1 Saˬmeuˬlaˆ 28 - Akha

¹ Aˇ yamˬ ui cuiˆ myahˇ laˇ ngeh jawˇ, Iˇsaˬleˬlaˆ miˇ kʼahˬ-ahˇ guiˇ deuˆ leˇ-eu gʼaˇ duˬ, Piˇliˇtiˆ tsawˇ haˬ deuˬ yehˇ kuˇ uiˬ-euˬ meh. Kʼoeˇ ngeh, “Nawˇ siˬ nya luꞈ-eu loꞈ-ehˇ, nawˇ hawˇ-eu nawˬ-euˬ tsawˇ haˬ deuˬ ngaˇ jawˇ paw ya pyawˬ meh” lehˇ, Daˬbiˇ-ahˇ Aˬkiˇ ehˇ nehˬ-euˬ meh.

² Daˬbiˇ ehˇ-eu, “Ngeuˇ tehꞈ-a. Ngaˇ nawˬ-euˬ zaˬ kʼaˆ ma. Ngaˇ guiˇ aˇ naˆ ni deuˆ nya-eu nawˇ ya mawˇ duˬ tehꞈ-a.” Aˬkiˇ ehˇ-eu, “Muiˬ tehꞈ-a. Nawˬ-ahˇ aˬ myah luꞈ ngaˬ-euˬ gʼawˇ mawˇ-ahˇ loꞈ piˇ-eu gʼaˬ bi geuꞈ ma.”

Sawˇluˆ nyiˇ paˬ-ahˇ gʼoe-euˬ

³ Saˬmeuˬlaˆ shiˇ-euˬ miˇ neh, Iˇsaˬleˬlaˆ tsawˇ haˬ dawˬ tawˆ luꞈ aˬ yawꞈ gʼaˇ duˬ tsawˇ ngoeˇ ngoeˇ-awˇ, aˬ yawꞈ jawˇ-eu Laˬmahˇ meuˬ-ahˇ aˬ yawꞈ-ahˇ baꞈ pahˬ nehˬ-euˬ meh. Nyiˇ paˬ shaˆ ma dawˬ tawˆ luꞈ-ahˇ, Iˇsaˬleˬlaˆ miˇ kʼahˬ laꞈ kʼoeˇ neh Sawˇluˆ teh dzeh-euˬ meh.

⁴ Piˇliˇtiˆ yehˇ dawˬ tawˆ luꞈ uiˬ leˇ-awˇ, Shuˇneˬ meuˬ dawˬ peh taˆ tsoˆ-awˇ jawˇ-eu meh. Sawˇluˆ gʼeh, Iˇsaˬleˬlaˆ tsawˇ haˬ deuˬ-ahˇ kuˇ uiˬ-awˇ, Giˇlaˬbawˬ gawˬ jawˬ-ahˇ taˆ tsoˆ-awˇ jawˇ-eu meh.

⁵ Piˇliˇtiˆ guiˇ maꞈ deuˬ-ahˇ Sawˇluˆ ya mawˇ ngeh, guˆ dui dui-eu meh.

⁶ Kʼoeˇ miˇ neh, aˬ joˆ-ehˇ ya jahˇ-eu gaˇ kawˆ, Sahˬpaˬ Miˬyehˇ-ahˇ aˬ yawꞈ naˇ haˬ-euˬ meh. Ehˇ kʼawꞈ, yuꞈ maˆ maˆ-eu laꞈ kʼoeˇ maˬ ehˇ, Uˇleˬ hawˇ-eu Duˇmeˬ-ahˇ gʼoe-eu laꞈ kʼoeˇ maˬ ehˇ, Miˬyehˇ gʼaˇ duˬ ngehˬ dah-eu deuˬ-ahˇ gʼoe-eu laꞈ kʼoeˇ maˬ ehˇ, Sahˬpaˬ Miˬyehˇ-ahˇ aˬ yawꞈ naˇ haˬ kʼawꞈ, aˬ yawꞈ-ahˇ Sahˬpaˬ Miˬyehˇ tiˬ jeˬ-iˬ maˬ ehˇ kʼoꞈ nehˬ-a.

