1 Tiˆmoˇseˬ 4 - Akha

Maˬ ngeuˇ-eu mehˬ-eu tsoˆ-eu saˬ laˬ deuˬ

¹ Aˇ nah aˇ nah-ehˇ, tsawˇ haˬ tiˬ paˆ na deuˬ jah-eu jeˬ-ahˇ byehˇ dzeh tehꞈ-a lehˇ Yaw sahˇ Miˬyehˇ ehˇ-eu meh. Jaˬ myawꞈ myawꞈ-eu yaw sahˇ deuˬ-euˬ dawˬ-ahˇ aˬ yawꞈ maꞈ naˇ haˬ-awˇ, nehꞈ mehˬ-eu tsoˆ-eu mehˬ nah caw teh gʼeh tehꞈ-a.

² Mehˬ-eu tsoˆ-eu kʼoeˇ jeˬ-aˬ, miˬ dzaˬ doꞈ-eu shmˇ neh bi puiˆ sehꞈ-euˬ baˬ da neh siˬ nya-eu nui ma shiˇ-euˬ jaˬ myawꞈ mehˇ shuiˇ kʼoeˇ deuˬ neh mehˬ byah taˬ-euˬ meh.

³ Sheuˬ dahˬ dzaˬ taꞈ-eu maˬ tsaˬ-a lehˇ mehˬ-eu uˬ taꞈ, dzaˬ dzaˬ dawˇ dawˇ tiˬ paˆ na deuˬ-ahˇ maˬ dzaˬ kʼmˬ-a lehˇ aˬ yawꞈ maꞈ mehˬ-eu meh. Ehˇ kʼawꞈ, dzaˬ dzaˬ dawˇ dawˇ kʼoeˇ deuˬ-aˬ, yaw tsaˬ yaw dawˇ jeˬ-ahˇ siˬ nya laˇ-euˬ tsawˇ haˬ deuˬ Miˬyehˇ-euˬ guiˬ lahˬ-ahˇ ja ceuˬ gʼaˬ-awˇ bi dzaˬ-eu gʼaˇ duˬ Miˬyehˇ neh beh taˬ-euˬ meh.

⁴ Miˬyehˇ neh kʼaˇ beh taˬ-euˬ yawˬ jeˬ na luꞈ, yaw muiˬ jeˬ pyeuꞈ-eu meh. Biˬ dzeh-eu jeˬ maˬ ahˇ-a. Yawˬ jeˬ na luꞈ-ahˇ Miˬyehˇ-euˬ guiˬ lahˬ-ahˇ ja ceuˬ-awˇ dzaˬ nya dawˇ nya-eu meh.

⁵ Aˬ jeˬ miˇ neh ehˇ naˇ, Miˬyehˇ-euˬ dawˬ kawˬ hawˇ-eu Miˬyehˇ-ahˇ guiˬ lahˬ shaˇ-eu jeˬ-aˬ, yawˬ jeˬ na luꞈ-ahˇ Miˬyehˇ ha geuꞈ nya-eu jeˬ bi pyeuꞈ laˇ-eu meh.

Yeˬsuˇ Ka li-euˬ muiˬ-eu zaˬ kʼaˆ

⁶ Gaˇ kawˆ heu deuˬ aˬ yuiꞈ aˬ nyiˇ Ka li zaˬ deuˬ-ahˇ nawˇ mehˬ nehˬ naˇ, nawˇ-aˬ, nawˬ neh caw teh gʼeh-euˬ jah-eu jeˬ-ahˇ taꞈ-eu yaw tsaˬ yaw dawˇ jeˬ laꞈ kʼoeˇ hawˇ-eu muiˬ dui dui-eu mehˬ-eu tsoˆ-eu dawˬ deuˬ laꞈ kʼoeˇ huiˬ laˇ-euˬ, Yeˬsuˇ Ka li-euˬ muiˬ-eu zaˬ kʼaˆ tiˬ gʼaˬ pyeuꞈ tehꞈ-a.

⁷ Miˬyehˇ-ahˇ yaw zeu baw-eu jeˬ maˬ ahˇ-eu ja mahˇ maˬ tsahˇ-eu aˬ poeˬ dawˬ oeˇ deuˬ-ahˇ maˬ naˇ haˬ ni, Miˬyehˇ-ahˇ yaw zeu baw-eu jeˬ laꞈ kʼoeˇ bym laˇ byehˆ laˇ ni mˇ dzaw shaˇ dzaw tehˇ tehˬ-awˬ.

