Biblia Todo Logo
Bìoball air-loidhne

- Sanasan -

1 Sahˬpaˬ 7 - Akha


Sawˇlaˬmoˬ-euˬ nymˇ

1 Sawˇlaˬmoˬ-aˬ, aˬ yawꞈ jawˇ-eu sahˬ paˬ-euˬ hawˇ nymˇ tiˬ nymˇ paˇ tsoˆ-awˇ, nymˇ kʼoeˇ nymˇ tsoˆ gʼaˬ ngeh keuˆ ni, tseˇ smˇ kʼoꞈ tsoˆ-euˬ meh.

2 Leˬbaˬnoˬ aˇ bawˇ sahˬ kʼaˆ lehˇ myahˇ-euˬ aˇ lawˆ lawˆ ma tiˬ lawˆ aˬ yawꞈ tsoˆ ahˇ-euˬ meh. Aˇ lawˆ kʼoeˇ lawˆ-aˬ, yaw mahˇ paw nyiˬ tseˇ ngaˬ lmˇ, yaw jeˇ paw tseˇ nyiꞈ lmˇ nui paˆ, yaw goˇ paw shiꞈ lmˇ nui paˆ byah-awˇ, shuˬ liˇ kʼawˇ zeuˇ oeˬ cehˆ ka tuˇ-awˇ, shuˬ liˇ pyaꞈ dmˬ tsahˬ-awˇ tsoˆ-euˬ meh.

3 Kʼawˇ zeuˇ tiˬ cehˆ-euˬ tseˇ ngaˬ zeuˇ byah-awˇ, pyaꞈ dmˬ dawˬ tawˆ luꞈ oeˬ tseˇ ngaˬ dmˬ tsahˬ-euˬ meh. Pyaꞈ dmˬ kʼoeˇ deuˬ-ahˇ, shuˬ liˇ teˇ byaꞈ diˬ gʼoeˬ-euˬ meh.

4 Aˇ lawˆ kʼoeˇ lawˆ-euˬ kaˇ pyawˇ pyawˬ ma nyiˬ pyawˬ-ahˇ, tiˬ pyawˬ-euˬ laˇ gʼoˆ zaˬ smˬ cehˆ jahˇ tsoꞈ-euˬ meh.

5 Laˇ gʼoˆ bahˬ hawˇ-eu laˇ gʼoˆ zaˬ gʼoˆ bahˬ deuˬ-ahˇ oeˬ bawˬ-ehˇ jahˇ-awˇ, kaˇ pyawˇ nyiˬ pyawˬ-ahˇ jahˇ tsoꞈ taˬ-euˬ laˇ gʼoˆ zaˬ kʼoeˇ smˬ cehˆ, tiˬ pyawˬ tiˇ pyawˬ dawˇ ni jahˇ ahˇ-euˬ meh.

6 Kʼawˇ zeuˇ-euˬ aˇ lawˆ lehˇ kuˇ-eu, yaw mahˇ paw tseˇ nyiꞈ lmˇ nui paˆ byah-awˇ, yaw jeˇ paw shiꞈ lmˇ nui paˆ byah-eu aˇ lawˆ tiˬ lawˆ aˬ yawꞈ tsoˆ-euˬ meh. Aˇ lawˆ kʼoeˇ lawˆ-euˬ mehˬ shi, uˇ leˇ duˬ tiˬ lawˆ paˇ tsoˆ doˆ taˬ-awˇ, kʼawˇ zeuˇ ka tuˇ-awˇ kʼoeˇ taˆ joe shmˇ taˬ-euˬ meh.

7 Yaˇ kʼaˬ daˇ-eu aˇ lawˆ lehˇ kuˇ-eu, sahˬ paˬ-euˬ nuiˇ mahˬ ciˬ taˬ-euˬ aˇ lawˆ tiˬ lawˆ aˬ yawꞈ tsoˆ-euˬ meh. Aˇ lawˆ kʼoeˇ-aˬ, aˬ yawꞈ yaˇ kʼaˬ daˇ-euˬ aˇ lawˆ pyeuꞈ-awˇ, aˇ lawˆ lawˆ lah-ehˇ shuˬ liˇ teˇ byaꞈ taw-awˇ, kʼoeˇ taˆ paw kʼawꞈ, shuˬ liˇ teˇ byaꞈ diˬ gʼoeˬ taˬ-euˬ meh.

