1 Saˬmeuˬlaˆ 12 - Akha

Saˬmeuˬlaˆ dawˬ mehˬ dawˬ tsoˆ tsoˆ-euˬ

¹ Iˇsaˬleˬlaˆ tsawˇ haˬ deuˬ-ahˇ Saˬmeuˬlaˆ heu loꞈ-ehˇ ehˇ nehˬ-euˬ meh. “Naw maꞈ neh ngaˬ-ahˇ bi mˇ laꞈ-euˬ jeˬ ngaˇ mˇ gʼaˬ-euˬ ma. Naw maꞈ-ahˇ bi uˆ lahˇ-eu gʼaˇ duˬ, ngaˇ naw maꞈ-ahˇ sahˬ paˬ tiˬ gʼaˬ biꞈ gʼaˬ-euˬ ma.

² Aˬ kaˇ naˇ, naw maꞈ-ahˇ aˬ yawꞈ uˆ lahˇ tehꞈ-a. Ngaˇ tsawˇ mawˬ mawˬ le-awˇ, uˬ duˬ pyuˇ laˇ-euˬ miˇ-a. Ngaˬ li deuˬ kʼawꞈ naw maꞈ nehˬ-ehˇ jawˇ luꞈ meh. Zaˬ guˬ pyeuꞈ ngeh neh nymˬ-mˇ keuˆ ni naw maꞈ-ahˇ ngaˇ sheuˬ gʼeh-euˬ ma.

³ Nymˬ-mˇ ngaˇ heu gaˇ yawꞈ luꞈ-eu ma. Ngaˬ neh mˇ lehˬ taˬ-euˬ tiˬ jeˬ paˬ jaˆ naˇ, Sahˬpaˬ Miˬyehˇ hawˇ-eu aˬ yawꞈ neh tseˇ doˆ taˬ-euˬ sahˬ paˬ heu gʼaˬ mehˬ shi nymˬ-mˇ ehˇ doˆ-awˬ. Aˬ cawˬ-euˬ mawˇ neˇ hawˇ-eu aˬ cawˬ-euˬ mahˬ tahˬ laˆ-ahˇ ngaˬ neh yuˇ geuꞈ taˬ-euˬ jaˆ ta loˇ. Ngaˬ neh aˬ cawˬ-ahˇ myawꞈ dzaˬ kʼaˆ dzaˬ-euˬ jaˆ ta loˇ. Aˬ cawˬ neh laꞈ nmꞈ nmꞈ nehˬ laꞈ-euˬ jeˬ-ahˇ ngaˬ neh ha geuꞈ-euˬ jaˆ ta loˇ. Heu loꞈ-ehˇ gʼeh-eu jeˬ ngaˬ neh mˇ taˬ-euˬ jaˆ naˇ, ngaˬ neh kʼaˇ yuˇ-euˬ jeˬ ngaˇ biꞈ kʼoꞈ ma.”

⁴ Iˇsaˬleˬlaˆ tsawˇ haˬ deuˬ ehˇ-eu, “Nawˇ nga maꞈ kʼoeˇ taˆ myawꞈ dzaˬ shuiˇ dzaˬ-awˇ, smˇ kʼaˆ kʼaˆ dzaˬ taˬ-euˬ tiˬ jeˬ-iˬ maˬ jaˆ-a. Aˬ cawˬ-euˬ myawˬ nawˬ neh yuˇ geuꞈ-euˬ kʼawꞈ, tiˬ jeˬ-iˬ maˬ jaˆ-a.”

⁵ Saˬmeuˬlaˆ ehˇ-eu, “Sahˬpaˬ Miˬyehˇ hawˇ-eu aˬ yawꞈ neh tseˇ doˆ taˬ-euˬ sahˬ paˬ heu gʼaˬ-aˬ, ngaˬ neh mˇ lehˬ taˬ-euˬ tiˬ jeˬ-iˬ maˬ jaˆ-a lehˇ iˬ nah naw maꞈ ehˇ-eu dawˬ heu dawˬ-euˬ saˇ kiˇ pyeuꞈ-eu ma.” Aˬ yawꞈ maꞈ ehˇ-eu, “Ngeuˇ meh. Sahˬpaˬ Miˬyehˇ-aˬ, aˬ dui maꞈ-euˬ saˇ kiˇ pyeuꞈ-eu ma.”

⁶ Saˬmeuˬlaˆ paˇ ehˇ-eu, “Sahˬpaˬ Miˬyehˇ-aˬ, Moˇseˬ hawˇ-eu Aˬloˬ-ahˇ tseˇ doˆ-euˬ gʼaˬ pyeuꞈ-awˇ, naw maꞈ-euˬ aˬ poeˬ aˬ bawˇ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ gʼaˬ pyeuꞈ-eu meh.

