1 Tiˆmoˇseˬ 6 - Akha

¹ Miˬyehˇ-euˬ tsawˇ myahˇ-ahˇ maˬ ehˇ, aˬ dui neh mehˬ-euˬ tsoˆ-euˬ jeˬ-ahˇ maˬ ehˇ, tsawˇ haˬ tiˬ gʼaˬ-iˬ yaw doeˇ maˬ ya ehˇ ni, aˬ cawˬ-euˬ zaˬ kʼaˆ kʼaˇ geuꞈ luꞈ-eu tsawˇ haˬ dawˬ tawˆ luꞈ yawˬ ha-euˬ baw leˬ-ahˇ yaw zeu ya baw-eu gaˇ kawˆ siˬ nya paˬ-ehˇ gʼeh-eu meh.

² Ka li zaˬ pyeuꞈ-eu baw leˬ deuˬ-euˬ zaˬ kʼaˆ geuꞈ luꞈ-eu deuˬ-aˬ, yaw ha-euˬ baw leˬ-ahˇ yehˬ bawˬ sehˇ lu-ehˇ gʼeh-eu maˬ tsaˬ-a. Aˬ jeˬ miˇ neh ehˇ naˇ, aˬ yawꞈ maꞈ-aˬ, yawˬ ha baw leˬ-euˬ aˬ yuiꞈ aˬ nyiˇ pyeuꞈ laˇ-euˬ meh. Kʼoeˇ uˬ taꞈ, baw leˬ deuˬ-euˬ gaˇ-ahˇ aˬ cawˬ naˆ maˬ tseˇ leh jeh-awˇ mˇ nehˬ paˬ-ehˇ gʼeh-eu meh. Aˬ jeˬ miˇ neh ehˇ naˇ, aˬ yawꞈ maꞈ mˇ cu luꞈ-eu kʼoeˇ-aˬ, aˬ yawꞈ maꞈ gaˬ-eu Ka li-ahˇ jah-eu tsawˇ haˬ deuˬ-ahˇ mˇ cu-eu jeˬ pyeuꞈ-eu meh. Gaˇ kawˆ heu deuˬ nawˇ mehˬ nehˬ tsoˆ nehˬ-awˇ gʼaˬ biꞈ-awˬ.

Maˬ ngeuˇ-eu mehˬ-eu tsoˆ-eu jeˬ hawˇ-eu maˇ maˇ ni smˇ muiˬ muiˬ-eu jeˬ

³ Aˬ dui-euˬ Sahˬpaˬ Yeˬsuˇ Ka li-euˬ dawˬ hawˇ-eu, aˬ dui-euˬ uˬ duˬ tahˬ-eu zahˇ sahˇ kʼoꞈ laꞈ kʼoeˇ mehˬ taˬ tsoˆ taˬ-euˬ gaˇ maˬ tsaˬ leˇ-eu, beu gaˇ-eu jah-eu jeˬ gaˇ kawˆ kʼaˇ mehˬ-eu tsawˇ haˬ deuˬ-aˬ,

⁴ nui ma huiˬ dui taˬ-awˇ, tiˬ jeˬ-iˬ maˬ siˬ nya-eu tsawˇ haˬ pyeuꞈ-eu meh. Dawˬ gaˇ kawˆ tsawˇ pyehˇ pyehˇ-awˇ ja dzaˬ mawꞈ-eu nui ma ahˇ-eu meh. Kʼoeˇ miˇ neh, myaˆ naˆ-eu, ceh dzaˬ-eu, ja bu ja doeˇ-eu, aˬ cawˬ-ahˇ yaw doeˇ jahˇ mawꞈ-eu, heu loꞈ-ehˇ gʼeh-eu jeˬ bi doˆ laˇ-eu meh.

⁵ Kʼoeˇ uˬ taꞈ, shaˇ noeˬ shaˇ sawˇ nya-eu nui ma byoˆ-iˇ-awˇ, yaw tsaˬ yaw dawˇ jeˬ maˬ paˇ ahˇ-euˬ tsawˇ haˬ deuˬ yaw kaˬ maˬ tsehˆ leˇ ni dawˬ ja bi doˆ laˇ-eu meh. Uˬ duˬ tahˬ-eu zahˇ sahˇ kʼoꞈ-aˬ, tsawˇ haˬ-ahˇ smˇ muiˬ bi muiˬ laˇ-eu jeˬ pyeuꞈ-eu meh lehˇ aˬ yawꞈ maꞈ noeˬ-eu meh.

⁶ Ngeuˇ tehꞈ-a. Tsawˇ haˬ tiˬ gʼaˬ yawˬ ha kʼaˇ jaˆ-eu myaˆ ni nui kʼahˇ shiˇ coeˇ naˇ, uˬ duˬ tahˬ-eu zahˇ sahˇ kʼoꞈ-aˬ, aˬ yawꞈ-ahˇ smˇ muiˬ bi muiˬ laˇ tehꞈ-a.

