1 Tiˆmoˇseˬ 2 - Akha

Ka li zaˬ aˇ muˇ uˬ duˬ tahˬ-eu gaˇ kawˆ

¹ Ngaˇ heu loꞈ-ehˇ jeˬ hu gʼaˬ biꞈ mawꞈ-eu ma. Tsawˇ haˬ dawˬ tawˆ luꞈ gʼaˇ duˬ, Miˬyehˇ-ahˇ loˬ-eu jeˬ shaˇ nehˬ-eu, guiˬ lahˬ shaˇ-eu, shaˇ ju-eu, aˬ yawꞈ-euˬ guiˬ lahˬ-ahˇ ja ceuˬ-eu, heu deuˬ-ahˇ mˇ-awˬ.

² Sahˬ paˬ sahˬ ma deuˬ hawˇ-eu dzoeˬ dzaˬ-eu tsawˇ haˬ dawˬ tawˆ luꞈ gʼaˇ duˬ kʼawꞈ, kʼoeˇ loꞈ-ehˇ shaˇ-awˬ. Kʼoeˇ loꞈ-ehˇ shaˇ naˇ, aˬ dui coꞈ ngehˇ ni nui saˇ oꞈ-awˇ, Miˬyehˇ-ahˇ yaw zeu baw baw-ehˇyaw muiˬ yaw shawˇ laꞈ kʼoeˇ ya dehꞈtehꞈ-a.

³ Kʼoeˇ loꞈ-ehˇ shaˇ-eu-aˬ, muiˬ-eu jeˬ pyeuꞈ-awˇ, aˬ dui-euˬ Ka kʼoꞈ-eu gʼaˬ pyeuꞈ-eu Miˬyehˇ kʼawꞈ nui kʼahˇ shiˇ-eu meh.

⁴ Aˬ yawꞈ-aˬ, tsawˇ haˬ yawˬ gʼaˬ na luꞈ ka kʼoꞈ-eu jeˬ bi za mawꞈ-awˇ, yaw tsaˬ yaw dawˇ jeˬ-ahˇ bi siˬ nya mawꞈ-eu meh.

⁵ Aˬ jeˬ miˇ neh ehˇ naˇ, Miˬyehˇ tiˬ gʼaˬ tehꞈ-ehˇ jawˇ-awˇ, Miˬyehˇ hawˇ-eu tsawˇ haˬ tsaˬ leˇ tsahˇ leˇ ni mˇ-eu tsawˇ kaˬ tiˬ gʼaˬ jawˇ-eu tehꞈ meh. Tsawˇ kaˬ kʼoeˇ gʼaˬ-aˬ, Yeˬsuˇ Ka li meh.

⁶ Tsawˇ haˬ zaˬ dawˬ tawˆ luꞈ-ahˇ ka kʼoꞈ-eu gʼaˇ duˬ, aˬ yawꞈ-euˬ gʼawˇ mawˇ biꞈ dah-euˬ meh. Kʼoeˇ-aˬ, tsawˇ haˬ yawˬ gʼaˬ na luꞈ-ahˇ Miˬyehˇ ka kʼoꞈ mawꞈ-eu gaˇ kawˆ, aˇ yamˬ tsaˬ laˇ ngeh bi siˬ bi mawˇ le-euˬ saˇ kiˇ pyeuꞈ-eu meh.

⁷ Kʼoeˇ miˇ neh, jah-eu jeˬ hawˇ-eu yaw tsaˬ yaw dawˇ jehˬ-ahˇ taꞈ-eu guiˬ lah dawˬ mehˬ-eu gʼaˇ duˬ, Yuˇdaˆ tsawˇ haˬ maˬ ngeuˇ-eu aˬ cawˬ tsawˇ jeuˬ jawˇ gaˇ gʼaˬ kʼehˇ hawˇ-eu mehˬ-eu tsoˆ-eu saˬ laˬ bi geuꞈ-eu lehˇ, Miˬyehˇ neh ngaˬ-ahˇ kʼehˇ gʼeh laꞈ-euˬ meh. Ngaˇ jaˬ myawꞈ maˬ myawꞈ. Dawˇ coe ni ehˇ-eu ma.

