2 Gawˇliˬtu 11 - Akha

Pawˇluˆ hawˇ-eu maˬ ngeuˇ-eu gʼaˬ kʼehˇ deuˬ

¹ Ngaˇ aˬ dzawˬ aˇ gah-euˬ dawˬ ui cuiˆ ngehˬ gaˇ naw maꞈ bi oˇ mawꞈ miˇ-a. Tiˬ poˆ oˇ nehˬ laꞈ-awˬ de.

² Miˬyehˇ naw maꞈ-ahˇ nui ma maˬ shiˇ-eu loꞈ-ehˇ, ngaˇ kʼawꞈ naw maꞈ-ahˇ nui ma maˬ shiˇ nya. Naw maꞈ miˬ shuiꞈ tiˬ gʼaˬ loꞈ-ehˇ Ka li tiˬ gʼaˬ-ahˇ tehꞈ-ehˇ bi dahˬ dzaˬ-iˇ-eu gʼaˇ duˬ saˇ jaˇ dzaˬ nehˬ-euˬ gʼaˬ ngaˇ ma.

³ Eˇbaˆ-ahˇ aˇ lawˇ neh mehˇ shuiˇ bi shuiˇ tawˆ-euˬ loꞈ-ehˇ, Ka li-ahˇ maˇ maˇ ni shawˇ jehˆ ni gaˬ-eu naw maꞈ-euˬ nui ma bi tsahˇ pyawˇ gaˇ ngaˇ kʼahˬ lahˇ dui dui nya.

⁴ Naw maꞈ jawˇ gaˇ kʼaˇ laˇ-eu tsawˇ haˬ-ahˇ naw maꞈ ha geuꞈ-awˇ, nga maꞈ neh mehˬ-euˬ Yeˬsuˇ maˬ ngeuˇ-eu Yeˬsuˇ yawˬ gʼaˬ yawˬ-euˬ gaˇ kawˆ mehˬ gaˇ naˇ haˬ-eu laꞈ kʼoeˇ, nga maꞈ neh naw maꞈ-ahˇ biꞈ-euˬ Yaw sahˇ Miˬyehˇ hawˇ-eu Laˬ kʼaˬ cehˇ-eu Guiˬ lahˬ dawˬ-ahˇ beu gaˇ dui dui-eu yaw sahˇ yawˬ gʼaˬ yawˬ hawˇ-eu laˬ kʼaˬ cehˇ-eu guiˬ lahˬ dawˬ yawˬ jeˬ yawˬ-ahˇ naw maꞈ laˬ kʼaˬ cehˇ taˆ ni ha geuꞈ-euˬ meh.

⁵ Huiˬ dzehˬ mahˇ dzehˬ-eu gʼaˬ kʼehˇ deuˬ lehˇ naw maꞈ kuˇ-eu gʼaˬ kʼehˇ kʼoeˇ deuˬ naˆ maˬ tseˇ ngaˇ tiˬ pawꞈ-iˬ maˬ nyiˇ teˬ lehˇ noeˬ-eu ma.

⁶ Ngaˇ-aˬ, dawˬ ngehˬ-eu paw aˬ cawˬ naˆ-ehˇ maˬ bym law hawˇ kʼawꞈ, zaˬ siˬ tsawˇ gahˇ paw aˬ cawˬ taꞈ-ehˇ teˬ-eu tsawˇ haˬ maˬ ngeuˇ. Nga maꞈ naw maꞈ-ahˇ cawˬ cawˬ taꞈ luꞈ-eu laꞈ kʼoeˇ, aˬ joˆ-ehˇ pyeuꞈ-euˬ maˬ kaˬ, aˬ geu ngeh yamˬ-ahˇ maˬ kaˬ, gaˇ kawˆ heu bya cehˆ ni bi mawˇ-euˬ ma.