8 Sawˇlaˬmoˬ jawˇ-eu lawˆ-aˬ, yaˇ kʼaˬ daˇ-eu lawˆ-euˬ naˇ kʼah paw jaˆ-awˇ, aˇ lawˆ nui deuˬ-ahˇ duˇ ni tsoˆ taˬ-euˬ meh. Iˇjiˇtuˆ sahˬ paˬ zaˬ miˬ pyeuꞈ-eu aˬ yawꞈ-euˬ miˬ zaˬ gʼaˇ duˬ kʼawꞈ, kʼoeˇ loꞈ-ehˇ duˇ-eu aˇ lawˆ tiˬ lawˆ aˬ yawꞈ tsoˆ nehˬ-euˬ meh.

9 Laꞈ nyiˇ paw lahˇ gawˬ taˬ-euˬ ahˇ leˇ-ehˇ aˇ lawˆ heu deuˬ dawˬ tawˆ luꞈ-ahˇ dawˬ pehˬ-ahˇ neh nymˇ mˬ mehˬ dzaˬ-ahˇ keuˆ ni, muiˬ dui dui-eu kʼaˬ lo neh gawˬ taˬ-euˬ meh. Kʼaˬ lo kʼoeˇ deuˬ-ahˇ, laꞈ kʼoeˇ paw maˬ ehˇ, laꞈ nyiˇ paw maˬ ehˇ, yaw muiˬ paˬ-ehˇ dza-awˇ yehˬ di taˬ-euˬ meh.

10 Dawˬ dah gawˬ-euˬ kʼaˬ lo deuˬ-aˬ, huiˬ dui muiˬ dui dui-eu kʼaˬ lo deuˬ pyeuꞈ-awˇ, tiˬ paˆ na deuˬ nyiˬ lmˇ nui paˆ mahˇ-awˇ, tiˬ paˆ na deuˬ nyiˬ lmˇ mahˇ-eu meh.

11 Kʼoeˇ deuˬ-euˬ kʼoeˇ taˆ, yaw muiˬ paˬ-ehˇ dza-awˇ yehˬ di taˬ-euˬ kʼaˬ lo deuˬ hawˇ-eu shuˬ liˇyeuꞈ ma deuˬ gawˬ daˆ taˬ-euˬ meh.

12 Sahˬ paˬ-euˬ nymˇ-ahˇ gawˬ jawˬ taˬ-euˬ lahˇ maˬ ehˇ, Uˬ duˬ tahˬ nymˇ nymˇ ma-ahˇ gawˬ jawˬ taˬ-euˬ lahˇ maˬ ehˇ, Uˬ duˬ tahˬ nymˇ nymˇ ma-ahˇ uˇ leˇ-eu lawˆ-ahˇ gawˬ jawˬ taˬ-euˬ lahˇ maˬ ehˇ, yehˬ di taˬ-euˬ kʼaˬ lo smˬ tiˆ gawˬ daˆ taˬ-euˬ yaw kaˬ-ahˇ, shuˬ liˇ yeuꞈ ma gawˬ tehˬ taˬ-euˬ meh.


Huˇlamˬ-ahˇ kuˇ-euˬ

13 Sahˬ paˬ Sawˇlaˬmoˬ-aˬ, Duˇlu meuˬ-ahˇ jawˇ-eu Huˇlamˬ lehˇ myahˇ-euˬ guiˬ shuiˇ tehˆ-eu ba jiˬ tiˬ gʼaˬ-ahˇ bi kuˇ laˬ-iˇ-euˬ meh.

