1 Saˬmeuˬlaˆ 24 - Akha

Daˬbiˇ neh Sawˇluˆ-ahˇ maˬ sehꞈ ni taˬ nehˬ-euˬ

¹ Sawˇluˆ Piˇliˇtiˆ tsawˇ haˬ deuˬ-ahˇ guiˇ deuˆ-iˇ-euˬ gʼoꞈ laˇ ngeh, Eˬgeˬdiˇ meuˬ dawˬ peh jaˆ-eu bawˇ tsahˬ bawˇ dahˇ laꞈ kʼoeˇ Daˬbiˇ jawˇ luꞈ-eu gaˇ kawˆ, aˬ cawˬ aˬ yawꞈ-ahˇ ehˇ nehˬ-euˬ meh.

² Iˇsaˬleˬlaˆ miˇ kʼahˬ laꞈ kʼoeˇ aˬ cawˬ naˆ maˬ tseˇ guiˇ deuˆ nya-eu yehˇ smˬ heˇ gʼaˬ Sawˇluˆ tseˇ doˆ-awˇ, Yaˬ lo guˇ-euˬ nahˇ ma doˆ kʼehˬ paw, Daˬbiˇ hawˇ-eu aˬ yawꞈ-euˬ tsawˇ haˬ deuˬ-ahˇ poˆ-iˇ-euˬ meh.

³ Gaˇ ma gaˇ dzeˇ jaˆ-eu yawˇ yawˇ kuˆ dawˬ peh lo kʼahˬ tiˬ kʼahˬ-ahˇ aˬ yawꞈ iˇ keuˆ-awˇ, lo kʼahˬ laꞈ kʼoeˇ uˇ leˇ-awˇ gʼaˬ doeˇ naˬ dah leˇ-euˬ meh. Aˬ yawꞈ gʼaˬ doeˇ naˬ dah leˇ-euˬ lo kʼahˬ kʼoeˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ dzuˇ zaꞈ luꞈ-eu lo kʼahˬ-ahˇ zaˬ leˇ-awˇ, lo kʼahˬ-euˬ laꞈ kʼoeˇ gʼawˬ mahˇ ni naꞈ gaˇ aˬ yawꞈ maꞈ dzuˇ zaꞈ luꞈ-eu meh.

⁴ Daˬbiˇ-euˬ tsawˇ haˬ deuˬ Daˬbiˇ-ahˇ ehˇ-eu. “Heu-aˬ, nawˬ-eu gʼaˇ duˬ yehꞈ dui dui laˇ-euˬ aˇ yamˬ ngaˇ. Nawˬ-ahˇ muiˇ-eu tsawˇ haˬ-ahˇ nawˬ-euˬ aˬ laꞈ laꞈ kʼoeˇ ngaˇ a nehˬ-awˇ, nawˇ kʼaˇ jahˇ nehˬ mawꞈ-eu jeˬ jahˇ nehˬ nya meh lehˇ, Sahˬpaˬ Miˬyehˇ neh ehˇ taˬ-euˬ kʼoeˇ iˬ nah keuˆ le-euˬ ngaˇ.” Kʼoeˇ ngeh, Daˬbiˇ aˬ ya ya-ehˇ joe joe-ehˇ iˇ-awˇ, Sawˇluˆ-ahˇ maˬ bi siˬ leˇ ni, aˬ yawꞈ-euˬ pehˇ kʼahˬ pehˇ dahˬ yehˬ tsehˆ-euˬ meh.

⁵ Sawˇluˆ-euˬ pehˇ kʼahˬ pehˇ dahˬ ya yehˬ tsehˆ-euˬ miˇ neh, Daˬbiˇ-euˬ nui ma laꞈ kʼoeˇ maˬ saˇ maˇ saˇ-ehˇ pyeuꞈ laˇ-euˬ meh.

⁶ Daˬbiˇ aˬ yawꞈ-euˬ tsawˇ haˬ deuˬ-ahˇ ehˇ nehˬ-euˬ, “Sahˬpaˬ Miˬyehˇ neh tseˇ doˆ-euˬ sahˬ paˬ pyeuꞈ-eu ngaˬ-euˬ sahˬ paˬ-ahˇ ngaˇ maˬ ya laˆ tahˬ, maˬ ya laˆ naˇ ni, Sahˬpaˬ Miˬyehˇ ngaˬ-ahˇ haw piˇ luꞈ-uˇ. Aˬ yawꞈ-ahˇ ngaˇ ui cuiˆ tehꞈ-ehˇ kʼawꞈ maˬ laˆ tahˬ kʼmˬ-a. Aˬ jeˬ miˇ neh ehˇ naˇ, Sahˬpaˬ Miˬyehˇ neh aˬ yawꞈ-ahˇ tsiˇ shehˆ daˆ-awˇ tseˇ doˆ taˬ-euˬ meh.”

