1 Saˬmeuˬlaˆ 5 - Akha

Piˇliˇtiˆ tsawˇ haˬ hawˇ-eu Dawˬ ma saˇ jaˇ Bahˬ keuˆ

¹ Dawˬ ma saˇ jaˇ Bahˬ keuˆ-ahˇ Piˇliˇtiˆ tsawˇ haˬ deuˬ deuˆ za gʼaˬ ngeh, Eˇbaˬneˬzaˬ lehˇ kuˇ-eu jawˇ duˬ-ahˇ neh, aˬ yawꞈ maꞈ jawˇ-eu Aˬshaˬdoˇ meuˬ-ahˇ baꞈ gʼeh-euˬ meh.

² Kʼoeˇ naˇ, aˬ yawꞈ maꞈ-euˬ Daˬgoˬ miˬ yehˇ-euˬ uˬ duˬ tahˬ nymˇ-ahˇ baꞈ ahˇ gʼeh-awˇ, tahˬ pahˬ aˬ ma mawˇ kawˇ dawˬ peh baꞈ taˬ-awˇ bi jaˆ-euˬ meh.

³ Yawˬ shawˬ yawˬ uˬ shawˬ yaw naꞈ-ehˇ, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ mehˬ shi, Daˬgoˬ miˬ yehˇ-euˬ tahˬ pahˬ aˬ ma mawˇ kawˇ miˇ tsa tahˬ poˆ-ehˇ ga gaˇ, Aˬshaˬdoˇ meuˬ-ahˇ jawˇ-eu tsawˇ haˬ deuˬ ya mawˇ-euˬ meh. Kʼoeˇ miˇ neh, tahˬ pahˬ aˬ ma mawˇ kawˇ kʼoeˇ hmˬ aˬ yawꞈ maꞈ paˇ baꞈ tuˇ taˬ-euˬ meh.

⁴ Yawˬ shawˬ yawˬ uˬ shawˬ yaw naꞈ-ehˇ, Dawˬ ma saˇ jaˇ Bahˬ keuˆ mehˬ shi tahˬ pahˬ aˬ ma mawˇ kawˇ kʼoeˇ hmˬ paˇ coˬ-iˇ taˬ-euˬ gaˇ aˬ yawꞈ maꞈ paˇ ya mawˇ-euˬ meh. Kʼoeˇ ngeh poˆ jawˇ, tahˬ pahˬ aˬ ma mawˇ kawˇ kʼoeˇ hmˬ-euˬ uˬ duˬ hawˇ-eu aˬ laꞈ nyiˬ laꞈ luꞈ kʼehꞈ tsehˆ-iˇ-awˇ, laˇ gʼoˆ dawˬ peh dawˬ dzm dawˬ tehꞈ kʼoeˇ taˆ ga luꞈ-eu meh. Gʼawˇ mawˇ hmˬ tehꞈ-ehˇ Dawˬ ma saˇ jaˇ Bahˬ keuˆ mehˬ shi ga yaꞈ-euˬ meh.

⁵ Kʼoeˇ miˇ neh, Daˬgoˬ miˬ yehˇ-euˬ gaˇ mˇ-eu piˇ ma deuˬ hawˇ-eu, aˬ yawꞈ-ahˇ uˬ duˬ kʼaˇ tahˬ-eu tsawˇ haˬ dawˬ tawˆ luꞈ, Aˬshaˬdoˇ meuˬ-ahˇ Daˬgoˬ miˬ yehˇ-euˬ uˬ duˬ tahˬ nymˇ laˇ gʼoˆ dawˬ peh jaˆ-eu dawˬ dzm dawˬ tehꞈ-ahˇ, iˬ nah keuˆ ni tiˬ gʼaˬ-iˬ maˬ kʼah dzeuˇ-a.

⁶ Aˬshaˬdoˇ meuˬ-ahˇ jawˇ-eu tsawˇ haˬ deuˬ-ahˇ Sahˬpaˬ Miˬyehˇ yaw kʼaˆ-ehˇ kʼehˬ nehˬ-awˇ, bi tsawˬ guˆ-iˇ-euˬ meh. Aˬ yawꞈ maꞈ hawˇ-eu meuˬ kʼoeˇ meuˬ-euˬ gahˬ kaˬ-ahˇ kʼaˇ jawˇ-eu tsawˇ haˬ deuˬ-ahˇ, maˇ cuˬ maˇ lu bi lu-eu laꞈ kʼoeˇ kʼehˬ nehˬ-euˬ meh.