⁷ Nymˬ-mˇ yawˬ ha-euˬ jawˇ duˬ-ahˇ yawˬ ha ciˬ cuˇ ni yawꞈ-awˬ. Naw maꞈ hawˇ-eu naw maꞈ-euˬ aˬ poeˬ aˬ bawˇ deuˬ-ahˇ ka kʼoꞈ-eu gʼaˇ duˬ, Sahˬpaˬ Miˬyehˇ neh mˇ-euˬ huiˬ-eu gaˇ deuˬ naw maꞈ-ahˇ ja mehˬ-eu laꞈ kʼoeˇ, Sahˬpaˬ Miˬyehˇ mehˬ shi ngaˇ naw maꞈ-ahˇ saˇ kiˇ kamˬ-eu ma.

⁸ Yaˬkoˆ hawˇ-eu aˬ yawꞈ-euˬ miˬ sawˇ zaˬ deuˬ Iˇjiˇtuˆ miˇ kʼahˬ-ahˇ jawˇ-iˇ-awˇ, Iˇjiˇtuˆ tsawˇ haˬ deuˬ aˬ yawꞈ maꞈ-ahˇ kʼehˬ nehˬ kʼaˆ nehˬ ngeh, naw maꞈ-euˬ aˬ poeˬ aˬ bawˇ deuˬ Sahˬpaˬ Miˬyehˇ-ahˇ guˇ guˇ-ehˇ, caw ba nehˬ laꞈ-awˬ lehˇ shaˇ-euˬ meh. Kʼoeˇ ngeh, Moˇseˬ hawˇ-eu Aˬloˬ-ahˇ aˬ yawꞈ pyehˬ gʼeh leꞈ-awˇ, aˬ yawꞈ maꞈ-ahˇ bi sheuˬ doˆ laꞈ-euˬ laꞈ kʼoeˇ, miˇ kʼahˬ heu kʼahˬ-ahˇ bi jawˇ-euˬ meh.

⁹ Ehˇ kʼawꞈ, tsawˇ haˬ kʼoeˇ deuˬ aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ngehˇ-euˬ meh. Kʼoeˇ miˇ neh, Piˇliˇtiˆ tsawˇ haˬ neh maˬ ehˇ, Mawˇbaˆ miˇ kʼahˬ hawˇ-eu Siˇseˬlaˇ meuˬ-ahˇ uˆ lahˇ-eu sahˬ paˬ neh maˬ ehˇ, Haˬzawˇ meuˬ-ahˇ jawˇ-eu guiˇ guiˇ maꞈ-ahˇ uˆ lahˇ-eu gʼaˬ neh maˬ ehˇ, naw maꞈ-euˬ aˬ poeˬ aˬ bawˇ deuˬ-ahˇ aˬ yawꞈ bi deuˆ gʼaˬ-euˬ meh.

¹⁰ Kʼoeˇ ngeh, aˬ yawꞈ maꞈ Sahˬpaˬ Miˬyehˇ-ahˇ guˇ guˇ-ehˇ, heu loꞈ-ehˇ shaˇ-eu meh. “Miˬyehˇ-oˇ, nga maꞈ iˬ baˇ mˇ gʼaˬ-euˬ ma. Aˬ jeˬ miˇ neh ehˇ naˇ, nga maꞈ nawˬ-ahˇ byehˇ dzeh-awˇ, Baˬlaˇ miˬyehˇ-euˬ tahˬ pahˬ aˬ ma mawˇ kawˇ hawˇ-eu, Aˬshaˇtaˬyoˇ miˬyehˇ ma-euˬ tahˬ pahˬ aˬ ma mawˇ kawˇ-ahˇ uˬ duˬ tahˬ-euˬ ma. Muiˇ-eu deuˬ-euˬ aˬ laꞈ laꞈ kʼoeˇ, nga maꞈ-ahˇ ka kʼoꞈ nehˬ laꞈ-awˬ.

