1 Sahˬpaˬ 5 - Akha

Uˬ duˬ tahˬ nymˇ nymˇ ma tsoˆ-eu gʼaˇ duˬ lehˬ hmˬ-euˬ

¹ Duˇlu sahˬ paˬ Hiˇlamˬ-aˬ, Daˬbiˇ nehˬ-ehˇ maˬ tsehˆ leˇ ni cawˬ cawˬ taꞈ-euˬ miˇ neh, Daˬbiˇ-euˬ jawˇ duˬ-ahˇ Sawˇlaˬmoˬ sahˬ paˬ keuˆ leˇ-euˬ gaˇ kawˆ ya gaˬ ngeh, cawˬ cawˬ taꞈ-eu gʼaˇ duˬ tsawˇ haˬ pyehˬ gʼeh-euˬ meh.

² Sawˇlaˬmoˬ neh Hiˇlamˬ-ahˇ heu loꞈ-ehˇ dawˬ tsaꞈ tsaꞈ ahˇ gʼeh-euˬ meh.

³ “Ngaˬ da Daˬbiˇ-aˬ, aˬ yawꞈ-euˬ miˇ kʼahˬ jawˬ jawˬ-ehˇ jaˆ-eu, aˬ yawꞈ-ahˇ muiˇ-eu deuˬ-euˬ miˇ kʼahˬ deuˬ nehˬ-ehˇ guiˇ deuˆ deuˆ-ehˇ jawˇ-euˬ miˇ neh, aˬ yawꞈ-ahˇ muiˇ-eu tsawˇ haˬ kʼoeˇ deuˬ kʼoeˇ taˆ Sahˬpaˬ Miˬyehˇ aˬ yawꞈ-ahˇ maˬ bi gʼaˬ leˇ kʼoeˇ keuˆ ni, aˬ yawꞈ-euˬ Miˬyehˇ pyeuꞈ-euˬ Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ Uˬ duˬ tahˬ nymˇ nymˇ ma maˬ tsoˆ dah-euˬ gaˇ kawˆ, nawˇ kʼawꞈ siˬ nya luꞈ meh.

⁴ Ehˇ kʼawꞈ, nymˬ-mˇ poˆ jawˇ ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, ngaˬ-euˬ miˇ kʼahˬ yawˬ coeˇ na luꞈ coꞈ ngehˇ ni bi jaˆ-awˇ, ngaˬ-ahˇ muiˇ-eu miˇ kʼahˬ maˬ jaˆ-eu miˇ neh, guiˇ deuˆ le gaˇ guˆ kʼaˇ maˬ za-a.

⁵ ‘Nawˬ-euˬ jawˇ duˬ-ahˇ ngaˇ sahˬ paˬ bi geuꞈ-eu lehˇ gʼeh-eu nawˬ li-aˬ, ngaˬ-euˬ gʼaˇ duˬ Uˬ duˬ tahˬ nymˇ nymˇ ma tsoˆ tehꞈ-a’ lehˇ, ngaˬ da Daˬbiˇ-ahˇ Sahˬpaˬ Miˬyehˇ neh saˇ jaˇ dzaˬ taˬ-euˬ jaˆ-eu meh. Kʼoeˇ miˇ neh, ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ, Uˬ duˬ tahˬ nymˇ nymˇ ma tsoˆ ma lehˇ ngaˇ noeˬ tsehˆ taˬ-euˬ ma.

