1 Saˬmeuˬlaˆ 20 - Akha

Yawˇnaˆshaˬ Daˬbiˇ-ahˇ caw ba-euˬ

¹ Laˬmahˇ gahˬ kaˬ laꞈ kʼoeˇ jaˆ-eu Naˬiˇyoˆ pu-ahˇ neh Daˬbiˇ cehˆ doˆ-awˇ, Yawˇnaˆshaˬ jawˇ gaˇ le-awˇ, “Ngaˇ aˬ jeˬ mˇ bahˬ taˬ-euˬ jaˆ ta. Aˬ jeˬ iˬ baˇ ahˇ ta. Nawˬ da ngaˬ-ahˇ sehꞈ mawꞈ paˬ-ehˇ, aˬ yawꞈ kʼoeˇ taˆ ngaˬ neh mˇ lehˬ taˬ-euˬ aˬ jeˬ jaˆ ta” lehˇ naˇ haˬ-euˬ meh.

² Yawˇnaˆshaˬ ehˇ-eu, “Miˬyehˇ nawˬ-ahˇ shiˇ gaˇ maˬ bi keuˆ-a. Ngaˬ da-aˬ, huiˬ-eu gaˇ maˬ ehˇ, nyiˇ-eu gaˇ maˬ ehˇ, aˬ yawꞈ kʼaˇ mˇ-eu lehˇ gʼeh-eu jeˬ dawˬ tawˆ luꞈ ngaˬ-ahˇ ehˇ nehˬ laꞈ-eu meh. Gaˇ kawˆ heu hmˬ kʼawꞈ, aˬ yawꞈ ngaˬ-ahˇ maˬ ehˇ nehˬ laꞈ ni maˬ zaꞈ taˬ-aˇ. Nawˇ ehˇ-eu loꞈ-ehˇ maˬ ngeuˇ-eu paˬ”

³ Ehˇ kʼawꞈ, Daˬbiˇ ehˇ-eu, “Nawˇ ngaˬ-ahˇ aˇ naˆ ni gʼoeˇ-eu gaˇ kawˆ nawˬ da siˬ duˬ-eu miˇ neh, nawˇ noeˬ shaˬ gaˇ guˆ-awˇ, aˬ yawꞈ mˇ-eu lehˇ gʼeh-eu gaˇ kawˆ heu hmˬ nawˬ-ahˇ maˬ bi siˬ ni mˇ ma lehˇ aˬ yawꞈ noeˬ tsehˆ-euˬ tehꞈ-a. Ngaˇ ya shiˇ-eu gʼaˇ duˬ kuiˇ toꞈ tiˬ toꞈ ca-eu tehꞈ miˇ-a lehˇ, dehꞈ luꞈ-eu Sahˬpaˬ Miˬyehˇ mehˬ shi nawˬ-ahˇ ngaˇ ehˇ-eu ma.”

⁴ Kʼoeˇ ngeh, “Nawˇ kʼaˇ loˬ-eu jeˬ ngaˇ mˇ nehˬ ma” lehˇ, Daˬbiˇ-ahˇ Yawˇnaˆshaˬ ehˇ nehˬ-euˬ meh.

⁵ Daˬbiˇ ehˇ-eu, “Ni shawˬ nah-aˬ, La shuiꞈ lah-eu Bawˬ-iˬ gʼeh-eu aˇ nah pyeuꞈ-awˇ, sahˬ paˬ nehˬ-ehˇ ngaˇ ya dzaˬ ya dawˇ taꞈ paˬ-ehˇ jaˆ-eu meh. Ehˇ kʼawꞈ, nawˇ nui ma tsaˬ naˇ, saˇ pehˬ uˬ ciꞈ keuˆ ni ngaˇ deh ga-ahˇ cehˆ zaꞈ-awˇ jawˇ-iˇ ma.

⁶ Dzaˬ taꞈ dawˇ taꞈ-eu hawˬ jeh-ahˇ ngaˇ hawˬ jawˬ maˬ jawˬ luꞈ nga lehˇ nawˬ da haw siˬ naˇ, ngaˬ-euˬ aˇ jeuˬ tiˬ jeuˬ jeuˬ lah ni tiˬ kʼoꞈ tiˬ poˆ ya lawˇ ya shehˇ-eu aˇ yamˬ tsaˬ laˇ-euˬ miˇ neh, nawˬ-ahˇ shaˇ-awˇ tehˬ law baw law-ehˇ Behˬlehˬhehˬ meuˬ-ahˇ gʼoꞈ-iˇ-euˬ meh lehˇ ehˇ nehˬ-awˬ.