⁷ Kʼoeˇ ngeh, aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ Sawˇluˆ dawˬ biꞈ-awˇ, “Ngaˬ-ahˇ zaˬ miˬ zaˬ nyiˇ paˬ tiˬ gʼaˬ poˆ mawˇ nehˬ laꞈ-awˬ. Ngaˇ aˬ yawꞈ-ahˇ naˇ haˬ haw la” lehˇ ehˇ nehˬ-euˬ meh. “Eˬdawˇlaˆ meuˬ-ahˇ nyiˇ paˬ tiˬ gʼaˬ jawˇ meh” lehˇ, yaw huiˬ yaw mahˇ kʼoeˇ deuˬ aˬ yawꞈ-ahˇ ehˇ kʼoꞈ nehˬ-euˬ meh.

⁸ Kʼoeˇ ngeh, aˬ yawꞈ-ahˇ sahˬ paˬ nga lehˇ aˬ cawˬ maˬ bi haw siˬ-eu gʼaˇ duˬ, Sawˇluˆ mehˬ tsoeˬ dm paˇ-euˬ meh. Kʼoeˇ naˇ, uˬ ciꞈ zahˇ le ngeh, aˬ yawꞈ-euˬ tsawˇ haˬ nyiˬ gʼaˬ sheuˬ-awˇ, zaˬ miˬ zaˬ kʼoeˇ gʼaˬ jawˇ gaˇ iˇ-euˬ meh. Zaˬ miˬ zaˬ kʼoeˇ gʼaˬ-ahˇ aˬ yawꞈ ehˇ nehˬ-eu, “Aˬ joˆ-ehˇ pyeuꞈ laˇ-eu lehˇ gʼeh-eu gaˇ kawˆ, ngaˬ-euˬ dah zaˇ yaw sahˇ deuˬ-ahˇ tiˬ poˆ naˇ haˬ haw nehˬ laꞈ sheˇ. Ngaˬ neh tsawˇ myahˇ kuˇ-euˬ tsawˇ haˬ heu gʼaˬ-euˬ yaw sahˇ-ahˇ tiˬ poˆ kuˇ nehˬ laꞈ sheˇ.”

⁹ Zaˬ miˬ zaˬ kʼoeˇ gʼaˬ ehˇ-eu, “Sahˬ paˬ Sawˇluˆ aˬ joˆ-ehˇ jahˇ-eu gaˇ kawˆ nawˇ siˬ nya-eu maˬ ngeuˇ te loˇ. Nyiˇ paˬ shaˆ ma dawˬ tawˆ luꞈ-ahˇ, Iˇsaˬleˬlaˆ miˇ kʼahˬ laꞈ kʼoeˇ neh aˬ yawꞈ teh dzeh jiˇ-euˬ maˬ ngeuˇ-a loˇ. Toˆ-ehˇ ngeuˇ-eu jeˬ maˇ-iˬ, ngaˇ ya shiˇ ni nawˇ ngaˬ-ahˇ aˬ jeˬ miˇ neh teu loꞈ-ehˇ muˇ juˇ juˇ te.”

¹⁰ Sawˇluˆ ciˬ cuˇ ni saˇ jaˇ dzaˬ kʼoeˬ-eu laꞈ kʼoeˇ,“Nawˇ teu loꞈ-ehˇ mˇ-eu baˬ da neh, nawˬ-euˬ kʼoeˇ taˆ kʼehˬ-eu kʼaˆ-eu jeˬ maˬ bi keuˆ le lehˇ, dehꞈ luꞈ-eu Sahˬpaˬ Miˬyehˇ mehˬ shi ngaˇ kamˬ tsehˆ-eu ma” lehˇ ehˇ nehˬ-euˬ meh.

¹¹ “Nawˬ-euˬ gʼaˇ duˬ aˬ suˇ gʼaˬ-ahˇ ya kuˇ nehˬ laꞈ nmˇ” lehˇ zaˬ miˬ zaˬ kʼoeˇ gʼaˬ ehˇ ngeh, “Saˬmeuˬlaˆ-ahˇ kuˇ-awˬ” lehˇ, Sawˇluˆ ehˇ kʼoꞈ nehˬ-euˬ meh.

¹² Zaˬ miˬ zaˬ kʼoeˇ gʼaˬ Saˬmeuˬlaˆ-ahˇ ya mawˇ ngeh, “Aˬ jeˬ miˇ neh nawˇ ngaˬ-ahˇ tsawˇ gahˇ gahˇ te. Nawˇ sahˬ paˬ Sawˇluˆ maˬ ngeuˇ loˇ” lehˇ, yaw kʼaˆ-ehˇ guˇ-awˇ ehˇ-eu meh.

