1 Saˬmeuˬlaˆ 25 - Akha

Saˬmeuˬlaˆ ziˇ jiˇ-euˬ

¹ Saˬmeuˬlaˆ ziˇ jiˇ-awˇ, Iˇsaˬleˬlaˆ tsawˇ haˬ dawˬ tawˆ luꞈ uiˬ laˇ-eu laꞈ kʼoeˇ, aˬ yawꞈ-ahˇ tsawˇ ngoeˇ ngoeˇ nehˬ-euˬ meh. Kʼoeˇ naˇ, Laˬmahˇ meuˬ-ahˇ jaˆ-eu aˬ yawꞈ-euˬ nymˇ-ahˇ, aˬ yawꞈ maꞈ aˬ yawꞈ-ahˇ baꞈ pahˬ nehˬ-euˬ meh. Kʼoeˇ naˇ, Paˬlaˬ lehˇ kuˇ-eu bawˇ tsahˬ bawˇ dahˇ-ahˇ Daˬbiˇ iˇ-euˬ meh.

Daˬbiˇ hawˇ-eu Aˬbiˇgeˬlaˆ

² Maˬoˬ meuˬ laꞈ kʼoeˇ smˇ muiˬ muiˬ dui dui-eu tsawˇ haˬ tiˬ gʼaˬ jawˇ-eu meh. Gaˬlaˬmeˬlaˇ meuˬ laꞈ kʼoeˇ, aˬ yawꞈ-euˬ deh yaˇ hawˇ-eu mˇ myawˬ gʼawˬ mya ni jaˆ-eu meh. Yawˇ smˬ heˇ mawˇ hawˇ-eu ciꞈ myehꞈ tiˬ heˇ mawˇ jawˇ-awˇ, Gaˬlaˬmeˬlaˇ meuˬ-ahˇ aˬ yawꞈ yawˇ caꞈ hm tehˬ luꞈ-eu meh.

³ Aˬ yawꞈ-euˬ tsawˇ myahˇ-aˬ, Naˬbaˬlaˇ pyeuꞈ-awˇ, aˬ yawꞈ-euˬ miˬ zaˬ-aˬ, Aˬbiˇgeˬlaˆ meh. Miˬ zaˬ gʼaˬ aˇ gʼehˇ muiˬ-awˇ tsawˇ gahˇ ahˇ-eu tsawˇ haˬ tiˬ gʼaˬ meh. Ehˇ kʼawꞈ, Gaˬlehˆ aˇ jeuˬ pyeuꞈ-eu kʼaˬ dzeˇ zaˬ gʼaˬ-aˬ, nui ma yaw doeˇ meh.

⁴ Bawˇ tsahˬ bawˇ dahˇ laꞈ kʼoeˇ Daˬbiˇ jawˇ luꞈ ngeh, Naˬbaˬlaˇ yawˇ caꞈ hm tehˬ luꞈ-eu gaˇ kawˆ ya gaˬ-euˬ meh.

⁵ Kʼoeˇ ngeh, Gaˬlaˬmeˬlaˇ meuˬ-ahˇ zaˬ guˬ tseˇ gʼaˬ pyehˬ gʼeh-awˇ, Naˬbaˬlaˇ-ahˇ dawˬ tsaꞈ bi tsaꞈ-iˇ-euˬ meh.

⁶ Aˬ yawꞈ maꞈ-ahˇ aˬ yawꞈ mehˬ duˬ nehˬ-awˇ, heu loꞈ-ehˇ bi ehˇ-iˇ-euˬ meh. “Cawˬ-oˇ, nawˇ maˬ ehˇ, nawˬ-euˬ nymˇ jiˇ maˬ ehˇ, nawˬ-ahˇ kʼaˇ taꞈ-eu deuˬ dawˬ tawˆ luꞈ maˬ ehˇ, yaw muiˬ jawˇ saˇ doˆ luꞈ-uˇ.

