1 Sahˬpaˬ 6 - Akha

Sawˇlaˬmoˬ Uˬ duˬ tahˬ nymˇ nymˇ ma tsoˆ-euˬ

¹ Iˇsaˬleˬlaˆ tsawˇ jeuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ-euˬ oeˬ yaˇ yehꞈ tseˇ kʼoꞈ byah laˇ-awˇ, Sawˇlaˬmoˬ Iˇsaˬleˬlaˆ miˇ kʼahˬ-ahˇ uˆ lahˇ-euˬ oeˬ kʼoꞈ byah ngeh kʼoꞈ, ba la nyiˬ siˬ tiˬ siˬ pyeuꞈ-eu Ziˇbaˆ ba la-ahˇ, Sawˇlaˬmoˬ Uˬ duˬ tahˬ nymˇ nymˇ ma tsoˆ dahˬ beh-euˬ meh.

² Sahˬpaˬ Miˬyehˇ gʼaˇ duˬ sahˬ paˬ Sawˇlaˬmoˬ neh tsoˆ-euˬ Uˬ duˬ tahˬ nymˇ nymˇ ma kʼoeˇ nymˇ-aˬ, yaw mahˇ paw tseˇ ngaˬ lmˇ, yaw jeˇ paw ngaˬ lmˇ hawˇ-eu, yaw goˇ paw shiꞈ lmˇ nui paˆ byah-eu meh.

³ Uˬ duˬ tahˬ nymˇ mehˬ shi tsoˆ doˆ taˬ-euˬ uˇ leˇ duˬ-ahˇ jaˆ-eu aˇ lawˆ kʼoeˇ lawˆ kʼawꞈ, yaw jeˇ paw Uˬ duˬ tahˬ nymˇ naˆ ni ngaˬ lmˇ jeˇ-awˇ, yaw mahˇ paw nyiˬ lmˇ nui paˆ byah-eu meh.

⁴ Uˬ duˬ tahˬ nymˇ-euˬ kaˇ pyawˇ-ahˇ, laꞈ kʼoeˇ paw jeˇ dzehˬ-awˇ, laꞈ nyiˇ paw suꞈ dzehˬ-eu laˇ gʼoˆ zaˬ deuˬ jahˇ ahˇ taˬ-euˬ meh.

⁵ Uˬ duˬ tahˬ nymˇ-euˬ pyawˬ ma nyiˬ pyawˬ hawˇ-eu pyawˬ zaˬ naˇ kʼah pyawˬ jawˬ jawˬ-ehˇ, smˬ tiˆ baw-eu aˇ lawˆ deuˬ kaˇ pyawˇ-ahˇ tsoˆ tawꞈ taˬ-euˬ meh. Aˬ yawꞈ tiˆ yawꞈ yaw goˇ paw ngaˬ caˆ byah-eu meh.

⁶ Yaw jeˇ paw-aˬ, laꞈ oˆ oˆ saˬ tiˆ ngaˬ caˆ, nyiˬ tiˆ tiˬ tiˆ koꞈ caˆ, smˬ tiˆ tiˬ tiˆ shiꞈ caˆ byah-eu meh. Uˬ duˬ tahˬ nymˇ nymˇ ma-euˬ kaˇ pyawˇ kʼoeˇ, yaw tuˇ paw tiˬ tiˆ saˇ-iˬ tiˬ tiˆ teuꞈ baˬ daˆ leꞈ-euˬ miˇ neh, aˇ lawˆ kʼoeˇ deuˬ-euˬ yeuꞈ ma ciˬ taˬ-eu gʼaˇ duˬ, kaˇ pyawˇ-ahˇ tahˇ byoe-eu maˬ loˬ-a.

⁷ Uˬ duˬ tahˬ nymˇ nymˇ ma tsoˆ gaˇ zmˬ-eu gʼaˇ duˬ lehˬ hmˬ taˬ-euˬ kʼaˬ lo deuˬ-ahˇ, tsoˆ duˬ-ahˇ maˬ yuˇ keuˆ laꞈ mi naˆ-ehˇ yaw muiˬ paˬ-ehˇ laˆ saˆ gʼaˬ taˬ-euˬ miˇ neh, Uˬ duˬ tahˬ nymˇ nymˇ ma tsoˆ ngeh, diˬ puˬ koˆ-eu teˇ saˇ, deuˆ haˬ deuˆ-eu teˇ saˇ hawˇ-eu, shmˇ keu ka deuˬ laˆ tahˬ laˆ toˆ-eu teˇ saˇ deuˬ maˬ ya gaˬ ni, ciˬ cuˇ ni tsoˆ-euˬ meh.