⁷ Miˬyehˇ-euˬ Laˬ kʼaˬ cehˇ-eu Guiˬ lahˬ dawˬ mehˬ nehˬ-euˬ aˇ poeˬ, ngaˇ naw maꞈ-ahˇ tiˬ jeˬ-iˬ maˬ shaˇ haw-aˬ. Naw maꞈ-ahˇ taˬ huiˬ-eu gʼaˇ duˬ, ngaˬ-euˬ gʼawˇ mawˇ-ahˇ ngaˇ taˬ nyiˇ-euˬ ma. Ngaˇ kʼoeˇ loꞈ-ehˇ mˇ-euˬ lehˬ ta loˇ.

⁸ Ngaˇ naw maꞈ nehˬ-ehˇ gaˇ mˇ ngeh, Ka li zaˬ aˇ muˇ nui deuˬ neh caw ba nehˬ laꞈ-euˬ pyuˇ zmˬ-awˇ mˇ-euˬ ma. Maˇ maˇ ni ehˇ naˇ, naw maꞈ-ahˇ caw ba-eu gʼaˇ duˬ aˬ cawˬ-ahˇ tahˇ joe joe-euˬ gaˇ duˇ nya.

⁹ Naw maꞈ nehˬ-ehˇ ngaˇ jawˇ ngeh, pyuˇ loˬ laˇ kʼawꞈ naw maꞈ-ahˇ maˬ shaˇ haw-aˬ. Maˬgeˬdawˇniˆˆ miˇ kʼahˬ-ahˇ neh oe-euˬ aˬ yuiꞈ aˬ nyiˇ Ka li zaˬ deuˬ ngaˇ kʼaˇ loˬ-eu jeˬ sha ha le-euˬ meh. Dzeuˇ laˇ ngeh naw maꞈ-ahˇ tiˬ jeˬ-iˬ maˬ shaˇ haw-euˬ loꞈ-ehˇ, aˬ kaˇ mehˬ hu paw kʼawꞈ maˬ shaˇ ni mˇ daˆ leꞈ ma.

¹⁰ Ka li-euˬ yaw tsaˬ yaw dawˇ jeˬ ngaˬ-euˬ laꞈ kʼoeˇ ahˇ-eu loꞈ-ehˇ, Aˬgaˬyaˇ miˇ kʼahˬ byah-iˇ ni ngaˇ heu loꞈ-ehˇ kʼahˬ sehˇ jehˆ gaˇ tiˬ gʼaˬ-iˬ maˬ laˆ tsoeˬ laˇ nya-aˇ lehˇ ehˇ tsehˆ peuˬ ma.

¹¹ Ngaˇ naw maꞈ-ahˇ maˬ gaˬ-eu miˇ neh heu loꞈ-ehˇ ehˇ-eu nga loˇ. Ngaˇ naw maꞈ-ahˇ aˇ naˆ ni gaˬ-eu Miˬyehˇ siˬ nya luꞈ meh.

¹² Gʼaˬ kʼehˇ kʼoeˇ deuˬ gʼeh nga maꞈ kʼaˇ mˇ-eu loꞈ-ehˇ mˇ luꞈ-eu ma lehˇ ehˇ-awˇ kʼahˬ sehˇ jehˆ kʼaˇ maˬ bi za ni, nymˬ-mˇ ngaˇ kʼaˇ mˇ luꞈ-eu jeˬ-ahˇ maˬ byehˇ dzeh ni mˇ daˆ leꞈ ma.

¹³ Tsawˇ haˬ kʼoeˇ deuˬ-aˬ, maˬ ngeuˇ-eu gʼaˬ kʼehˇ deuˬ meh. Ka li-euˬ gʼaˬ kʼehˇ jahˇ geuꞈ-eu mehˇ shuiˇ shuiˇ-eu tsawˇ haˬ deuˬ meh.

