1 Saˬmeuˬlaˆ 14 - Akha

Yawˇnaˆshaˬ-euˬ nui kʼaˬ

¹ Tiˬ nah keuˆ laˇ ngeh, aˬ yawꞈ-euˬ guiˇ deuˆ-eu keu ka bi baꞈ-euˬ zaˬ guˬ-ahˇ, “Piˇliˇtiˆ tsawˇ haˬ deuˬ-euˬ taˆ-ahˇ uˇ leˇ kaˇ-euˇ” lehˇ, Yawˇnaˆshaˬ ehˇ nehˬ-euˬ meh. Ehˇ kʼawꞈ, gaˇ kawˆ kʼoeˇ aˬ yawꞈ-euˬ aˬ da-ahˇ aˬ yawꞈ maˬ ehˇ nehˬ-a.

² Sawˇluˆ-aˬ, Giˇbyaˬ meuˬ nehˬ-ehˇ maˬ kaˬ maˬ kaˇ-ehˇ jaˆ-eu Miˇgaˬloˬ meuˬ-ahˇ, aˇ ka uˆ aˇ bawˇ dawˬ pehˬ-ahˇ taˆ tsoˆ-awˇ jawˇ luꞈ-eu meh. Aˬ yawꞈ nehˬ-ehˇ yehˇ koꞈ yaˇ gʼaˬ ehˇ gʼaˬ ni jawˇ-eu meh.

³ Piˇ ma-euˬ pehˇ kʼahˬ pehˇ mahˇ dm-awˇ piˇ ma geuꞈ luꞈ-eu gʼaˬ-aˬ, Aˬhiˇtuˆ-euˬ aˬ li Aˬhiˇyaˬ meh. Aˬhiˇtuˆ-aˬ, Iˇkaˬbawˇ nehˬ-ehˇ tiˬ mehˇ nmˇ meh. Aˬ yawꞈ-aˬ, Piˇnaˬhaˇ-euˬ aˬ li pyeuꞈ-awˇ, Shiˇloˬ meuˬ-ahˇ Sahˬpaˬ Miˬyehˇ-euˬ piˇ ma geuꞈ-eu Eˇliˆ-euˬ oeˬ paˬ pyeuꞈ-eu meh. Yawˇnaˆshaˬ doˆ-iˇ-euˬ gaˇ kawˆ, kʼoeˇ gaˇ jawˇ-eu deuˬ maˬ siˬ nya -a.

⁴ Yawˇnaˆshaˬ Piˇliˇtiˆ tsawˇ haˬ deuˬ-euˬ taˆ-ahˇ le ngeh ya le tsehˆ-eu Miˇkaˬmaˆ gʼaˬ lahˇ kʼoeˇ tsahˇ-ahˇ, gʼaˬ lahˇ gaˇ ma kʼoeˇ paˆ maˇ paˆ-ehˇ lo guˇ nyiˬ guˇ ciˬ taw taˬ-euˬ meh. Lo guˇ kʼoeˇ nyiˬ guˇ-ahˇ Bawˇzeh hawˇ-eu Seˬnehˇ lehˇ kuˇ-eu meh.

⁵ Tiˬ guˇ-aˬ, Miˇkaˬmaˆ meuˬ paw pyawˇ-ehˇ, gʼaˬ lahˇ-euˬ laꞈ taˆ paw pyawˬ-ahˇ jaˆ-awˇ, yawˬ guˇ yawˬ-aˬ, gʼaˬ lahˇ-euˬ laꞈ oˆ paw Geˬbaˬ meuˬ paw pyawˇ-ehˇ jaˆ-eu meh.

⁶ Aˬ yawꞈ-euˬ guiˇ deuˆ-eu keu ka baꞈ luꞈ-eu zaˬ guˬ kʼoeˇ gʼaˬ-ahˇ Yawˇnaˆshaˬ ehˇ nehˬ-eu, “Sahˬpaˬ Miˬyehˇ-ahˇ maˬ siˬ nya-eu Piˇliˇtiˆ tsawˇ haˬ kʼoeˇ deuˬ-euˬ taˆ-ahˇ aˇ nyaꞈ le tsehˆ haw kaˇ-euˇ. Sahˬpaˬ Miˬyehˇ aˇ nyaꞈ-ahˇ caw ba nehˬ laꞈ-eu duˇ. Aˬ dui-euˬ tsawˇ haˬ aˇ naˆ ni cuiˆ kʼawꞈ, aˬ yawꞈ caw ba nehˬ laꞈ-awˇ, aˬ dui gʼaˬ leˇ ni aˬ yawꞈ jahˇ naˇ, tiˬ jeˬ-iˬ maˬ laˆ tsoeˬ nya-aˇ.”

