1 Teˇsaˬloˇni 4 - Akha

Miˬyehˇ nui kʼahˇ shiˇ ni yaw dehꞈ dehꞈ-eu

¹ Aˬ yuiꞈ aˬ nyiˇ Ka li zaˬ deuˬ-oˇ, aˇ saˬ saˬ-eu dawˬ heu loꞈ-ehˇ ehˇ mawꞈ-eu ma. Miˬyehˇ nui kʼahˇ shiˇ ni aˬ joˆ-ehˇ ya dehꞈ ya jawˇ-eu gaˇ kawˆ, naw maꞈ-ahˇ nga maꞈ dehꞈ mehˬ jawˇ mehˬ gʼaˬ-euˬ ma. Naw maꞈ kʼoeˇ loꞈ-ehˇ dehꞈ luꞈ jawˇ luꞈ-eu meh. Kʼoeˇ naˆ maˬ tseˇ leh jeh-awˇ dehꞈ daˆ leꞈ-eu gʼaˇ duˬ Sahˬpaˬ Yeˬsuˇ-euˬ tsawˇ myahˇ uˬ moˆ naw maꞈ-ahˇ nga maꞈ shaˇ-eu ma.

² Nga maꞈ Sahˬpaˬ Yeˬsuˇ-euˬ baoˬ-ahˇ gʼoe-awˇ naw maꞈ-ahˇ mehˬ nehˬ-euˬ dehꞈ-eu jawˇ-eu gaˇ kawˆ naw maꞈ siˬ nya meh.

³ Naw maꞈ yaw muiˬ yaw shawˇ shawˇ-ehˇ jawˇ-awˇ, aˬ cawˬ-euˬ miˬ zaˬ yo zaˬ-ahˇ maˬ bahˬ maˬ muˆ ni dehꞈ gaˇ Miˬyehˇ geuꞈ mawꞈ-eu meh.

⁴ Naw maꞈ yawˬ gʼaˬ na luꞈ, yawˬ ha-euˬ miˬ zaˬ nehˬ-ehˇ muiˬ-eu shawˇ-eu laꞈ kʼoeˇ hawˇ-eu aˬ cawˬ yaw zeu baw paˬ-ehˇ aˬ joˆ-ehˇ ya dehꞈ taꞈ-eu gaˇ kawˆ siˬ nya-eu tsaˬ meh.

⁵ Miˬyehˇ-ahˇ maˬ siˬ nya-eu tsawˇ haˬ loꞈ-ehˇ, yawˬ ha-euˬ nui kʼahˇ laˆ shiˇ-eu gʼaˇ duˬ tehꞈ-ehˇ miˬ zaˬ sheuˬ taˬ-euˬ jeˬ maˬ ya bi pyeuꞈ-a.

⁶ Gaˇ kawˆ heu hmˬ-ahˇ taꞈ leˇ-awˇ, tsawˇ haˬ tiˬ gʼaˬ-iˬ aˬ yuiꞈ aˬ nyiˇ Ka li zaˬ-euˬ nymˇ jiˇ-ahˇ coeˬ-eu ciˆ-eu bahˬ-eu muˆ-eu jeˬ maˬ mˇ kʼmˬ-a. Gaˇ Kawˆ heu naw maꞈ-ahˇ nga maꞈ mehˬ nehˬ dzeuˇ gʼaˬ-euˬ ma. Kʼoeˇ loꞈ-ehˇ gʼeh-eu tsawˇ haˬ-ahˇ Sahˬpaˬ Yeˬsuˇ kʼehˬ nehˬ kʼaˆ nehˬ tehꞈ-a lehˇ, nga maꞈ yaw kʼaˆ kʼaˆ-ehˇ ehˇ-euˬ ma.

⁷ Aˬ jeˬ miˇ neh ehˇ naˇ, aˬ cawˬ nehˬ-ehˇ joe joe-ehˇ bi dehꞈ-eu gʼaˇ duˬ aˬ dui-ahˇ Miˬyehˇ neh kuˇ taˬ-euˬ maˬ ngeuˇ-a. Muiˬ-eu shawˇ-eu laꞈ kʼoeˇ bi dehꞈ-eu gʼaˇ duˬ kuˇ taˬ-euˬ meh.

⁸ Kʼoeˇ miˇ neh, mehˬ-eu tsoˆ-eu dawˬ heu-ahˇ maˬ naˇ haˬ geuꞈ-eu tsawˇ haˬ-aˬ, tsawˇ haˬ zaˬ-euˬ dawˬ maˬ naˇ haˬ geuꞈ-eu maˬ ngeuˇ-a. Naw maꞈ-ahˇ Muiˬ-eu shawˇ-eu Yaw sahˇ Miˬyehˇ biꞈ nehˬ laꞈ-euˬ gʼaˬ pyeuꞈ-eu Miˬyehˇ-euˬ ehˇ dawˬ maˬ naˇ haˬ geuꞈ-eu jeˬ pyeuꞈ-eu meh.

⁹ Ka li zaˬ cawˬ cawˬ ya gaˬ ya gʼoeˇ-eu gaˇ kawˆ naw maꞈ-ahˇ boꞈ nehˬ-eu maˬ paˇ loˬ meh. Naw maꞈ tiˬ gʼaˬ tiˇ gʼaˬ aˬ joˆ-ehˇ ya gaˬ ya gʼoeˇ-eu gaˇ kawˆ, Miˬyehˇ neh naw maꞈ-ahˇ mehˬ nehˬ tsoˆ nehˬ gʼaˬ-euˬ meh.

