ naw maꞈ-ahˇ ngaˇ ehˇ tsehˆ peuˬ ma. Aˬ yawꞈ maꞈ yawˬ haˇ yawˬ ha noeˬ siˬ noeˬ mawˇ-eu laꞈ kʼoeˇ,

⁴ Yuˇdaˆ miˇ kʼahˬ-ahˇ jawˇ-eu Miˬyehˇ-euˬ tsawˇ haˬ-ahˇ caw ba nehˬ-eu gʼaˇ duˬ bi damˬ nehˬ laꞈ lehˇ nga maꞈ-ahˇ shaˇ-eu meh.

⁵ Kʼoeˇ-aˬ, nga maꞈ neh noeˬ tmˬ taˬ-euˬ taꞈ-ehˇ dzehˬ leˇ taˬ-euˬ jeˬ pyeuꞈ-eu meh. Yaw beh tiˬ tiˆ, aˬ yawꞈ maꞈ-euˬ gʼawˇ mawˇ Sahˬpaˬ Yeˬsuˇ-ahˇ a nehˬ-euˬ meh. Nyiˬ tiˆ tiˬ tiˆ, Miˬyehˇ nui ma tsaˬ-eu loꞈ-ehˇ aˬ yawꞈ maꞈ-euˬ gʼawˇ mawˇ nga maꞈ-ahˇ a nehˬ laꞈ-euˬ meh.

⁶ Kʼoeˇ miˇ neh, Tiˇtuˆ aˬ yawꞈ naw maꞈ jawˇ gaˇ gʼoeˇ-eu gaˬ-eu jeˬ-ahˇ taꞈ-eu gaˇ heu hmˬ mˇ-eu gʼaˇ duˬ dahˬ beh nehˬ le-euˬ gʼaˬ pyeuꞈ-eu loꞈ-ehˇ, aˇ saˬ saˬ ngeh keuˆ ni mˇ daˆ leꞈ-eu gʼaˇ duˬ aˬ yawꞈ-ahˇ nga maꞈ gʼaˬ biꞈ-euˬ ma.

⁷ Naw maꞈ-aˬ, yawˬ paw na luꞈ maˬ gaˇ dui dui-eu meh. Jah-eu paw maˬ ehˇ, ngehˬ-eu tmˇ-eu paw maˬ ehˇ, zaˬ siˬ tsawˇ gahˇ paw naˬ ehˇ, caw ba nehˬ mawꞈ-eu nui ma ahˇ-eu paw maˬ ehˇ, nga maꞈ-ahˇ gʼoeˇ-eu gaˬ-eu paw maˬ ehˇ, maˬ gaˇ dzehˬ-eu meh. Kʼoeˇ miˇ neh, gʼoeˇ-eu gaˬ-eu jeˬ-ahˇ taꞈ-eu gaˇ heu hmˬ laꞈ kʼoeˇ kʼawꞈ, nui ma keuˆ-awˇ bi damˬ mawꞈ-eu ma.

⁸ Maˬ mˇ-ehˇ maˬ gʼeh nya-a lehˇ naw maꞈ-ahˇ ciˬ pi nehˬ-eu maˬ ngeuˇ. Aˬ cawˬ caw ba mawꞈ-eu nui ma aˇ naˆ ni ahˇ-eu gaˇ kawˆ naw maꞈ-ahˇ bi siˬ bi mawˇ-eu laꞈ kʼoeˇ, naw maꞈ-euˬ gʼoeˇ-eu gaˬ-eu jeˬ aˇ naˆ ni duˬ-eu ciˇ-eu gaˇ kawˆ ngaˇ siˬ duˬ mawꞈ-eu ma.

⁹ Aˬ dui-euˬ Sahˬpaˬ Yeˬsuˇ Ka li neh mˇ nehˬ laꞈ-euˬ guiˬ lahˬ-ahˇ naw maꞈ siˬ nya luꞈ meh. Aˬ yawꞈ smˇ muiˬ muiˬ dui dui-eu kʼawꞈ, naw maꞈ gʼaˇ duˬ iˇ shaˬ zaˬ pyeuꞈ le-euˬ meh. Aˬ yawꞈ iˇ shaˬ shaˬ-euˬ baˬ da neh naw maꞈ smˇ muiˬ bi muiˬ laˇ-eu gʼaˇ duˬ, kʼoeˇ loꞈ-ehˇ mˇ le-euˬ meh.