⁷ Nawˇ yawˇ caꞈ hm tehˬ luꞈ-eu gaˇ kawˆ ngaˇ ya gaˬ-euˬ ma. Nawˬ-euˬ yawˇ bo-eu tsawˇ haˬ deuˬ nga maꞈ nehˬ-ehˇ jawˇ ngeh, nga maꞈ tiˬ jeˬ-iˬ maˬ jahˇ nehˬ-aˬ. Aˬ yawꞈ maꞈ Gaˬlaˬmeˬlaˇ meuˬ-ahˇ kʼaˇ jawˇ-eu nmˇ kaˬ, aˬ yawꞈ maꞈ-euˬ myawˬ tiˬ jeˬ-iˬ maˬ bi byoˆ-aˬ.

⁸ Gaˇ kawˆ heu aˬ yawꞈ maꞈ-ahˇ nawˇ naˇ haˬ haw naˇ, aˬ yawꞈ maꞈ nawˬ-ahˇ ehˇ mehˬ nehˬ laꞈ tehꞈ-a. Nga maꞈ bawˬ-iˬ ya gʼeh-eu aˇ nah keuˆ laˇ-euˬ miˇ neh, ngaˬ neh bi oe-euˬ zaˬ guˬ heu deuˬ-ahˇ nawˇ yaw muiˬ paˬ-ehˇ ha geuꞈ nehˬ laꞈ-awˇ, nga maꞈ-ahˇ caw ba-eu laꞈ kʼoeˇ, kʼaˇ biꞈ mawꞈ-eu jeˬ biꞈ nehˬ laꞈ-awˬ.”

⁹ Daˬbiˇ-euˬ tsawˇ haˬ kʼoeˇ deuˬ, Daˬbiˇ-euˬ tsawˇ myahˇ uˬ moˆ Naˬbaˬlaˇ-ahˇ dawˬ kʼoeˇ deuˬ tsaꞈ gaˬ nehˬ-awˇ, kʼoeˇ gaˇ loꞈ luꞈ-eu meh.

¹⁰ Naˬbaˬlaˇ ehˇ-eu, “Daˬbiˇ neh teu loꞈ-ehˇ bi tsaꞈ le taˬ lehˇ la. Daˬbiˇ ehˇ-eu aˬ suˇ gʼaˬ-aˬ. Ngaˇ tiˬ poˆ-iˬ maˬ gaˬ haw-aˬ. Miˇ kʼahˬ heu kʼahˬ laꞈ kʼoeˇ nymˬ-mˇ kaˬ-ahˇ cehˆ byoˆ taˬ-euˬ zaˬ kʼaˆ gʼawˬ mya gʼaˬ jawˇ meh.

¹¹ Ngaˬ-euˬ yawˇ caꞈ hm tehˬ-eu tsawˇ haˬ deuˬ bi dzaˬ-eu lehˇ bi jaˆ-euˬ kaˬ muˇ, iˇ cuꞈ hawˇ-eu, ngaˬ neh sehꞈ taˬ-euˬ shaˬ jiˇ heu deuˬ-ahˇ ngaˇ yuˇ-awˇ, teu paw heu paw neh oe-euˬ maˬ siˬ dzaˬ laˇ-eu tsawˇ haˬ deuˬ-ahˇ aˬ jeˬ miˇ neh ya biꞈ ta.”

¹² Daˬbiˇ-euˬ tsawˇ haˬ deuˬ gʼoꞈ leˇ-awˇ, Naˬbaˬlaˇ neh kʼaˇ ehˇ-euˬ loꞈ-ehˇ tsaꞈ nehˬ leˇ-euˬ meh.

¹³ Kʼoeˇ ngeh, “Mi cehˇ shaꞈ-awˬ” lehˇ, aˬ yawꞈ-euˬ tsawˇ haˬ deuˬ-ahˇ Daˬbiˇ dawˬ biꞈ-awˇ, aˬ yawꞈ maꞈ yawˬ gʼaˬ na luꞈ mi cehˇ shaꞈ-euˬ meh. Daˬbiˇ gʼeh mi cehˇ shaꞈ-awˇ, aˬ yawꞈ-euˬ tsawˇ haˬ oeˬ yaˇ gʼaˬ byah ni sheuˬ-awˇ doˆ-iˇ-euˬ meh. Myawˬ gahˬ-ahˇ bi loꞈ-eu gʼaˇ duˬ, naˇ kʼah paw nyiˬ yaˇ gʼaˬ bi jawˇ yaꞈ-euˬ meh.