¹⁴ Aˬ yawꞈ maꞈ kʼoeˇ loꞈ-ehˇ gʼeh gaˇ zahˬ leˇ duˬ maˬ jaˆ-a. Nehꞈ Saˬdaˬ kʼawꞈ yaw shehꞈ bya-eu mˬ taˆ gʼaˬ kʼehˇ jahˇ geuꞈ nya-eu meh.

¹⁵ Kʼoeˇ miˇ neh, aˬ yawꞈ-euˬ zaˬ kʼaˆ deuˬ kʼawꞈ yaw tsaˬ yaw dawˇ jeˬ-euˬ zaˬ kʼaˆ jahˇ geuꞈ gaˇ zahˬ lehˇ kʼaˇ maˬ za-a. Aˇ saˬ saˬ laˇ ngeh, aˬ yawꞈ maꞈ neh kʼaˇ mˇ kʼaˇ shaˇ-euˬ jeˬ aˬ yawꞈ maꞈ kʼoeˇ taˆ keuˆ le tehꞈ-a.

Pawˇluˆ gʼaˬ kʼehˇ geuꞈ-euˬ miˇ neh ya daˬ-euˬ deuˬ

¹⁶ Ngaˇ tiˬ poˆ paˇ ehˇ-eu ma. Tsawˇ haˬ tiˬ gʼaˬ-iˬ ngaˬ-ahˇ aˬ dzawˬ nga lehˇ taˬ noeˬ nehˬ laꞈ. Naw maꞈ kʼoeˇ loꞈ-ehˇ maˇ diˇ noeˬ naˇ kʼawꞈ, ngaˇ gʼeh aˬ cawˬ loꞈ-ehˇ kʼahˬ sehˇ ui cuiˆ jehˆ nya paˬ-ehˇ aˬ dzawˬ tiˬ gʼaˬ loꞈ-ehˇ ha geuꞈ nehˬ laꞈ-awˬ.

¹⁷ Nymˬ-mˇ ngaˇ ehˇ luꞈ-eu heu-aˬ, Sahˬpaˬ Miˬyehˇ ngaˬ-ahˇ bi ngehˬ mawꞈ-eu jeˬ law nmˇ-aˬ maˬ ngeuˇ-a. Kʼahˬ sehˇ jehˆ-eu gaˇ kawˆ heu-ahˇ taꞈ leˇ-awˇ, maˇ maˇ ni aˬ dzawˬ aˇ gah tiˬ gʼaˬ loꞈ-ehˇ ngaˇ ngehˬ luꞈ-eu ma.

¹⁸ Ehˇ kʼawꞈ, miˇ tsaˬ shiˬ shaˬ jiˇ gaˇ kawˆ tsawˇ haˬ gʼawˬ mya gʼaˬ kʼahˬ sehˇ jehˆ luꞈ-eu miˇ neh, ngaˇ gʼeh kʼoeˇ loꞈ-ehˇ kʼahˬ sehˇ jehˆ ma.

¹⁹ Naw maꞈ-aˬ, zaˬ siˬ tsawˇ gahˇ ahˇ-eu miˇ neh aˬ dzawˬ aˇ gah deuˬ-euˬ dawˬ-ahˇ daˬ coeˇ oˇ coeˇ meh ehˇ lawˬ laˬ.

²⁰ Aˬ cawˬ naw maꞈ-ahˇ kʼehˇ dzaˬ laˇ gaˇ maˬ ehˇ, nawˬ dzaˬ kʼaˆ dzaˬ laˇ gaˇ maˬ ehˇ, zuiˆ laˇ gaˇ maˬ ehˇ, daˆ dziˬ laˇ gaˇ maˬ ehˇ, baˬ ba-ahˇ tehˆ laˇ gaˇ maˬ ehˇ, naw maꞈ daˬ coeˇ meh ehˇ lawˬ laˬ.