⁷ Kʼoeˇ loꞈ-ehˇ pyeuꞈ laˇ luꞈ gaˇ ya mawˇ ngeh, “Iˇsaˬleˬlaˆ-euˬ Miˬyehˇ aˬ dui maꞈ hawˇ-eu aˬ dui maꞈ-euˬ Daˬgoˬ miˬ yehˇ-ahˇ kʼehˬ luꞈ-eu nga. Dawˬ ma saˇ jaˇ Bahˬ keuˆ-ahˇ heu gaˇ maˬ paˇ bi jaˆ nya ngaˇ” lehˇ aˬ yawꞈ maꞈ ehˇ-eu meh.

⁸ Kʼoeˇ naˇ, aˬ yawꞈ maꞈ tsawˇ haˬ pyehˬ gʼeh-awˇ, Piˇliˇtiˆ sahˬ paˬ ngaˬ gʼaˬ luꞈ bi kuˇ uiˬ-awˇ, “Iˇsaˬleˬlaˆ Miˬyehˇ-euˬ Dawˬ ma saˇ jaˇ Bahˬ keuˆ-ahˇ aˬ dui aˬ joˆ-ehˇ jahˇ nmˇ” lehˇ naˇ haˬ ngeh, “Gaˬdaˇ meuˬ-ahˇ baꞈ gʼeh-awˬ” lehˇ ehˇ-eu miˇ neh, Piˇliˇtiˆ tsawˇ haˬ deuˬ-euˬ meuˬ tiˬ meuˬ pyeuꞈ-eu Gaˬdaˇ meuˬ-ahˇ aˬ yawꞈ maꞈ baꞈ gʼeh-euˬ meh.

⁹ Meuˬ kʼoeˇ meuˬ-ahˇ Dawˬ ma saˇ jaˇ Bahˬ keuˆ baꞈ keuˆ gʼeh ngeh jawˇ, kʼoeˇ gaˇ kʼawꞈ Sahˬpaˬ Miˬyehˇ paˇ kʼehˬ nehˬ-awˇ, yaw kʼaˆ-ehˇ bi shaˬ bi zahˬ-euˬ meh. Meuˬ kʼoeˇ meuˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ, zaˬ guˬ tsawˇ kʼaˆ maˬ ehˇ, gʼawˇ mawˇ mawˇ lah-ehˇ maˇ cuˬ maˇ lu lu byah jiˇ-euˬ meh.

¹⁰ Kʼoeˇ miˇ neh, Dawˬ ma saˇ jaˇ Bahˬ keuˆ-ahˇ, Piˇliˇtiˆ tsawˇ haˬ deuˬ-euˬ meuˬ tiˬ meuˬ pyeuꞈ-eu Eˇkaˬloˬ meuˬ-ahˇ paˇ bi baꞈ gʼeh-euˬ meh. Ehˇ kʼawꞈ, kʼoeˇ gaˇ baꞈ keuˆ gʼeh ngeh, “Nga maꞈ bi shiˇ jiˇ-eu lehˇ Iˇsaˬleˬlaˆ Miˬyehˇ-euˬ Dawˬ ma saˇ jaˇ Bahˬ keuˆ-ahˇ heu gaˇ baꞈ laꞈ-euˬ ngaˇ” lehˇ, Eˇkaˬloˬ meuˬ-ahˇ jawˇ-eu tsawˇ haˬ deuˬ guˇ-eu meh.

¹¹ Kʼoeˇ miˇ neh, Piˇliˇtiˆ sahˬ paˬ dawˬ tawˆ luꞈ-ahˇ aˬ yawꞈ maꞈ tiˬ poˆ paˇ kuˇ uiˬ-awˇ, “Aˬ dui hawˇ-eu aˬ dui-euˬ miˬ sawˇ zaˬ deuˬ-ahˇ maˬ paˇ bi sehꞈ-eu gʼaˇ duˬ, Iˇsaˬleˬlaˆ tsawˇ jeuˬ-euˬ Dawˬ ma saˇ jaˇ Bahˬ keuˆ kʼoeˇ keuˆ-ahˇ, aˬ yawꞈ jaˆ duˬ-ahˇ bi baꞈ kʼoꞈ ha leˇ-awˬ” lehˇ ehˇ nehˬ-euˬ meh. Miˬyehˇ aˬ yawꞈ maꞈ-ahˇ yaw kʼaˆ-ehˇ kʼehˬ nehˬ-euˬ miˇ neh, meuˬ meuˬ lah ni kʼoeˇ taˆ guˆ-eu gaˆ-eu jeˬ keuˆ le luꞈ-eu meh.

¹² Maˬ shiˇ-euˬ tsawˇ haˬ deuˬ kʼawꞈ, maˇ cuˬ maˇ lu paˇ lu dzehˬ laˇ-awˇ, kʼoeˇ gaˇ jawˇ-eu tsawˇ haˬ deuˬ guˇ guˇ-ehˇ, “Caw ba nehˬ laꞈ-awˬ” lehˇ aˬ yawꞈ maꞈ-euˬ miˬ yehˇ-ahˇ shaˇ-eu meh.