¹⁴ Naˬbaˬlaˇ-euˬ zaˬ kʼaˆ tiˬ gʼaˬ, Naˬbaˬlaˇ-euˬ miˬ zaˬ Aˬbiˇgeˬlaˆ-ahˇ heu loꞈ-ehˇ ehˇ nehˬ-euˬ meh. “Daˬbiˇ bawˇ tsahˬ bawˇ dahˇ-ahˇ neh tsawˇ haˬ tiˬ deuˬ pyehˬ gʼeh leꞈ-awˇ, ngaˬ maꞈ-euˬ baw leˬ jawˇ gaˇ dawˬ tsaꞈ bi tsaꞈ gaˬ le-euˬ gaˇ kawˆ hawˇ-eu, dawˬ tsaꞈ tsaꞈ le-euˬ tsawˇ haˬ kʼoeˇ deuˬ-ahˇ nga maꞈ-euˬ baw leˬ neh dehˬ-awˇ bi gʼoꞈ leˇ-euˬ gaˇ kawˆ nawˇ yaˬ gaˬ gʼaˬ maˬ loˇ.

¹⁵ Aˬ yawꞈ maꞈ-aˬ, nga maꞈ kʼoeˇ taˆ muiˬ dui dui-eu tsawˇ haˬ deuˬ pyeuꞈ-eu meh. Aˬ yawꞈ maꞈ nga maꞈ-ahˇ tiˬ jeˬ-iˬ maˬ suˬ saˬ ni, nga maꞈ kʼawꞈ, deh ga-ahˇ aˬ yawꞈ maꞈ nehˬ-ehˇ tehꞈ-ehˇ jawˇ-euˬ ma. Nga maꞈ-euˬ myawˬ tiˬ hmˬ-iˬ maˬ byoˆ haw-aˬ.

¹⁶ Nga maꞈ aˬ yawꞈ maꞈ nehˬ-ehˇ jawˇ-awˇ yawˇ bo luꞈ ngeh, uˬ ciꞈ nah gʼahˇ maˬ ehˇ, nga maꞈ-ahˇ haw piˇ nehˬ laꞈ-euˬ meh.

¹⁷ Gaˇ kawˆ heu hmˬ nawˇ shaˇ noeˬ-awˇ, aˬ joˆ-ehˇ jahˇ paˬ nga lehˇ noeˬ tsehˆ-awˬ. Gaˇ kawˆ heu hmˬ baˬ da neh, nga maꞈ-euˬ baw leˬ hawˇ-eu aˬ yawꞈ-eu nymˇ jiˇ kʼoeˇ taˆ luˬ-iˇ seˇ-iˇ-eu jeˬ keuˆ le nya tehꞈ-a. Aˬ yawꞈ nui ma gʼahˇ dui dui-awˇ, tiˬ gʼaˬ-euˬ ehˇ dawˬ-ahˇ-iˬ maˬ naˇ haˬ nehˬ laꞈ-a.”

¹⁸ Aˬbiˇgeˬlaˆ-aˬ, kaˬ muˇ nyiˬ yaˇ siˬ, aˬ gaꞈ dzaˇ uiˇ tiˬ byah ni dahˬ-eu shaˬ kʼoˆ iˇ puˬ nyiˬ siˬ, tehˬ ba jaꞈ taˬ-euˬ yawˇ ngaˬ mawˇ, aˇ saˇ aˇ poˬ tseˇ nyiꞈ pehˬ, lawꞈ koˆ taˬ-euˬ aˬ gaꞈ aˇ siˬ tseˇ nyiꞈ dzahˬ, lawꞈ koˆ taˬ-euˬ siˬ guˬ aˇ siˬ neh jahˇ taˬ-euˬ kaˬ muˇ nyiˬ yaˇ yaˆ, heu deuˬ yaw kawˇ-ehˇ lehˬ hmˬ-awˇ, mahˬ tahˬ laˆ kʼoeˇ taˆ kaꞈ daˆ-euˬ meh.