⁸ Shiˬ shaˬ jiˇ gʼawˇ mawˇ gʼaˬ ahˇ laˇ ni jahˇ dzaw-eu jeˬ-aˬ, gaˇ dahˇ ui cuiˆ tsoeˬ-eu tehꞈ meh. Ehˇ kʼawꞈ, saꞈ laˇ paw gʼaˬ ahˇ laˇ ni mˇ dzaw shaˇ dzaw-eu jeˬ-aˬ, yawˬ paw na luꞈ gaˇ dahˇ tsoeˬ-eu meh. Aˬ jeˬ miˇ neh ehˇ naˇ, kʼoeˇ-aˬ, heu ziˇ gʼaˇ duˬ maˬ ehˇ, aˬ kaˇ kaˇ ziˇ gʼaˇ duˬ maˬ ehˇ, gaˇ dahˇ tsoeˬ-eu yaw duˬ baw meh.

⁹ Dawˬ heu dawˬ-aˬ, yaw muiˬ paˬ-ehˇ naˇ haˬ geuꞈ-awˇ jah paˬ-ehˇ gʼeh-eu tsaˬ dui dui-eu dawˬ meh.

¹⁰ Aˬ dui-aˬ, leh jeh leh jeh-ehˇ gaˇ mˇ dui dui luꞈ-eu ma. Aˬ jeˬ miˇ neh ehˇ naˇ, dehꞈ luꞈ-eu Miˬyehˇ-ahˇ aˬ dui noeˬ tmˬ taˬ-euˬ ma. Aˬ yawꞈ-aˬ, tsawˇ haˬ dawˬ tawˆ luꞈ-ahˇ ka kʼoꞈ-eu gʼaˬ pyeuꞈ-awˇ, aˬ cawˬ-ahˇ naˆ maˬ tseˇ jah-eu tsawˇ haˬ deuˬ-ahˇ ka kʼoꞈ-eu meh.

¹¹ Aˬ yawꞈ maꞈ-ahˇ heu loꞈ-ehˇ dawˬ biꞈ-awˇ mehˬ nehˬ tsoˆ nehˬ-awˬ.

¹² Nawˇ zaˬ guˬ pyeuꞈ-eu miˇ neh, aˬ cawˬ neh yehˬ bawˬ sehˇ lu-ehˇ maˬ ya bi ehˇ ni yahˇ-awˬ. Kʼoeˇ uˬ taꞈ, ngehˬ-eu tmˇ-eu, dehꞈ-eu jawˇ-eu, gʼoeˇ-eu gaˬ-eu, jah-eu, muiˬ-eu shawˇ-eu, heu deuˬ laꞈ kʼoeˇ, jah-eu tsawˇ haˬ deuˬ nawˬ-ahˇ bi dzaw geuꞈ paˬ-ehˇ dehꞈ-awˬ.

¹³ Ngaˇ laˇ keuˆ ngeh keuˆ ni, nawˬ-euˬ aˇ yamˬ hawˇ-eu gʼaˬ dawˬ tawˆ luꞈ, tsawˇ haˬ aˇ maꞈ-ahˇ Jaˇliꞈ gui mehˬ-eu, dawˬ mehˬ mehˬ-eu, mehˬ nehˬ tsoˆ nehˬ-eu, heu deuˬ-euˬ gʼaˇ duˬ zmˬ-awˬ.

¹⁴ Miˬyehˇ gʼaˇ duˬ ngehˬ dah-eu deuˬ neh dawˬ ngehˬ gʼeh-awˇ Ka li zaˬ aˇ muˇ-euˬ aˬ yuiꞈ aˬ tsu deuˬ nawˬ-euˬ kʼoeˇ taˆ aˬ laꞈ baꞈ daˆ nehˬ ngeh za taˬ-euˬ jeˬ pyeuꞈ-eu guiˬ lahˬ saꞈ laˇ paw-euˬ laꞈ sawˬ deuˬ-ahˇ taˬ byehˇ dzeh taˬ.

¹⁵ Nawˇ gaˇ mˇ-eu huiˬ laˇ mahˇ laˇ luꞈ gaˇ tsawˇ haˬ dawˬ tawˆ luꞈ ya mawˇ ni, kʼoeˇ deuˬ dawˬ tawˆ luꞈ-ahˇ nui ma gʼawˇ mawˇ keuˆ-eu laꞈ kʼoeˇ mˇ dzaw shaˇ dzaw-awˬ.

¹⁶ Yawˬ ha-euˬ gʼawˇ mawˇ gaˇ kawˆ maˬ ehˇ, yawˬ ha mehˬ-eu tsoˆ-eu jeˬ gaˇ kawˆ maˬ ehˇ, yaw muiˬ-ehˇ yahˇ-awˬ. Gaˇ heu deuˬ-ahˇ maˬ byehˇ ni mˇ daˆ leꞈ-awˬ. Aˬ jeˬ miˇ neh ehˇ naˇ, nawˇ kʼoeˇ loꞈ-ehˇ mˇ-eu kʼoeˇ-aˬ, nawˬ-euˬ gʼawˇ mawˇ-ahˇ maˬ ehˇ, nawˬ neh mehˬ nehˬ tsoˆ nehˬ-euˬ tsawˇ haˬ deuˬ-ahˇ maˬ ehˇ, ka kʼoꞈ-eu jeˬ pyeuꞈ-eu meh.