1 Yoˇhaˬ 3 - Akha

Miˬyehˇ-euˬ zaˬ deuˬ

¹ Aˬda Miˬyehˇ aˬ dui-ahˇ aˇ naˆ ni gaˬ-eu gaˇ kawˆ shaˇ noeˬ haw sheˇ. Aˬ yawꞈ aˬ dui-ahˇ gaˬ dui dui-eu miˇ neh Miˬyehˇ-euˬ zaˬ lehˇ myahˇ nehˬ laꞈ-euˬ meh. Aˬ dui-aˬ, maˇ maˇ ni aˬ yawꞈ-euˬ zaˬ deuˬ ma. Kʼoeˇ miˇ neh, miˇ tsaˬ zaˬ deuˬ aˬ dui-ahˇ maˬ siˬ nya-a. Aˬ jeˬ miˇ neh ehˇ naˇ, aˬ yawꞈ maꞈ Miˬyehˇ-ahˇ maˬ siˬ nya-eu miˇ neh, aˬ dui-ahˇ maˬ siˬ nya-eu jeˬ pyeuꞈ-eu meh.

² Ngaˇ gaˬ dui dui-eu cawˬ deuˬ-oˇ, nymˬ-mˇ aˬ dui Miˬyehˇ-euˬ zaˬ ma. Ehˇ kʼawꞈ, aˬ dui mehˬ hu paw aˬ joˆ-ehˇ pyeuꞈ laˇ-eu maˬ duˬ-a siˬ. Ehˇ kʼawꞈ, Yeˬsuˇ Ka li-ahˇ bya cehˆ ni ya mawˇ ngeh, aˬ dui aˬ yawꞈ loꞈ-ehˇ pyeuꞈ laˇ tehꞈ-a lehˇ siˬ duˬ taˬ-euˬ ma. Aˬ jeˬ miˇ neh ehˇ naˇ, aˬ yawꞈ kʼaˇ ngeuˇ-eu loꞈ-ehˇ aˬ dui aˬ yawꞈ-ahˇ ya mawˇ duˬ ma.

³ Ka li laꞈ kʼoeˇ, kʼoeˇ loꞈ-ehˇ kʼaˇ noeˬ tmˬ taˬ-euˬ tsawˇ haˬ deuˬ-aˬ, Ka li muiˬ-eu shawˇ-eu loꞈ-ehˇ, yawˬ ha kʼawꞈ ya bi muiˬ ya bi shawˇ meh.

⁴ Iˬ baˇ mˇ-euˬ tsawˇ haˬ yawˬ gʼaˬ na luꞈ Miˬyehˇ-euˬ zahˇ dawˬ kʼoꞈ dawˬ-ahˇ mˇ bahˬ-euˬ meh. Aˬ jeˬ miˇ neh ehˇ naˇ, iˬ baˇ ehˇ-eu jeˬ-aˬ, zahˇ dawˬ kʼoꞈ dawˬ-ahˇ bahˬ leˇ-eu jeˬ pyeuꞈ-eu meh.

⁵ Ka li oe-euˬ-aˬ, iˬ baˇ-ahˇ yuˇ dzeh-eu gʼaˇ duˬ pyeuꞈ-awˇ, aˬ yawꞈ-euˬ laꞈ kʼoeˇ iˬ baˇ tiˬ pawꞈ-iˬ maˬ ahˇ-eu gaˇ kawˆ naw maꞈ siˬ duˬ luꞈ meh.

⁶ Kʼoeˇ miˇ neh, Ka li laꞈ kʼoeˇ kʼaˇ jawˇ-eu tsawˇ haˬ-aˬ, iˬ baˇ maˬ paˇ mˇ meh. Ehˇ kʼawꞈ, iˬ baˇ kʼaˇ mˇ doˆ leꞈ-eu tsawˇ haˬ-aˬ, Ka li-ahˇ tiˬ jawˇ-iˬ maˬ siˬ maˬ mawˇ haw-euˬ tsawˇ haˬ pyeuꞈ-eu meh.

⁷ Ngaˇ gaˬ dui dui-eu zaˬ deuˬ-oˇ, tsawˇ haˬ tiˬ gʼaˬ neh-iˬ naw maꞈ-ahˇ mehˇ shuiˇ taˬ bi shuiˇ tawˆ. Yaw tsaˬ yaw dawˇ jeˬ-ahˇ kʼaˇ mˇ-eu tsawˇ haˬ-aˬ, Ka li tsaˬ-eu dawˇ-eu loꞈ-ehˇ yawˬ ha kʼawꞈ tsaˬ-eu dawˇ-eu meh.