⁷ Aˬ yawꞈ-euˬ guiˇ deuˆ-eu keu ka baꞈ-eu zaˬ guˬ kʼoeˇ gʼaˬ ehˇ-eu, “Nawˇ kʼaˇ noeˬ taˬ-euˬ loꞈ-ehˇ mˇ-awˬ. Nawˇ kʼaˇ jahˇ-eu jeˬ ngaˇ jahˇ ma.”

⁸ Yawˇnaˆshaˬ ehˇ-eu , “Muiˬ tehꞈ-a. Aˬ dui nyaꞈ aˬ yawꞈ maꞈ-euˬ taˆ-ahˇ le tsehˆ-awˇ, Piˇliˇtiˆ tsawˇ haˬ kʼoeˇ deuˬ neh bi haw mawˇ ma.

⁹ Aˬ yawꞈ maꞈ teu gaˇ jawˇ tawˬ lehˇ aˇ nyaꞈ-ahˇ ehˇ laˇ-awˇ aˇ nyaꞈ jawˇ gaˇ laˇ naˇ, aˇ nyaꞈ jawˇ tawˬ nehˬ ma.

¹⁰ Aˬ yawꞈ maꞈ jawˇ gaˇ laˇ-awˬ lehˇ ehˇ laˇ naˇ, aˇ nyaꞈ le ma. Aˬ jeˬ miˇ neh ehˇ naˇ, aˬ yawꞈ maꞈ kʼoeˇ loꞈ-ehˇ ehˇ laˇ naˇ, Sahˬpaˬ Miˬyehˇ neh aˬ dui maꞈ-ahˇ aˬ yawꞈ maꞈ kʼoeˇ taˆ bi gʼaˬ leˇ nehˬ laꞈ-euˬ gaˇ kawˆ bi siˬ bi mawˇ-eu jeˬ pyeuꞈ-eu meh.”

¹¹ Kʼoeˇ naˇ, Piˇliˇtiˆ tsawˇ haˬ deuˬ-ahˇ aˬ yawꞈ nyaꞈ-euˬ gʼawˇ mawˇ bi mawˇ-euˬ meh. Kʼoeˇ ngeh, “Haw sheˇ. Heˬbyehˇ tsawˇ haˬ tiˬ paˆ na deuˬ lo kʼahˬ-ahˇ dzuˇ zaꞈ luꞈ-eu cehˆ doˆ laˇ ngaˇ” lehˇ, Piˇliˇtiˆ tsawˇ haˬ deuˬ ehˇ-eu meh.

¹² Kʼoeˇ naˇ, Yawˇnaˆshaˬ hawˇ-eu aˬ yawꞈ-euˬ guiˇ deuˆ-eu keu ka baꞈ luꞈ-eu zaˬ guˬ aˬ nyaꞈ-ahˇ aˬ yawꞈ maꞈ guˇ-awˇ, “Heu gaˇ laˇ sheˇ. Naw nyaꞈ-ahˇ tiˬ jeˬ ehˇ nehˬ nyaˇ” lehˇ ehˇ-eu meh. Kʼoeˇ ngeh, aˬ yawꞈ-euˬ guiˇ deuˆ-eu keu ka baꞈ luꞈ-eu zaˬ guˬ kʼoeˇ gʼaˬ-ahˇ, “Ngaˬ-euˬ mehˬ nah caw teh laˇ-awˬ. Sahˬpaˬ Miˬyehˇ neh Iˇsaˬleˬlaˆ tsawˇ haˬ deuˬ-ahˇ Piˇliˇtiˆ tsawˇ haˬ deuˬ kʼoeˇ taˆ bi gʼaˬ leˇ nehˬ laꞈ-euˬ yaw duˬ baw ngaˇ” lehˇ Yawˇnaˆshaˬ ehˇ nehˬ-euˬ meh.

¹³ Yawˇnaˆshaˬ-aˬ, pawˬ tsuiꞈ pawˬ dmˬ dmˬ-awˇ laꞈ gaˆ gaˆ gaˆ-ehˇ, gʼaˬ lahˇ-ahˇ neh daˆ leˇ-awˇ, zaˬ guˬ kʼoeˇ gʼaˬ kʼawꞈ aˬ yawꞈ-euˬ mehˬ nah caw teh daˆ leꞈ-euˬ meh. Yawˇnaˆshaˬ gʼaˬ Piˇliˇtiˆ tsawˇ haˬ kʼoeˇ deuˬ-ahˇ teˇ coˬ-awˇ, zaˬ guˬ kʼoeˇ gʼaˬ neh bi sehꞈ-euˬ meh.