⁸ Kaˇ pyawˇ laꞈ nyiˇ jawˬ jawˬ-ehˇ tsoˆ tawꞈ taˬ-euˬ aˇ lawˆ deuˬ-euˬ laꞈ oˆ oˆ saˬ tiˆ-ahˇ uˇ leˇ-eu gʼoˆ kʼehˬ-aˬ, Uˬ duˬ tahˬ nymˇ nymˇ ma-euˬ laꞈ oˆ paw pyawˬ-ahˇ dahˇ-awˇ, nyiˬ tiˆ tiˬ tiˆ hawˇ-eu laꞈ taˆ taˆ saˬ tiˆ-ahˇ uˇ leˇ-eu gʼaˇ duˬ, dawˬ dzm tsoꞈ taˬ-euˬ meh.

⁹ Uˬ duˬ tahˬ nymˇ nymˇ ma kʼoeˇ nymˇ-ahˇ sahˬ paˬ Sawˇlaˬmoˬ tsoˆ gʼaˬ ngeh, shuˬ liˇ pyaꞈ dmˬ hawˇ-eu shuˬ liˇ teˇ byaꞈ deuˬ yuˇ-awˇ, nymˇ mˬ-euˬ uˬ moˆ taw-euˬ meh.

¹⁰ Aˬ yawꞈ tiˆ yawꞈ ngaˬ caˆ goˇ-awˇ, smˬ tiˆ baw-eu nymˇ kʼawꞈ, Uˬ duˬ tahˬ nymˇ nymˇ ma-euˬ kaˇ pyawˇ laꞈ nyiˇ jawˬ jawˬ-ehˇ tsoˆ doˆ-awˇ, shuˬ liˇ pyaꞈ dmˬ neh kaˇ pyawˇ-ahˇ tsoˆ tawꞈ taˬ-euˬ meh.

¹¹ Sawˇlaˬmoˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹² “Ngaˬ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ nawˇ caw teh-awˇ, ngaˬ-euˬ ehˇ dawˬ-ahˇ naˇ haˬ geuꞈ naˇ, nawˬ da Daˬbiˇ-ahˇ ngaˬ neh saˇ jaˇ dzaˬ taˬ-euˬ jeˬ, nawˬ-euˬ kʼoeˇ taˆ ngaˇ bi keuˆ le ma.

¹³ Nawˇ tsoˆ luꞈ-eu Uˬ duˬ tahˬ nymˇ nymˇ ma heu nymˇ laꞈ kʼoeˇ, Iˇsaˬleˬlaˆ tsawˇ haˬ deuˬ nehˬ-ehˇ ngaˇ jawˇ-awˇ, aˬ yawꞈ maꞈ-ahˇ ngaˇ maˬ byehˇ dzeh.”

¹⁴ Kʼoeˇ naˇ, Sawˇlaˬmoˬ Uˬ duˬ tahˬ nymˇ nymˇ ma tsoˆ gʼaˬ-euˬ meh.

Uˬ duˬ tahˬ nymˇ nymˇ ma-euˬ laꞈ kʼoeˇ paw laˆ saˆ muiˬ-euˬ

¹⁵ Uˬ duˬ tahˬ nymˇ nymˇ ma-euˬ kaˇ pyawˇ laꞈ kʼoeˇ paw pyawˬ-ahˇ uˬ kʼawˬ-ahˇ neh kaˇ pyawˇ uˬ gʼmˬ-ahˇ tuˆ ni, shuˬ liˇ teˇ byaꞈ neh paˇ taw gʼoeˬ-awˇ, teˇ byaꞈ kʼoeˇ neh kʼawˬ-euˬ meh.

¹⁶ Muiˬ dui shawˇ dui dui-eu jawˇ duˬ lehˇ kuˇ-eu lawˆ-aˬ, Uˬ duˬ tahˬ nymˇ nymˇ ma-euˬ naˇ kʼah paw pyawˬ-ahˇ jaˆ-eu meh. Aˇ lawˆ kʼoeˇ lawˆ yaw mahˇ paw ngaˬ lmˇ byah-awˇ, uˬ kʼawˬ-ahˇ neh kaˇ pyawˇ uˬ gʼmˬ-ahˇ tuˆ ni, shuˬ liˇ teˇ byaꞈ neh taw lawˆ taˬ-euˬ meh.

¹⁷ Muiˬ dui shawˇ dui dui-eu jawˇ duˬ-euˬ mehˬ shi jaˆ-eu nymˇ ma pyawˬ-aˬ, yaw mahˇ paw tseˇ lmˇ byah-eu meh.