⁷ Tiˬ jeˬ-iˬ maˬ ngeuˇ-aˇ lehˇ aˬ yawꞈ ehˇ naˇ, ngaˇ ya buˬ ya law-iˇ tehꞈ-a. Ehˇ kʼawꞈ, aˬ yawꞈ kʼoeˇ loꞈ-ehˇ maˬ ehˇ ni nui ma pehˇ laˇ-euˬ gaˇ nawˇ ya mawˇ naˇ, ngaˬ-ahˇ yaw dehꞈ-ehˇ maˬ taˬ lehˇ aˬ yawꞈ noeˬ tsehˆ taˬ-awˇ jawˇ-eu meh lehˇ nawˇ siˬ nya-awˬ.

⁸ Nawˬ neh ngaˬ nehˬ-ehˇ dzaˬ taˬ-euˬ muiˬ-eu shawˇ-eu saˇ jaˇ-ahˇ nawˇ ziꞈ-eu laꞈ kʼoeˇ, ngaˬ-ahˇ kʼoeˇ loꞈ-ehˇ tiˬ poˆ caw ba nehˬ laꞈ-awˬ. Ehˇ kʼawꞈ, ngaˇ iˬ baˇ ahˇ-eu ngeuˇ naˇ, nawˇ ngaˬ-ahˇ sehꞈ-awˬ. Nawˬ da neh ngaˬ-ahˇ bi sehꞈ-eu gʼaˇ duˬ, nawˇ ngaˬ-ahˇ nawˬ da jawˇ gaˇ sheuˬ gʼeh sheuˬ gʼeh-ehˇ jeuˬ-eu maˬ loˬ-aˇ.”

⁹ Yawˇnaˆshaˬ ehˇ-eu, “Nawˇ teu loꞈ-ehˇ aˬ joˆ-ehˇ noeˬ kʼmˬ-eu nya. Nawˬ-ahˇ yaw dehꞈ-ehˇ maˬ taˬ lehˇ ngaˬ da neh aˬ diˇ aˬ maˇ noeˬ tsehˆ taˬ-euˬ gaˇ kawˆ ngaˇ ya siˬ duˬ naˇ, nawˬ-ahˇ ngaˇ maˬ ehˇ gaˬ le ni jawˇ tehˬ coeˇ tehꞈ-a loˇ.”

¹⁰ Daˬbiˇ ehˇ-eu, “Nawˬ da nawˬ-ahˇ nui ma pehˇ-eu dawˬ ngehˬ naˇ, aˬ yawꞈ kʼoeˇ loꞈ-ehˇ ngehˬ-eu gaˇ kawˆ ngaˬ-ahˇ aˬ suˇ gʼaˬ ehˇ gaˬ le nmˇ.”

¹¹ Kʼoeˇ ngeh, “Deh ga-ahˇ iˇ kaˇ-euˇ” lehˇ Yawˇnaˆshaˬ ehˇ-awˇ, nyiˬ gʼaˬ luꞈ deh ga paw iˇ gʼeh-euˬ meh.

¹² Daˬbiˇ-ahˇ Yawˇnaˆshaˬ ehˇ nehˬ-eu, “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ aˇ nyaꞈ yaw kaˬ-ahˇ tsawˇ kaˬ geuꞈ luꞈ-uˇ. Ni shawˬ hawˇ-eu saˇ pehˬ nah laꞈ kʼoeˇ, ngaˬ da-ahˇ ngaˇ naˇ haˬ ma. Aˬ yawꞈ nawˬ-euˬ kʼoeˇ taˆ nui ma taˬ-eu yaw muiˬ naˇ, gaˇ kawˆ kʼoeˇ nawˇ jawˇ gaˇ ngaˇ bi gaˬ keuˆ le ma.

¹³ Nawˬ-ahˇ yaw dehꞈ-ehˇ maˬ taˬ lehˇ aˬ yawꞈ noeˬ luꞈ-eu ngaˇ ya siˬ ngeh, gaˇ kawˆ kʼoeˇ nawˬ-ahˇ ngaˇ maˬ ehˇ gaˬ le-ehˇ, nawˬ-ahˇ maˬ sheuˬ buˬ nehˬ ni ngaˇ jawˇ naˇ, Sahˬpaˬ Miˬyehˇ ngaˬ-ahˇ sehꞈ luꞈ-uˇ. Ngaˬ da nehˬ-ehˇ Sahˬpaˬ Miˬyehˇ jawˇ-eu loꞈ-ehˇ, nawˬ nehˬ-ehˇ kʼawꞈ jawˇ luꞈ-uˇ.

