1 Saˬmeuˬlaˆ 31 - Akha

Sawˇluˆ hawˇ-eu aˬ yawꞈ-euˬ aˬ li deuˬ shiˇ-euˬ

¹ Piˇliˇtiˆ tsawˇ haˬ deuˬ hawˇ-eu Iˇsaˬleˬlaˆ tsawˇ haˬ deuˬ, Giˇlaˬbawˬ gawˬ jawˬ kʼoeˇ taˆ guiˇ deuˆ-euˬ meh. Iˇsaˬleˬlaˆ tsawˇ haˬ deuˬ gʼawˬ mya ni kʼoeˇ gaˇ bi deuˆ sehꞈ-awˇ, maˬ bi deuˆ sehꞈ-ehˇ dzeˇ-eu deuˬ-aˬ, Sawˇluˆ hawˇ-eu aˬ yawꞈ-euˬ aˬ li deuˬ nehˬ-ehˇ tiˬ kawˆ loꞈ-ehˇ cehˆ-euˬ meh.

² Ehˇ kʼawꞈ, Piˇliˇtiˆ tsawˇ haˬ deuˬ aˬ yawꞈ maꞈ-euˬ mehˬ nah teh miˇ le-awˇ, Sawˇluˆ-euˬ aˬ li Yawˇnaˆshaˬ, Aˬbiˇnaˬdehˇ, Maˬlaˬkiˇshuˬ aˬ ha smˬ mehˇ nmˇ-ahˇ sehꞈ-euˬ meh.

³ Sawˇluˆ-ahˇ yaw kʼaˆ-ehˇ ga jawˬ-awˇ deuˆ-eu miˇ neh, shiˇ taw tehˬ ni bi deuˆ naˇ-euˬ meh.

⁴ Kʼoeˇ ngeh, aˬ yawꞈ-euˬ guiˇ deuˆ-eu keu ka baꞈ luꞈ-eu zaˬ guˬ-ahˇ, “Miˬyehˇ maˬ baw-eu Piˇliˇtiˆ tsawˇ haˬ heu deuˬ ngaˬ-ahˇ kʼaˇ gʼeh mawꞈ-eu gʼeh-awˇ maˬ bi sehꞈ mawꞈ nya. Nawˬ-euˬ mi cehˇ gʼeu doˆ-awˇ ngaˬ-ahˇ sehꞈ-awˬ” lehˇ, Sawˇluˆ ehˇ nehˬ-euˬ meh. Ehˇ kʼawꞈ, zaˬ guˬ kʼoeˇ gʼaˬ kʼoeˇ loꞈ-ehˇ maˬ jahˇ peuˬ-a. Kʼoeˇ miˇ neh, yawˬ haˇ yawˬ ha mi cehˇ gʼawˇ daˬ-awˇ, coˬ daˆ sehꞈ-euˬ meh.

⁵ Sawˇluˆ shiˇ-euˬ gaˇ zaˬ guˬ kʼoeˇ gʼaˬ ya mawˇ ngeh, aˬ yawꞈ kʼawꞈ yawˬ ha-euˬ mi cehˇ kʼoeˇ taˆ coˬ daˆ-awˇ, Sawˇluˆ nehˬ-ehˇ shiˇ caw-euˬ meh.

⁶ Sawˇluˆ maˬ ehˇ, aˬ yawꞈ-euˬ aˬ li smˬ li maˬ ehˇ, kʼoeˇ loꞈ-ehˇ shiˇ-awˇ, Sawˇluˆ-euˬ tsawˇ haˬ dawˬ tawˆ luꞈ, kʼoeˇ ngeh nah shiˇ jiˇ-euˬ meh.

⁷ Iˇsaˬleˬlaˆ guiˇ maꞈ deuˬ cehˆ byaˆ jiˇ-euˬ gaˇ kawˆ hawˇ-eu, Sawˇluˆ hawˇ-eu aˬ yawꞈ-euˬ aˬ li deuˬ bi sehꞈ-euˬ gaˇ kawˆ-ahˇ, Yeˬzaˬleˬlaˇ deh kʼawꞈ nui baˬ paw jawˇ-eu Iˇsaˬleˬlaˆ tsawˇ haˬ deuˬ hawˇ-eu, Yawˇdaˬ lawˇ baˬ nahˇ ma doˆ kʼehˬ paw jawˇ-eu Iˇsaˬleˬlaˆ tsawˇ haˬ deuˬ ya gaˬ ngeh, aˬ yawꞈ maꞈ-euˬ meuˬ deuˬ-ahˇ byehˇ dzeh yaꞈ-awˇ cehˆ-euˬ meh. Kʼoeˇ naˇ, Piˇliˇtiˆ tsawˇ haˬ deuˬ oe-awˇ, meuˬ kʼoeˇ deuˬ-ahˇ jawˇ-euˬ meh.