⁷ Sawˇluˆ-ahˇ laˆ tahˬ laˆ naˇ nehˬ-eu jeˬ maˬ ya jahˇ-eu gʼaˇ duˬ, Daˬbiˇ aˬ yawꞈ-euˬ tsawˇ haˬ deuˬ-ahˇ kʼoeˇ loꞈ-ehˇ ehˇ nehˬ-euˬ meh. Kʼoeˇ naˇ, Sawˇluˆ noeˬ laˇ-awˇ, lo kʼahˬ laꞈ nyiˇ iˇ doˆ gʼeh-euˬ meh.

⁸ Daˬbiˇ gʼeh, Sawˇluˆ-euˬ mehˬ nah lo kʼahˬ laꞈ nyiˇ iˇ doˆ gʼeh-awˇ, “Ngaˬ-euˬ sahˬ paˬ-oˇ” lehˇ guˇ gaˬ nehˬ-euˬ meh. Sawˇluˆ naˇ kʼah paw gʼawˇ pyawˇ haw ngeh, Daˬbiˇ miˇ tsa awˆ byaˆ-awˇ yaw zeu baw nehˬ-euˬ meh.

⁹ Sawˇluˆ-ahˇ Daˬbiˇ ehˇ nehˬ-eu, “Nawˬ-ahˇ laˆ tahˬ laˆ naˇ-eu gʼaˇ duˬ ngaˇ leh jeh luꞈ meh lehˇ ehˇ-eu tsawˇ haˬ deuˬ-euˬ dawˬ-ahˇ, aˬ jeˬ miˇ neh nawˇ naˇ haˬ te.

¹⁰ Nymˬ-mˇ tseuˆ tseuˆ ni, lo kʼahˬ heu kʼahˬ laꞈ kʼoeˇ, Sahˬpaˬ Miˬyehˇ neh nawˬ-euˬ gʼawˇ mawˇ ngaˬ-euˬ aˬ laꞈ laꞈ kʼoeˇ a nehˬ laꞈ gʼaˬ-euˬ gaˇ, nawˇ ya mawˇ-euˬ meh. Nawˬ-ahˇ sehꞈ-awˬ lehˇ ngaˬ-euˬ tsawˇ haˬ tiˬ paˆ na deuˬ ngaˬ-ahˇ ehˇ-eu meh. Ehˇ kʼawꞈ, nawˇ sahˬ paˬ geuꞈ-eu gʼaˇ duˬ, Sahˬpaˬ Miˬyehˇ neh nawˬ-ahˇ tseˇ doˆ taˬ-euˬ miˇ neh, nawˬ-ahˇ ngaˇ ui cuiˆ tehꞈ-ehˇ kʼawꞈ maˬ laˆ tahˬ maˬ laˆ naˇ nehˬ lehˇ, aˬ yawꞈ maꞈ-ahˇ ngaˇ ehˇ nehˬ-euˬ ma.

¹¹ Ngaˬ-euˬ aˬ da-oˇ, heu gaˇ haw sheˇ. Ngaˇ tuˆ tehˬ luꞈ-eu nawˬ-euˬ pehˇ kʼahˬ pehˇ dahˬ-ahˇ haw sheˇ. Nawˬ-ahˇ ngaˇ sehꞈ-eu yehꞈ laˇ-euˬ kʼawꞈ maˬ sehꞈ ni, pehˇ kʼahˬ pehˇ dahˬ tehꞈ-ehˇ yehˬ tsehˆ-euˬ ma. Heu gaˇ haw-awˇ, ngaˬ-euˬ nui ma laꞈ kʼoeˇ, nawˬ-ahˇ puiˬ mawꞈ-eu jeˬ hawˇ-eu laˆ tahˬ laˆ naˇ nehˬ mawꞈ-eu jeˬ tiˬ pawꞈ-iˬ maˬ ahˇ nga lehˇ, nawˇ siˬ duˬ-awˬ. Ngaˬ neh nawˬ-ahˇ mˇ lehˬ taˬ-euˬ tiˬ jeˬ-iˬ maˬ jaˆ kʼawꞈ, ngaˬ-ahˇ sehꞈ-eu lehˇ nawˇ poˆ luꞈ meh.

¹² Aˇ nyaꞈ aˬ geu gʼaˬ lehˬ-eu nga lehˇ, Sahˬpaˬ Miˬyehˇ yaˇ kʼaˬ daˇ luꞈ-uˇ. Nawˬ neh ngaˬ-ahˇ mˇ lehˬ-euˬ jeˬ baˬ da neh, Sahˬpaˬ Miˬyehˇ nawˬ-ahˇ jahˇ kʼoꞈ nehˬ luꞈ-uˇ. Ehˇ kʼawꞈ, ngaˇ nawˬ-ahˇ ui cuiˆ tehꞈ-ehˇ kʼawꞈ maˬ laˆ tahˬ maˬ laˆ naˇ nehˬ ni jawˇ ma.

¹³ Haiˬ-eu tsawˇ haˬ deuˬ tehꞈ-ehˇ yaw haiˬ jeˬ mˇ-eu meh lehˇ ehˇ-eu tsawˇ mawˬ dawˬ daˬ nawˇ siˬ nya meh. Kʼoeˇ miˇ neh, nawˬ-ahˇ laˆ tahˬ laˆ naˇ-eu jeˬ ngaˇ maˬ mˇ.