14 Shiˇ dzeuˇ-euˬ aˬ yawꞈ-euˬ aˬ da gʼaˬ kʼawꞈ, Duˇlu meuˬ-ahˇ guiˬ shuiˇ tehˆ-euˬ ba jiˬ meh. Aˬ yawꞈ-euˬ aˬ ma-aˬ, Naˬtaˬliˇ tsawˇ jeuˬ pyeuꞈ-eu meh. Huˇlamˬ-aˬ, tsawˇ gahˇ ahˇ-awˇ, nya dui dui-eu ba jiˬ pyeuꞈ-eu meh. Guiˬ shuiˇ tehˆ gaˇ aˬ yuiꞈ geuꞈ-awˇ haw-eu pyaˆ-eu gʼaˇ duˬ sahˬ paˬ Sawˇlaˬmoˬ aˬ yawꞈ-ahˇ kuˇ ngeh, aˬ yawꞈ laˬ kʼaˬ tiˬ cehˇ laˇ-euˬ meh.


Guiˬ shuiˇ kʼawˇ zeuˇ nyiˬ zeuˇ
( 2 Laˬsaˬbaˬ 3.15-17 )

15 Yaw mahˇ paw oeˬ lmˇ nui paˆ byah-awˇ, yaw huiˬ laꞈ paˇ smˬ paˇ byah-eu guiˬ shuiˇ kʼawˇ zeuˇ nyiˬ zeuˇ Huˇlamˬ kʼaˇ-awˇ, Uˬ duˬ tahˬ nymˇ nymˇ ma-euˬ gʼoˆ kʼehˬ-ahˇ ka tuˇ-euˬ meh.

16 Kʼoeˇ naˇ, ngaˬ caˆ goˇ-eu guiˬ shuiˇ uˬ dzo nyiˬ hmˬ tehˆ-awˇ, kʼawˇ zeuˇ kʼoeˇ nyiˬ zeuˇ-euˬ uˬ duˬ-ahˇ tsahˬ-euˬ meh.

17 Kʼawˇ zeuˇ kʼoeˇ nyiˬ zeuˇ-euˬ uˬ duˬ-ahˇ, tiˬ zeuˇ-euˬ guiˬ shuiˇ caˆ pyehꞈ shiꞈ pyehꞈ bi tsoꞈ-euˬ meh.

18 Kʼawˇ zeuˇ kʼoeˇ nyiˬ zeuˇ-euˬ uˬ duˬ-ahˇ, aˇ ka uˆ aˇ siˬ aˇ baˇ nyiˬ cehˆ toeˬ boꞈ taˬ-euˬ meh.

19 Kʼawˇ zeuˇ-euˬ uˬ dzo-ahˇ, tiˬ lmˇ byah ni ka paꞈ aˇ yehˆ aˇ baˇ jahˇ ahˇ taˬ-euˬ meh.

20 Kʼawˇ zeuˇ-euˬ uˬ dzo-ahˇ, aˇ yehˆ aˇ boꞈ boꞈ taˬ-euˬ laꞈ taˆ paw yaw lah lah-ehˇ jaˆ-eu tsahˇ-ahˇ, tiˬ cehˆ-euˬ tiˬ yaˇ siˬ byah-eu aˇ ka uˆ aˇ siˬ aˇ baˇ nyiˬ cehˆ toeˬ boꞈ taˬ-euˬ meh.

21 Uˬ duˬ tahˬ nymˇ nymˇ ma-euˬ gʼoˆ kʼehˬ-ahˇ, Huˇlamˬ neh kʼawˇ zeuˇ kʼoeˇ nyiˬ zeuˇ ka tuˇ taˬ-euˬ meh. Laꞈ oˆ paw pyawˬ-ahˇ jaˆ-eu zeuˇ-ahˇ Yaˬciˬ lehˇ myahˇ-awˇ, laꞈ taˆ paw pyawˬ-ahˇ jaˆ-eu zeuˇ-ahˇ Bawˇza lehˇ myahˇ-euˬ meh.

22 Ka paꞈ aˇ yehˆ loꞈ-ehˇ jahˇ taˬ-euˬ uˬ dzo deuˬ, kʼawˇ zeuˇ kʼoeˇ taˆ ciꞈ tsahˬ taˬ-euˬ meh. Kʼoeˇ loꞈ-ehˇ jahˇ-awˇ, kʼawˇ zeuˇ-ahˇ taꞈ leˇ-awˇ mˇ paˬ-ehˇ gʼeh-eu jeˬ mˇ gʼaˬ-euˬ meh.