¹⁴ Yaw beh poˆ sehꞈ ngeh tehꞈ-ehˇ, cehˇ tiˬ puˬ ka deˇ ni jeˇ-eu jawˇ duˬ tiˬ tsahˇ laꞈ kʼoeˇ, tsawˇ haˬ nyiˬ tseˇ gʼaˬ ehˇ gʼaˬ ni Yawˇnaˆshaˬ hawˇ-eu zaˬ guˬ kʼoeˇ gʼaˬ neh sehꞈ-euˬ meh.

¹⁵ Meuˬ meuˬ dzeˇ kʼaˇ jawˇ-eu Piˇliˇtiˆ tsawˇ haˬ deuˬ hawˇ-eu, taˆ laꞈ kʼoeˇ kʼaˇ jawˇ-eu Piˇliˇtiˆ yehˇ deuˬ uˬ taꞈ, Iˇsaˬleˬlaˆ tsawˇ haˬ deuˬ-ahˇ guiˇ deuˆ le-eu lehˇ lehˬ hmˬ taˬ-euˬ kʼaˬ dui dui-eu aˬ yawꞈ maꞈ-euˬ yehˇ deuˬ kʼawꞈ, guˆ dui dui-eu laꞈ kʼoeˇ yaw dzuˬ dzuˬ-euˬ meh. Miˇluˆluˆ laˇ-awˇ, guˆ dui dui-eu jeˬ keuˆ le-euˬ meh.

Piˇliˇtiˆ tsawˇ haˬ deuˬ-ahˇ guiˇ deuˆ gʼaˬ-euˬ

¹⁶ Beˬyaˬmiˬ miˇ kʼahˬ Giˇbyaˬ meuˬ-ahˇ loꞈ luꞈ-eu Sawˇluˆ-euˬ yehˇ deuˬ Piˇliˇtiˆ tsawˇ haˬ deuˬ cehˆ byaˆ luꞈ gaˇ ya mawˇ-euˬ meh.

¹⁷ Kʼoeˇ ngeh, “Aˬ geu gʼaˬ maˬ jawˇ nga lehˇ yehˇ deuˬ-ahˇ gui haw sheˇ” lehˇ, aˬ yawꞈ-euˬ yehˇ deuˬ-ahˇ Sawˇluˆ ehˇ nehˬ-euˬ meh. Aˬ yawꞈ neh ehˇ nehˬ-euˬ loꞈ-ehˇ aˬ yawꞈ maꞈ gui haw ngeh, Yawˇnaˆshaˬ hawˇ-eu aˬ yawꞈ-euˬ guiˇ deuˆ-eu keu ka baꞈ luꞈ-eu zaˬ guˬ kʼoeˇ gʼaˬ maˬ jawˇ gaˇ ya mawˇ-euˬ meh.

¹⁸ Kʼoeˇ ngeh, “Miˬyehˇ-euˬ Dawˬ ma saˇ jaˇ Bahˬ keuˆ baꞈ laꞈ sheˇ” lehˇ, piˇ ma Aˬhiˇyaˬ-ahˇ Sawˇluˆ ehˇ nehˬ-euˬ meh. Aˇ nah aˇ yamˬ kʼoeˇ yamˬ laꞈ kʼoeˇ, Aˬhiˇyaˬ gʼaˬ Dawˬ ma saˇ jaˇ Bahˬ keuˆ kʼoeˇ baꞈ-awˇ, Iˇsaˬleˬlaˆ tsawˇ haˬ deuˬ-euˬ mehˬ hu cah luꞈ-eu meh.

¹⁹ Piˇ ma-ahˇ Sawˇluˆ dawˬ ngehˬ cawˬ luꞈ ngeh, Piˇliˇtiˆ tsawˇ haˬ-euˬ taˆ laꞈ kʼoeˇ luiˬ gʼaˬ luꞈ-eu teˇ saˇ kʼoeˇ tiˬ jawˇ saˇ-iˬ tiˬ jawˇ kʼaˆ laˇ luꞈ-eu miˇ neh, “Sahˬpaˬ Miˬyehˇ-ahˇ mehˬ bawˬ mˇ mˇ-ehˇ jawˇ-eu maˬ paˇ dah ngaˇ” lehˇ, piˇ ma-ahˇ Sawˇluˆ ehˇ nehˬ-euˬ meh.

²⁰ Bahˬ leˇ lahˇ leˇ jiˇ-awˇ yawˬ ha tsawˇ haˬ cawˬ cawˬ deuˆ ceh ceh luꞈ-eu Piˇliˇtiˆ tsawˇ haˬ deuˬ jawˇ gaˇ, Sawˇluˆ hawˇ-eu aˬ yawꞈ-euˬ tsawˇ haˬ deuˬ le-awˇ guiˇ deuˆ-euˬ meh.