¹⁹ Kʼoeˇ naˇ, “Naw maꞈ le tawˬ. Ngaˇ iˇ no caw teh gʼeh laꞈ ma” lehˇ, aˬ yawꞈ-euˬ zaˬ kʼaˆ deuˬ-ahˇ aˬ yawꞈ ehˇ nehˬ-euˬ meh. Ehˇ kʼawꞈ, aˬ yawꞈ-euˬ kʼaˬ dzeˇ zaˬ gʼaˬ-ahˇ aˬ yawꞈ tiˬ jeˬ-iˬ maˬ ehˇ nehˬ-a.

²⁰ Gawˬ jawˬ baˬ gʼa gaˇ gʼoꞈ tiˬ tsahˇ-ahˇ, Aˬbiˇgeˬlaˆ mahˬ tahˬ laˆ dziˬ-awˇ le luꞈ ngeh, Daˬbiˇ hawˇ-eu aˬ yawꞈ-euˬ tsawˇ haˬ deuˬ oe luꞈ gaˇ ja pyuˬ ni tahˬ puˬ-euˬ meh.

²¹ Kʼoeˇ ngeh, Daˬbiˇ heu loꞈ-ehˇ shaˇ sawˇ shaˇ sawˇ-ehˇ oe luꞈ-eu meh. “Bawˇ tsahˬ bawˇ dahˇ laꞈ kʼoeˇ tsawˇ haˬ kʼoeˇ gʼaˬ-euˬ myawˬ gahˬ deuˬ-ahˇ aˬ jeˬ miˇ neh ngaˇ haw piˇ nehˬ-euˬ nga. Aˬ yawꞈ-euˬ myawˬ tiˬ jeˬ-iˬ maˬ bi byoˆ ni teu naˆ naˆ-ehˇ caw ba nehˬ taˬ-euˬ kʼawꞈ, aˬ yawꞈ ngaˬ-ahˇ aˬ joˆ-ehˇ teu loꞈ-ehˇ paˇ jahˇ kʼoꞈ nehˬ laꞈ kʼmˬ-eu nga.

²² Uˬ bya maˬ bya laˇ mi naˆ-ehˇ tsawˇ haˬ kʼoeˇ deuˬ-ahˇ ngaˇ maˬ sehꞈ jiˇ naˇ, Miˬyehˇ ngaˬ-ahˇ tsoꞈ bi deh le luꞈ-uˇ.”

²³ Daˬbiˇ-ahˇ Aˬbiˇgeˬlaˆ ya mawˇ ngeh, mahˬ tahˬ laˆ kʼoeˇ taˆ dziˬ luꞈ-eu tsawˬ ka-awˇ, Daˬbiˇ-euˬ mehˬ shi baˬ ba miˇ tsa tuˆ ni awˆ byaˆ-awˇ yaw zeu baw nehˬ-euˬ meh.

²⁴ Daˬbiˇ-euˬ aˬ kuiˇ dawˬ peh aˬ yawꞈ awˆ byaˆ-awˇ ehˇ-eu, “Huiˬ-eu mahˇ-eu gʼaˬ-oˇ, ngaˇ ehˇ gaˇ naˇ haˬ nehˬ laꞈ-awˬ. Yaw lehˬ yaw ca heu deuˬ dawˬ tawˆ luꞈ, ngaˬ-euˬ kʼoeˇ taˆ bi jaˆ-awˬ.

²⁵ Gaˇ dahˇ maˬ tsoeˬ-eu tsawˇ haˬ pyeuꞈ-eu Naˬbaˬlaˇ-euˬ ehˇ dawˬ-ahˇ taˬ naˇ haˬ nehˬ laꞈ. Aˬ yawꞈ-euˬ tsawˇ myahˇ Naˬbaˬlaˇ lehˇ myahˇ taˬ-euˬ loꞈ-ehˇ, maˇ maˇ ni tsawˇ uˬ tiˬ gʼaˬ pyeuꞈ-eu meh. Nawˬ neh pyehˬ gʼeh leꞈ-euˬ zaˬ guˬ kʼoeˇ deuˬ-ahˇ ngaˇ maˬ ya mawˇ-aˬ.