⁸ Ka li zaˬ aˇ muˇ uˬ duˬ kʼaˇ tahˬ ngeh, kʼaˬ dzeˇ zaˬ deuˬ-ahˇ guiˬ lahˬ bi shaˇ mawꞈ-eu ma. Yawˬ ha-euˬ gʼawˇ mawˇ Miˬyehˇ-ahˇ a nehˬ taˬ-euˬ tsawˇ haˬ deuˬ pyeuꞈ-eu, nui ma maˬ pehˇ-eu uˬ taꞈ, tsawˇ pyehˇ maˬ pyehˇ ni aˬ laꞈ baꞈ diˇ-awˇ guiˬ lahˬ shaˇ nya-eu tsawˇ haˬ deuˬ guiˬ lahˬ bi shaˇ mawꞈ-eu ma.

⁹ Zaˬ miˬ zaˬ deuˬ kʼawꞈ nui ma nahˬ yu ni taˬ-awˇ, aˬ cawˬ haw muiˬ ni bi dm bi gʼaˬ mawꞈ-eu ma. Uˬ duˬ tsehˇ kahˇ aˬ cawˬ-ahˇ maˬ duˇ gaˇ keuˆ ni laˆ muiˬ-eu, shuiˇ myawˬ guˇ geuꞈ-eu, aˇ caˇ caˇ kʼawꞈ sehˇ geuꞈ-eu, aˇ poeˬ kʼaˆ dui dui-eu mehˬ tsoeˬ dm-eu, heu loꞈ-ehˇ gʼeh-eu deuˬ-ahˇ cehˇ gʼa-eu maˬ tsaˬ-a.

¹⁰ Ehˇ kʼawꞈ, Miˬyehˇ-ahˇ yaw zeu baw-eu ma lehˇ yawˬ haˇ yaw ha ehˇ-eu zaˬ miˬ zaˬ deuˬ-aˬ, yaw muiˬ jeˬ mˇ-eu paw leh jeh-eu tsaˬ meh.

¹¹ Zaˬ miˬ zaˬ deuˬ-aˬ, ciˬ cuˇ ni jawˇ-awˇ nui ma nahˬ yu ni taˬ-eu laꞈ kʼoeˇ, aˬ cawˬ mehˬ gaˇ naˇ haˬ geuꞈ-eu tsaˬ meh.

¹² Aˬ cawˬ-ahˇ mehˬ-eu tsoˆ-eu maˬ ehˇ, kʼaˬ dzeˇ zaˬ deuˬ kʼoeˇ taˆ uˆ lahˇ-eu maˬ ehˇ, maˬ bi gʼeh mawꞈ nya. Ciˬ cuˇ ni jawˇ-eu tsaˬ meh.

¹³ Aˬ jeˬ miˇ neh ehˇ naˇ, Aˬdaˬ-ahˇ jeˬ huˬ beh gʼaˬ miˇ tsa, Eˇbaˆ-ahˇ beh-euˬ meh.

¹⁴ Kʼoeˇ uˬ taꞈ, muˇ juˇ bi juˇ gʼaˬ-euˬ kʼoeˇ-aˬ, Aˬdaˬ maˬ ngeuˇ-a. Muˇ juˇ bi juˇ gʼaˬ-awˇ Miˬyehˇ-euˬ zahˇ dawˬ kʼoꞈ dawˬ-ahˇ mˇ bahˬ-euˬ kʼoeˇ-aˬ, zaˬ miˬ zaˬ meh.

¹⁵ Ehˇ kʼawꞈ, zaˬ miˬ zaˬ tiˬ gʼaˬ nui nahˬ nui yu ahˇ-eu laꞈ kʼoeˇ, jah-eu jeˬ, gʼoeˇ-eu gaˬ-eu jeˬ hawˇ-eu, muiˬ-eu shawˇ-eu jeˬ laꞈ kʼoeˇ ziꞈ luꞈ naˇ, zaˬ ciˬ zaˬ cu mˇ-eu baˬ da neh ka kʼoꞈ-eu jeˬ za nya tehꞈ-a.