Guiˬ shuiˇ lah
( 2 Laˬsaˬbaˬ 4.2-5 )

23 Yaw naꞈ paw ngaˬ caˆ, mehˬ kʼehˬ yaw jeˇ paw nyiˬ lmˇ nui paˆ, yaw huiˬ paw caˆ jawˬ shiꞈ lmˇ nui paˆ byah-eu guiˬ shuiˇ lah tiˬ lah Huˇlamˬ neh kʼaˇ-euˬ meh.

24 Lah kʼoeˇ-euˬ daˇ bahˇ caw caw-ehˇ, tiˬ caˆ laꞈ kʼoeˇ iˇ puˬ aˇ baˇ tseˇ siˬ ahˇ leˇ-ehˇ, iˇ puˬ aˇ baˇ nyiˬ cehˆ, lah aˬ yawꞈ-ahˇ tiˬ poˆ tehꞈ-ehˇ kʼaˇ tawꞈ taˬ-euˬ meh.

25 Laꞈ taˆ paw smˬ mawˇ, laꞈ oˆ paw smˬ mawˇ, nahˇ ma doˆ kʼehˬ paw smˬ mawˇ, nahˇ ma ga kʼehˬ paw smˬ mawˇ ciˬ pyawˇ taˬ-euˬ guiˬ shuiˇ mawˇ neˇ mawˇ kawˇ kʼoeˇ taˆ, lah kʼoeˇ lah ciˬ taˬ-euˬ meh.

26 Lah kʼoeˇ lah-euˬ daˇ bahˇ laꞈ zaˬ tiˬ daˬ tuˇ-eu meh. Lah mehˬ kʼehˬ-euˬ daˇ bahˇ-aˬ, kʼmˬ maˬ-euˬ daˇ bahˇ-ahˇ duˇ-awˇ, laꞈ nyiˇ paw ka paꞈ aˇ yehˆ aˇ baˇ aˇ boꞈ boꞈ taˬ-euˬ meh. Lah kʼoeˇ lah laꞈ kʼoeˇ, tsawˇ haˬ nyiˬ heˇ gʼaˬ dzuiꞈ loꞈ-eu iˇ cuꞈ deˇ leˇ-eu meh.


Guiˬ shuiˇ laˆ lawˬ

27 Tiˬ lmˇ oeˬ bawˬ byah-awˇ, smˬ caˆ goˇ-eu guiˬ shuiˇ laˆ lawˬ tseˇ laˇ Huˇlamˬ jahˇ-euˬ meh.

28 Guiˬ shuiˇ daˇ byaˆ tehˆ-awˇ, laˆ lawˬ-euˬ daˬ kawˇ-ahˇ toeˬ tsoꞈ-awˇ jahˇ-euˬ meh.

29 Daˬ kawˇ-ahˇ toeˬ tsoꞈ-euˬ guiˬ shuiˇ daˇ byaˆ kʼoeˇ deuˬ kʼoeˇ taˆ, aˇ laˬ jaˬ shiˇ aˇ baˇ, mawˇ neˇ aˇ baˇ, jeˬ luˇ beˬ aˇ baˇ heu deuˬ toeˬ boꞈ taˬ-euˬ meh. Aˇ laˬ jaˬ shiˇ hawˇ-eu mawˇ neˇ aˇ baˇ-euˬ laꞈ oˆ hawˇ-eu laꞈ taˆ jaˆ-eu daˬ kawˇ aˬ yawꞈ-ahˇ, aˇ boꞈ aˇ yehˆ yaw gʼoꞈ yaw diˆ-ehˇ boꞈ taˬ-euˬ meh.

30 Laˆ lawˬ yawˬ laˇ na luꞈ, guiˬ shuiˇ puˬ juˬ-ahˇ guiˬ shuiˇ aˇ beuˆ oeˬ beuˆ jahˇ tsoꞈ taˬ-euˬ meh. Laˆ lawˬ kʼoeˇ taˆ jaˆ-eu sehˇ byehˇ ciˬ taˬ duˬ-ahˇ bi toˆ tehˬ-eu gʼaˇ duˬ, laˆ lawˬ-euˬ laꞈ coeˇ oeˬ coeˇ-ahˇ, guiˬ shuiˇ neh jahˇ taˬ-euˬ aˬ kuiˇ oeˬ kuiˇ bi tsoꞈ doˆ-awˇ, aˬ kuiˇ kʼoeˇ oeˬ kuiˇ-ahˇ aˇ boꞈ aˇ yehˆ yaw gʼoꞈ yaw diˆ-ehˇ boꞈ taˬ-euˬ meh.

