2 Gawˇliˬtu 5 - Akha

¹ Aˬ jeˬ miˇ neh ehˇ naˇ, miˇ tsaˬ heu kʼoeˇ taˆ aˬ dui jawˇ luꞈ-eu yaˇ cmˇ pyeuꞈ-eu aˬ dui-euˬ gʼawˇ mawˇ heu cawˆ-iˇ ngeh, aˬ dui bi jawˇ-eu gʼaˇ duˬ Miˬyehˇ neh mˬ kʼoeˇ taˆ tsoˆ taˬ-euˬ mˬ maˬ maˬ byaˆ zaˇ ziˇ ziꞈ-eu nymˇ jaˆ ma lehˇ aˬ dui siˬ nya ma.

² Nymˬ-mˇ aˬ dui mehˬ tsoeˬ dm daˆ-eu loꞈ-ehˇ, mˬ taˆ-euˬ nymˇ kʼoeˇ-ahˇ dm mawꞈ dui dui-eu miˇ neh mahˇ mahˇ-ehˇ shaˬ-eu laꞈ kʼoeˇ noeˬ tmˬ luꞈ ma.

³ Nymˇ kʼoeˇ-ahˇ dm gʼaˬ ngeh, aˬ dui neˇ myawˆ ni maˬ paˇ gʼeh-aˇ.

⁴ Miˇ tsaˬ heu kʼoeˇ taˆ jaˆ-eu yaˇ cmˇ laꞈ kʼoeˇ aˬ dui kʼaˆ behˆ kah-eu miˇ neh mahˇ luꞈ ma. Ehˇ kʼawꞈ, miˇ tsaˬ shiˬ shaˬ jiˇ gʼawˇ mawˇ heu-ahˇ lehˆ dzeh mawꞈ-eu miˇ neh mahˇ-eu maˬ ngeuˇ. Buꞈ-iˇ cehˇ-iˇ nya-eu jeˬ-ahˇ maˬ buꞈ maˬ cehˇ-iˇ nya-eu jeˬ neh bi myoꞈ ahˇ-eu gʼaˇ duˬ, mˬ taˆ-euˬ nymˇ dm daˆ mawꞈ-eu miˇ neh mahˇ-eu ma.

⁵ Aˬ dui kʼoeˇ loꞈ-ehˇ pyeuꞈ laˇ nya ni lehˬ hmˬ-euˬ gʼaˬ-aˬ, Miˬyehˇ pyeuꞈ-awˇ, aˬ yawꞈ kʼoeˇ loꞈ-ehˇ mˇ-eu lehˇ gʼeh-eu kʼoeˇ yaw duˬ yaw ciˇ baw ni, aˬ yawꞈ-euˬ Yaw sahˇ Miˬyehˇ aˬ dui-ahˇ biꞈ leꞈ-euˬ meh.

⁶ Kʼoeˇ miˇ neh, nga maꞈ aˬ myah luꞈ nui ma kʼaˬ duˬ ni jaˆ ma. Miˇ tsaˬ shiˬ shaˬ jiˇ gʼawˇ mawˇ heu laꞈ kʼoeˇ kʼaˇ jawˇ luꞈ kʼoeˇ keuˆ ni, Sahˬpaˬ Yeˬsuˇ Ka li-ahˇ gaˇ mahˇ kaˬ-a siˬ lehˇ nga maꞈ siˬ nya ma.

⁷ Aˬ jeˬ miˇ neh ehˇ naˇ, jah-eu jeˬ-ahˇ gʼoe-awˇ aˬ dui dehꞈ luꞈ-eu ma. Myaˆ nuiˆ haw mawˇ nya-eu jeˬ-ahˇ gʼoe-awˇ dehꞈ luꞈ-eu maˬ ngeuˇ.

⁸ Nga maꞈ nui ma kʼaˬ duˬ ni jaˆ-eu laꞈ kʼoeˇ shiˬ shaˬ jiˇ gʼawˇ mawˇ heu-ahˇ byehˇ dzeh yaꞈ mawꞈ-awˇ, Sahˬpaˬ Miˬyehˇ jawˇ gaˇ gʼoꞈ leˇ mawꞈ-eu ma.