⁸ Guiˇ deuˆ gʼaˬ-awˇ yawˬ nah yawˬ-ahˇ, shiˇ taˬ-euˬ tsawˇ haˬ deuˬ-euˬ mˇ myawˬ poˆ geuꞈ-eu lehˇ Piˇliˇtiˆ tsawˇ haˬ deuˬ laˇ ngeh, Giˇlaˬbawˬ gawˬ jawˬ kʼoeˇ taˆ Sawˇluˆ hawˇ-eu aˬ yawꞈ-euˬ aˬ li smˇ gʼaˬ shiˇ taˬ-awˇ ga gaˇ ya mawˇ-euˬ meh.

⁹ Aˬ yawꞈ maꞈ Sawˇluˆ-euˬ uˬ duˬ deuˆ tsehˆ-awˇ, aˬ yawꞈ-euˬ guiˇ deuˆ-eu mehˬ tsoeˬ hawˇ-eu keu ka deuˬ lehˆ doˆ-euˬ meh. Kʼoeˇ naˇ, uˬ duˬ hawˇ-eu keu ka kʼoeˇ deuˬ, Piˇliˇtiˆ miˇ kʼahˬ doe ni bi baꞈ doe gʼeh-awˇ, aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ hawˇ-eu, aˬ yawꞈ maꞈ-euˬ tsawˇ haˬ deuˬ gʼaˇ duˬ, laˬ kʼaˬ cehˇ-eu dawˬ bi tsaꞈ gaˬ-iˇ-euˬ meh.

¹⁰ Aˬ yawꞈ-euˬ guiˇ deuˆ-eu keu ka-ahˇ Aˬshaˇtaˬyoˇ miˬ yehˇ ma-euˬ uˬ duˬ tahˬ nymˇ-ahˇ bi jaˆ-awˇ, aˬ yawꞈ-euˬ gʼawˇ mawˇ-ahˇ, Behˬshaˬ meuˬ-euˬ meuˬ lahˇ kʼoeˇ taˆ taꞈ myahˬ-awˇ bi jaˆ-euˬ meh.

¹¹ Piˇliˇtiˆ tsawˇ haˬ deuˬ neh Sawˇluˆ-ahˇ kʼoeˇ loꞈ-ehˇ jahˇ nehˬ-euˬ gaˇ kawˆ-ahˇ, Giˇlaˆ miˇ kʼahˬ Jaˬbehˆ meuˬ-ahˇ jawˇ-eu tsawˇ haˬ deuˬ ya gaˬ ngeh,

¹² nui ma kʼaˬ dui dui-eu tsawˇ haˬ deuˬ doˆ laˇ-awˇ, uˬ ciꞈ miˇ lah-ehˇ Behˬshaˬ meuˬ-ahˇ iˇ-euˬ meh. Meuˬ meuˬ lahˇ-ahˇ taꞈ myahˬ taˬ-euˬ Sawˇluˆ-euˬ gʼawˇ mawˇ hawˇ-eu, aˬ yawꞈ-euˬ aˬ li deuˬ-euˬ gʼawˇ mawˇ-ahˇ aˬ yawꞈ maꞈ baꞈ ka-awˇ, Jaˬbehˆ meuˬ-ahˇ baꞈ kʼoꞈ gʼeh-awˇ, miˬ dzaˬ dzah-euˬ meh.

¹³ Kʼoeˇ naˇ, shaˬ yoeˬ deuˬ yuˇ doˆ-awˇ, meuˬ kʼoeˇ meuˬ-ahˇ jaˆ-eu miˬ shuˬ paꞈ muˆ aˇ bawˇ dawˬ pehˬ-ahˇ baꞈ pahˬ-awˇ, shiꞈ nah keuˆ ni maˬ dzaˬ maˬ dawˇ-ehˇ lah-euˬ meh.