31 Laˆ lawˬ kʼoeˇ taˆ sehˇ byehˇ ciˬ taˬ nya ni, daˇ kʼahˇ yaw zah zah-ehˇ jahˇ tsoꞈ taˬ-euˬ meh. Sehˇ byehˇ ciˬ taˬ duˬ kʼoeˇ, tiˬ caˆ byah ni yaw kʼahˬ kʼahˬ-ehˇ jahˇ taˬ-awˇ, laˆ lawˬ-ahˇ toeˬ tsoꞈ taˬ-euˬ aˬ kuiˇ-ahˇ keuˆ ni, tiˬ caˆ tiˬ toˇ byah-eu meh. Kʼoeˇ-euˬ jawˬ jawˬ-ehˇ, aˇ boꞈ boꞈ taˬ-euˬ meh.

32 Laˆ lawˬ aˇ beuˆ kʼoeˇ deuˬ-aˬ, yaw goˇ paw tiˬ caˆ tiˬ toˇ byah-awˇ, guiˬ shuiˇ shuiˇ byaˆ kʼoeˇ deuˬ-euˬ uˬ moˆ bi tsoꞈ-euˬ meh. Puˬ juˬ aˬ yawꞈ hmˬ-aˬ, tiˬ poˆ tehꞈ-ehˇ laˆ lawˬ daˬ kawˇ aˬ yawꞈ-ahˇ kʼaˇ tsoꞈ taˬ-euˬ meh.

33 Aˇ beuˆ kʼoeˇ mahˬ laˆ lawˬ-euˬ aˇ beuˆ-ahˇ duˇ-awˇ, beuˆ lah-ehˇ guiˬ shuiˇ neh tehꞈ-ehˇ jahˇ taˬ-euˬ meh.

34 Laˆ lawˬ aˬ yawꞈ laˇ yawꞈ-euˬ laꞈ coeˇ dawˬ pehˬ-ahˇ aˬ kuiˇ oeˬ kahˬ tsoꞈ-awˇ, aˬ kuiˇ kʼoeˇ oeˬ kahˬ luꞈ, laˆ lawˬ aˬ yawꞈ-ahˇ tiˬ poˆ tehꞈ-ehˇ kʼaˇ tawꞈ taˬ-euˬ meh.

35 Laˆ lawˬ kʼoeˇ taˆ tiˬ toˇ goˇ gaˇ, jawˬ jawˬ-ehˇ daˇ bahˇ bahˇ taˬ-euˬ meh. Laˆ lawˬ-euˬ daˇ bahˇ hawˇ-eu laˆ lawˬ-euˬ aˬ kuiˇ kʼoeˇ-aˬ, laˆ lawˬ aˬ yawꞈ-ahˇ tiˬ poˆ tehꞈ-ehˇ kʼaˇ tawꞈ taˬ-euˬ meh.

36 Laˆ lawˬ aˬ kuiˇ kʼoeˇ deuˬ hawˇ-eu guiˬ shuiˇ shuiˇ byaˆ kʼoeˇ deuˬ kʼoeˇ taˆ aˇ boꞈ boꞈ kʼaˇ kʼaˇ za gaˇ, jeˬ luˇ beˬ aˇ baˇ, aˇ laˬ jaˬ shiˇ aˇ baˇ, daoˇ aˇ bawˬ aˇ baˇ heu deuˬ boꞈ taˬ-awˇ, yaw kaˬ yaw kaˇ-ehˇ aˇ boꞈ aˇ yehˆ yaw gʼahˬ yaw diˆ-ehˇ boꞈ taˬ-euˬ meh.