²¹ Nga maꞈ-aˬ, aˬ cawˬ-ahˇ kʼoeˇ naˆ naˆ-ehˇ daˬ coeˇ oˇ coeˇ gaˇ keuˆ ni maˬ gʼahˇ keuˆ nya lehˇ shaꞈ dawˬ zahˇ dawˬ ngehˬ-eu ma. Aˬ dzawˬ aˇ gah-euˬ dawˬ ngehˬ-awˇ ya ehˇ naˇ, aˬ cawˬ kʼahˬ sehˇ kʼaˇ jehˆ-eu jeˬ ngaˇ kʼawꞈ jehˆ peuˬ ma.

²² Aˬ yawꞈ maꞈ Heˬbyehˇ tsawˇ haˬ ngeuˇ naˇ, ngaˇ kʼawꞈ Heˬbyehˇ tsawˇ haˬ ma. Aˬ yawꞈ maꞈ Iˇsaˬleˬlaˆ tsawˇ haˬ ngeuˇ naˇ, ngaˇ kʼawꞈ Iˇsaˬleˬlaˆ tsawˇ haˬ ma. Aˬ yawꞈ maꞈ Aˬbyaˬhaˬ-euˬ zaˬ ngeuˇ naˇ, ngaˇ kʼawꞈ ngeuˇ ma.

²³ Ngaˇ tsawˇ uˬ loꞈ-ehˇ ngehˬ la de. Aˬ yawꞈ maꞈ Ka li-euˬ zaˬ kʼaˆ ngeuˇ naˇ, ngaˇ-aˬ, aˬ yawꞈ maꞈ naˆ maˬ tseˇ bym dzehˬ-eu Ka li-euˬ zaˬ kʼaˆ ma. Aˬ yawꞈ maꞈ naˆ maˬ tseˇ ngaˇ mˇ taˬ shaˇ taˬ-euˬ jaˆ ma. Aˬ yawꞈ maꞈ naˆ maˬ tseˇ tawˬ-ahˇ uˇ haw-euˬ ma. Aˬ yawꞈ maꞈ naˆ maˬ tseˇ yahˬ caˆ neh bi juiꞈ haw-euˬ ma. Aˬ yawꞈ maꞈ naˆ maˬ tseˇ shiˇ taw tehˬ ni gʼawˬ mya poˆ bi kʼehˬ bi kʼaˆ haw-euˬ ma.

²⁴ Yuˇdaˆ tsawˇ haˬ deuˬ yahˬ caˆ neh smˬ tseˇ gʼoeˬ laꞈ juiꞈ nehˬ laꞈ gaˇ, ngaˬ poˆ keuˆ ni ngaˇ ya daˬ haw-euˬ ma.

²⁵ Loˇmaˆ tsawˇ haˬ deuˬ daˇ kawˬ neh diˬ laˇ gaˇ, smˬ poˆ keuˆ ni ya daˬ haw-euˬ ma. Kʼaˬ lo neh biˬ laˇ gaˇ kʼawꞈ, tiˬ poˆ ya daˬ-euˬ ma. Saˇ baoˬ cawˆ-iˇ-awˇ ya shaˬ haw-euˬ smˬ poˆ byah-eu ma. Tiˬ poˆ-aˬ, tiˬ nah uˬ taꞈ uˬ ciꞈ tiˬ miˇ iˬ ma laˆ shaˆ-ahˇ bu-euˬ ma.