²⁶ Nawˬ-ahˇ muiˇ-eu deuˬ-ahˇ nawˇ laꞈ poˆ poˆ nehˬ-awˇ maˬ ya sehꞈ ni, nawˬ-ahˇ ha lahˇ-eu gʼaˬ-aˬ Sahˬpaˬ Miˬyehˇ meh. Nawˬ-ahˇ muiˇ-eu deuˬ hawˇ-eu nawˬ-ahˇ laˆ coeˬ laˆ ciˆ mawꞈ-euˬ deuˬ-aˬ, Naˬbaˬlaˇ loꞈ-ehˇ kʼehˬ nehˬ kʼaˆ nehˬ-eu jeˬ-ahˇ ya daˬ luꞈ-uˇ lehˇ, dehꞈ luꞈ-eu Sahˬpaˬ Miˬyehˇ mehˬ shi nymˬ-mˇ ngaˇ yaˬ kʼehˇ yaˬ-eu ma.

²⁷ Ngaˬ-ahˇ gʼawˬ shaˬ gaˬ-eu laꞈ kʼoeˇ, ngaˬ neh yuˇ laꞈ-euˬ laꞈ sawˬ heu deuˬ-ahˇ ha geuꞈ-awˇ, nawˬ-euˬ tsawˇ haˬ deuˬ-ahˇ biꞈ-awˬ.

²⁸ Ngaˬ neh mˇ-euˬ yaw lehˬ jeˬ jaˆ naˇ kʼawꞈ, iˬ baˇ pyehˬ nehˬ laꞈ-awˬ. Sahˬpaˬ Miˬyehˇ-aˬ, nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ sahˬ paˬ bi geuꞈ tehꞈ-a. Aˬ jeˬ miˇ neh ehˇ naˇ, aˬ yawꞈ gʼaˇ duˬ nawˇ guiˇ deuˆ luꞈ-awˇ, yaw dehꞈ kʼaˇ dehꞈ kʼoeˇ keuˆ ni yaw haiˬ jeˬ maˬ mˇ ni nawˇ jawˇ tehꞈ-a.

²⁹ Tsawˇ haˬ tiˬ gʼaˬ na nawˬ-ahˇ guiˇ deuˆ le-awˇ, nawˬ-ahˇ sehꞈ-eu lehˇ leh jeh ngeh, aˇ poeˬ kʼaˆ-eu pyuˇ shuiˇ myawˬ gahˬ-ahˇ aˬ cawˬ haw piˇ-eu loꞈ-ehˇ, Sahˬpaˬ Miˬyehˇ nawˬ-ahˇ haw piˇ nehˬ laꞈ tehꞈ-a. Nawˬ-ahˇ muiˇ-eu tsawˇ haˬ deuˬ-ahˇ kʼawꞈ, caˬ oeˬ neh bi beuˆ byoˆ gʼeh-euˬ caˬ oeˬ miˬ siˬ loꞈ-ehˇ, Sahˬpaˬ Miˬyehˇ neh bi beuˆ byoˆ tehꞈ-a.

³⁰ Sahˬpaˬ Miˬyehˇ neh nawˬ-ahˇ saˇ jaˇ dzaˬ taˬ-euˬ loꞈ-ehˇ, nawˬ-euˬ gʼaˇ duˬ yaw muiˬ jeˬ dawˬ tawˆ luꞈ aˬ yawꞈ mˇ byah gʼaˬ-awˇ, nawˬ-ahˇ Iˇsaˬleˬlaˆ tsawˇ jeuˬ-euˬ sahˬ paˬ bi pyeuꞈ laˇ ngeh,

³¹ gaˇ kawˆ maˬ jaˆ gaˇ aˬ cawˬ-ahˇ sehꞈ-eu jeˬ baˬ da neh maˬ ehˇ, aˬ cawˬ-ahˇ laꞈ poˆ poˆ kʼoꞈ nehˬ-eu jeˬ baˬ da neh maˬ ehˇ, nawˇ maˬ paˇ ya noeˬ shaˬ ni pyeuꞈ-iˇ tehꞈ-a. Sahˬpaˬ Miˬyehˇ nawˬ-ahˇ guiˬ lahˬ biꞈ nehˬ laꞈ ngeh, nawˬ-euˬ zaˬ kʼaˆ pyeuꞈ-eu ngaˬ-ahˇ taˬ ngehˇ nehˬ laꞈ.”