⁷ Aˬ dui miˇ tsaˬ kʼoeˇ taˆ dehꞈ le ngeh tiˬ jeˬ-iˬ maˬ yuˇ leꞈ-ehˇ, shiˇ ngeh kʼawꞈ tiˬ jeˬ-iˬ maˬ yuˇ gʼeh nya-a.

⁸ Toˆ-ehˇ ngeuˇ naˇ, dzaˬ dzaˬ dawˇ dawˇ hawˇ-eu dm gʼaˬ dm lmˇ jaˆ naˇ, aˬ dui gʼaˇ duˬ maˬ gʼaˬ-a siˬ loˇ.

⁹ Ehˇ kʼawꞈ, smˇ muiˬ muiˬ laˇ mawꞈ-eu tsawˇ haˬ deuˬ-aˬ, muˇ juˇ juˇ-eu jeˬ laꞈ kʼoeˇ ga ahˇ-awˇ, luꞈ-iˇ seˇ-iˇ-eu jeˬ laꞈ kʼoeˇ aˬ yawꞈ maꞈ-ahˇ gʼeu ahˇ-eu jeˬ pyeuꞈ-eu, luˬ-eu seˇ-eu lahˇ ju-ahˇ paꞈ leˇ-eu meh.

¹⁰ Aˬ jeˬ miˇ neh ehˇ naˇ, pyuˇ-ahˇ mehˇ juiˇ juiˇ-eu nui ma-aˬ, yaw haiˬ jeˬ dawˬ tawˆ luꞈ-euˬ dawˬ pehˬ duˬ puˇ pyeuꞈ-eu meh. Tiˬ paˆ na deuˬ-aˬ, pyuˇ-ahˇ nui kʼahˇ jaˆ-eu miˇ neh jah-eu jeˬ-ahˇ gaˇ mahˇ kaˬ dui dui-iˇ-awˇ, noeˬ shaˬ-eu gʼawˬ mya jeˬ ciˬ tehˬ-eu baˬ da neh nui ma tsawˬ paˆ gaˇ keuˆ-eu meh.

Tiˆmoˇseˬ-ahˇ mehˬ-eu tsoˆ-eu dawˬ

¹¹ Ehˇ kʼawꞈ, Miˬyehˇ-euˬ tsawˇ haˬ pyeuꞈ-eu nawˇ-aˬ, heu deuˬ dawˬ tawˆ luꞈ-ahˇ gaˇ jaw jaw-awˬ. Yaw tsaˬ yaw dawˇ jeˬ, Miˬyehˇ-ahˇ yaw zeu baw-eu jeˬ, jah-eu jeˬ, gʼoeˇ-eu gaˬ-eu jeˬ, daˬ coeˇ oˇ coeˇ-eu jeˬ, nui nahˬ nui yu ahˇ-eu jeˬ, heu deuˬ-ahˇ leh jeh dui dui-awˬ.

¹² Yawˬ ha-euˬ gʼaˇ duˬ mˬ maˬ maˬ byaˆ zaˇ ziˇ dehꞈ-eu jeˬ-ahˇ za nya ni, jah-eu jeˬ laꞈ kʼoeˇ kʼaˇ gʼeh nya-eu loꞈ-ehˇ deuˆ ceh ceh-awˬ. Miˬyehˇ neh nawˬ-ahˇ kuˇ-awˇ, tsawˇ haˬ gʼawˬ mya ni mehˬ shi, nawˬ-euˬ jah-eu jeˬ-ahˇ nawˇ ziꞈ dah ni dehꞈ mehˬ-euˬ kʼoeˇ-aˬ, mˬ maˬ maˬ byaˆ zaˇ ziˇ dehꞈ-eu jeˬ gʼaˇ duˬ meh.

¹³ Yawˬ jeˬ na luꞈ-ahˇ dehꞈ-eu saꞈ laˇ biꞈ-euˬ gʼaˬ pyeuꞈ-eu Miˬyehˇ mehˬ shi hawˇ-eu, sahˬ paˬ Boˬtiˆ Piˇlaˆ-ahˇ jah-eu jeˬ ziꞈ dah ni mehˬ nehˬ-euˬ gʼaˬ pyeuꞈ-eu Yeˬsuˇ Ka li mehˬ shi, ngaˇ nawˬ-ahˇ dawˬ heu loꞈ-ehˇ biꞈ-eu ma.

¹⁴ Nawˬ-ahˇ biꞈ taˬ-euˬ dawˬ deuˬ-ahˇ naˇ haˬ geuꞈ-awˇ, Sahˬpaˬ Yeˬsuˇ Ka li oe-eu aˇ nah-ahˇ keuˆ ni ziꞈ dah ni tuˆ tehˬ taˬ-awˬ.