¹⁴ Nawˇ shaˇ noeˬ haw sheˇ. Iˇsaˬleˬlaˆ tsawˇ jeuˬ-euˬ sahˬ paˬ aˬ jeˬ-ahˇ sehꞈ-eu lehˇ leh jeh luꞈ ta. Aˬ jeˬ-euˬ mehˬ nah aˬ yawꞈ teh luꞈ ta. Shiˇ-euˬ aˬ kuiˬ tiˬ mawˇ mehˬ nah teh luꞈ ta loˇ.

¹⁵ Maˬ ngeuˇ naˇ, kuiˬ shehˇ-euˬ mehˬ nah teh luꞈ ta loˇ. Aˇ nyaꞈ aˬ geu gʼaˬ lehˬ nga lehˇ, Sahˬpaˬ Miˬyehˇ noeˬ tsehˆ-awˇ yaˇ kʼaˬ daˇ luꞈ-uˇ. Gaˇ kawˆ heu hmˬ-ahˇ aˬ yawꞈ haw-awˇ, ngaˬ-ahˇ haw piˇ-eu laꞈ kʼoeˇ, nawˬ-euˬ aˬ laꞈ laꞈ kʼoeˇ aˬ yawꞈ ngaˬ-ahˇ ka kʼoꞈ nehˬ laꞈ luꞈ-uˇ.”

¹⁶ Sawˇluˆ-ahˇ Daˬbiˇ kʼoeˇ loꞈ-ehˇ ehˇ nehˬ gʼaˬ ngeh, “Ngaˬ li Daˬbiˇ-oˇ, toˆ-ehˇ ehˇ luꞈ-eu teu aˬ diˇ aˬ maˇ nawˇ ma loˇ” lehˇ Sawˇluˆ ehˇ-awˇ ngoeˇ-euˬ meh.

¹⁷ Kʼoeˇ naˇ, Daˬbiˇ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Nawˇ-aˬ, ngaˇ naˆ maˬ tseˇ tsaˬ-eu dawˇ-eu tsawˇ haˬ pyeuꞈ-eu meh. Nawˬ-ahˇ ngaˇ yaw doeˇ mˇ nehˬ-euˬ kʼawꞈ, nawˇ ngaˬ-ahˇ yaw muiˬ jeˬ mˇ kʼoꞈ nehˬ laꞈ-euˬ meh.

¹⁸ Nawˇ ngaˬ-euˬ kʼoeˇ taˆ aˇ naˆ ni muiˬ-eu tsawˇ haˬ pyeuꞈ-eu gaˇ kawˆ, iˬ nah nawˇ bi siˬ bi mawˇ-euˬ meh. Aˬ jeˬ miˇ neh ehˇ naˇ, Sahˬpaˬ Miˬyehˇ ngaˬ-ahˇ nawˬ-euˬ aˬ laꞈ laꞈ kʼoeˇ a nehˬ gʼaˬ-euˬ kʼawꞈ, nawˇ ngaˬ-ahˇ maˬ sehꞈ-a.

¹⁹ Yawˬ ha-ahˇ muiˇ-eu tsawˇ haˬ-ahˇ nyehꞈ mi-awˇ, maˬ laˆ tahˬ maˬ laˆ naˇ ni pyehˬ nehˬ-eu aˬ suˇ gʼaˬ jawˇ ta. Iˬ nah nawˇ ngaˬ-ahˇ mˇ nehˬ laꞈ-euˬ jeˬ baˬ da neh, Sahˬpaˬ Miˬyehˇ nawˬ-ahˇ guiˬ lahˬ biꞈ luꞈ-uˇ.

²⁰ Nawˇ Iˇsaˬleˬlaˆ tsawˇ jeuˬ-euˬ sahˬ paˬ pyeuꞈ laˇ-awˇ, miˇ kʼahˬ heu kʼahˬ-ahˇ ya uˆ lahˇ daˆ leꞈ tehꞈ-a.

²¹ Ehˇ kʼawꞈ, ngaˬ-euˬ tsawˇ myahˇ maˬ ehˇ, ngaˬ-euˬ nymˇ jiˇ-euˬ tsawˇ myahˇ maˬ ehˇ, maˬ ya bi byoˆ-iˇ-eu gʼaˇ duˬ, ngaˬ-euˬ zaˬ deuˬ uˆ deuˬ-ahˇ nawˇ maˬ sehꞈ ni taˬ nehˬ ma lehˇ, Sahˬpaˬ Miˬyehˇ-euˬ tsawˇ myahˇ uˬ moˆ ngaˬ-ahˇ saˇ jaˇ dzaˬ-awˬ.”

²² Kʼoeˇ ngeh, Sawˇluˆ nehˬ-ehˇ Daˬbiˇ saˇ jaˇ dzaˬ-euˬ meh. Kʼoeˇ naˇ, Sawˇluˆ gʼoꞈ-iˇ-awˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ kʼawꞈ, ziꞈ dah ni gʼeh-eu dzuˇ zaꞈ duˬ-ahˇ gʼoꞈ leˇ-euˬ meh.