¹⁴ Ngaˇ maˬ shiˇ-ehˇ ya dehꞈ naˇ, nawˬ neh dzaˬ taˬ-euˬ muiˬ-eu shawˇ-eu saˇ jaˇ-ahˇ nawˇ maˬ byehˇ ni, ngaˬ-ahˇ saˇ jaˇ ziꞈ-awˬ. Ehˇ kʼawꞈ, ngaˇ ya shiˇ lawˬ naˇ,

¹⁵ ngaˬ-euˬ nymˇ jiˇ-ahˇ, maˬ shiˇ tiˬ ziˇ nawˇ saˇ jaˇ ziꞈ-awˬ. Nawˬ-ahˇ muiˇ-eu tsawˇ haˬ dawˬ tawˆ luꞈ-ahˇ Sahˬpaˬ Miˬyehˇ laˆ luˬ laˆ seˇ nehˬ jiˇ ngeh,

¹⁶ aˇ nyaꞈ yaw kaˬ dzaˬ taˬ-euˬ saˇ jaˇ heu maˬ poˆ maˬ paˇ laˇ ni ziꞈ luꞈ-uˇ. Saˇ jaˇ heu hmˬ-ahˇ nawˇ maˬ ziꞈ naˇ, Sahˬpaˬ Miˬyehˇ nawˬ-ahˇ kʼehˬ nehˬ laꞈ tehꞈ-a.”

¹⁷ Yawˇnaˆshaˬ-ahˇ Daˬbiˇ gaˬ ni, Yawˇ naˆshaˬ neh Daˬbiˇ-ahˇ saˇ jaˇ paˇ bi dzaˬ poˆ-euˬ meh. Aˬ jeˬ miˇ neh ehˇ naˇ, Yawˇnaˆshaˬ-aˬ, yawˬ ha-euˬ gʼawˇ mawˇ-ahˇ gaˬ-eu loꞈ-ehˇ Daˬbiˇ-ahˇ gaˬ-eu meh.

¹⁸ Daˬbiˇ-ahˇ Yawˇnaˆshaˬ ehˇ nehˬ-eu, “Ni shawˬ nah-aˬ, La shuiꞈ lah-eu Bawˬ-iˬ gʼeh-eu aˇ nah pyeuꞈ-eu miˇ neh, hawˬ jawˬ jawˬ leˇ ngeh nawˬ-euˬ nuiˇ duˬ yawꞈ ngehꞈ-ehˇ jaˆ naˇ, nawˇ maˬ jawˇ nga lehˇ siˬ nya shaw-iˬ tehꞈ-a.

¹⁹ Saˇ pehˬ ngeh nah paˇ keuˆ laˇ naˇ, nawˇ maˬ jawˇ-eu gaˇ kawˆ paˇ siˬ duˬ dzehˬ laˇ tehꞈ-a. Kʼoeˇ miˇ neh, dzeuˇ laˇ ngeh poˆ nawˬ neh cehˆ zaꞈ-euˬ jawˇ duˬ-ahˇ iˇ-awˇ, kʼoeˇ gaˇ jaˆ-eu kʼaˬ lo lo bymˇ baˇ laˇ-ahˇ dzuˇ zaꞈ-iˇ-awˬ.

²⁰ Ngaˇ kaˆ myaˬ smˇ myaˬ yuˇ-awˇ, aˇ pyaˇ-ahˇ beuˆ-eu loꞈ-ehˇ kʼaˬ lo lo bymˇ kʼoeˇ bymˇ-ahˇ beuˆ ma.

²¹ Kʼoeˇ naˇ, ngaˬ-euˬ zaˬ kʼaˆ-ahˇ kaˆ myaˬ kʼoeˇ deuˬ bi gʼoˆ kʼoꞈ laˬ-iˇ ma. ‘Nawˇ jawˇ-eu heu paw dzeˇ kaˆ myaˬ ga ngaˇ. Gʼoˆ-awˬ’ lehˇ, zaˬ kʼaˆ kʼoeˇ gʼaˬ-ahˇ ngaˇ ehˇ nehˬ naˇ, ehˇ mawꞈ-eu dawˬ tsuiꞈ-aˬ, ‘Nawˬ-euˬ gʼaˇ duˬ guˆ kʼaˇ maˬ za-a. Doˆ le-awˬ’ lehˇ ehˇ mawꞈ-eu ma. Nawˬ-eu gʼaˇ duˬ guˆ kʼaˇ maˬ za-eu gaˇ kawˆ, dehꞈ luꞈ-eu Sahˬpaˬ Miˬyehˇ mehˬ shi ngaˇ saˇ kiˇ kamˬ-eu jeˬ pyeuꞈ-eu ma.