¹³ “Taˬ guˆ. Nawˇ aˬ jeˬ-ahˇ ya mawˇ teˬ” lehˇ Sawˇluˆ naˇ haˬ ngeh, “Miˇ tsaˬ dawˬ dah paw neh doˆ laˇ-euˬ yaw sahˇ-ahˇ ya mawˇ-euˬ ma” lehˇ, zaˬ miˬ zaˬ kʼoeˇ gʼaˬ ehˇ-eu meh.

¹⁴ “Aˬ joˆ-ehˇ gʼeh-eu nga lehˇ Sawˇluˆ paˇ naˇ haˬ ngeh, tsawˇ mawˬ tiˬ gʼaˬ pehˇ kʼahˬ pehˇ mahˇ dm-awˇ doˆ laˇ luꞈ meh” lehˇ, zaˬ miˬ zaˬ kʼoeˇ gʼaˬ ehˇ-eu meh. Kʼoeˇ-aˬ, Saˬmeuˬlaˆ pyeuꞈ-eu meh lehˇ Sawˇluˆ siˬ nya-awˇ, miˇ tsa awˆ byaˆ-awˇ yaw zeu baw nehˬ-euˬ meh.

¹⁵ Sawˇluˆ-ahˇ Saˬmeuˬlaˆ ehˇ nehˬ-eu, “Aˬ jeˬ miˇ neh nawˇ ngaˬ-ahˇ laˆ bahˬ te. Aˬ jeˬ loˬ-eu miˇ neh ngaˬ-ahˇ paˇ kuˇ kʼoꞈ te.” Sawˇluˆ ehˇ-eu, “Ngaˇ shaˬ zahˬ naꞈ dui dui luꞈ-eu ma. Piˇliˇtiˆ tsawˇ haˬ deuˬ ngaˬ-ahˇ guiˇ deuˆ le-awˇ, Miˬyehˇ ngaˬ-ahˇ byehˇ dzeh nehˬ laꞈ-euˬ meh. Miˬyehˇ gʼaˇ duˬ ngehˬ dah-eu deuˬ-ahˇ gʼoe-eu laꞈ kʼoeˇ maˬ ehˇ, yuꞈ maˆ maˆ-eu laꞈ kʼoeˇ maˬ ehˇ, aˬ yawꞈ ngaˬ-ahˇ tiˬ jeˬ-iˬ maˬ ehˇ nehˬ laꞈ-a. Kʼoeˇ miˇ neh, ngaˇ aˬ joˆ-ehˇ ya jahˇ-eu gaˇ kawˆ bi ehˇ nehˬ laꞈ-eu gʼaˇ duˬ, nawˬ-ahˇ ngaˇ ya kuˇ-eu jeˬ pyeuꞈ-eu ma.”

¹⁶ Saˬmeuˬlaˆ ehˇ-eu, “Sahˬpaˬ Miˬyehˇ nawˬ-ahˇ byehˇ dzeh-awˇ, aˬ yawꞈ nawˬ-ahˇ muiˇ luꞈ ngeh, aˬ jeˬ miˇ neh nawˇ ngaˬ-ahˇ kuˇ te.

¹⁷ Sahˬpaˬ Miˬyehˇ ngaˬ-ahˇ gʼoe-eu laꞈ kʼoeˇ nawˬ-ahˇ ehˇ nehˬ taˬ-euˬ loꞈ-ehˇ, aˬ yawꞈ mˇ luꞈ shaˇ luꞈ-eu meh. Miˇ kʼahˬ heu kʼahˬ-ahˇ nawˬ-euˬ aˬ laꞈ laꞈ kʼoeˇ neh aˬ yawꞈ yuˇ doˆ-awˇ, Daˬbiˇ-ahˇ biꞈ nehˬ gʼaˬ-euˬ meh.

¹⁸ Sahˬpaˬ Miˬyehˇ neh dawˬ biꞈ-eu gaˇ nawˇ maˬ naˇ haˬ-ehˇ, Aˬmaˬlehˇ tsawˇ haˬ deuˬ hawˇ-eu aˬ yawꞈ maꞈ kʼaˇ jaˆ-eu jeˬ dawˬ tawˆ luꞈ-ahˇ nawˇ maˬ laˆ cawˆ nehˬ jiˇ ni byehˇ yaꞈ-euˬ meh. Kʼoeˇ miˇ neh, Sahˬpaˬ Miˬyehˇ nawˬ-ahˇ heu loꞈ-ehˇ jahˇ nehˬ luꞈ-eu jeˬ pyeuꞈ-eu meh.