¹⁸ Shuˬ liˇ teˇ byaꞈ kʼoeˇ deuˬ-ahˇ, iˇ puˬ aˇ baˇ hawˇ-eu aˇ yehˆ aˇ baˇ toeˬ boꞈ taˬ-euˬ meh. Kaˇ pyawˇ laꞈ kʼoeˇ pyawˬ tiˬ pyawˬ pyawˬ lah-ehˇ, kʼaˬ lo kaˇ pyawˇ maˬ bi mawˇ laˇ ni, shuˬ liˇ teˇ byaꞈ neh paˇ taw gʼoeˬ jiˇ taˬ-euˬ meh.

¹⁹ Uˬ duˬ tahˬ nymˇ nymˇ ma-euˬ naˇ kʼah paw pyawˬ-ahˇ, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ taˬ-eu gʼaˇ duˬ, aˇ lawˆ tiˬ lawˆ taw lawˆ taˬ-euˬ meh.

²⁰ Aˇ lawˆ kʼoeˇ lawˆ-aˬ, yaw mahˇ paw ngaˬ lmˇ, yaw jeˇ paw ngaˬ lmˇ, yaw goˇ paw ngaˬ lmˇ byah-awˇ, aˇ lawˆ lawˆ lah-ehˇ maˇ jawˆ ni gʼeh-eu shuiˇ neh yaw taˬ-euˬ meh.

²¹ Uˬ duˬ tahˬ nymˇ nymˇ ma-euˬ laꞈ kʼoeˇ paw shuiˇ yaw taˬ-awˇ, laꞈ kʼoeˇ lawˆ-ahˇ uˇ leˇ-eu gʼoˆ kʼehˬ-ahˇ, shuiˇ shuiˇ caˆ gʼeu taw taˬ-euˬ meh. Laꞈ kʼoeˇ lawˆ-ahˇ kʼawꞈ, shuiˇ yaw taˬ-euˬ meh.

²² Uˬ duˬ tahˬ nymˇ nymˇ ma-euˬ laꞈ kʼoeˇ paw kaˇ pyawˇ yawˬ pyawˬ na luꞈ shuiˇ yaw taˬ-awˇ, Muiˬ dui shawˇ dui dui-eu jawˇ duˬ-ahˇ jaˆ-eu lawˇ duˬ-ahˇ kʼawꞈ, shuiˇ neh yaw taˬ-euˬ meh.

²³ Nyiˬ lmˇ nui paˆ goˇ-eu jeˬ luˇ beˬ mawˇ kawˇ nyiˬ kawˇ-ahˇ, saˬ loˬ daˇ kawˬ neh pyaꞈ-awˇ, Muiˬ dui shawˇ dui dui-eu jawˇ duˬ-ahˇ bi jaˆ-euˬ meh.

²⁴ Jeˬ luˇ beˬ mawˇ kawˇ tiˬ kawˇ-euˬ aˬ dahˇ tiˬ pyawˬ ngaˬ caˆ mahˇ-awˇ, aˬ dahˇ nyiˬ pyawˬ luꞈ-euˬ kʼoeˇ dzaˬ heu dzaˬ-ahˇ doˆ ni, nyiˬ lmˇ nui paˆ byah-eu meh.

²⁵ Mawˇ kawˇ nyiˬ kawˇ luꞈ aˬ yawꞈ tiˬ gaˇ duˇ ni, tiˬ kawˆ mah ni pyaꞈ taˬ-euˬ miˇ neh, mawˇ kawˇ yawˬ kawˇ yawˬ kʼawꞈ, aˬ dahˇ nyiˬ pyawˬ luꞈ-euˬ kʼoeˇ dzaˬ heu dzaˬ-ahˇ doˆ ni, nyiˬ lmˇ nui paˆ byah-eu meh.

²⁶ Mawˇ kawˇ kʼoeˇ nyiˬ kawˇ luꞈ, nyiˬ lmˇ nui paˆ goˇ-eu meh.

²⁷ Mawˇ kawˇ kʼoeˇ nyiˬ kawˇ-ahˇ, Muiˬ dui shawˇ dui dui-eu jawˇ duˬ laꞈ kʼoeˇ tiˬ paw tiˬ kawˇ bi jaˆ-euˬ meh. Mawˇ kawˇ tiˬ kawˇ-euˬ aˬ dahˇ mehˬ dzaˬ tiˬ paw dzaˬ-aˬ, yawˬ kawˇ yawˬ-euˬ aˬ dahˇ mehˬ dzaˬ-ahˇ tuˆ-awˇ, aˬ dahˇ mehˬ dzaˬ yawˬ dzaˬ yawˬ kaˇ pyawˇ-ahˇ tuˆ ni bi jaˆ-euˬ meh. Kʼoeˇ miˇ neh, aˬ dahˇ mehˬ dzaˬ nyiˬ dzaˬ tiˬ gaˇ tuˆ-awˇ, aˬ dahˇ mehˬ dzaˬ nyiˬ dzaˬ-aˬ, kaˇ pyawˇ nyiˬ pyawˬ-ahˇ tuˆ-eu meh.