²² Ehˇ kʼawꞈ, ‘Nawˇ jawˇ-eu kʼoeˇ paw paˆ kaˆ myaˬ ga-iˇ mehˬ’ lehˇ, ngaˬ-euˬ zaˬ kʼaˆ kʼoeˇ gʼaˬ-ahˇ ngaˇ ehˇ nehˬ naˇ, nawˇ dzuˇ dzuˇ-ehˇ taˬ paˇ jawˇ. Aˬ jeˬ miˇ neh ehˇ naˇ, Sahˬpaˬ Miˬyehˇ nawˬ-ahˇ iˇ doˆ -awˬ lehˇ ehˇ luꞈ meh.

²³ Aˇ nyaꞈ yaw kaˬ ngehˬ cawˬ-euˬ dawˬ heu dawˬ-ahˇ taꞈ leˇ-eu laꞈ kʼoeˇ, aˇ nyaꞈ-euˬ yaw kaˬ-ahˇ Sahˬpaˬ Miˬyehˇ aˬ myah luꞈ jawˇ tehꞈ-a.”

²⁴ Kʼoeˇ naˇ, Daˬbiˇ deh ga-ahˇ cehˆ zaꞈ-awˇ jawˇ-euˬ meh. La shuiꞈ lah-eu Bawˬ-iˬ gʼeh ngeh, dzaˬ byawˇ laˆ dawˆ taˬ-euˬ hawˬ jeh-ahˇ sahˬ paˬ Sawˇluˆ hawˬ jawˬ jawˬ le-euˬ meh.

²⁵ Aˬ myah myah aˬ yawꞈ nuiˇ-eu nuiˇ duˬ pyeuꞈ-eu kaˇ pyawˇ dawˬ peh jaˆ-eu nuiˇ duˬ-ahˇ aˬ yawꞈ nuiˇ-euˬ meh. Aˬbaˬnaˬ gʼaˬ aˬ yawꞈ-euˬ gaˇ dzeˇ nuiˇ-awˇ, Yawˇnaˆshaˬ gʼaˬ aˬ yawꞈ-euˬ mehˬ shi nuiˇ-euˬ meh. Daˬbiˇ-euˬ nuiˇ duˬngehꞈ luꞈ-eu meh.

²⁶ Ehˇ kʼawꞈ, kʼoeˇ ngeh nah Sawˇluˆ tiˬ jeˬ-iˬ maˬ ehˇ ni jawˇ-euˬ meh. Aˬ jeˬ miˇ neh ehˇ naˇ, “Tiˬ jeˬ paˬ gʼeh-awˇ zahˇ sahˇ kʼoꞈ-ahˇ taꞈ leˇ-eu laꞈ kʼoeˇ maˬ shawˇ-eu miˇ neh maˬ laˇ-euˬ ngeuˇ nga” lehˇ aˬ yawꞈ noeˬ-euˬ meh.

²⁷ La shuiꞈ lah-eu Bawˬ-iˬ jahˇ gʼaˬ-awˇ yawˬ nah yawˬ keuˆ laˇ ngeh keuˆ ni, Daˬbiˇ-euˬ nuiˇ duˬ yawꞈ ngehꞈ-ehˇ jaˆ luꞈ-eu miˇ neh, “Aˬ jeˬ miˇ neh Daˬbiˇ heu gʼaˬ miˇ nah maˬ ehˇ, iˬ nah maˬ ehˇ, hawˬ jawˬ maˬ jawˬ laˇ ni jawˇ ta” lehˇ, Yawˇnaˆshaˬ-ahˇ Sawˇluˆ naˇ haˬ-euˬ meh.

²⁸ Yawˇnaˆshaˬ ehˇ-eu, “Behˬlehˬhehˬ meuˬ-ahˇ bi gʼoꞈ-iˇ nehˬ laꞈ lehˇ, aˬ yawꞈ ngaˬ-ahˇ shaˇ laˇ-euˬ meh.