⁹ Ehˇ kʼawꞈ, nymˇ heu nymˇ-ahˇ ya jawˇ-eu maˬ kaˬ, kʼoeˇ nymˇ-ahˇ ya jawˇ leˇ-eu maˬ kaˬ, nui jeˬ-ahˇ naˆ maˬ tseˇ Sahˬpaˬ Yeˬsuˇ nui kʼahˇ shiˇ-eu jeˬ-ahˇ dawˬ pehˬ taˬ-eu ma.

¹⁰ Aˬ jeˬ miˇ neh ehˇ naˇ, aˬ dui dawˬ tawˆ luꞈ Ka li yaˇ kʼaˬ daˇ-eu nuiˇ mahˬ mehˬ shi ya uiˬ leˇ jiˇ meh. Tsawˇ haˬ yawˬ gʼaˬ na luꞈ shiˬ shaˬ jiˇ gʼawˇ mawˇ heu laꞈ kʼoeˇ kʼaˇ mˇ kʼaˇ shaˇ dzeuˇ-euˬ loꞈ-ehˇ, muiˬ-eu maˬ ehˇ, doeˇ-eu maˬ ehˇ, yawˬ ha-ahˇ kʼaˇ oꞈ-eu jeˬ za tehꞈ-a.

Ka li baˬ da neh Miˬyehˇ-ahˇ cawˬ cawˬ taꞈ nya-eu

¹¹ Nga maꞈ Sahˬpaˬ Miˬyehˇ-ahˇ yaw zeu baw-awˇ guˆ-eu siˬ nya-eu miˇ neh, tsawˇ haˬ yawˬ gʼaˬ na luꞈ aˬ yawꞈ jawˇ paw pyawˇ laˇ ni gʼaˬ biꞈ luꞈ-eu ma. Nga maꞈ aˬ joˆ-ehˇ gʼeh-eu tsawˇ haˬ pyeuꞈ-eu gaˇ kawˆ Miˬyehˇ siˬ duˬ meh. Naw maꞈ-euˬ nui ma laꞈ kʼoeˇ kʼawꞈ, ngaˬ-ahˇ siˬ nya luꞈ meh lehˇ ngaˇ noeˬ tmˬ-eu ma.

¹² Nga maꞈ-ahˇ naw maꞈ ha geuꞈ nehˬ laꞈ ni, yawˬ ha-euˬ gaˇ kawˆ naw maꞈ-ahˇ maˬ paˇ boꞈ ahˇ laꞈ ma. Yawˬ ha nui ma aˬ joˆ-ehˇ taˬ-eu gaˇ kawˆ-ahˇ maˬ shaˇ sawˇ ni, aˬ cawˬ yawˬ ha-ahˇ noeˬ huiˬ laˇ gaˇ tehꞈ-ehˇ kʼahˬ sehˇ jehˆ luꞈ-eu tsawˇ haˬ deuˬ mehˬ shi, nga maꞈ-euˬ gaˇ kawˆ naw maꞈ kʼahˬ sehˇ bi jehˆ mawꞈ miˇ-a.

¹³ Nga maꞈ uˬ-iˇ-euˬ nga loˇ. Uˬ-iˇ-euˬ ngeuˇ naˇ, Miˬyehˇ hawˇ-eu nga maꞈ-euˬ yaw kaˬ-ahˇ jaˆ luꞈ-uˇ. Nga maꞈ maˬ uˬ-iˇ ngaˬ loˇ. Maˬ uˬ-iˇ-euˬ ngeuˇ naˇ kʼawꞈ, naw maꞈ gʼaˇ duˬ guiˬ lahˬ baw luꞈ-uˇ.

¹⁴ Ka li-euˬ gʼoeˇ-eu gaˬ-eu jeˬ nga maꞈ-ahˇ uˆ lahˇ luꞈ-eu meh. Tsawˇ haˬ dawˬ tawˆ luꞈ gʼaˇ duˬ tsawˇ haˬ tiˬ gʼaˬ shiˇ dah-euˬ meh lehˇ nga maꞈ jah duˬ taˬ-euˬ ma. Kʼoeˇ miˇ neh, dawˬ tawˆ luꞈ aˬ yawꞈ nehˬ-ehˇ shiˇ-euˬ gaˇ duˇ-eu meh.