²¹ Piˇliˇtiˆ tsawˇ haˬ deuˬ jawˇ paw cehˆ uˇ leˇ-awˇ, aˬ yawꞈ maꞈ-euˬ taˆ-ahˇ jawˇ leˇ-euˬ Heˬbyehˇ tsawˇ haˬ deuˬ kʼawꞈ nui ma paˇ laˇ-awˇ, Sawˇluˆ hawˇ-eu Yawˇnaˆshaˬ jawˇ paw pyawˬ-euˬ meh.

²² Eˇpaˬleˬ miˇ kʼahˬ gawˬ jawˬ gawˬ duˇ doe ni cehˆ zaꞈ taˬ-euˬ Iˇsaˬleˬlaˆ tsawˇ haˬ deuˬ kʼawꞈ, Piˇliˇtiˆ tsawˇ haˬ deuˬ cehˆ byaˆ luꞈ-eu gaˇ kawˆ ya gaˬ-awˇ, Piˇliˇtiˆ tsawˇ haˬ deuˬ nehˬ-ehˇ guiˇ deuˆ luꞈ gaˇ oe-euˬ meh.

²³ Behˬdaˬbeˬ meuˬ iˇ dzeuˇ ngeh keuˆ ni deuˆ ceh ceh-awˇ, kʼoeˇ ngeh nah Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ ka kʼoꞈ nehˬ-euˬ meh.

Yawˇnaˆshaˬ byaˬ byaˬ uiˇ dzaˬ-euˬ

²⁴ Kʼoeˇ ngeh nah, Iˇsaˬleˬlaˆ tsawˇ haˬ deuˬ hawˬ mehꞈ laˇ-awˇ, gʼaˬ baˬ dui dui-eu meh. Aˬ jeˬ miˇ neh ehˇ naˇ, “Iˬ nah uˬ ciꞈ uˬ taw paw keuˆ ni ngaˬ-ahˇ muiˇ-eu deuˬ-ahˇ ngaˇ laꞈ poˆ maˬ poˆ gʼaˬ mi naˆ-ehˇ, tiˬ jeˬ paˬ kʼaˇ dzaˬ-eu tsawˇ haˬ aˬ geu gʼaˬ maˬ kaˬ, yaˬ kʼehˇ yaˬ-eu jeˬ-ahˇ ya daˬ luꞈ-uˇ” lehˇ, Sawˇluˆ saˇ jaˇ dawˬ ngehˬ taˬ-euˬ miˇ neh meh. Kʼoeˇ miˇ neh, yawˬ gʼaˬ na luꞈ tiˬ jeˬ-iˬ maˬ dzaˬ ni nah ga-ehˇ dzahˬ-euˬ meh.

²⁵ Aˬ yawꞈ maꞈ dawˬ tawˆ luꞈ aˇ bawˇ sahˬ kʼaˆ-ahˇ laˇ keuˆ-awˇ, yawˬ gaˇ na luꞈ byaˬ byaˬ uiˇ jaˆ gaˇ ya mawˇ-euˬ meh.

²⁶ Sahˬ kʼaˆ kʼaˆ lah-ehˇ byaˬ byaˬ uiˇ jaˆ byah taˬ-euˬ gaˇ aˬ yawꞈ maꞈ ya mawˇ kʼawꞈ, tiˬ gʼaˬ-iˬ maˬ dzaˬ peuˬ-a. Aˬ jeˬ miˇ neh ehˇ naˇ, Sawˇluˆ neh yaˬ kʼehˇ yaˬ taˬ-euˬ dawˬ-ahˇ aˬ yawꞈ maꞈ dawˬ tawˆ luꞈ guˆ-eu meh.

²⁷ Ehˇ kʼawꞈ, tsawˇ haˬ kʼoeˇ deuˬ-ahˇ aˬ yawꞈ-euˬ aˬ da neh yaˬ kʼehˇ yaˬ-awˇ laˆ tsoeˬ taˬ-euˬ gaˇ kawˆ-ahˇ Yawˇnaˆshaˬ gʼaˬ maˬ siˬ nya-a. Kʼoeˇ miˇ neh, aˬ yawꞈ yuˇ luꞈ-eu daˇ cuiˇ neh byaˬ byaˬ yaˆ tsawˆ paˆ doˆ-awˇ, byaˬ byaˬ uiˇ ui cuiˆ yuˇ dzaˬ-euˬ meh. Kʼoeˇ ngeh, tiˬ kʼehˇ laˇ kʼehˬ laꞈ kʼoeˇ aˬ yawꞈ gʼaˬ paˇ kʼoꞈ laˇ-euˬ meh.