³² Aˬbiˇgeˬlaˆ-ahˇ Daˬbiˇ ehˇ nehˬ-eu, “Iˬ nah nawˬ-ahˇ ngaˇ jawˇ gaˇ bi oe-euˬ Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ.

³³ Tsawˇ haˬ-ahˇ sehꞈ-awˇ laꞈ poˆ poˆ kʼoꞈ nehˬ-eu laꞈ kʼoeˇ, ngaˇ iˬ baˇ maˬ ya mˇ ni, iˬ nah ngaˬ-ahˇ laˆ tsoeˬ le-euˬ nawˬ neh mˇ-euˬ muiˬ dui dui-eu gaˇ heu hmˬ baˬ daˬ neh, Miˬyehˇ-ahˇ guiˬ lahˬ huiˬ dui dui luꞈ-uˇ.

³⁴ Iˬ nah nawˬ-ahˇ laˆ tahˬ laˆ naˇ nehˬ-eu jeˬ ngaˇ maˬ ya mˇ-eu gʼaˇ duˬ, Sahˬpaˬ Miˬyehˇ ngaˬ-ahˇ ha lahˇ taˬ-euˬ ngaˇ. Ehˇ kʼawꞈ, nawˇ ngaˬ-ahˇ yaw kawˇ-ehˇ maˬ tahˬ puˬ laˇ law nmˇ-aˬ, Naˬbaˬlaˇ-euˬ tsawˇ haˬ dawˬ tawˆ luꞈ uˬ bya maˬ bya laˇ mi naˆ-ehˇ ya shiˇ jiˇ meh lehˇ, Iˇsaˬleˬlaˆ tsawˇ jeuˬ-euˬ dehꞈ luꞈ-eu Miˬyehˇ mehˬ shi ngaˇ nawˬ-ahˇ ehˇ-eu ma.”

³⁵ Kʼoeˇ naˇ, Aˬbiˇgeˬlaˆ neh yuˇ laꞈ-euˬ laꞈ sawˬ deuˬ-ahˇ Daˬbiˇ ha geuꞈ-gʼaˬ ngeh, Gʼoꞈ-iˇ-awˇ maˬ noeˬ shaˬ ni jawˇ-awˬ. Nawˬ neh kʼaˇ ehˇ-euˬ loꞈ-ehˇ ngaˇ geuꞈ ma” lehˇ ehˇ nehˬ-euˬ meh.

³⁶ Naˬbaˬlaˇ jawˇ gaˇ Aˬbiˇgeˬlaˆ gʼoꞈ-iˇ ngeh, sahˬ paˬ dzaˬ-eu dzaˬ byawˇ dawˇ gʼawˆ loꞈ-ehˇ saˇ dahˇ taˬ-awˇ, Naˬbaˬlaˇ dzaˬ luꞈ dawˇ luꞈ gaˇ ya mawˇ-euˬ meh. Aˬ yawꞈ dzaˬ yehꞈ dawˇ yehꞈ taˬ-euˬ miˇ neh, yawˬ nah yawˬ uˬ shawˬ paw keuˆ ni tiˬ jeˬ-iˬ maˬ ehˇ nehˬ ni jawˇ-euˬ meh.

³⁷ Uˬ bya bya laˇ-awˇ, Naˬbaˬlaˇ aˬ gaꞈ dzaˇ uiˇ yehꞈ-eu beuˇ laˇ gʼaˬ ngeh, yawˬ jeˬ na luꞈ ehˇ mehˬ nehˬ-euˬ meh. Kʼoeˇ ngeh, Naˬbaˬlaˇ shaˬ guˬ shaˬ caˆ shiˇ-eu naˇ gawˇ naˇ laˇ-awˇ, maˬ luˆ maˬ laˆ nya-ehˇ pyeuꞈ-iˇ-euˬ meh.

³⁸ Tseˇ nah ehˇ gʼaˬ ni byah laˇ ngeh, Sahˬpaˬ Miˬyehˇ neh Naˬbaˬlaˇ-ahˇ bi shiˇ-euˬ meh.