⁸ Iˬ baˇ kʼaˇ mˇ daˆ leꞈ-eu tsawˇ haˬ-aˬ, Nehꞈ sahˬ paˬ-ahˇ taꞈ-eu tsawˇ haˬ meh. Aˬ jeˬ miˇ neh ehˇ naˇ, Nehꞈ sahˬ paˬ-aˬ, aˇ dahˬ beh ngeh neh iˬ baˇ mˇ daˆ laꞈ-euˬ meh. Kʼoeˇ baˬ da neh, Miˬyehˇ-euˬ Zaˬmaˇ oe-euˬ meh. Nehꞈ saˬ paˬ neh mˇ taˬ-euˬ jeˬ-ahˇ laˆ cawˆ-eu gʼaˇ duˬ oe-euˬ jeˬ pyeuꞈ-eu meh.

⁹ Miˬyehˇ-euˬ zaˬ pyeuꞈ laˇ-euˬ tsawˇ haˬ aˬ geuˬ gʼaˬ maˬ kaˬ, iˬ baˇ maˬ paˇ mˇ meh. Aˬ jeˬ miˇ neh ehˇ naˇ, Miˬyehˇ-euˬ seuˆ dzeuꞈ aˬ yawꞈ-euˬ laꞈ kʼoeˇ ahˇ-eu meh. Miˬyehˇ-aˬ, aˬ yawꞈ-euˬ aˬ da pyeuꞈ-eu baˬ da neh, aˬ yawꞈ iˬ baˇ maˬ paˇ mˇ daˆ leꞈ nya meh.

¹⁰ Miˬyehˇ-euˬ zaˬ hawˇ-eu Nehꞈ sahˬ paˬ-euˬ zaˬ yaw kaˬ kʼoeˇ naˆ ni beu gaˇ-eu meh. Yaw tsaˬ yaw dawˇ jeˬ maˬ mˇ-ehˇ, Ka li zaˬ cawˬ cawˬ maˬ gaˬ-eu tsawˇ haˬ-aˬ, Miˬyehˇ-euˬ zaˬ maˬ ngeuˇ-a.

Tiˬ gʼaˬ tiˇ gʼaˬ gaˬ-awˬ

¹¹ Aˇ dahˬ beh ngeh neh naw maꞈ ya gaˬ taˬ-euˬ guiˬ lahˬ dawˬ-aˬ, aˬ dui tiˬ gʼaˬ tiˇ gʼaˬ ya gaˬ meh lehˇ ehˇ-eu kʼoeˇ dawˬ meh.

¹² Aˬ dui-aˬ, Gaˬiˇnaˆ loꞈ-ehˇ maˬ ya gʼeh-a. Aˬ yawꞈ-aˬ, Haiˬ dui dui-eu Gʼaˬ-ahˇ taꞈ-eu tsawˇ haˬ pyeuꞈ-awˇ, aˬ yawꞈ-euˬ aˬ nyiˇ tsi tsi ni gʼeh-eu Aˬbeˬlaˆ-ahˇ sehꞈ-euˬ meh. Aˬ jeˬ miˇ neh yawˬ ha-euˬ aˬ nyiˇ-ahˇ sehꞈ-euˬ ta. Aˬ yawꞈ neh mˇ-euˬ jeˬ lehˬ-awˇ, aˬ yawꞈ-euˬ aˬ nyiˇ neh mˇ-euˬ jeˬ tsaˬ-eu miˇ neh sehꞈ-euˬ meh.

¹³ Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, miˇ tsaˬ zaˬ deuˬ naw maꞈ-ahˇ muiˇ gaˇ taˬ zahˬ leˇ.

¹⁴ Aˬ dui-aˬ, shiˇ-eu jeˬ laꞈ kʼoeˇ neh doˆ dzeuˇ laˇ-awˇ, dehꞈ-eu jeˬ laꞈ kʼoeˇ uˇ keuˆ laˇ taˬ-euˬ ma lehˇ siˬ nya-eu ma. Aˬ dui Ka li zaˬ cawˬ cawˬ gaˬ luꞈ-eu miˇ neh, kʼoeˇ loꞈ-ehˇ ehˇ tsehˆ nya-eu ma. Gʼoeˇ-eu gaˬ-eu jeˬ maˬ ahˇ-eu tsawˇ haˬ-aˬ, shiˇ-eu jeˬ-euˬ baoˬ uˬ moˆ jawˇ luꞈ-a siˬ.

¹⁵ Yawˬ ha-euˬ cawˬ pyeuꞈ-eu Ka li zaˬ deuˬ-ahˇ bye-eu tsawˇ haˬ-aˬ, aˬ cawˬ-ahˇ sehꞈ gaˇ duˇ-eu meh. Aˬ cawˬ-ahˇ sehꞈ-eu tsawˇ haˬ-aˬ, yawˬ ha laꞈ kʼoeˇ mˬ maˬ maˬ byaˆ zaˇ ziˆ dehꞈ-eu jeˬ-ahˇ maˬ za nya-a lehˇ naw maꞈ siˬ nya meh.

