1 Tiˆmoˇseˬ 5 - Akha

Jah-eu tsawˇ haˬ deuˬ-ahˇ mˇ nehˬ paˬ-ehˇ gʼeh-eu jeˬ

¹ Tsawˇ mawˬ tsawˇ kʼaˆ-ahˇ dehˬ dehˬ-ehˇ taˬ mehˬ. Yawˬ ha-euˬ aˬ da loꞈ-ehˇsawˇ-awˇ nahˬ yu ni mehˬ nehˬ tsoˆ nehˬ-awˬ. Zaˬ guˬ deuˬ-ahˇ yawˬ ha-euˬ mehˇ nmˇ loꞈ-ehˇ sawˇ-awˬ.

² Tsawˇ mawˬ mawˬ laˇ-euˬ zaˬ miˬ zaˬ deuˬ-ahˇ yawˬ ha-euˬ aˬ ma loꞈ-ehˇ sawˇ-awˬ. Zaˬ miˬ aˬ buˇ zaˬ guˬ deuˬ-ahˇ nui ma shawˇ jehˆ ni taˬ-eu laꞈ kʼoeˇ yawˬ ha-euˬ dmˇ ma loꞈ-ehˇ sawˇ-awˬ.

³ Ngehˬ gʼeh nehˬ-eu gʼaˬ maˬ jawˇ-eu miˬ coeˬ miˬ ma deuˬ-ahˇ yaw zeu baw-awˬ.

⁴ Ehˇ kʼawꞈ, miˬ coeˬ miˬ ma tiˬ gʼaˬ zaˬ hawˇ-eu oeˬ paˬ oeˬ ma jawˇ naˇ, uˬ duˬ tahˬ-eu zahˇ sahˇ kʼoꞈ-ahˇ taꞈ leˇ-awˇ, aˬ yawꞈ maꞈ yawˬ ha-euˬ nymˇ jiˇ-ahˇ mˇ nehˬ paˬ-ehˇ gʼeh-eu jeˬ-ahˇ jeˬ huˬ mˇ dzaw-eu tsaˬ meh. Aˬ jeˬ miˇ neh ehˇ naˇ, kʼoeˇ-aˬ, aˬ ma aˬ da, aˬ piˬ aˬ bawˇ deuˬ-ahˇ guiˬ lahˬ jahˇ kʼoꞈ nehˬ-eu jeˬ pyeuꞈ-awˇ, Miˬyehˇ nui ma tsaˬ-eu jeˬ pyeuꞈ-eu meh.

⁵ Ngehˬ gʼeh caw ba nehˬ-eu gʼaˬ maˬ baw ni yawˬ ha tiˬ gʼaˬ tehꞈ-ehˇ jawˇ-eu miˬ coeˬ miˬ ma-aˬ, Miˬyehˇ tiˬ gʼaˬ-ahˇ tehꞈ-ehˇ noeˬ tmˬ kʼaˇ za-awˇ, uˬ ciꞈ nah gʼahˇ maˬ ehˇ caw ba nehˬ laꞈ lehˇ guiˬ lahˬ shaˇ-eu meh.

⁶ Ehˇ kʼawꞈ, byawˬ gʼa mo gʼa-eu jeˬ mehˬ nah dehꞈ gʼeh luꞈ-eu miˬ coeˬ miˬ ma-aˬ, dehꞈ luꞈ kʼawꞈ shiˇ-euˬ gaˇ duˇ-eu meh.

⁷ Aˬ yawꞈ maꞈ-ahˇ aˬ cawˬ iˬ baˇ taˬ kʼaˇ maˬ za ni heu loꞈ-ehˇ mehˬ nehˬ tsoˆ nehˬ-awˬ.

⁸ Tsawˇ haˬ tiˬ gʼaˬ na, yawˬ ha-euˬ aˬ yuiꞈ aˬ nyiˇ-ahˇ ngehˬ maˬ gʼeh-eu uˬ taꞈ, kʼoeˇ naˆ maˬ tseˇ, yawˬ ha-euˬ nymˇ jiˇ-ahˇ keuˆ ni ngehˬ maˬ gʼeh naˇ, jah-eu jeˬ-ahˇ byehˇ dzeh-euˬ gaˇ duˇ-awˇ, Ka li-ahˇ maˬ jah-eu tsawˇ haˬ deuˬ naˆ maˬ tseˇ doeˇ dui dui-eu meh.

⁹ Aˇ kʼoꞈ koꞈ tseˇ dzehˬ-iˇ-euˬ miˬ coeˬ miˬ ma deuˬ hawˇ-eu, tiˬ zahˇ tehꞈ-ehˇ iˇ haw-euˬ mi coeˬ miˬ ma deuˬ-ahˇ maˬ ngeuˇ naˇ, maˇ maˇ ni miˬ coeˬ miˬ ma meh lehˇ maˬ sawˇ nya-a.