¹⁵ Dehꞈ luꞈ-eu tsawˇ haˬ deuˬ kʼawꞈ yawˬ ha gʼaˇ duˬ dehꞈ luꞈ-eu jeˬ maˬ bi pyeuꞈ-ehˇ, aˬ yawꞈ maꞈ gʼaˇ duˬ shiˇ dah-awˇ paˇ bi gʼoꞈ dehꞈ laˇ-euˬ gʼaˬ-euˬ gʼaˇ duˬ tehꞈ-ehˇ dehꞈ luꞈ-eu jeˬ bi pyeuꞈ ni, dawˬ tawˆ luꞈ gʼaˇ duˬ aˬ yawꞈ shiˇ dah-euˬ meh.

¹⁶ Iˬ nah taꞈ naˇ, shiˬ shaˬ jiˇ myaˆ nuiˆ neh aˬ cawˬ-ahˇ nga maꞈ maˬ paˇ haw ma. Dzeuˇ laˇ ngeh Ka li-ahˇ shiˬ shaˬ jiˇ myaˆ nuiˆ neh haw-euˬ kʼawꞈ, aˬ kaˇ naˇ kʼoeˇ loꞈ-ehˇ maˬ paˇ haw ma.

¹⁷ Tsawˇ haˬ tiˬ gʼaˬ Ka li laꞈ kʼoeˇ jawˇ naˇ, yaw shuiꞈ beh paˇ-euˬ tsawˇ haˬ pyeuꞈ-eu meh. Yaw oeˇ byoˆ tsehˆ-awˇ, yaw shuiꞈ paˇ laˇ-euˬ meh.

¹⁸ Heu deuˬ dawˬ tawˆ luꞈ Miˬyehˇ neh mˇ-euˬ jeˬ pyeuꞈ-eu meh. Ka li-ahˇ gʼoe-eu laꞈ kʼoeˇ aˬ dui aˬ yawꞈ-ahˇ tsaˬ leˇ tsahˇ leˇ nya ni aˬ yawꞈ mˇ-awˇ, aˬ cawˬ aˬ yawꞈ-ahˇ tsaˬ leˇ tsahˇ leˇ ni mˇ-eu gʼaˇ duˬ aˬ dui-ahˇ aˬ yawꞈ gaˇ biꞈ nehˬ laꞈ-euˬ meh.

¹⁹ Nga maꞈ ehˇ mawꞈ-eu-aˬ, miˇ tsaˬ zaˬ dawˬ tawˆ luꞈ Miˬyehˇ-ahˇ tsaˬ leˇ tsahˇ leˇ nya ni, Ka li-ahˇ gʼoe-awˇ Miˬyehˇ mˇ luꞈ-eu meh. Aˬ yawꞈ maꞈ-euˬ iˬ baˇ-ahˇ Miˬyehˇ maˬ juiˇ uiˬ taˬ ni, aˬ yawꞈ maꞈ aˬ yawꞈ-ahˇ tsaˬ leˇ tsahˇ leˇ nya ni mehˬ nehˬ-iˇ-eu gʼaˇ duˬ, aˬ yawꞈ-euˬ dawˬ nga maꞈ-ahˇ biꞈ laꞈ-euˬ meh.

²⁰ Kʼoeˇ miˇ neh, nga maꞈ-aˬ, Ka li-euˬ dah zaˇ ngehˬ zaˬ tmˇ zaˬ geuꞈ luꞈ-eu ma. Nga maꞈ-ahˇ gʼoe-eu laꞈ kʼoeˇ naw maꞈ-ahˇ Miˬyehˇ shaˇ ju luꞈ gaˇ duˇ meh. Miˬyehˇ-ahˇ tsaˬ leˇ tsahˇ leˇ-awˬ lehˇ, Ka li-euˬ dah zaˇ naw maꞈ-ahˇ shaˇ-eu ma.

²¹ Ka li-aˬ, iˬ baˇ tiˬ pawꞈ-iˬ maˬ ahˇ-a. Ehˇ kʼawꞈ, Ka li laꞈ kʼoeˇ Miˬyehˇ-euˬ yaw tsaˬ yaw dawˇ jeˬ-ahˇ aˬ dui za nya ni, aˬ dui-euˬ gʼaˇ duˬ Miˬyehˇ neh Ka li-ahˇ iˬ baˇ bi pyeuꞈ-iˇ-euˬ meh.