¹¹ Nawˬ-ahˇ nga maꞈ uˬ duˬ tahˬ-eu ma lehˇ ehˇ-eu meh. Kʼoeˇ naˇ, Giˇdoˬ, Baˬyehˇ, Yeˬpaˬtaˆ aˬ ha smˇ gʼaˬ-ahˇ, tiˬ gʼaˬ saˇ-iˬ tiˬ gʼaˬ Sahˬpaˬ Miˬyehˇ pyehˬ gʼeh leꞈ-awˇ, aˇ saˬ saˬ laˇ ngeh ngaˬ-ahˇ pyehˬ gʼeh leꞈ-euˬ meh. Nga maꞈ oeˬ gʼaˬ aˬ yawꞈ gʼaˬ yawꞈ, muiˇ-eu deuˬ-euˬ aˬ laꞈ laꞈ kʼoeˇ neh naw maꞈ-ahˇ ka kʼoꞈ-awˇ, naw maꞈ-ahˇ nui saˇ za-eu laꞈ kʼoeˇ bi dehꞈ bi jawˇ-euˬ ma.

¹² Ehˇ kʼawꞈ, Aˬmoˬ sahˬ paˬ Naˬhaˆ naw maꞈ-ahˇ guiˇ deuˆ le-eu lehˇ lehˬ hmˬ luꞈ gaˇ naw maꞈ ya mawˇ ngeh, Sahˬpaˬ Miˬyehˇ-ahˇ naw maꞈ-euˬ sahˬ paˬ lehˇ maˬ paˇ sawˇ ni, Nga maꞈ-ahˇ bi uˆ lahˇ-eu sahˬ paˬ tiˬ gʼaˬ geuꞈ mawꞈ nya lehˇ, naw maꞈ ngaˬ-ahˇ ehˇ laˇ-euˬ meh.

¹³ “Haw yawˬ. Naw maꞈ neh tseˇ doˆ-euˬ sahˬ paˬ iˬ nah heu gaˇ jawˇ luꞈ meh. Naw maꞈ neh shaˇ-euˬ loꞈ-ehˇ, Sahˬpaˬ Miˬyehˇ naw maꞈ-ahˇ sahˬ paˬ heu gʼaˬ biꞈ laꞈ-euˬ meh.

¹⁴ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ naw maꞈ yaw zeu baw-eu, aˬ yawꞈ-euˬ gaˇ mˇ-eu, aˬ yawꞈ-euˬ ehˇ dawˬ naˇ haˬ-eu, aˬ yawꞈ neh biꞈ taˬ-euˬ zahˇ dawˬ kʼoꞈ dawˬ deuˬ-ahˇ maˬ byehˇ dzeh ni caw teh-eu, heu deuˬ-ahˇ naw maꞈ mˇ-eu laꞈ kʼoeˇ, naw maꞈ-euˬ sahˬ paˬ hawˇ-eu, naw maꞈ dawˬ tawˆ luꞈ Sahˬpaˬ Miˬyehˇ-euˬ mehˬ nah caw teh naˇ, naw maꞈ ehˇ kʼaˇ maˬ za ni ya dehꞈ dzaˬ tehꞈ-a.

¹⁵ Ehˇ kʼawꞈ, Sahˬpaˬ Miˬyehˇ-euˬ dawˬ-ahˇ naw maꞈ maˬ naˇ haˬ-ehˇ, aˬ yawꞈ neh biꞈ taˬ-euˬ zahˇ dawˬ kʼoꞈ dawˬ deuˬ-ahˇ puiˬ naˇ, naw maꞈ hawˇ-eu naw maꞈ-euˬ sahˬ paˬ kʼoeˇ taˆ aˬ yawꞈ nui ma pehˇ-eu jeˬ keuˆ le tehꞈ-a.

¹⁶ Teu miˇ neh, nymˬ-mˇ ciˬ cuˇ ni yawꞈ-awˇ haw-awˬ. Sahˬpaˬ Miˬyehˇ mˇ-eu lehˇ lehˬ hmˬ taˬ-euˬ kʼaˆ jeˬ-ehˇ gʼeh-eu jeˬ-ahˇ naw maꞈ ya mawˇ tehꞈ-a.

¹⁷ Nymˬ-mˇ jawˇ la yamˬ meh lehˇ naw maꞈ siˬ nya meh. Ehˇ kʼawꞈ, ngaˇ guiˬ lahˬ shaˇ ngeh jawˇ, Sahˬpaˬ Miˬyehˇ mˬ jeˬ bi jeˬ le-awˇ, uˬ yehˇ bi yehˇ le tehꞈ-a. Kʼoeˇ loꞈ-ehˇ pyeuꞈ laˇ ngeh, naw maꞈ sahˬ paˬ shaˇ-eu heu-aˬ, Sahˬpaˬ Miˬyehˇ mehˬ shi huiˬ-eu iˬ baˇ pyeuꞈ law hawˇ nga lehˇ, naw maꞈ ya siˬ duˬ tehꞈ-a.”