37 Laˆ lawˬ kʼoeˇ deuˬ aˬ yawꞈ tiˬ shehˆ tehꞈ-ehˇ pyeuꞈ-awˇ, aˬ yawꞈ tiˬ laˇ-ahˇ duˇ ni kʼoeˇ loꞈ-ehˇ jahˇ-euˬ meh.

38 Huˇlamˬ-aˬ, laˆ lawˬ kʼoeˇ tseˇ laˇ gʼaˇ duˬ, sehˇ byehˇ tseˇ byehˇ jahˇ-euˬ meh. Sehˇ byehˇ kʼoeˇ aˬ yawꞈ byehˇ yawꞈ, tsawˇ haˬ oeˬ tseˇ gʼaˬ dzuiꞈ loꞈ-eu iˇ cuꞈ deˇ leˇ-eu meh.

39 Laˆ lawˬ kʼoeˇ deuˬ, Uˬ duˬ tahˬ nymˇ nymˇ ma-euˬ laꞈ oˆ paw pyawˬ-ahˇ ngaˬ laˇ bi jaˆ-awˇ, laꞈ taˆ paw pyawˬ-ahˇ ngaˬ laˇ bi jaˆ-euˬ meh. Guiˬ shuiˇ lah kʼoeˇ lah-ahˇ, laꞈ oˆ paw nahˇ ma doˆ kʼehˬ paw coeˇ-ahˇ bi jaˆ-euˬ meh.


Uˬ duˬ tahˬ nymˇ nymˇ ma-ahˇ taꞈ-eu mˇ myawˬ deuˬ
( 2 Laˬsaˬbaˬ 4.11—5.1 )

40 Huˇlamˬ-aˬ, mui deuˇ oeˬ lahˬ deuˬ, ni ceuˆ deuˬ hawˇ-eu, naˬ bo deuˬ kʼawꞈ jahˇ-euˬ meh. Kʼoeˇ ngeh jawˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ, sahˬ paˬ Sawˇlaˬmoˬ-ahˇ kʼaˇ mˇ nehˬ paˬ-ehˇ gʼeh-eu jeˬ aˬ yawꞈ mˇ gʼaˬ shaˇ gʼaˬ-euˬ meh.

41 Kʼawˇ zeuˇ nyiˬ zeuˇ, kʼawˇ zeuˇ kʼoeˇ nyiˬ zeuˇ-euˬ uˬ duˬ-ahˇ tsoꞈ-eu naˬ bo-ahˇ duˇ-eu kʼawˇ zeuˇ uˬ dzo nyiˬ hmˬ, kʼawˇ zeuˇ-euˬ uˬ dzo-ahˇ jahˇ tsoꞈ taˬ-euˬ aˇ caˆ caˆ pyehꞈ aˇ baˇ,

42 kʼawˇ zeuˇ uˬ dzo aˬ yawꞈ hmˬ yawꞈ-euˬ jawˬ jawˬ-ehˇ, aˇ cehˆ nyiˬ cehˆ jahˇ baw taˬ-euˬ aˇ ka uˆ aˇ baˇ oeˬ yaˇ baˇ,

43 laˆ lawˬ tseˇ laˇ hawˇ-eu laˆ lawˬ kʼoeˇ taˆ ciˬ daˆ-eu sehˇ byehˇ tseˇ byehˇ,

44 guiˬ shuiˇ lah hawˇ-eu guiˬ shuiˇ lah daˬ luꞈ-eu mawˇ neˇ mawˇ kawˇ tseˇ nyiꞈ kawˇ, oeˬ lahˬ, ni ceuˆ hawˇ-eu naˬ bo heu deuˬ aˬ yawꞈ jahˇ gʼaˬ-euˬ meh.

45 Huˇlamˬ neh sahˬ paˬ Sawˇlaˬmoˬ-ahˇ jahˇ nehˬ-awˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ jaˆ-eu oeˬ lahˬ deuˬ, ni ceuˆ deuˬ hawˇ-eu, kʼmˬ maˬ sehˇ byehˇ deuˬ dawˬ tawˆ luꞈ, guiˇ nyiˬ ni gʼeh-eu muiˬ dui dui-eu guiˬ shuiˇ neh tehꞈ-ehˇ jahˇ taˬ-euˬ meh.

