1 Teˇsaˬloˇni 3 - Akha

¹ Nga maꞈ naw maꞈ-ahˇ maˬ ya mawˇ-ehˇ maˬ jawˇ tehˬ coeˇ ni pyeuꞈ laˇ-euˬ miˇ neh, nga maꞈ tehꞈ-ehˇ Aˬteˬ meuˬ-ahˇ jawˇ yaꞈ-eu gʼaˇ duˬ noeˬ tsehˆ-awˇ,

² nga maꞈ nehˬ-ehˇ tiˬ kawˆ loꞈ-ehˇ Laˬ kʼaˬ cehˇ-eu Guiˬ lahˬ dawˬ mehˬ-eu gaˇ mˇ luꞈ-eu aˬ nyiˇ Tiˆmoˇseˬ-ahˇ kʼehˇ gʼeh laꞈ-euˬ ma. Naw maꞈ jah-eu nui ma ziꞈ ni gʼaˬ bi biꞈ-eu gʼaˇ duˬ aˬ yawꞈ-ahˇ kʼehˇ gʼeh laꞈ-euˬ jeˬ pyeuꞈ-eu ma.

³ Kʼehˬ-eu kʼaˆ-eu heu jeˬ baˬ da neh jah-eu jeˬ-ahˇ naw maꞈ maˬ ya byehˇ dzeh-eu gʼaˇ duˬ bi laˇ-euˬ ma. Kʼehˬ-eu kʼaˆ-eu jeˬ-ahˇ aˬ dui ya daˬ-eu heu-aˬ, Miˬyehˇ nui ma tsaˬ-eu tiˬ jehˬ meh lehˇ naw maꞈ siˬ nya meh.

⁴ Kʼoeˇ miˇ neh, naw maꞈ nehˬ-ehˇ nga maꞈ jawˇ ngeh neh, kʼehˬ-eu kʼaˆ-eu jeˬ-ahˇ aˬ dui ya daˬ tehꞈ-a lehˇ naw maꞈ-ahˇ ehˇ nehˬ-euˬ ma. Kʼaˇ ehˇ-euˬ loꞈ-ehˇ keuˆ le teuˇ le luꞈ-eu naw maꞈ siˬ duˬ mawˇ duˬ luꞈ meh.

⁵ Kʼoeˇ baˬ da neh, Tiˆmoˇseˬ-ahˇ ngaˇ kʼehˇ gʼeh laꞈ-euˬ jeˬ pyeuꞈ-eu ma. Ngaˇ naw maꞈ-euˬ gaˇ kawˆ siˬ mawꞈ-eu maˬ jawˇ tehˬ coˇ ni pyeuꞈ laˇ-euˬ miˇ neh, naw maꞈ jah-eu aˬ joˆ-ehˇ pyeuꞈ luꞈ-eu bi haw laˇ-eu lehˇ, aˬ yawꞈ-ahˇ kʼehˇ gʼeh laꞈ-euˬ ma. Nehꞈ sahˬ paˬ naw maꞈ-ahˇ muˇ juˇ juˇ-awˇ, nga maꞈ neh mˇ yaꞈ-euˬ gaˇ deuˬ yawꞈ ngehꞈ-ehˇ pyeuꞈ-iˇ-eu baw le lehˇ ngaˇ kʼahˬ lahˇ dui dui luꞈ ma.

⁶ Nymˬ-mˇ Tiˆmoˇseˬ gʼoꞈ keuˆ le-awˇ, naw maꞈ-euˬ jah-eu jeˬ hawˇ-eu gʼoeˇ-eu gaˬ-eu jeˬ gaˇ kawˆ, laˬ kʼaˬ cehˇ laˇ paˬ-ehˇ dzawˇ gaˬ le-euˬ meh. Naw maꞈ nga maꞈ-ahˇ aˬ myah luꞈ noeˬ keuˆ luꞈ-awˇ, nga maꞈ naw maꞈ-ahˇ mawˇ mawꞈ dui dui-eu loꞈ-ehˇ, naw maꞈ kʼawꞈ nga maꞈ-ahˇ mawˇ mawꞈ dui dui luꞈ-eu gaˇ kawˆ dzawˇ nehˬ laꞈ-euˬ meh.