²⁸ “Nga maꞈ dawˬ tawˆ luꞈ hawˬ mehꞈ-awˇ gʼaˬ baˬ dui dui nya. Ehˇ kʼawꞈ, ‘Iˬ nah tiˬ jeˬ paˬ kʼaˇ dzaˬ-euˬ tsawˇ haˬ kʼoeˇ taˆ yaˬ kʼehˇ yaˬ-eu jeˬ keuˆ le tehꞈ-a’ lehˇ, nawˬ da neh nga maꞈ-ahˇ ehˇ taˬ-euˬ dawˬ jaˆ-eu miˇ neh maˬ dzaˬ peuˬ nya” lehˇ, tsawˇ haˬ tiˬ gʼaˬ Yawˇnaˆshaˬ-ahˇ ehˇ-eu meh.

²⁹ Yawˇnaˆshaˬ ehˇ-eu, “Ngaˬ da heu gʼaˬ aˬ jeˬ miˇ neh aˬ dui maꞈ tsawˇ haˬ-ahˇ kʼoeˇ loꞈ-ehˇ ehˇ-awˇ bi shaˬ-euˬ nga. Haw sheˇ. Ngaˇ byaˬ byaˬ uiˇ ui cuiˆ dzaˬ ahˇ-euˬ miˇ neh aˇ naˆ ni gʼaˬ paˇ kʼoꞈ laˇ-euˬ nga.

³⁰ Iˬ nah muiˇ-eu tsawˇ haˬ deuˬ-ahˇ aˬ dui maꞈ deuˆ gʼaˬ ngeh deuˆ za-euˬ dzaˬ dzaˬ dawˇ dawˇ kʼoeˇ deuˬ-ahˇ aˬ dui maꞈ dzaˬ-euˬ law nmˇ-aˬ, aˇ naˆ ni muiˬ dzehˬ-eu nga. Piˇliˇtiˆ tsawˇ haˬ deuˬ heu myaˆ maˬ tseˇ aˇ myaˆ ni ya shiˇ dzehˬ nmˇ lehˇ shaˇ noeˬ haw sheˇ.”

³¹ Kʼoeˇ ngeh nah, Miˇkaˬmaˆ meuˬ-ahˇ neh Aiˬjaˬloˬ meuˬ-ahˇ keuˆ ni guiˇ deuˆ keuˆ-awˇ, Iˇsaˬleˬlaˆ tsawˇ haˬ deuˬ neh Piˇliˇtiˆ tsawˇ haˬ deuˬ-ahˇ deuˆ gʼaˬ-euˬ meh. Kʼoeˇ ngeh, Iˇsaˬleˬlaˆ tsawˇ haˬ deuˬ hawˬ mehꞈ mehꞈ dui dui-awˇ, gʼaˬ baˬ laˇ taˬ-euˬ meh.

³² Kʼoeˇ miˇ neh, muiˇ-eu deuˬ-euˬ aˬ laꞈ laꞈ kʼoeˇ neh aˬ yawꞈ maꞈ kʼaˇ deuˆ za taˬ-euˬ jeˬ jaˆ gaˇ aˬ yawꞈ maꞈ cehˆ gʼeh-awˇ, yawˇ hawˇ-eu mawˇ neˇ deuˬ-ahˇ kʼaˇ mawˇ le gaˇ sehꞈ-awˇ, shiˬ lehꞈ-eu shaˬ jiˇ yaw jmˬ dzaˬ-euˬ meh.

³³ “Haw sheˇ, tsawˇ haˬ heu deuˬ shiˬ lehꞈ-eu shaˬ jiˇ dzaˬ-eu laꞈ kʼoeˇ, Sahˬpaˬ Miˬyehˇ-ahˇ mˇ lehˬ luꞈ meh” lehˇ, Sawˇluˆ-ahˇ aˬ yawꞈ maꞈ ehˇ nehˬ-euˬ meh. Sawˇluˆ guˇ-awˇ, “Naw maꞈ-aˬ, saˇ jaˇ puiˬ-euˬ tsawˇ haˬ deuˬ meh. Ngaˇ jawˇ gaˇ kʼaˬ lo lo ma tiˬ siˬ lehˬ taˬ le-awˬ” lehˇ ehˇ-eu meh.

³⁴ Kʼoeˇ naˇ, aˬ yawꞈ dawˬ biꞈ-awˇ ehˇ-eu, “Mawˇ neˇ hawˇ-eu yawˇ kʼoeˇ deuˬ-ahˇ heu gaˇ tsahˇ laꞈ-awˬ lehˇ tsawˇ haˬ kʼoeˇ deuˬ-ahˇ ehˇ nehˬ-iˇ-awˬ. Aˬ yawꞈ maꞈ jeˬ zaˬ kʼoeˇ deuˬ-ahˇ heu gaˇ sehꞈ-awˇ dzaˬ luꞈ-uˇ. Shiˬ dahˬ-eu shaˬ jiˇ dzaˬ-eu laꞈ kʼoeˇ, Sahˬpaˬ Miˬyehˇ mehˬ shi aˬ yawꞈ maꞈ iˬ baˇ maˬ ya mˇ-a.” Kʼoeˇ ngeh miˇ, aˬ yawꞈ maꞈ dawˬ tawˆ luꞈ yawˬ ha-euˬ mawˇ neˇ tsahˇ laꞈ-awˇ, kʼoeˇ gaˇ sehꞈ-euˬ meh.