¹⁵ Dawˬ tawˆ luꞈ kʼoeˇ taˆ tiˬ gʼaˬ tehꞈ-ehˇ uˆ lahˇ luꞈ-eu guiˬ lahˬ huiˬ-eu Uˆ lahˇ-eu gʼaˬ pyeuꞈ-awˇ, sahˬ paˬ kʼoeˇ taˆ Sahˬpaˬ, sahˬ ma kʼoeˇ taˆ Sahˬma pyeuꞈ-eu Miˬyehˇ-aˬ, aˬ yawꞈ-ahˇ aˇ yamˬ tsaˬ ngeh bi oe tehꞈ-a.

¹⁶ Aˬ yawꞈ tiˬ gʼaˬ tehꞈ-ehˇ mˬ maˬ maˬ byaˆ zaˇ ziˇ dehꞈ-awˇ, tsawˇ haˬ tiˬ gʼaˬ-iˬ maˬ tah tehˬ leˇ nya-eu yaw shehꞈ laꞈ kʼoeˇ aˬ yawꞈ jawˇ-eu meh. Tsawˇ haˬ tiˬ gʼaˬ-iˬ aˬ yawꞈ-ahˇ maˬ mawˇ haw-aˬ. Tsawˇ haˬ tiˬ gʼaˬ-iˬ aˬ yawꞈ-ahˇ tiˬ jawˇ-iˬ maˬ mawˇ nya-a. Taˬ huiˬ taˬ mahˇ nehˬ-eu jeˬ hawˇ-eu mˬ maˬ maˬ byaˆ zaˇ ziˇ uˆ lahˇ-eu baoˬ aˬ yawꞈ-ahˇ jaˆ luꞈ-uˇ.

¹⁷ Miˇ tsaˬ heu kʼoeˇ taˆ dehꞈ ngeh smˇ muiˬ muiˬ-eu tsawˇ haˬ deuˬ-ahˇ nui ma taˬ huiˬ lehˇ ehˇ nehˬ-awˬ. Yaw duˬ maˬ baw-eu pyuˇ shuiˇ myawˬ gahˬ deuˬ-ahˇ maˬ noeˬ tmˬ-ehˇ, aˬ dui laˬ kʼaˬ ya cehˇ ni yawˬ jeˬ na luꞈ tiˬ byah tiˬ loꞈ biꞈ laˬ-eu gʼaˬ pyeuꞈ-eu Miˬyehˇ-ahˇ noeˬ tmˬ-awˬ lehˇ mehˬ nehˬ-awˬ.

¹⁸ Aˬ cawˬ gʼaˇ duˬ yaw muiˬ jeˬ mˇ-eu, muiˬ-eu gaˇ gʼawˬ mya jeˬ mˇ-eu, tsawˇ tsiˇ maˬ tsiˇ ni damˬ nehˬ-eu, aˬ cawˬ-ahˇ caw ba nehˬ-eu, heu loꞈ-ehˇ gʼeh-eu deuˬ-ahˇ mˇ-awˬ lehˇ aˬ yawꞈ maꞈ-ahˇ mehˬ nehˬ-awˬ.

¹⁹ Kʼoeˇ loꞈ-ehˇ mˇ-eu kʼoeˇ-aˬ, aˬ kaˇ kaˇ ziˇ gʼaˇ duˬ ziꞈ dah ni gʼeh-eu pyuˇ shuiˇ myawˬ gahˬ jeˬ hmˬ taˬ gaˇ duˇ-awˇ, maˇ maˇ ni gʼeh-eu dehꞈ-eu jeˬ-ahˇ aˬ yawꞈ maꞈ za tehꞈ-a.

²⁰ Tiˆmoˇseˬ-oˇ, nawˬ-ahˇ a nehˬ taˬ-euˬ jeˬ-ahˇ yaw muiˬ paˬ-ehˇ jeˬ hmˬ bo saˆ-awˬ. Gaˇ dahˇ maˬ tsoeˬ-eu jeˬ ngehˬ-eu tmˇ-eu jeˬ-ahˇ maˬ ehˇ, tsawˇ haˬ tiˬ paˆ na deuˬ neh “Zaˬ siˬ tawˇ gahˇ” lehˇ maˬ ngeuˇ gaˇ myahˇ lehˬ taˬ-euˬ tsawˇ pyehˇ pyehˇ-eu jeˬ-ahˇ maˬ ehˇ, gaˇ jaw jaw-awˬ.

²¹ Aˬ jeˬ miˇ neh ehˇ naˇ, tsawˇ haˬ tiˬ paˆ na deuˬ zaˬ siˬ tsawˇ gahˇ kʼoeˇ ahˇ ma lehˇ ehˇ-awˇ, jah-eu jeˬ-ahˇ gaˇ mahˇ kaˬ-iˇ-euˬ meh. Miˬyehˇ-euˬ guiˬ lahˬ yaw dzahˇ nawˬ-euˬ kʼoeˇ taˆ jaˆ luꞈ-uˇ.