⁶ Kʼoeˇ miˇ neh, ngaˬ-euˬ tsawˇ haˬ deuˬ-ahˇ Leˬbaˬnoˬ gawˬ jawˬ-ahˇ pyehˬ gʼeh-awˇ, ngaˬ-euˬ gʼaˇ duˬ shuˬ liˇ aˇ bawˇ bi tuˇ leˇ-awˬ. Ngaˬ-euˬ tsawˇ haˬ deuˬ kʼawꞈ, aˬ yawꞈ maꞈ nehˬ-ehˇ bi mˇ caw leˇ-awˇ, nawˬ-euˬ tsawˇ haˬ deuˬ gʼaˇ duˬ, nawˇ kʼaˇ shaˇ-eu loꞈ-ehˇ ngaˇ aˇ poeˬ biꞈ ma. Ngaˬ-euˬ tsawˇ haˬ deuˬ-aˬ, nawˬ-euˬ tsawˇ haˬ deuˬ loꞈ-ehˇ aˇ bawˇ maˬ tuˇ nya-eu nawˇ siˬ nya meh.”

⁷ Sawˇlaˬmoˬ neh tsaꞈ ahˇ gʼeh-euˬ dawˬ-ahˇ Hiˇlamˬ ya gaˬ ngeh, nui kʼahˇ shiˇ dui dui-awˇ, “Huiˬ dui dui-eu tsawˇ jeuˬ kʼoeˇ jeuˬ kʼoeˇ taˆ sahˬ paˬ geuꞈ-awˇ bi uˆ lahˇ-eu gʼaˇ duˬ, tsawˇ gahˇ ahˇ-eu aˬ li tiˬ li Daˬbiˇ-ahˇ biꞈ-euˬ miˇ neh, Sahˬpaˬ Miˬyehˇ-ahˇ ja ceuˬ-awˬ” lehˇ ehˇ-eu meh.

⁸ Kʼoeˇ naˇ, Hiˇlamˬ neh Sawˇlaˬmoˬ-ahˇ heu loꞈ-ehˇ dawˬ tsaꞈ paˇ tsaꞈ ahˇ gʼeh-euˬ meh. “Nawˬ neh tsaꞈ ahˇ laꞈ-euˬ dawˬ ngaˇ ya gaˬ gʼaˬ-awˇ, nawˬ neh ehˇ-euˬ loꞈ-ehˇ mˇ-eu gʼaˇ duˬ ngaˇ lehˬ hmˬ taˬ-euˬ ma. Shuˬ liˇ aˇ bawˇ hawˇ-eu miˬ shuˬ aˇ bawˇ deuˬ ngaˇ nawˬ-ahˇ biꞈ ma.

⁹ Leˬbaˬnoˬ gawˬ jawˬ-ahˇ neh iˬ ma laˆ shaˆ lawˇ deh-ahˇ keuˆ ni, ngaˬ-euˬ tsawˇ haˬ deuˬ aˇ bawˇ diˬ tm gʼeu ka leꞈ-awˇ, iˬ ma laˆ shaˆ lawˇ dzeˇ caw caw-ehˇ poeˇ kaꞈ-awˇ nawˬ ka leꞈ-eu laꞈ kʼoeˇ, nawˇ kʼaˇ bi yuˇ keuˆ leꞈ mawꞈ gaˇ keuˆ ni bi sha ha keuˆ le ma. Kʼoeˇ gaˇ oe keuˆ naˇ, ngaˬ-euˬ tsawˇ haˬ deuˬ diˬ tm kʼoeˇ deuˬ puiˇ-awˇ, nawˬ-euˬ tsawˇ haˬ deuˬ-euˬ laꞈ-ahˇ a nehˬ tehꞈ-a. Ngaˬ-euˬ tsawˇ haˬ deuˬ loˬ-eu dzaˬ dzaˬ dawˇ dawˇ nawˇ caw ba nehˬ-awˬ.”

¹⁰ Kʼoeˇ naˇ, Sawˇlaˬmoˬ kʼaˇ loˬ-eu shuˬ liˇ hawˇ-eu miˬ shuˬ aˇ bawˇ deuˬ Hiˇlamˬ neh sha ha nehˬ-euˬ meh.