¹⁰ Gaˇ kawˆ heu hmˬ-ahˇ taꞈ leˇ-awˇ, ngaˇ naw maꞈ-ahˇ heu loꞈ-ehˇ gʼaˬ biꞈ-eu ma. Miˇ nui kʼoꞈ naw maꞈ neh beh-euˬ gaˇ heu hmˬ nymˬ-mˇ mˇ luiˆ jiˇ-eu tsaˬ meh. Naw maꞈ-aˬ, mˇ beh beh-euˬ deuˬ pyeuꞈ-eu tehꞈ-ehˇ maˬ ngeuˇ ni, mui ma keuˆ beh beh-euˬ deuˬ kʼawꞈ pyeuꞈ-eu meh.

¹¹ Gaˇ heu hmˬ-ahˇ tiˬ poˆ paˇ dawꞈ leˇ-awˇ mˇ luiˆ-awˬ. Aˇ dahˬ beh ngeh nui ma keuˆ-euˬ loꞈ-ehˇ mˇ luiˆ-eu gʼaˇ duˬ kʼawꞈ nui ma keuˆ-eu laꞈ kʼoeˇ, naw maꞈ kʼaˇ gʼeh nya-eu loꞈ-ehˇ damˬ-awˬ.

¹² Damˬ mawꞈ-eu nui ma ahˇ naˇ, naw maꞈ kʼaˇ gʼeh nya-eu loꞈ-ehˇ damˬ-euˬ gaˇ Miˬyehˇ ha geuꞈ nehˬ laꞈ tehꞈ-a. Maˬ gʼeh nya gaˇ keuˆ ni damˬ-awˬ lehˇ maˬ ehˇ-a.

¹³ Aˬ cawˬ-euˬ kʼaˆ behˆ bi pyaˇ dzehˬ-awˇ naw maꞈ-euˬ kʼaˆ behˆ bi kah dzehˬ-eu lehˇ ngaˇ jahˇ-eu maˬ ngeuˇ.

¹⁴ Ehˇ kʼawꞈ, nymˬ-mˇ naw maꞈ maˬ gaˇ dzehˬ-eu miˇ neh, shaˬ-eu deuˬ-ahˇ caw ba nehˬ-eu tsaˬ meh. Aˬ kaˇ aˬ cawˬ maˬ gaˇ dzehˬ laˇ-awˇ naw maꞈ shaˬ le ngeh, aˬ cawˬ naw maꞈ-ahˇ paˇ caw ba nehˬ laꞈ tehꞈ-a. Kʼoeˇ loꞈ-ehˇ mˇ-eu laꞈ kʼoeˇ tiˬ paw tiˇ paw di laˇ tehꞈ-a.

¹⁵ Jaˇliꞈ laꞈ kʼoeˇ ehˇ taˬ-euˬ loꞈ-ehˇ, “Gʼawˬ mya ni gʼoˆ uiˬ-euˬ gʼaˬ maˬ jaˆ myaˬ dzehˬ-ehˇ, ui cuiˆ tehꞈ-ehˇ gʼoˆ uiˬ-euˬ gʼaˬ maˬ jaˆ cuiˆ dzehˬ-aˇ.”

Tiˇtuˆ hawˇ-eu aˬ yawꞈ-euˬ gaˇ mˇ cawˬ deuˬ

¹⁶ Ngaˇ naw maꞈ gʼaˇ duˬ nui ma keuˆ-eu loꞈ-ehˇ, Tiˇtuˆ kʼawꞈ nui ma keuˆ ni Miˬyehˇ jahˇ-euˬ miˇ neh, Miˬyehˇ-euˬ guiˬ lahˬ-ahˇ ja ceuˬ ngeh maˬ jiˇ nya.

¹⁷ Nga maꞈ neh shaˇ-euˬ dawˬ-ahˇ aˬ yawꞈ geuꞈ nehˬ laꞈ-euˬ tehꞈ-ehˇ maˬ ngeuˇ ni, naw maꞈ-ahˇ caw ba nehˬ mawꞈ-eu nui ma ahˇ-eu miˇ neh, aˬ yawˇ yawꞈ noeˬ tsehˆ-awˇ naw maꞈ jawˇ gaˇ oe-euˬ meh.