¹⁰ Kʼoeˇ uˬ taꞈ, yaw muiˬ jeˬ heu loꞈ-ehˇ mˇ taˬ-euˬ jaˆ-eu tsawˇ haˬ ya bi pyeuꞈ meh. Yawˬ ha-euˬ zaˬ deuˬ-ahˇ yaw muiˬ paˬ-ehˇ bo saˆ huiˬ-eu, daˬ yah-ahˇ yaw muiˬ-ehˇ ha-eu, Ka li zaˬ deuˬ gʼaˇ duˬ nyiˇ-eu teˬ-eu gaˇ deuˬ mˇ nehˬ-eu, shaˬ laˇ zahˬ laˇ-euˬ deuˬ-ahˇ caw ba-eu, yaw muiˬ jeˬ-ahˇ gʼaˬ byehˆ maˬ byehˆ ni mˇ-eu, heu loꞈ-ehˇ gʼeh-eu gaˇ deuˬ-ahˇ mˇ-eu tsawˇ haˬ ya bi pyeuꞈ-eu meh.

¹¹ Ehˇ kʼawꞈ, aˇ kʼoꞈ maˬ kʼawˆ laˇ-euˬ miˬ coeˬ miˬ ma deuˬ-ahˇ, miˬ coeˬ miˬ ma meh lehˇ maˬ sawˇ tsehˆ nya-a. Aˬ jeˬ miˇ neh ehˇ naˇ, aˬ yawꞈ maꞈ dahˬ dzaˬ-iˇ mawꞈ laˇ ngeh,

¹² aˬ yawꞈ maꞈ neh yaw beh dzaˬ taˬ-euˬ saˇ jaˇ-ahˇ puiˬ-eu jeˬ pyeuꞈ-eu miˇ neh, iˬ baˇ ahˇ-eu meh.

¹³ Tiˬ nymˇ saˇ-iˬ tiˬ nymˇ cah cah-ehˇ aˇ yamˬ gʼa jiˇ-eu jeˬ aˬ yawꞈ maꞈ mˇ nya laˇ-eu meh. Kʼoeˇ naˆ maˬ tseˇ doeˇ-eu jeˬ pyeuꞈ-eu, aˬ cawˬ gaˇ kawˆ maˬ ja paˬ-ehˇ gʼeh-eu jeˬ-ahˇ keuˆ ni ja ja-ehˇ cah-eu jeˬ-ahˇ mˇ nya laˇ-eu meh.

¹⁴ Kʼoeˇ miˇ neh, aˬ dui-ahˇ muiˇ-eu deuˬ aˬ dui-euˬ gaˇ kawˆ ja bu ja doeˇ kʼaˇ maˬ bi za ni, aˇ kʼoꞈ maˬ kʼawˆ laˇ-euˬ zaˬ miˬ zaˬ deuˬ bi dahˬ dzaˬ-iˇ-awˇ, zaˬ ciˬ zaˬ cu mˇ-eu laꞈ kʼoeˇ yawˬ ha-euˬ nymˇ jiˇ-ahˇ bo saˆ-eu jeˬ-ahˇ ngaˇ geuꞈ mawꞈ-eu ma.

¹⁵ Aˬ jeˬ miˇ neh ehˇ naˇ, miˬ coeˬ miˬ ma tiˬ paˆ na deuˬ nehꞈ Saˬdaˬ mehˬ nah caw teh gʼeh dzeuˇ-euˬ meh.

¹⁶ Ehˇ kʼawꞈ, Ka li zaˬ zaˬ miˬ zaˬ tiˬ gʼaˬ na, yawˬ ha-euˬ nymˇ jiˇ laꞈ kʼoeˇ miˬ coeˬ miˬ ma deuˬ jawˇ naˇ, Ka li zaˬ aˇ muˇ-ahˇ maˬ bi daˇ ni miˬ coeˬ miˬ ma kʼoeˇ deuˬ-ahˇ yawˬ haˇ yawˬ ha cu-eu tsaˬ tehꞈ-a. Kʼoeˇ loꞈ-ehˇ ngeuˇ naˇ, Ka li zaˬ aˇ muˇ-aˬ, caw ba ngehˬ gʼeh nehˬ-eu gʼaˬ maˬ jawˇ-eu miˬ coeˬ miˬ ma deuˬ-ahˇ yaw muiˬ paˬ-ehˇ ngehˬ gʼeh nehˬ nya tehꞈ-a.