¹¹ Sawˇlaˬmoˬ kʼawꞈ, Hiˇlamˬ-euˬ tsawˇ haˬ deuˬ bi dzaˬ-eu gʼaˇ duˬ, aˬ yawꞈ kʼoꞈ yawꞈ cehˇ gʼoeˬ muiˇ daˇ hawˇ-eu, saˬ loˬ tsiˇ oeˬ tseˇ muiˇ jawꞈ-i Hiˇlamˬ-ahˇ biꞈ-euˬ meh.

¹² Kʼoeˇ naˇ, Sahˬpaˬ Miˬyehˇ Sawˇlaˬmoˬ-ahˇ saˇ jaˇ ziꞈ-awˇ, aˬ yawꞈ-ahˇ zaˬ siˬ tsawˇ gahˇ biꞈ-euˬ meh. Kʼoeˇ ngeh, sahˬ paˬ Hiˇlamˬ hawˇ-eu sahˬ paˬ Sawˇlaˬmoˬ nui ma taꞈ leˇ-awˇ, aˬ yawꞈ nyaꞈ saˇ jaˇ dzaˬ taꞈ-euˬ meh.

¹³ Sahˬ paˬ Sawˇlaˬmoˬ-aˬ, Iˇsaˬleˬlaˆ miˇ kʼahˬ kʼahˬ lah ni laꞈ kʼoeˇ, myawˬ kʼaˆ bi mˇ-eu tsawˇ haˬ smˬ muiˇ gʼaˬ bi poˆ doˆ-euˬ meh.

¹⁴ Kʼoeˇ naˇ, Aˬdawˇniˇlamˬ neh tsawˇ haˬ kʼoeˇ deuˬ-ahˇ bi haw bi pyaˆ-euˬ meh. Tsawˇ haˬ kʼoeˇ deuˬ-ahˇ, tiˬ muiˇ gʼaˬ byah-eu aˇ muˇ smˬ muˇ biˇ nehˬ-awˇ, aˬ yawꞈ muˇ yawꞈ Leˬbaˬnoˬ gawˬ jawˬ-ahˇ ba la tiˬ siˬ gaˇ bi mˇ leˇ-awˇ, iˇ kahˇ-ahˇ ba la nyiˬ siˬ bi gʼoꞈ naˬ le-euˬ meh.

¹⁵ Sawˇlaˬmoˬ-aˬ, gawˬ jawˬ gawˬ duˇ-ahˇ kʼaˬ lo deh-eu tsawˇ haˬ yehꞈ muiˇ gʼaˬ jawˇ-awˇ, kʼaˬ lo baꞈ-eu tsawˇ haˬ shiꞈ muiˇ gʼaˬ jawˇ-eu meh.

¹⁶ Tsawˇ haˬ kʼoeˇ deuˬ gaˇ mˇ gaˇ aˬ yuiꞈ geuꞈ-awˇ haw-eu pyaˆ-eu gʼaˇ duˬ kʼawꞈ, tsawˇ haˬ smˬ heˇ smˬ yaˇ gʼaˬ tseˇ doˆ nehˬ taˬ-euˬ meh.

¹⁷ Sahˬ paˬ Sawˇlaˬmoˬ neh dawˬ biꞈ taˬ-euˬ loꞈ-ehˇ, Uˬ duˬ tahˬ nymˇ nymˇ ma tsoˆ ngeh gawˬ dahˬ beh-eu gʼaˇ duˬ, huiˬ-eu muiˬ-eu kʼaˬ lo deuˬ deh-euˬ meh.

¹⁸ Sawˇlaˬmoˬ-euˬ tsawˇ haˬ deuˬ, Hiˇlamˬ-euˬ tsawˇ haˬ deuˬ hawˇ-eu, Biˇbaˬlawˆ meuˬ-ahˇ jawˇ-eu tsawˇ haˬ deuˬ, Uˬ duˬ tahˬ nymˇ nymˇ ma tsoˆ-eu gʼaˇ duˬ, kʼaˬ lo hawˇ-eu daˇ kawˬ laˆ saˆ-euˬ meh.