¹⁶ Aˬ dui gʼaˇ duˬ Ka li shiˇ dah-euˬ miˇ neh, gʼoeˇ-eu gaˬ-eu jeˬ lehˇ ehˇ-eu-aˬ, kʼoeˇ loꞈ-ehˇ gʼeh gaˇ ehˇ-eu meh lehˇ aˬ dui siˬ nya-eu ma. Aˬ dui kʼawꞈ, aˬ dui-euˬ tsawˇ haˬ pyeuꞈ-eu jah-eu tsawˇ haˬ deuˬ gʼaˇ duˬ shiˇ dah-eu tsaˬ meh.

¹⁷ Smˇ muiˬ smˇ baw tiˬ gʼaˬ-aˬ, shaˬ-eu zahˬ-eu aˬ yuiꞈ aˬ nyiˇ tiˬ gʼaˬ-ahˇ mawˇ luꞈ kʼawꞈ, gʼawˬ shaˬ gaˬ-eu nui ma maˬ ahˇ naˇ, Ka li zaˬ ma lehˇ aˬ joˆ-ehˇ ehˇ nya nmˇ.

¹⁸ Ngaˇ gaˬ dui dui-eu zaˬ deuˬ-oˇ, aˬ dui-euˬ gʼoeˇ-eu gaˬ-eu heu-aˬ, mehˬ boeˬ neh tehꞈ-ehˇ gaˬ-eu jeˬ taˬ bi pyeuꞈ. Maˇ jawˆ ni gʼeh-eu gʼoeˇ-eu gaˬ-eu jeˬ bi pyeuꞈ-awˇ, mˇ-eu shaˇ-eu laꞈ kʼoeˇ bi doˆ laˇ-awˬ.

Miˬyehˇ mehˬ shi nui ma ziꞈ dah ni jaˆ-eu

¹⁹ Aˬ dui-euˬ gʼoeˇ-eu gaˬ-eu jeˬ heu maˇ jawˆ ni gʼeh-eu baˬ da neh, yawˬ ha yaw tsaˬ yaw dawˇ jeˬ-ahˇ taꞈ-eu gaˇ kawˆ yawˬ haˇ yawˬ ha siˬ laˇ tehꞈ-a. Kʼoeˇ baˬ da neh Miˬyehˇ mehˬ shi aˬ dui nui ma ziꞈ dah ni jaˆ tehꞈ-a.

²⁰ Aˬ dui-euˬ nui ma aˬ dui-ahˇ iˬ baˇ taˬ kʼaˇ za ngeh, Miˬyehˇ-aˬ, aˬ dui-euˬ nui ma naˆ maˬ tseˇ huiˬ dzehˬ mahˇ dzehˬ-awˇ dawˬ tawˆ luꞈ-ahˇ siˬ nya meh lehˇ aˬ dui noeˬ duˬ kʼaˇ za-eu ma.

²¹ Kʼoeˇ miˇ neh ngaˇ gaˬ dui dui-eu cawˬ deuˬ-oˇ, aˬ dui-euˬ nui ma aˬ dui-ahˇ iˬ baˇ taˬ kʼaˇ maˬ za naˇ, Miˬyehˇ mehˬ shi aˬ dui nui ma ziꞈ dah ni jaˆ-eu ma.

²² Aˬ yawꞈ-euˬ dawˬ-ahˇ aˬ dui naˇ haꞈ geuꞈ-awˇ, aˬ yawꞈ nui kʼahˇ shiˇ-eu jeˬ aˬ dui mˇ-eu miˇ neh, aˬ yawꞈ-ahˇ kʼaˇ shaˇ-eu jeˬ aˬ dui za-eu ma.

²³ Aˬ yawꞈ neh aˬ dui-ahˇ biꞈ-euˬ dawˬ-aˬ, aˬ yawꞈ-euˬ Zaˬmaˇ Yeˬsuˇ Ka li-ahˇ jah-awˇ, Ka li neh dawˬ biꞈ taˬ-euˬ loꞈ-ehˇ tiˬ gʼaˬ tiˇ gʼaˬ gaˬ-awˬ lehˇ ehˇ-eu kʼoeˇ dawˬ meh.

²⁴ Miˬyehˇ neh biꞈ-euˬ dawˬ-ahˇ kʼaˇ naˇ haˬ geuꞈ-eu tsawˇ haˬ-aˬ, Miˬyehˇ-euˬ laꞈ kʼoeˇ jawˇ-eu tsawˇ haˬ pyeuꞈ-awˇ, Miˬyehˇ kʼawꞈ, aˬ yawꞈ-euˬ laꞈ kʼoeˇ jawˇ-eu meh. Miˬyehˇ neh biꞈ leꞈ-euˬ Yaw sahˇ Miˬyehˇ baˬ da neh, Miˬyehˇ a dui-euˬ laꞈ kʼoeˇ jawˇ meh lehˇ aˬ dui siˬ duˬ-eu ma.