³⁵ Kʼoeˇ naˇ, Sahˬpaˬ Miˬyehˇ gʼaˇ duˬ lawˇ duˬ tiˬ tsahˇ Sawˇluˆ gawˬ-euˬ meh. Lawˇ duˬ kʼoeˇ tsahˇ-aˬ, aˬ yawꞈ neh Sahˬpaˬ Miˬyehˇ gʼaˇ duˬ gawˬ beh beh-euˬ lawˇ duˬ pyeuꞈ-eu meh.

³⁶ Kʼoeˇ naˇ, “Aˬ dui maꞈ Piˇliˇtiˆ tsawˇ haˬ deuˬ-ahˇ uˬ ciꞈ paw guiˇ deuˆ-iˇ-awˇ, uˬ ciꞈ uˬ bya bya ni aˬ yawꞈ maꞈ-euˬ myawˬ gahˬ deuˬ ceh geuꞈ-eu laꞈ kʼoeˇ, tiˬ gʼaˬ-iˬ maˬ bi dzeuˇ-iˇ ni sehꞈ jiˇ kaˇ-euˇ” lehˇ, aˬ yawꞈ-euˬ tsawˇ haˬ deuˬ-ahˇ Sawˇluˆ ehˇ nehˬ ngeh, “Nawˬ neh muiˬ meh lehˇ kʼaˇ noeˬ-euˬ loꞈ-ehˇ mˇ-awˬ” lehˇ aˬ yawꞈ-euˬ tsawˇ haˬ deuˬ ehˇ-eu meh. Ehˇ kʼawꞈ, piˇ ma gʼaˬ, “Miˬyehˇ-ahˇ mehˬ bawˬ jeˬ huˬ mˇ haw kaˇ-euˇ” lehˇ ehˇ-eu meh.

³⁷ Kʼoeˇ ngeh, “Piˇliˇtiˆ tsawˇ haˬ deuˬ-ahˇ ngaˇ guiˇ deuˆ-iˇ-eu tsaˬ meh loˇ. Nawˇ nga maꞈ-ahˇ bi gʼaˬ leˇ nehˬ laꞈ ma loˇ” lehˇ, Miˬyehˇ-ahˇ Sawˇluˆ naˇ haˬ-euˬ meh. Ehˇ kʼawꞈ, kʼoeˇ ngeh nah aˬ yawꞈ-ahˇ Miˬyehˇ tiˬ jeˬ-iˬ maˬ ehˇ kʼoꞈ nehˬ-a.

³⁸ Iˇsaˬleˬlaˆ tsawˇ haˬ aˬ yuiꞈ aˬ tsu deuˬ-ahˇ Sawˇluˆ ehˇ nehˬ-eu, “Heu gaˇ laˇ-awˇ, iˬ nah iˬ baˇ aˬ geu jeˬ mˇ taˬ-euˬ jaˆ-eu nga lehˇ pyehˆ tseˇ duˬ haw laˇ sheˇ.

³⁹ Iˇsaˬleˬlaˆ tsawˇ haˬ deuˬ-ahˇ muiˇ-eu deuˬ kʼoeˇ taˆ bi gʼaˬ leˇ nehˬ laꞈ-euˬ gʼaˬ pyeuꞈ-eu dehꞈ luꞈ-eu Miˬyehˇ mehˬ shi, ngaˇ heu loꞈ-ehˇ saˇ jaˇ dzaˬ-eu ma. Ngaˬ li Yawˇnaˆshaˬ-ahˇ keuˆ ni, tsawˇ haˬ aˬ geu gʼaˬ maˬ kaˬ iˬ baˇ ahˇ naˇ, sehꞈ gaˇ ya daˬ tehꞈ-a.” Sawˇluˆ Kʼoeˇ loꞈ-ehˇ ehˇ kʼawꞈ, tsawˇ haˬ tiˬ gʼaˬ-iˬ dawˬ maˬ ngehˬ-a.