¹⁰ Maˇ maˇ ni ehˇ naˇ, Maˬgeˬdawˇniˆ miˇ kʼahˬ laꞈ kʼoeˇ kʼaˇ jawˇ-eu aˬ yuiꞈ aˬ nyiˇ Ka li zaˬ dawˬ tawˆ luꞈ-ahˇ, naw maꞈ kʼoeˇ loꞈ-ehˇ gʼoeˇ-euˬ gaˬ-euˬ meh. Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, naw maꞈ-euˬ gʼoeˇ-eu gaˬ-eu jeˬ kʼoeˇ naˆ maˬ tseˇ myaˬ laˇ ni leh jeh siˬ lehˇ nga maꞈ shaˇ-eu ma.

¹¹ Nga maꞈ neh naw maꞈ-ahˇ ehˇ nehˬ yaꞈ-euˬ loꞈ-ehˇ, yawˬ ha-euˬ kʼaˬ boeˬ yawˬ ha boeˬ-awˇ, yawˬ haˬ-euˬ gaˇ yawˬ ha mˇ mˇ-ehˇ ciˬ cuˇ ni dehꞈ daˆ leꞈ-awˬ.

¹² Kʼoeˇ loꞈ-ehˇ dehꞈ naˇ, Sahˬpaˬ Yeˬsuˇ-ahˇ maˬ jah-eu tsawˇ haˬ deuˬ naw maꞈ-ahˇ yaw zeu baw-awˇ, yawˬ ha loˬ-eu jeˬ gʼaˇ duˬ aˬ cawˬ-ahˇ maˬ kʼawˬ daˇ ni dehꞈ nya tehꞈ-a.

Sahˬpaˬ Yeˬsuˇ zaꞈ le-eu gaˇ kawˆ

¹³ Aˬ yuiꞈ aˬ nyiˇ Ka li zaˬ deuˬ-oˇ, noeˬ tmˬ kʼaˇ maˬ za-eu laꞈ nyiˇ paw-euˬ tsawˇ haˬ deuˬ noeˬ shaˬ-eu loꞈ-ehˇ naw maꞈ maˬ ya noeˬ shaˬ-eu gʼaˇ duˬ, shiˇ-euˬ tsawˇ haˬ deuˬ aˬ joˆ-ehˇ pyeuꞈ-eu gaˇ kawˆ bi siˬ mawꞈ miˇ-a.

¹⁴ Yeˬsuˇ shiˇ-awˇ paˇ gʼoꞈ dehꞈ laˇ-euˬ meh lehˇ aˬ dui jah-eu ma. Kʼoeˇ miˇ neh, Yeˬsuˇ-ahˇ jah jah-ehˇ shiˇ-euˬ tsawˇ haˬ deuˬ-ahˇ Yeˬsuˇ nehˬ-ehˇ tiˬ kawˆ loꞈ-ehˇ Miˬyehˇ sheuˬ kʼoꞈ laꞈ tehꞈ-a lehˇ aˬ dui jah-eu ma.

¹⁵ Nymˬ-mˇ naw maꞈ-ahˇ nga maꞈ mehˬ luꞈ tsoˆ luꞈ-eu dawˬ heu-aˬ, Sahˬpaˬ Yeˬsuˇ-euˬ dawˬ ma. Sahˬpaˬ Yeˬsuˇ oe ngeh dehꞈ luꞈ-eu aˬ dui maꞈ-aˬ, shiˇ dzeuˇ-euˬ tsawˇ haˬ deuˬ-euˬ aˬ hu aˬ yawꞈ nehˬ-ehˇ ya jawˇ-eu maˬ ngeuˇ-a.

¹⁶ Miˬyehˇ guˇ-awˇ dawˬ biꞈ-eu teˇ saˇ maˬ ehˇ, mˬ taˆ gʼaˬ kʼehˇ yaw huiˬ gʼaˬ-euˬ teˇ saˇ maˬ ehˇ, Miˬyehˇ-euˬ daˇ heh teˇ saˇ maˬ ehˇ, ya gaˬ-awˇ, Sahˬpaˬ Yeˬsuˇ mˬ-ahˇ neh zaꞈ le tehꞈ-a. Kʼoeˇ ngeh, Ka li-ahˇ jah jah-ehˇ shiˇ-euˬ tsawˇ haˬ deuˬ aˬ hu gʼoꞈ dehꞈ laˇ tehꞈ-a.

¹⁷ Kʼoeˇ naˇ, kʼoeˇ ngeh dehꞈ luꞈ-eu aˬ dui maꞈ kʼawꞈ, aˬ yawꞈ maꞈ nehˬ-ehˇ mˬ dmˇ laꞈ kʼoeˇ tiˬ kawˆ loꞈ-ehˇ uiˬ leˇ-awˇ, mˬ taˆ yaw goˇ-ahˇ Sahˬpaˬ Yeˬsuˇ-ahˇ ya tahˬ puˬ leˇ tehꞈ-a. Kʼoeˇ naˇ, aˬ myah luꞈ Sahˬpaˬ Yeˬsuˇ nehˬ-ehˇ ya jawˇ tehꞈ-a.

¹⁸ Kʼoeˇ miˇ neh, tiˬ gʼaˬ tiˇ gʼaˬ gaˇ kawˆ heu ja ja-ehˇ gʼaˬ biꞈ-awˬ.