2 Gawˇliˬtu 3 - Akha

Dawˬ ma saˇ jaˇ Yaw shuiꞈ gʼaˇ duˬ gaˇ mˇ-eu

¹ Nga maꞈ yawˬ haˇ yawˬ ha kʼahˬ sehˇ paˇ jehˆ gaˇ duˇ-eu nga loˇ. Aˬ cawˬ jahˇ luꞈ-eu loꞈ-ehˇ, nga maꞈ gʼeh naw maꞈ jawˇ gaˇ laˇ ngeh naw maꞈ ha geuꞈ nehˬ laꞈ ni aˬ cawˬ neh nga maꞈ-euˬ gaˇ kawˆ naw maꞈ-ahˇ boꞈ nehˬ-euˬ sahˬ boꞈ yuˇ leꞈ-eu loˬ ta loˇ. Maˬ ngeuˇ naˇ, nga maꞈ aˬ cawˬ jawˇ gaˇ iˇ ngeh, aˬ cawˬ nga maꞈ-ahˇ ha geuꞈ nehˬ laꞈ ni, naw maꞈ neh nga maꞈ-euˬ gaˇ kawˆ boꞈ nehˬ-euˬ sahˬ boꞈ yuˇ gʼeh-eu loˬ ta loˇ.

² Naw maꞈ-euˬ mawˇ do-aˬ, tsawˇ haˬ yawˬ gʼaˬ na luꞈ siˬ nya gui nya ni nga maꞈ-euˬ nui ma-ahˇ boꞈ myahˬ taˬ-euˬ sahˬ boꞈ pyeuꞈ-eu ma.

³ Naw maꞈ-aˬ, Ka li neh boꞈ ahˇ leꞈ-awˇ nga maꞈ neh hehˇ leꞈ-euˬ sahˬ boꞈ tiˬ dzeh pyeuꞈ-eu meh. Sahˬ boꞈ heu dzeh-ahˇ sahˬ uiˇ zmˬ-awˇ boꞈ taˬ-euˬ maˬ ngeuˇ-a. Dehꞈ luꞈ-eu Miˬyehˇ-euˬ Yaw sahˇ-ahˇ zmˬ-awˇ boꞈ taˬ-euˬ meh. Kʼaˬ lo teˇ byaꞈ kʼoeˇ taˆ boꞈ taˬ-euˬ maˬ ngeuˇ-a. Tsawˇ haˬ-euˬ nui ma teˇ byaꞈ kʼoeˇ taˆ boꞈ taˬ-euˬ meh.

⁴ Ka li-ahˇ gʼoe-eu laꞈ kʼoeˇ Miˬyehˇ-ahˇ nui ma huiˬ kʼaˇ za-eu miˇ neh ngaˇ heu loꞈ-ehˇ ehˇ peuˬ-eu ma.

⁵ Gaˇ heu nga maꞈ mˇ nya ma lehˇ ehˇ paˬ-ehˇ nga maꞈ laꞈ kʼoeˇ tiˬ jeˬ-iˬ maˬ ahˇ. Nga maꞈ mˇ nya-eu kʼoeˇ-aˬ, Miˬyehˇ neh biꞈ laꞈ-euˬ jeˬ pyeuꞈ-eu meh.

⁶ Boꞈ doˆ taˬ-euˬ zahˇ dawˬ kʼoꞈ dawˬ-ahˇ maˬ taꞈ-ehˇ, Yaw sahˇ Miˬyehˇ-ahˇ taꞈ-eu dawˬ ma saˇ jaˇ yaw shuiꞈ gʼaˇ duˬ nga maꞈ gaˇ mˇ nya ni Miˬyehˇ neh jahˇ nehˬ laꞈ-euˬ meh. Boꞈ doˆ taˬ-euˬ zahˇ dawˬ kʼoꞈ dawˬ-aˬ, bi shiˇ-eu jeˬ pyeuꞈ-eu meh. Ehˇ kʼawꞈ Yaw sahˇ Miˬyehˇ-aˬ, bi dehꞈ laˇ-eu jeˬ pyeuꞈ-eu meh.

⁷ Zahˇ dawˬ kʼoꞈ dawˬ kʼoeˇ-aˬ, kʼaˬ lo kʼoeˇ taˆ taꞈ boꞈ taˬ-awˇ, Zahˇ dawˬ kʼoꞈ dawˬ kʼoeˇ biꞈ le ngeh, Miˬyehˇ-euˬ yaw shehꞈ kʼahˬ sehˇ doˆ le-euˬ meh. Moˇseˬ-euˬ myaˆ pyawˬ kʼoeˇ taˆ bya-eu yaw shehꞈ kʼoeˇ-aˬ, tiˬ kʼehˇ laˇ kʼehˬ tehꞈ-ehˇ gmˬ-eu yaw shehꞈ pyeuꞈ kʼawꞈ, yaw shehꞈ aˇ dzehˬ-ehˇ kʼaˆ-eu miˇ neh Iˇsaˬleˬlaˇ tsawˇ haˬ deuˬ Moˇseˬ-euˬ myaˆ pyawˬ-ahˇ maˬ haw peuˬ-a. Shiˇ-eu jeˬ bi keuˆ le-eu Zahˇ dawˬ kʼoꞈ dawˬ kʼawꞈ, kʼoeˇ naˆ naˆ-ehˇ gʼeh-eu yaw shehꞈ kʼahˬ sehˇ laꞈ kʼoeˇ oe-euˬ ngeuˇ naˇ,

⁸ Yaw sahˇ Miˬyehˇ neh mˇ-euˬ gaˇ deuˬ-ahˇ taꞈ leˇ-eu yaw shehꞈ kʼahˬ sehˇ-aˬ, aˇ naˆ ni paˇ kʼaˆ dzehˬ nmˇ.