²⁹ Behˬ lehˬhehˬ meuˬ laꞈ kʼoeˇ aˬ yawꞈ pehˬ aˇ jeuˬ lawˇ-eu shehˇ-eu jeˬ mˇ luꞈ-awˇ, aˬ yawꞈ-ahˇ maˬ gʼoꞈ le-ehˇ taˬ byehˇ lehˇ, aˬ yawꞈ-euˬ aˇ doˆ tsaꞈ ahˇ laꞈ-euˬ miˇ neh bi gʼoꞈ-iˇ nehˬ laꞈ-awˬ lehˇ, aˬ yawꞈ ngaˬ-ahˇ shaˇ-eu meh. Ngaˇ aˬ yawꞈ-ahˇ gʼoeˇ-eu cawˬ pyeuꞈ-eu ngeuˇ naˇ, aˬ yawꞈ-euˬ aˬ yuiꞈ aˬ nyiˇ deuˬ jawˇ gaˇ tiˬ poˆ bi gʼoꞈ-iˇ nehˬ laꞈ-awˬ lehˇ shaˇ-eu miˇ neh, aˬ yawꞈ-ahˇ ngaˇ bi gʼoꞈ-iˇ-euˬ ma. Kʼoeˇ miˇ neh, nawˬ neh lehˬ hmˬ taˬ-euˬ dzaˬ byawˇ-ahˇ aˬ yawꞈ hawˬ jawˬ maˬ jawˬ laˇ nya-eu jeˬ pyeuꞈ-eu meh.”

³⁰ Yawˇnaˆshaˬ-ahˇ Sawˇluˆ nui ma pehˇ dui dui laˇ-awˇ ehˇ-eu, “Kuiˬ kuiˬ zaˬ-oˇ, nawˇ Daˬbiˇ jawˇ paw tehꞈ-ehˇ pyawˬ pyawˬ-ehˇ, nawˬ-euˬ gʼawˇ mawˇ hawˇ-eu nawˬ ma ya shaꞈ dawˇ ni mˇ luꞈ-eu gaˇ kawˆ ngaˇ maˬ siˬ nya-aˇ lehˇ noeˬ te loˇ.

³¹ Daˬbiˇ yaw dehꞈ kʼaˇ dehꞈ kʼoeˇ keuˆ ni, nawˇ miˇ kʼahˬ heu kʼahˬ-euˬ sahˬ paˬ maˬ ya geuꞈ-a lehˇ maˬ siˬ nya nya loˇ. Nymˬ-mˇ aˬ yawꞈ-ahˇ sheuˬ kʼoꞈ laˬ-iˇ-awˬ. Aˬ yawꞈ-ahˇ maˬ sehꞈ-ehˇ maˬ gʼeh nya-a.”

³² Yawˇnaˆshaˬ ehˇ-eu, “Aˬ yawꞈ aˬ jeˬ mˇ taˬ-euˬ jaˆ-eu miˇ neh, aˬ yawꞈ-ahˇ ya sehꞈ ta.”

³³ Kʼoeˇ ngeh, Sawˇluˆ-aˬ, Yawˇnaˆshaˬ-ahˇ gahˬ neh joeˬ sehꞈ-eu lehˇ joeˬ-euˬ meh. Kʼoeˇ miˇ neh, Daˬbiˇ-ahˇ sehꞈ-eu gʼaˇ duˬ aˬ yawꞈ-euˬ aˬ da noeˬ tsehˆ taˬ-euˬ gaˇ kawˆ Yawˇnaˆshaˬ ya siˬ duˬ-euˬ meh.

³⁴ Yawˇnaˆshaˬ nui ma pehˇ dui dui-eu laꞈ kʼoeˇ, hawˬ jawˬ jawˬ luꞈ-eu tsawˬ tuˇ-awˇ, kʼoeˇ ngeh nah tiˬ jeˬ-iˬ maˬ dzaˬ ni jawˇ-euˬ meh. Kʼoeˇ ngeh nah-aˬ, La shuiꞈ lah-eu Bawˬ-iˬ gʼeh luꞈ-eu nyiˬ nah tiˬ nah pyeuꞈ-eu meh. Daˬbiˇ-ahˇ aˬ yawꞈ-euˬ aˬ da kʼoeˇ naˆ naˆ-ehˇ muiˇ-eu miˇ neh, Daˬbiˇ gʼaˇ duˬ Yawˇnaˆshaˬ nui ma tiˬ pawꞈ-iˬ maˬ saˇ-a.