¹⁸ Laˬ kʼaˬ cehˇ-eu Guiˬ lahˬ dawˬ mehˬ-eu gaˇ laꞈ kʼoeˇ Ka li zaˬ aˇ muˇ dawˬ tawˆ luꞈ yaw zeu baw dui dui-eu nga maꞈ-euˬ aˬ nyiˇ tiˬ gʼaˬ-ahˇ kʼawꞈ, aˬ yawꞈ nehˬ-ehˇ bi oe caw-euˬ ma.

¹⁹ Kʼoeˇ uˬ taꞈ, nga maꞈ laꞈ kʼoeˇ caw ba nehˬ mawꞈ-eu nui ma ahˇ-eu gaˇ kawˆ aˬ cawˬ-ahˇ bi siˬ bi mawˇ-eu gʼaˇ duˬ, Sahˬpaˬ Yeˬsuˇ-euˬ yaw shehꞈ kʼahˬ sehˇ doˆ laˇ ni gʼoeˇ-eu gaˬ-eu jeˬ-ahˇ taꞈ-eu gaˇ heu hmˬ-ahˇ nga maꞈ mˇ mˇ-ehˇ cah ngeh, nga maꞈ nehˬ-ehˇ bi cah-eu lehˇ aˬ yawꞈ-ahˇ Ka li zaˬ aˇ muˇ deuˬ neh tseˇ doˆ taˬ-euˬ meh.

²⁰ Nui ma keuˆ-awˇ damˬ taˬ-euˬ pyuˇ heu deuˬ-ahˇ nga maꞈ tuˆ tehˬ-awˇ gaˇ mˇ ngeh, aˬ cawˬ iˬ baˇ taˬ-eu jeˬ maˬ bi doˆ laˇ ni yahˇ luꞈ ma.

²¹ Sahˬpaˬ Miˬyehˇ mehˬ shi tehꞈ-ehˇ maˬ ngeuˇ ni, tsawˇ haˬ zaˬ-euˬ mehˬ shi kʼawꞈ dawˇ coe ni mˇ-eu gʼaˇ duˬ nga maꞈ noeˬ tsehˆ taˬ-euˬ ma.

²² Kʼoeˇ miˇ neh, nga maꞈ-euˬ aˬ nyiˇ heu gʼaˬ-ahˇ aˬ yawꞈ maꞈ nehˬ-ehˇ kʼehˇ gʼeh leꞈ-euˬ ma. Nga maꞈ aˬ yawꞈ-ahˇ gʼawˬ mya poˆ lawˬ haw-eu laꞈ kʼoeˇ, aˬ yawꞈ aˬ myah luꞈ caw ba mawꞈ-eu nui ma ahˇ-eu gaˇ kawˆ siˬ duˬ taˬ-euˬ ma. Nymˬ-mˇ aˬ yawꞈ naw maꞈ-ahˇ jah coeˇ-eu nui ma paˇ ahˇ-eu miˇ neh, yaw beh naˆ maˬ tseˇ nui ma keuˆ dui dui luꞈ meh.

²³ Tiˇtuˆ gʼaˬ-aˬ, ngaˬ-euˬ gaˇ mˇ cawˬ pyeuꞈ-eu loꞈ-ehˇ, ngaˬ nehˬ-ehˇ tiˬ kawˆ loꞈ-ehˇ naw maꞈ-ahˇ caw ba-eu gaˇ mˇ luꞈ meh. Aˬ yawꞈ nehˬ-ehˇ oe caw-euˬ aˬ yuiꞈ aˬ nyiˇ nui deuˬ-aˬ, Ka li-euˬ yaw shehꞈ kʼahˬ sehˇ bi doˆ laˇ-eu gʼaˇ duˬ Ka li zaˬ aˇ muˇ deuˬ-euˬ dah zaˇ oe-euˬ meh.

²⁴ Naw maꞈ-euˬ gaˇ kawˆ nga maꞈ neh kʼahˬ sehˇ jehˆ-euˬ loꞈ-ehˇ ngeuˇ ngaˇ lehˇ, Ka li zaˬ aˇ muˇ dawˬ tawˆ luꞈ-ahˇ bi siˬ bi mawˇ duˬ leˇ-eu gʼaˇ duˬ, naw maꞈ-euˬ gʼoeˇ-eu gaˬ-eu jeˬ aˬ yawꞈ maꞈ-ahˇ mehˬ nehˬ-awˬ.