¹⁹ Nawˇ hawˇ-eu Iˇsaˬleˬlaˆ miˇ kʼahˬ-ahˇ, Piˇliˇtiˆ tsawˇ haˬ deuˬ-euˬ aˬ laꞈ laꞈ kʼoeˇ aˬ yawꞈ a nehˬ tehꞈ-a. Ni shawˬ nah, nawˇ hawˇ-eu nawˬ li ngaˬ nehˬ-ehˇ ya jawˇ-awˇ, Iˇsaˬleˬlaˆ tsawˇ jeuˬ-euˬ guiˇ maꞈ-ahˇ , Piˇliˇtiˆ tsawˇ haˬ deuˬ-euˬ aˬ laꞈ laꞈ kʼoeˇ Sahˬpaˬ Miˬyehˇ a nehˬ tehꞈ-a.”

²⁰ Saˬmeuˬlaˆ kʼoeˇ loꞈ-ehˇ ehˇ gaˇ Sawˇluˆ ya gaˬ ngeh, guˆ dui dui-eu miˇ neh, tiˬ poˆ tehꞈ-ehˇ coꞈ-iˇ-awˇ, ja sheu ni miˇ tsa ga-eu meh. Tiˬ nah tiˬ miˇ tiˬ jeˬ-iˬ maˬ dzaˬ ni jawˇ-awˇ, gʼaˬ baˬ dui dui-eu meh.

²¹ Zaˬ miˬ zaˬ kʼoeˇ gʼaˬ aˬ yawꞈ jawˇ gaˇ iˇ-awˇ, aˬ yawꞈ nui ma cawˆ dui dui luꞈ gaˇ ya mawˇ ngeh, heu loꞈ-ehˇ ehˇ nehˬ-euˬ meh. “Sahˬ paˬ-oˇ, ngaˬ-euˬ saꞈ laˇ damˬ-awˇ, nawˬ neh kʼaˇ ehˇ-euˬ loꞈ-ehˇ ngaˇ mˇ nehˬ-euˬ ma. Nymˬ-mˇ ngaˬ-euˬ ehˇ dawˬ-ahˇ nawˇ tiˬ poˆ naˇ haˬ nehˬ laꞈ-awˬ.

²² Nawˬ-euˬ gʼaˇ duˬ ngaˇ dzaˬ dzaˬ dawˇ dawˇ laˆ saˆ nehˬ ma. Nawˇ gʼaˬ paˇ kʼoꞈ laˇ-awˇ, mehˬ hu paw iˇ nya ni, dzaˇ heu nawˇ ya dzaˬ meh.”

²³ Zaˬ miˬ zaˬ kʼoeˇ gʼaˬ ehˇ gaˇ Sawˇluˆ maˬ naˇ haˬ-ehˇ, Ngaˇ tiˬ jeˬ-iˬ maˬ dzaˬ lehˇ ehˇ-eu meh. Ehˇ kʼawꞈ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ, aˬ yawꞈ tiˬ jeˬ paˬ dzaˬ ni gʼaˬ biꞈ nehˬ ngeh, aˬ yawꞈ naˇ haˬ-awˇ, miˇ tsa ga luꞈ-eu tuˇ laˇ-awˇ, ja ciˬ kʼoeˇ taˆ nuiˇ-euˬ meh.

²⁴ Kʼoeˇ ngeh, zaˬ miˬ zaˬ kʼoeˇ gʼaˬ aˬ yawꞈ neh cu tsuˇ taˬ-euˬ mawˇ neˇ mawˇ kʼaˇ tiˬ mawˇ sehꞈ-euˬ meh. Cehˇ meu ui cuiˆ yuˇ-awˇ, dehˬ tseˬ maˬ dawˆ-euˬ kaˬ muˇ kʼawꞈ jahˇ-euˬ meh.

²⁵ Sawˇluˆ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ kʼoeˇ deuˬ mehˬ shi, zaˬ miˬ zaˬ kʼoeˇ gʼaˬ dzaˬ dzaˬ dawˇ dawˇ ciˬ taˬ nehˬ-awˇ, aˬ yawꞈ maꞈ dzaˬ-euˬ meh. Kʼoeˇ naˇ, kʼoeˇ ngeh miˇ neh aˬ yawꞈ maꞈ doˆ-iˇ-euˬ meh.