¹⁸ Kʼoeˇ naˇ, Saˬmeuˬlaˆ guiˬ lahˬ shaˇ-awˇ, kʼoeˇ ngeh nah laꞈ kʼoeˇ Sahˬpaˬ Miˬyehˇ mˬ jeˬ bi jeˬ le-awˇ, uˬ yehˇ bi yehˇ le-euˬ meh. Kʼoeˇ ngeh jawˇ, tsawˇ haˬ dawˬ tawˆ luꞈ, Sahˬpaˬ Miˬyehˇ hawˇ-eu Saˬmeuˬlaˆ-ahˇ guˆ laˇ taˬ-euˬ meh.

¹⁹ Aˬ yawꞈ maꞈ Saˬmeuˬlaˆ-ahˇ ehˇ-eu, “Nga maꞈ maˬ ya shiˇ-eu gʼaˇ duˬ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guiˬ lahˬ shaˇ nehˬ laꞈ-awˬ. Nga maꞈ mˇ dzeuˇ-euˬ iˬ baˇ nui deuˬ uˬ taꞈ, sahˬ paˬ shaˇ-eu laꞈ kʼoeˇ nga maꞈ iˬ baˇ paˇ mˇ lahˬ-euˬ loꞈ-ehˇ pyeuꞈ luꞈ-eu gaˇ kawˆ nymˬ-mˇ nga maˬ siˬ duˬ-euˬ ma.”

²⁰ Saˬmeuˬlaˆ ehˇ-eu, “Naw maꞈ taˬ guˆ. Heu loꞈ-ehˇ gʼeh-eu yaw lehˬ jeˬ naw maꞈ mˇ gʼaˬ-euˬ kʼawꞈ, Sahˬpaˬ Miˬyehˇ-ahˇ naw maꞈ maˬ paˇ byehˇ dzeh ni, naw maꞈ-euˬ nui ma gʼawˇ mawˇ dawˬ tawˆ luꞈ aˬ yawꞈ-euˬ gaˇ mˇ-awˬ.

²¹ Maˬ ngeuˇ-eu miˬ yehˇ deuˬ-euˬ mehˬ nah naw maꞈ taˬ caw teh. Kʼoeˇ deuˬ-aˬ, gaˇ dahˇ maˬ tsoeˬ-eu miˬyehˇ deuˬ pyeuꞈ-awˇ, naw maꞈ-ahˇ maˬ caw ba nehˬ nya, maˬ ka kʼoꞈ nehˬ nya-a.

²² Sahˬpaˬ Miˬyehˇ-aˬ, naꞈ dui dui-eu saˇ jaˇ dzaˬ taˬ-awˇ, naw maꞈ-ahˇ aˬ yawꞈ-euˬ tsawˇ jeuˬ bi pyeuꞈ laˇ ma lehˇ noeˬ tsehˆ taˬ-euˬ miˇ neh, naw maꞈ-ahˇ maˬ byehˇ dzeh nehˬ laꞈ-a.

²³ Ngaˇ tehꞈ law nmˇ-aˬ, naw maꞈ gʼaˇ duˬ guiˬ lahˬ maˬ shaˇ ni jawˇ-eu baˬ da neh ngaˬ-euˬ kʼoeˇ taˆ iˬ baˇ maˬ ya jaˆ laˇ ni yahˇ-eu gʼaˇ duˬ, Sahˬpaˬ Miˬyehˇ ngaˬ-ahˇ ehˇ nehˬ laꞈ gʼaˬ-euˬ meh. Yaw muiˬ jeˬ hawˇ-eu yaw tsaˬ yawˬ dawˇ jeˬ-ahˇ naw maꞈ mˇ ni, ngaˇ mehˬ luꞈ tsoˆ luꞈ-eu ma.

²⁴ Naw maꞈ-euˬ nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ-euˬ dawˬ-ahˇ naˇ haˬ geuꞈ-awˇ, saˇ jaˇ ziꞈ-eu laꞈ kʼoeˇ aˬ yawꞈ-euˬ gaˇ mˇ-awˬ. Naw maꞈ gʼaˇ duˬ aˬ yawꞈ neh mˇ-euˬ huiˬ-eu gaˇ deuˬ-ahˇ noeˬ keuˆ-awˬ.

²⁵ Ehˇ kʼawꞈ, naw maꞈ iˬ baˇ mˇ daˆ leꞈ naˇ, naw maꞈ hawˇ-eu naw maꞈ-euˬ sahˬ paˬ ya luˬ ya seˇ-iˇ tehꞈ-a.”