⁴⁰ Kʼoeˇ naˇ, “Naw maꞈ dawˬ tawˆ luꞈ teu gaˇ yawꞈ-awˬ. Ngaˇ hawˇ-eu Yawˇnaˆshaˬ heu gaˇ yawꞈ ma” lehˇ, aˬ yawꞈ maꞈ-ahˇ Sawˇluˆ ehˇ nehˬ ngeh, “Nawˬ neh muiˬ meh lehˇ kʼaˇ noeˬ-euˬ loꞈ-ehˇ geuꞈ ma” lehˇ aˬ yawꞈ maꞈ ehˇ-eu meh.

⁴¹ Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ Sawˇluˆ ehˇ nehˬ-eu, “Sahˬpaˬ Miˬyehˇ-oˇ, aˬ jeˬ miˇ neh nawˇ ngaˬ-ahˇ iˬ nah dawˬ maˬ ngehˬ cawˬ nehˬ laꞈ te. Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, muiˬ-eu shawˇ-eu kʼaˬ lo heu deuˬ dawˬ peh ngaˬ-ahˇ dawˬ ngehˬ cawˬ nehˬ laꞈ-awˬ. Yawˇnaˆshaˬ nga nyaꞈ da zaˬ tiˬ gʼaˬ na iˬ baˇ ahˇ naˇ, Uˇleˬ-ahˇ gʼoe-awˇ ehˇ nehˬ laꞈ-awˬ. Ehˇ kʼawꞈ, nawˬ-euˬ Iˇsaˬleˬlaˆ tsawˇ haˬ deuˬ laꞈ kʼoeˇ tiˬ gʼaˬ na iˬ baˇ ahˇ naˇ, Duˇmeˬ-ahˇ gʼoe-awˇ ehˇ nehˬ laꞈ-awˬ.”‘Uˇleˬ hawˇ-eu Duˇmeˬ’ lehˇ ehˇ-eu dawˬ tsuiꞈ Doˆ-iˇ-eu 28.30-ahˇ haw-awˬ.* Kʼoeˇ ngeh, Yawˇnaˆshaˬ hawˇ-eu Sawˇluˆ aˬ nyaꞈ da zaˬ iˬ baˇ ahˇ-awˇ, Iˇsaˬleˬlaˆ tsawˇ haˬ deuˬ iˬ baˇ maˬ ahˇ-eu gaˇ kawˆ ya siˬ duˬ-euˬ meh.

⁴² Kʼoeˇ ngeh, “Ngaˬ li Yawˇnaˆshaˬ nga nyaꞈ aˬ geu gʼaˬ iˬ baˇ ahˇ-eu nga lehˇ ehˇ nehˬ laꞈ-awˬ” lehˇ Sawˇluˆ paˇ ehˇ-eu meh. Kʼoeˇ naˇ, Yawˇnaˆshaˬ gʼaˬ iˬ baˇ ahˇ-eu gaˇ kawˆ uˬ duˬ duˬ leˇ-euˬ meh.

⁴³ “Nawˇ aˬ jeˬ mˇ teˬ” lehˇ Yawˇnaˆshaˬ-ahˇ Sawˇluˆ naˇ haˬ ngeh, “Ngaˇ byaˬ byaˬ uiˇ uiˆ cuiˆ dzaˬ-euˬ ma. Nymˬ-mˇ ngaˇ shiˇ-eu gʼaˇ duˬ noeˬ tsehˆ gʼaˬ taˬ-euˬ ma” lehˇ, Yawˇnaˆshaˬ ehˇ-eu meh.

⁴⁴ “Yawˇnaˆshaˬ-oˇ, nawˇ maˬ ya shiˇ ni dzeuˇ-iˇ nya naˇ, ngaˬ-euˬ kʼoeˇ taˆ shiˇ-eu jeˬ Miˬyehˇ bi keuˆ le luꞈ-uˇ” lehˇ Sawˇluˆ ehˇ-eu meh.

⁴⁵ Ehˇ kʼawꞈ, Iˇsaˬleˬlaˆ tsawˇ haˬ deuˬ Sawˇluˆ-ahˇ ehˇ nehˬ-eu, “Iˬ nah Iˇsaˬleˬlaˆ miˇ kʼahˬ gʼaˇ duˬ huiˬ dui dui-eu guiˇ heu deuˆ gʼaˬ-euˬ gʼaˬ pyeuꞈ-eu Yawˇnaˆshaˬ-ahˇ ya bi shiˇ ta loˇ. Tiˬ jeˬ gʼeh-awˇ neh-iˬ teu loꞈ-ehˇ maˬ bi jahˇ. Aˬ yawꞈ-euˬ uˬ duˬ tsehˇ kahˇ tiˬ kahˇ tehꞈ-ehˇ kʼawꞈ miˇ tsa maˬ bi ga iˇ lehˇ, dehꞈ luꞈ-eu Sahˬpaˬ Miˬyehˇ mehˬ shi nga maꞈ saˇ jaˇ dzaˬ-eu ma. Iˬ nah aˬ yawꞈ neh mˇ-euˬ huiˬ-eu gaˇ heu-aˬ, Miˬyehˇ neh caw ba nehˬ-euˬ laꞈ kʼoeˇ mˇ-euˬ gaˇ pyeuꞈ-eu meh.” Kʼoeˇ loꞈ-ehˇ ehˇ-awˇ, Yawˇnaˆshaˬ maˬ ya shiˇ ni Iˇsaˬleˬlaˆ tsawˇ haˬ kʼoeˇ deuˬ neh ka kʼoꞈ-euˬ meh.