²⁶ Ngaˇ tiˬ kʼehˬ maˬ taˬ ni gaˇ ma doˆ-iˇ-eu laꞈ kʼoeˇ, gʼawˬ mya jeˬ-ahˇ guˆ kʼaˇ za za-ehˇ cah-euˬ ma. Lawˇ baˬ huiˬ le gaˇ maˬ ehˇ, tahˇ joe joe laˇ gaˇ maˬ ehˇ, Yuˇdaˆ tsawˇ haˬ maˬ ngeuˇ-eu deuˬ kʼehˬ laˇ gaˇ maˬ ehˇ, guˆ guˆ-ehˇ cah-euˬ ma. Meuˬ laꞈ kʼoeˇ maˬ ehˇ, bawˇ tsahˬ bawˇ dahˇ-ahˇ maˬ ehˇ, iˬ ma laˆ shaˆ kʼoeˇ taˆ maˬ ehˇ, guˆ-eu gaˆ-eu jeˬ-ahˇ ya tahˬ puˬ-eu uˬ taꞈ, maˬ ngeuˇ-eu Ka li zaˬ deuˬ yehˬ bawˬ-ehˇ jahˇ laˇ gaˇ guˆ guˆ-ehˇ shaˬ haw-euˬ ma.

²⁷ Gaˇ mˇ dui dui-awˇ shaˬ dui dui-eu laꞈ kʼoeˇ, uˬ ciꞈ maˬ yuꞈ ni gʼawˬ mya poˆ leh jeh haw-euˬ ma. Hawˬ mehꞈ-eu, iˇ cuꞈ mehꞈ-eu, dzaˬ dzaˬ dawˇ dawˇ maˬ jaˆ-ehˇ ya dzahˬ-eu, dm gʼaˬ dm lmˇ maˬ jaˆ-ehˇ yaw gaˆ gaˆ-eu, heu deuˬ-ahˇ daˬ dzeuˇ yaꞈ-euˬ ma.

²⁸ Nui deuˬ gaˇ kawˆ ya shaˬ-euˬ deuˬ-ahˇ taˬ paˇ ehˇ siˬ. Ka li zaˬ aˇ muˇ dawˬ tawˆ luꞈ gʼaˇ duˬ kʼahˬ lahˇ-eu jeˬ yawˬ nah na luꞈ ngaˬ-euˬ nui ma-ahˇ ciˬ tehˬ taˬ-euˬ meh.

²⁹ Tsawˇ haˬ tiˬ gʼaˬ na gʼaˬ baˬ ngeh, ngaˬ-ahˇ gʼaˬ baˬ laˇ-eu miˇ-a. Tsawˇ haˬ tiˬ gʼaˬ na iˬ baˇ laꞈ kʼoeˇ coˬ-iˇ ngeh, ngaˬ-ahˇ noeˬ shaˬ miˇ-a.

³⁰ Ngaˇ kʼahˬ sehˇ ya jehˆ naˇ, ngaˇ gʼaˬ baˬ-eu gaˇ kawˆ kʼahˬ sehˇ jehˆ ma.

³¹ Ngaˇ jaˬ myawꞈ maˬ myawꞈ-eu gaˇ kawˆ Sahˬpaˬ Yeˬsuˇ-euˬ Aˬda pyeuꞈ-eu Miˬyehˇ siˬ nya luꞈ meh. Aˬ yawꞈ-euˬ tsawˇ myahˇ mˬ maˬ maˬ byaˆ zaˇ ziˇ guiˬ lahˬ huiˬ luꞈ-uˇ.

³² Ngaˇ Daˬmaˬsehˇ meuˬ laꞈ kʼoeˇ jawˇ luꞈ ngeh, sahˬ paˬ Aˬleˬdaˇ-euˬ laꞈ oˆ uˆ lahˇ luꞈ-eu gʼaˬ neh ngaˬ-ahˇ bi nyehꞈ-eu gʼaˇ duˬ meuˬ-euˬ lahˇ kʼehˬ-ahˇ bi loꞈ tsoeˬ jiˇ taˬ-euˬ meh.

³³ Ehˇ kʼawꞈ, meuˬ meuˬ lahˇ-euˬ kaˇ pyawˇ-ahˇ dahˇ-eu laˇ gʼoˆ zaˬ-ahˇ kʼaˆ kaˇ neh bi pyehˬ ka-awˇ, aˬ yawꞈ-euˬ laꞈ-ahˇ ya dzeuˇ-iˇ-euˬ ma.