³⁵ Yawˬ nah yawˬ uˬ shawˬ paw aˬ li li zaˬ tiˬ gʼaˬ sheuˬ-awˇ, yaw beh ehˇ taˬ-euˬ loꞈ-ehˇ Daˬbiˇ-ahˇ tahˬ puˬ-iˇ-eu gʼaˇ duˬ, deh ga-ahˇ aˬ yawꞈ iˇ-euˬ meh.

³⁶ “Cehˆ gʼeh-awˇ, ngaˬ neh beuˆ-euˬ kaˆ myaˬ gʼoˆ kʼoꞈ laˬ-iˇ-awˬ” lehˇ, aˬ li kʼoeˇ li-ahˇ Yawˇnaˆshaˬ ehˇ nehˬ-euˬ meh. Aˬ li kʼoeˇ li cehˆ gʼeh-eu nehˬ-ehˇ, aˬ li kʼoeˇ li jawˇ-eu kʼoeˇ paw paˆ aˬ yawꞈ kaˆ myaˬ tiˬ myaˬ beuˆ gʼeh-euˬ meh.

³⁷ Kaˆ myaˬ ga-eu jawˇ duˬ-ahˇ aˬ li kʼoeˇ li iˇ keuˆ ngeh, “Nawˇ jawˇ-eu kʼoeˇ paw paˆ kaˆ myaˬ ga-iˇ-euˬ maˬ ngeuˇ-a loˇ.

³⁸ Teu gaˇ yawꞈ yawꞈ-ehˇ maˬ jawˇ ni yaw kawˇ-ehˇ cehˆ gʼeh-awˬ” lehˇ, Yawˇnaˆshaˬ guˇ-euˬ meh. Kʼoeˇ naˇ, aˬ li kʼoeˇ li kaˆ myaˬ gʼoˆ uiˬ-awˇ, Yawˇnaˆshaˬ jawˇ gaˇ gʼoꞈ leˇ-euˬ meh.

³⁹ Kʼoeˇ loꞈ-ehˇ jahˇ-eu dawˬ tsuiꞈ-ahˇ aˬ li kʼoeˇ li maˬ siˬ nya-a. Yawˇnaˆshaˬ hawˇ-eu Daˬbiˇ aˬ nyaꞈ tehꞈ-ehˇ siˬ nya-eu meh.

⁴⁰ Kʼoeˇ naˇ, Yawˇnaˆshaˬ-aˬ, aˬ li kʼoeˇ li-ahˇ aˬ yawꞈ-euˬ guiˇ deuˆ-eu keu ka deuˬ biꞈ nehˬ-awˇ, meuˬ-ahˇ bi yuˇ kʼoꞈ gʼeh-eu meh.

⁴¹ Aˬ li kʼoeˇ li gʼoꞈ-iˇ dzeuˇ ngeh, kʼaˬ lo lo bymˇ naˇ kʼah paw dzuˇ zaꞈ luꞈ-eu Daˬbiˇ tuˇ laˇ-awˇ, pawˬ tsuiꞈ pawˬ dmˬ dmˬ-awˇ smˬ poˆ awˆ byaˆ-euˬ meh. Yawˇnaˆshaˬ aˬ yawꞈ nyaꞈ tiˬ gʼaˬ tiˇ gʼaˬ mehˬ cuˇ cuˇ-awˇ, nyiˬ gʼaˬ luꞈ ngoeˇ-euˬ meh. Daˬbiˇ-aˬ, Yawˇnaˆshaˬ naˆ maˬ tseˇ nui ma shaˬ zahˬ naꞈ dzehˬ-euˬ meh.

⁴² Kʼoeˇ naˇ, Yawˇnaˆshaˬ Daˬbiˇ-ahˇ ehˇ nehˬ-eu, “Miˬyehˇ nawˬ nehˬ-ehˇ jawˇ luꞈ-uˇ. Aˇ nyaꞈ neh dzaˬ taˬ-euˬ muiˬ-eu shawˇ-eu saˇ jaˇ-ahˇ, nawˬ-euˬ zaˬ deuˬ uˆ deuˬ hawˇ-eu ngaˬ-euˬ zaˬ deuˬ uˆ deuˬ maˬ ehˇ, mˬ maˬ maˬ byaˆ zaˇ ziˇ ziꞈ ni, Sahˬpaˬ Miˬyehˇ saˇ kiˇ geuꞈ luꞈ-uˇ.” Kʼoeˇ naˇ, Daˬbiˇ doˆ-iˇ-awˇ, Yawˇnaˆshaˬ meuˬ-ahˇ gʼoꞈ-iˇ-euˬ meh.