²⁸ Jeˬ luˇ beˬ mawˇ kawˇ kʼoeˇ nyiˬ kawˇ-ahˇ, shuiˇ yaw taˬ-euˬ meh.

²⁹ Nymˇ ma lawˆ hawˇ-eu laꞈ kʼoeˇ lawˆ-euˬ kaˇ pyawˇ yawˬ pyawˬ na luꞈ-ahˇ, jeˬ luˇ beˬ aˇ baˇ, daoˇ aˇ bawˬ aˇ baˇ hawˇ-eu aˇ yehˆ aˇ baˇ deuˬ toeˬ boꞈ taˬ-euˬ meh.

³⁰ Uˬ kʼawˬ teˇ byaꞈ-ahˇ kʼawꞈ, shuiˇ yaw taˬ-euˬ meh.

³¹ Muiˬ dui shawˇ dui dui-eu jawˇ duˬ-ahˇ uˇ leˇ-eu gʼoˆ kʼehˬ-ahˇ, saˬ loˬ daˇ kawˬ neh laˇ gʼoˆ paꞈ nyiˬ paꞈ tsoꞈ-eu laˇ gʼoˆ jahˇ tsoꞈ taˬ-awˇ, laˇ gʼoˆ uˬ duˬ paw yaw ceh ceh-ehˇ jahˇ taˬ-euˬ meh.

³² Laˇ gʼoˆ kʼoeˇ-ahˇ, Jeˬ luˇ beˬ aˇ baˇ, daoˇ aˇ bawˬ aˇ baˇ hawˇ-eu aˇ yehˆ aˇ baˇ deuˬ taꞈ boꞈ taˬ-euˬ meh. Laˇ gʼoˆ kʼoeˇ maˬ ehˇ, Jeˬ luˇ beˬ aˇ baˇ maˬ ehˇ, daoˇ aˇ bawˬ aˇ baˇ hawˇ-eu aˇ yehˆ aˇ baˇ maˬ ehˇ, shuiˇ yaw taˬ-euˬ meh.

³³ Nymˇ ma lawˆ-ahˇ uˇ leˇ duˬ-ahˇ, saˬ loˬ daˇ kawˬ neh oeˬ kʼawˇ kʼawˇ-eu laˇ gʼoˆ bahˬ jahˇ tsoꞈ taˬ-euˬ meh.

³⁴ Miˬ shuˬ daˇ kawˬ neh jahˇ taˬ-euˬ dehˬ dmˇ nya-eu laˇ gʼoˆ paꞈ nyiˬ paꞈ, kʼoeˇ gaˇ jahˇ tsoꞈ taˬ-euˬ meh.

³⁵ Laˇ gʼoˆ paꞈ kʼoeˇ nyiˬ paꞈ-ahˇ kʼawꞈ, jeˬ luˇ beˬ aˇ baˇ, daoˇ aˇ bawˬ aˇ baˇ, aˇ yehˆ aˇ baˇ deuˬ taꞈ boꞈ taˬ-awˇ, shuiˇ yaw taˬ-euˬ meh.

³⁶ Uˬ duˬ tahˬ nymˇ nymˇ ma-euˬ mehˬ shi laꞈ kʼoeˇ lahˇ lehˇ kuˇ-eu lahˇ kʼoeˇ lahˇ gawˬ ngeh, kʼaˬ lo smˬ tiˆ gawˬ-euˬ yaw kaˬ-ahˇ shuˬ liˇ yeuꞈ ma gawˬ tehˬ daˆ leꞈ-euˬ meh.

³⁷ Sawˇlaˬmoˬ uˆ lahˇ-eu oeˬ kʼoꞈ byah laˇ ngeh kʼoꞈ, ba la nyiˬ siˬ tiˬ siˬ pyeuꞈ-eu Ziˇbaˆ ba la-ahˇ, Uˬ duˬ tahˬ nymˇ nymˇ ma gawˬ dahˬ beh-euˬ meh.

³⁸ Sawˇlaˬmoˬ uˆ lahˇ-euˬ tseˇ tiꞈ kʼoꞈ byah ngeh kʼoꞈ, ba la yehꞈ siˬ tiˬ siˬ pyeuꞈ-eu Buˇlaˆ ba la-ahˇ, yaw beh neh kʼaˇ noeˬ taˬ-euˬ loꞈ-ehˇ, Uˬ duˬ tahˬ nymˇ nymˇ ma tsoˆ gʼaˬ-euˬ meh. Sawˇlaˬmoˬ neh Uˬ duˬ tahˬ nymˇ nymˇ ma tsoˆ-euˬ aˇ yamˬ shiꞈ kʼoꞈ ga-iˇ-euˬ meh.