⁹ Iˬ baˇ ahˇ gaˇ kʼehˬ nehˬ kʼaˆ nehˬ le-euˬ kʼoeˇ jeˬ kʼoeˇ naˆ ni yaw shehꞈ kʼahˬ sehˇ ahˇ naˇ, tsawˇ haˬ zaˬ-ahˇ Miˬyehˇ mehˬ shi yaw tsaˬ yaw dawˇ tsawˇ haˬ bi pyeuꞈ laˇ ni mˇ-eu heu jeˬ aˇ naˆ ni yaw shehꞈ kʼahˬ sehˇ paˇ ahˇ dzehˬ nmˇ.

¹⁰ Maˇ maˇ ni ehˇ naˇ, nymˬ-mˇ-euˬ yaw shehꞈ kʼahˬ sehˇ heu hmˬ bya dzehˬ-eu miˇ neh, aˇ hu bya dui dui-euˬ yaw shehꞈ kʼahˬ sehˇ kʼoeˇ hmˬ miˆ-iˇ-euˬ gaˇ duˇ meh.

¹¹ Tiˬ kʼehˬ tiˬ yamˬ tehꞈ-ehˇ gmˬ-eu jeˬ laꞈ kʼoeˇ kʼawꞈ yaw shehꞈ kʼahˬ sehˇ ahˇ-eu ngeuˇ naˇ, mˬ maˬ maˬ byaˆ zaˇ ziˇ gmˬ-eu jeˬ laꞈ kʼoeˇ yaw shehꞈ kʼahˬ sehˇ aˇ naˆ ni paˇ ahˇ paˬ nga.

¹² Nga maꞈ heu loꞈ-ehˇ noeˬ tmˬ taˬ-euˬ miˇ neh, tiˬ pawꞈ-iˬ maˬ guˆ ni ngehˬ peuˬ tmˇ peuˬ-eu ma.

¹³ Nga maꞈ-aˬ, Moˇseˬ-ahˇ maˬ duˇ. Moˇseˬ-aˬ, aˬ yawꞈ-euˬ myaˆ pyawˬ kʼoeˇ taˆ bya-eu yaw shehꞈ kʼahˬ sehˇ kʼoeˇ byoˆ-iˇ gaˇ Iˇsaˬleˬlaˇ tsawˇ haˬ deuˬ maˬ bi mawˇ-eu gʼaˇ duˬ, myaˆ pyawˬ-ahˇ saˬ paˇ dehˬ kaˬ-euˬ meh.

¹⁴ Ehˇ kʼawꞈ, aˬ yawꞈ maꞈ nui ma gʼahˇ-eu meh. Iˬ nah keuˆ ni aˬ yawꞈ maꞈ dawˬ ma saˇ jaˇ yaw oeˇ-ahˇ kʼaˇ gui ngeh, myaˆ pyawˬ-ahˇ saˬ paˇ dehˬ kaˬ taˬ-euˬ kʼoeˇ maˬ yuˇ dzeh-aˬ siˬ. Aˬ jeˬ miˇ neh ehˇ naˇ, ka li-ahˇ maˬ taꞈ naˇ myaˆ pyawˬ-ahˇ dehˬ kaˬ taˬ-euˬ saˬ paˇ kʼoeˇ maˬ yuˇ dzeh nya-a.

¹⁵ Ngeuˇ meh. Iˬ nah keuˆ ni Moˇseˬ-euˬ Zahˇ dawˬ kʼoꞈ dawˬ-ahˇ aˬ yawꞈ maꞈ kʼaˇ gui ngeh, aˬ yawꞈ maꞈ-euˬ nui ma-ahˇ saˬ paˇ kʼoeˇ hmˬ dehˬ kaˬ taˬ-euˬ meh.

¹⁶ Ehˇ kʼawꞈ, tsawˇ haˬ tiˬ gʼaˬ Sahˬpaˬ Miˬyehˇ jawˇ gaˇ gʼoꞈ kʼoꞈ laˇ naˇ, saˬ paˇ kʼoeˇ hmˬ-ahˇ yuˇ dzeh nehˬ-eu meh.

¹⁷ Nymˬ-mˇ Sahˬpaˬ Miˬyehˇ lehˇ ehˇ-eu heu-aˬ, Yaw sahˇ Miˬyehˇ-ahˇ ehˇ-eu meh. Sahˬpaˬ Miˬyehˇ-euˬ Yaw sahˇ-aˬ, aˬ dui-ahˇ bi buˬ bi law-iˇ laꞈ-eu meh.

¹⁸ Aˬ dui dawˬ tawˆ luꞈ myaˆ pyawˬ-ahˇ saˬ paˇ maˬ dehˬ kaˬ taˬ-ehˇ, Sahˬpaˬ Miˬyehˇ-euˬ yaw shehꞈ kʼahˬ sehˇ aˬ dui-ahˇ tahˬ le luꞈ meh. Sahˬpaˬ Miˬyehˇ-euˬ Yaw sahˇ jawˇ gaˇ neh oe-euˬ yaw shehꞈ kʼahˬ sehˇ kʼoeˇ aˬ dui-ahˇ tiˬ jawˇ saˇ-iˬ tiˬ jawˇ yaw shehꞈ kʼahˬ sehˇ bi huiˬ dzehˬ laˇ-awˇ, aˬ yawꞈ-ahˇ duˇ leˇ ni aˬ dui-ahˇ bi paˇ laˇ luꞈ-eu meh.