¹⁷ Ka li zaˬ aˇ muˇ-ahˇ sheuˬ gʼeh-eu gaˇ yaw muiˬ paˬ-ehˇ mˇ luꞈ-eu tsawˇ mawˬ tsawˇ kʼaˆ deuˬ-ahˇ nyiˬ bymˇ taˬ huiˬ nehˬ paˬ-ehˇ gʼeh tehꞈ-a. Aꞈ yawꞈ maꞈ laꞈ kʼoeˇ, dawˬ mehˬ mehˬ-eu hawˇ-eu mehˬ-eu tsoˆ-eu jeˬ-ahˇ yaw kʼaˆ-ehˇ leh jeh-awˇ mˇ-eu deuˬ-ahˇ, kʼoeˇ naˆ maˬ tseˇ taˬ huiˬ nehˬ paˬ-ehˇ gʼeh tehꞈ-a.

¹⁸ Aˬ jeˬ miˇ neh ehˇ naˇ, Jaˇliꞈ laꞈ kʼoeˇ “Cehˇ nawˬ luꞈ-eu mawˇ neˇ-ahˇ mehˬ tsahˬ maˬ ya tsahˬ-a” lehˇ ehˇ taˬ-euˬ uˬ taꞈ, “Gaˇ mˇ-eu tsawˇ haˬ-ahˇ gʼaˬ gaˇ poeˬ ya biꞈ meh” lehˇ ehˇ taˬ-euˬ meh.

¹⁹ Siˬ duˬ mawˇ duˬ-euˬ tsawˇ kaˬ kʼaˇ teˬ-eu nyiˬ gʼaˬ maˬ jawˇ naˇ, aˬ yuiꞈ aˬ tsu kʼoeˇ taˆ iˬ baˇ taˬ-eu dawˬ-ahˇ naˇ haˬ-eu maˬ tsaˬ-a.

²⁰ Tsawˇ haˬ dawˬ tawˆ luꞈ noeˬ guˆ-awˇ yahˇ nya laˇ ni, iˬ baˇ mˇ-euˬ tsawˇ haˬ-ahˇ dawˬ tawˆ luꞈ-euˬ mehˬ shi dehˬ-awˬ.

²¹ Nawˇ kʼaˇ mˇ kʼaˇ shaˇ-eu yawˬ jeˬ na luꞈ laꞈ kʼoeˇ myaˆ pyawˬ huiˬ nyiˇ maˬ tseˇ ni, ngaˬ neh mehˬ-euˬ tsoˆ-euˬ dawˬ heu deuˬ-ahˇ yaw muiˬ paˬ-ehˇ naˇ haˬ geuꞈ-awˬ lehˇ, Miˬyehˇ hawˇ-eu Yeˬsuˇ Ka li mehˬ shi, muiˬ-eu shawˇ-eu mˬ taˆ gʼaˬ kʼehˇ deuˬ-euˬ mehˬ shi, ngaˇ nawˬ-ahˇ naꞈ suiˇ ni ehˇ-eu ma.

²² Sahˬpaˬ Miˬyehˇ-euˬ gaˇ mˇ-eu lehˇ noeˬ tsehˆ-awˇ gʼawˇ mawˇ a nehˬ-euˬ tsawˇ haˬ kʼoeˇ taˆ aˬ laꞈ baꞈ daˆ nehˬ-eu taˬ tehˬ. Aˬ cawˬ iˬ baˇ mˇ gaˇ maˬ ahˇ leˇ ni yawˬ haˇ yawˬ ha shawˇ jehˆ ni dehꞈ-awˬ.

²³ Nawˇ tiˬ kʼehˬ maˬ taˬ ni jawˇ saˇ maˬ doˆ-eu miˇ neh nawˬ-euˬ uˬ maˆ naˇ-eu maˬ gaˇ laˇ ni, iˇ cuꞈ tehꞈ-ehˇ maˬ dawˇ-ehˇ aˬ gaꞈ dzaˇ uiˇ kʼawꞈ ui cuiˆ na dawˇ-eu tsaˬ meh.

²⁴ Tsawˇ haˬ tiˬ paˆ na deuˬ-euˬ iˬ baˇ-aˬ, bya cehˆ ni mawˇ laˇ-awˇ, iˬ baˇ kʼoeˇ aˬ yawꞈ maꞈ-ahˇ yaˇ kʼaˬ daˇ gaˇ sheuˬ gʼeh-eu meh.

²⁵ Ehˇ kʼawꞈ, tiˬ paˆ na deuˬ-euˬ iˬ baˇ-aˬ, aˇ nah ba hawˇ-eu siˬ laˇ mawˇ laˇ-eu meh. Kʼoeˇ gaˇ duˇ ni, yaw muiˬ jeˬ mˇ-eu-aˬ, aˬ cawˬ-ahˇ bya cehˆ ni siˬ leˇ mawˇ leˇ-eu meh. Aˬ cawˬ-ahˇ maˬ siˬ maˬ mawˇ leˇ dah-euˬ deuˬ kʼawꞈ, gʼawˬ myahˇ ni maˬ dehˬ kaˬ zaꞈ nya-a.