⁴⁶ Kʼoeˇ naˇ, Piˇliˇtiˆ tsawˇ haˬ deuˬ-euˬ mehˬ nah Sawˇluˆ maˬ paˇ teh ni, yawˬ ha-euˬ miˇ kʼahˬ-ahˇ gʼoꞈ leˇ-euˬ meh.

Sahˬ paˬ Sawˇluˆ hawˇ-eu aˬ yawꞈ-euˬ miˬ sawˇ zaˬ deuˬ

⁴⁷ Sawˇluˆ Iˇsaˬleˬlaˆ miˇ kʼahˬ-euˬ sahˬ paˬ pyeuꞈ laˇ gʼaˬ ngeh, aˬ yawꞈ-ahˇ muiˇ-eu tsawˇ haˬ deuˬ-ahˇ, yawˬ paw na luꞈ aˬ yawꞈ guiˇ deuˆ-euˬ meh. Mawˇbaˆ tsawˇ jeuˬ, Aˬmoˬ tsawˇ jeuˬ, Eˬdoˬ tsawˇ jeuˬ, Zoˇbaˬ sahˬ paˬ deuˬ hawˇ-eu, Piˇliˇtiˆ tsawˇ jeuˬ heu deuˬ-ahˇ aˬ yawꞈ guiˇ deuˆ-euˬ meh. Kʼoeˇ loꞈ-ehˇ guiˇ kʼaˇ deuˆ ngeh, aˬ yawꞈ gʼaˬ leˇ-euˬ meh.

⁴⁸ Aˬ yawꞈ kʼaˬ duˬ ni guiˇ deuˆ-eu laꞈ kʼoeˇ, Aˬmaˬlehˇ tsawˇ haˬ deuˬ-ahˇ kʼawꞈ deuˆ gʼaˬ-euˬ meh. Guiˇ kʼaˇ deuˆ le-eu tsawˇ jeuˬ deuˬ-euˬ aˬ laꞈ laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ aˬ yawꞈ ka kʼoꞈ nehˬ-euˬ meh.

⁴⁹ Sawˇluˆ-euˬ aˬ li deuˬ-aˬ, Yawˇnaˆshaˬ, Iˇshaˬbiˇ hawˇ-eu, Maˬlaˬkiˇshuˬ meh. Aˬ buˇ aˬ yuiꞈ gʼaˬ-ahˇ Meˬlaˇ lehˇ myahˇ-awˇ, aˬ nyiˇ gʼaˬ-ahˇ Miˇkaˬlaˇ lehˇ myahˇ-euˬ meh.

⁵⁰ Aˬ yawꞈ-euˬ miˬ zaˬ-aˬ, Aˬhiˇmaˆ-euˬ aˬ buˇ Aˬhiˇnoˬ meh. Aˬ yawꞈ-euˬ guiˇ maꞈ-ahˇ uˆ lahˇ-eu gʼaˬ-aˬ, aˬ yawꞈ-euˬ aˬ zawˇ Neˬlaˇ-euˬ aˬ li Aˬbaˬnaˬ meh.

⁵¹ Sawˇluˆ-euˬ aˬ da Giˇshaˆ hawˇ-eu Aˬbaˬnaˬ-euˬ aˬ da Neˬlaˇ aˬ nyaꞈ nmˇ-aˬ, Aˬbyeˬlaˆ-euˬ aˬ li pyeuꞈ-eu meh.

⁵² Sawˇluˆ yaw dehꞈ dehꞈ-euˬ tiˬ ziˇ, Piˇliˇtiˆ tsawˇ haˬ deuˬ nehˬ-ehˇ guiˇ yaw kʼaˆ-ehˇ deuˆ-euˬ meh. Kʼoeˇ miˇ neh, gʼaˬ tsmˬ-eu tsawˇ haˬ hawˇ-eu nui ma kʼaˬ duˬ ni gʼeh-eu tsawˇ haˬ kʼaˇ mawˇ le ngeh, aˬ yawꞈ-euˬ taˆ laꞈ kʼoeˇ tsawˇ myahˇ bi dawˆ-awˇ, aˬ yawꞈ-euˬ yehˇ bi geuꞈ-euˬ meh.