46 Suˇkoˆ meuˬ hawˇ-eu Zaˬleˬdaˬ meuˬ-euˬ yaw kaˬ-ahˇ, Yawˇdaˬ lawˇ baˬ deh kʼawꞈ laꞈ kʼoeˇ jaˆ-eu guiˬ shuiˇ kʼaˇ duˬ-ahˇ, mˇ myawˬ kʼoeˇ deuˬ dawˬ tawˆ luꞈ-ahˇ sahˬ paˬ neh bi kʼaˇ-euˬ meh.

47 Guiˬ shuiˇ neh jahˇ taˬ-euˬ mˇ myawˬ kʼoeˇ deuˬ-ahˇ Sawˇlaˬmoˬ maˬ saˆ haw-aˬ. Aˬ jeˬ miˇ neh ehˇ naˇ, mˇ myawˬ kʼoeˇ deuˬ myaˬ dui dui-eu miˇ neh, maˬ saˆ haw jiˇ coeˇ-a.

48 Uˬ duˬ tahˬ nymˇ nymˇ ma laꞈ kʼoeˇ zmˬ-eu gʼaˇ duˬ, shuiˇ neh jahˇ taˬ-euˬ keu ka deuˬ-ahˇ kʼawꞈ, Sawˇlaˬmoˬ neh bi jahˇ-euˬ meh. Shuiˇ neh jahˇ taˬ-euˬ lawˇ duˬ, Miˬyehˇ mehˬ shi kaˬ muˇ damˬ nehˬ-eu gʼaˇ duˬ shuiˇ hawˬ jeh,

49 Muiˬ dui shawˇ dui dui-eu jawˇ duˬ mehˬ shi laꞈ oˆ paw pyawˬ-ahˇ ngaˬ hmˬ, laꞈ taˆ paw pyawˬ-ahˇ ngaˬ hmˬ bi jaˆ-eu gʼaˇ duˬ, shuiˇ neh jahˇ taˬ-euˬ tsiˇ kʼmˬ doꞈ taˬ duˬ tseˇ hmˬ, shuiˇ aˇ yehˆ deuˬ, shuiˇ tsiˇ kʼmˬ deuˬ hawˇ-eu shuiˇ ciˆ nyawˆ deuˬ,

50 shuiˇ neh jahˇ taˬ-euˬ kʼmˬ maˬ deuˬ, shuiˇ neh jahˇ taˬ-euˬ tsiˇ kʼmˬ laˆ saˆ doꞈ-eu shuiˇ daˇ ceh deuˬ, shuiˇ naˬ bo deuˬ, yaw saw jeˬ doꞈ taˬ-euˬ shuiˇ kʼmˬ maˬ deuˬ, miˬ jiˆ pehˆ ahˇ-eu shuiˇ mui za deuˬ, Muiˬ dui shawˇ dui dui-eu jawˇ duˬ-ahˇ uˇ leˇ-eu laˇ gʼoˆ-ahˇ zmˬ-eu gʼaˇ duˬ hawˇ-eu, Uˬ duˬ tahˬ nymˇ nymˇ ma-ahˇ uˇ leˇ-eu laˇ gʼoˆ-ahˇ zmˬ-eu gʼaˇ duˬ shuiˇ naˬ joˆ deuˬ meh.

51 Uˬ duˬ tahˬ nymˇ nymˇ ma tsoˆ-eu gaˇ yawˬ jeˬ na luꞈ-ahˇ sahˬ paˬ Sawˇlaˬmoˬ mˇ luiˆ gʼaˬ jiˇ ngeh, aˬ yawꞈ aˬ da Daˬbiˇ neh Sahˬpaˬ Miˬyehˇ-ahˇ damˬ nehˬ-euˬ shuiˇ deuˬ, pyuˇ deuˬ hawˇ-eu, nui jeˬ dawˬ tawˆ luꞈ-ahˇ, Uˬ duˬ tahˬ nymˇ nymˇ ma laꞈ kʼoeˇjaˆ-eu myawˬ taˬ-eu aˇ lawˆ deuˬ laꞈ kʼoeˇ jeˬ hmˬ taˬ-euˬ meh.

Akha Bible Revision (Latin Script) © Thailand Bible Society, 2011.

Thailand Bible Society
Lean sinn:



Sanasan