⁷ Kʼoeˇ miˇ neh aˬ yuiꞈ aꞈ nyiˇ Ka li zaˬ deuˬ-oˇ, shaˬ-eu zahˬ-eu jeˬ hawˇ-eu kʼehˬ-eu kʼaˆ-eu jeˬ-ahˇ nga maꞈ ya daˬ luꞈ ngeh, naw maꞈ-euˬ gaˇ kawˆ ya gaˬ-awˇ, gʼaˬ tiˬ tiˆ paˇ lahˬ laˇ-euˬ miˇ-a. Naw maꞈ-euˬ jah-eu jeˬ kʼoeˇ, nga maꞈ-ahˇ gʼaˬ bi lahˬ laˇ-euˬ meh.

⁸ Naw maꞈ Sahˬpaˬ Yeˬsuˇ laꞈ kʼoeˇ ziꞈ dah ni jawˇ luꞈ naˇ, nga maꞈ yaw dehꞈ dehꞈ mahˇ tsahˇ ma.

⁹ Naw maꞈ gʼaˇ duˬ Miˬyehˇ-euˬ guiˬ lahˬ-ahˇ nymˬ-mˇ nga maꞈ ja ceuˬ-eu ma. Naw maꞈ baˬ da neh aˬ yawꞈ-euˬ mehˬ shi nga maꞈ laˬ kʼaˬ ya cehˇ-eu miˇ neh, aˬ yawꞈ-euˬ guiˬ lahˬ-ahˇ ja ceuˬ-eu ma.

¹⁰ Naw maꞈ-ahˇ nga maꞈ paˇ ya mawˇ dzoeˇ-awˇ, naw maꞈ jah-eu laꞈ kʼoeˇ maˬ byah-eu jeˬ bi byah laˇ ni bi caw ba nehˬ-eu gʼaˇ duˬ, uˬ ciꞈ nah gʼahˇ maˬ ehˇ nui ma keuˆ dui dui-eu laꞈ kʼoeˇ aˬ yawꞈ-ahˇ guiˬ lahˬ shaˇ luꞈ ma.

¹¹ Naw maꞈ jawˇ gaˇ nga maꞈ laˇ nya ni, aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ gaˇ ma laˆ dahˇ nehˬ laꞈ luꞈ-uˇ.

¹² Naw maꞈ tiˬ gʼaˬ tiˇ gʼaˬ gʼoeˇ-eu gaˬ-eu jeˬ hawˇ-eu tsawˇ haˬ dawˬ tawˆ luꞈ-ahˇ gʼoeˇ-eu gaˬ-eu jeˬ tiˬ jawˇ saˇ-iˬ tiˬ jawˇ myaˬ laˇ-awˇ, nga maꞈ naw maꞈ-ahˇ gʼoeˇ luꞈ gaˬ luꞈ-eu naˆ ni byah laˇ luꞈ-uˇ.

¹³ Aˬ dui-euˬ Sahˬpaˬ Yeˬsuˇ aˬ yawꞈ-euˬ tsawˇ haˬ dawˬ tawˆ luꞈ nehˬ-ehˇ oe ngeh, aˬ dui-euˬ Aˬda Miˬyehˇ mehˬ shi naw maꞈ iˬ baˇ taˬ kʼaˇ maˬ za-eu muiˬ-eu shawˇ-eu tsawˇ haˬ pyeuꞈ ni, aˬ yawꞈ naw maꞈ-ahˇ kʼoeˇ loꞈ-ehˇ gʼaˬ biꞈ lahˬ nehˬ luꞈ-uˇ.