³⁹ Naˬbaˬlaˇ shiˇ-euˬ gaˇ kawˆ Daˬbiˇ ya gaˬ ngeh, heu loꞈ-ehˇ ehˇ-eu meh. “Yaw lehˬ jeˬ maˬ ya mˇ ni ngaˬ-ahˇ ha lahˇ nehˬ laꞈ-awˇ, ngaˬ-ahˇ yehˬ bawˬ sehˇ lu-ehˇ ehˇ-eu Naˬbaˬlaˇ-ahˇ Sahˬpaˬ Miˬyehˇ laꞈ poˆ poˆ kʼoꞈ nehˬ-euˬ miˇ neh, Sahˬpaˬ Miˬyehˇ-ahˇ ngaˇ ja ceuˬ-eu ma. Naˬbaˬlaˇ yaw haiˬ jeˬ mˇ-euˬ miˇ neh, Sahˬpaˬ Miˬyehˇ neh aˬ yawꞈ-ahˇ kʼehˬ nehˬ kʼaˆ nehˬ-euˬ meh.” Kʼoeˇ naˇ, “Ngaˬ-ahˇ mˇ dzaˬ laˇ ma loˇ” lehˇ, Daˬbiˇ neh Aˬbiˇgeˬlaˆ-ahˇ bi naˇ haˬ-iˇ-euˬ meh.

⁴⁰ Daˬbiˇ-euˬ zaˬ kʼaˆ deuˬ Gaˬlaˬmeˬlaˇ meuˬ-ahˇ Aˬbiˇgeˬlaˆ jawˇ gaˇ iˇ-awˇ, “Daˬbiˇ neh nga maꞈ-ahˇ heu gaˇ bi oe-awˇ, aˬ yawꞈ-euˬ miˬ zaˬ bi geuꞈ-eu gʼaˇ duˬ nawˬ-ahˇ bi kuˇ laˬ le-euˬ meh” lehˇ ehˇ nehˬ-euˬ meh.

⁴¹ Kʼoeˇ ngeh, Aˬbiˇgeˬlaˆ miˇ tsa awˆ byaˆ-awˇ, “Ngaˇ-aˬ, aˬ yawꞈ-euˬ zaˬ kʼaˆ pyeuꞈ-eu ma. Aˬ yawꞈ-euˬ zaˬ kʼaˆ deuˬ-euˬ aˬ kuiˇ dzuiꞈ nehˬ ma lehˇ, ngaˇ noeˬ shaw taˬ gʼaˬ-euˬ ma” lehˇ ehˇ-eu meh.

⁴² Kʼoeˇ naˇ, aˬ yawꞈ mahˬ tahˬ laˆ-ahˇ yaw kawˇ-ehˇ dziˬ leˇ-euˬ meh. Aˬ yawꞈ-euˬ zaˬ miˬ zaˬ zaˬ kʼaˆ ngaˬ gʼaˬ sheuˬ-awˇ, Daˬbiˇ-euˬ zaˬ kʼaˆ deuˬ mehˬ nah caw teh gʼeh leꞈ-awˇ, Daˬbiˇ-ahˇ dahˬ dzaˬ leˇ-euˬ meh.

⁴³ Daˬbiˇ-aˬ, Yeˬzaˬleˬlaˇ meuˬ-ahˇ jawˇ-eu Aˬhiˇnoˬ-ahˇ sheuˬ-awˇ jawˇ luꞈ-eu meh. Nymˬ-mˇ poˆ jawˇ, Aˬbiˇgeˬlaˆ gʼaˬ kʼawꞈ aˬ yawꞈ-euˬ miˬ zaˬ paˇ pyeuꞈ laˇ-euˬ meh.

⁴⁴ Kʼoeˇ ngeh deuˆ-ahˇ, Sawˇluˆ-aˬ, aˬ yawꞈ-euˬ aˬ buˇ pyeuꞈ-eu Daˬbiˇ-euˬ miˬ zaˬ Miˇkaˬlaˇ-ahˇ, Gaˬlmˬ meuˬ-ahˇ jawˇ-eu Laˬiˇshaˆ-euˬ aˬ li Paˬlaˬtiˇ-ahˇ bi iˇ paˇ-euˬ meh.